I oseleti

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
I Oseleti
Capricio ditirambico
XIX secolo

 Edission original:   

Collezione delle migliori opere scritte in dialetto veneziano, Volume quinto: Ditirambi di diversi autori, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817

 Fonte:

Indice:Collezione delle migliori opere scritte in dialetto veneziano 5.djvu

Edission e fonte ▼
Nota: l'atribuzion la xe incerta, secondo altre fonti l'autore el sarìa Lodovico Pastò.
[p. 61 modifica]

I OSELETI

CAPRICIO DITIRAMBICO

DI

AUTORE ANONIMO

[p. 63 modifica]





I OSELETI


Benedeto sia l'Autuno,
     Benedeta sta stagion,
     No gh'è tempo più lodabile,
     Più pregiabile, più bon.
Ghe xe molti, son sicuro,
     Che dirave: avè rason;
     Ma per cossa lo diraveli?
     Per un gusto macaron.
I dirave perchè nasse
     10Quel prezioso
     Odoroso,
     Quel gran netare divin,
     Quel'ambrosia, idest el vin.
Mi'l me piase, no lo nego,
     Ma lo bevo solamente,
     Per parar
     Zo quel poco de magnar;
     Ma per altro a cossa far?
Xe lodabile l'Autuno;
     20Ma savèu mo el gran perchè?...
     Perchè nasse la polenta?
     Cossa varla cussì sola?

[p. 64 modifica]

     Eh voleu saver perchè?
     Perchè tempo no ghe xe
     Che ne daga in più abondanza
     La piatanza
     De quei cari, benedeti
     Prelibati Oseleti:
No gh'è megio, v'assicuro,
     30Velo zuro,
     No gh'è megio in tuto el mondo,
     A Berlin, Roma, Parigi,
     Sul Danubio, sul Tamigi,
     Sul Mar-Negro, sul... ma gnente;
     Mi son stà da tanta zente
     Da magnoni,
     Signoroni,
     Ò magnà dei gran boconi,
     Ò sentio de tante sorte,
     40E de torte e de pastizzi,
     Lievri, Cervi e Porchi rizzi;
     Dei Dentali, Astesi, Toni,
     Dei Storioni...
     Dei... minchioni!...
     No ghe xe gnanca confronto,
     No ghe dago, se i me prega,
     Se i me prega in zenochion
     Gnanca un bocon...
     Cossa digo? no dasseno
     50No ghe dago a dirlo schieto

[p. 65 modifica]

     Gnanca un beco d'Oseleto.
     No, ve digo, perchè 'l beco
     No lo buto minga via;
     Guai, per dia!
     L'è un bocon
     Tanto bon...
Mi vorìa che me vedessi,
     Quando magno i mi Oseleti,
     Come meto i so becheti
     60Tuti quanto separai
     In t'un piato picinin,
     Che me tegno da vicin.
     E po dopo che ò finìo
     De magnarme sti Oseleti,
     O che 'l piato go impenìo,
     Me i destrigo tuti neti;
     E che gusto, che i me da!
     I me fa
     Richiamar tuti a memoria,
     70Anzi digo, sul palà
     I me chiama tuti i gusti
     Dei Oseleti ch'ò magnà.
Oh che gusto magior d'ogni gusto
     Se podesse goderlo in eterno!
     Oh che gran felicità!
     E pur tanti ghe xe stà,
     Che lo ga fin disprezzà.
E ti filosofo

[p. 66 modifica]

     Ti xe Pitagora?
     80E dei Demagora
     Ti trovarà
     Che le to legi
     Le to sempiagini
     Adularà?
Mi ve digo che, per sbrio,
     El più scioco no gh'è stà;
     Basta dir, che l'à proibio,
     Come el tipo d'ogni mal,
     A tuti i omeni,
     90Ai vechi, ai zoveni,
     Fin a le femene,
     Fin a le gravide
     Magnar carne d'animal....
     Mi per far a l'incontrario
     De quel testa de cocal
     Voi magnarghen fin che posso,
     E co più no podarò
     A la romana me tirarò
     Duro duro
     100Arente un muro,
     E co un deo zo par la gola
     Darò un ordene pressante;
     “Che qualunque viandante,
     Che si trovi in quel distretto,
     Sia nel ventre, sia nel petto,
     Alla vista di quel dito

[p. 67 modifica]

     All'esofago salito;
     Ex abrupto ceda il loco
     Ai piattelli del mio cuoco...”
110Siora Aneta benedeta
     La m'à tanto consolà,
     Co la ò vista a vegnir qua,
     Che no so più cossa dir:
     Ma podevela vegnir
     Megio a tempo de cussì?
     Proprio se vede che la me vol ben
     Se la se degna de disnar co mi.
Qua, la sa, che xe bandì
     El zambon, el salpicon,
     120L'alisson, el salcisson,
     I rosbifi coi zigot,
     I rosbinghi coi rolot,
     Sia pur semplici, o farsì;
     Xe bandidi anca i salmì
     Xe bandidi anca i colì.
     No i me staga a nominar
     Andoliè, anetrè, alafar.
     Cossa far dei salpurè,
     Dei cogliuf e dei purè,
     130Dei refredi e dei brulè,
     Dei aloscè, dei antremè?
     Mi no i vogio per i piè.
     Maledeti quei gonfiet,
     Quei sublanc, quei cotlet;

[p. 68 modifica]

     Maledeti quei godiù
     No li vogio sentir più:
     Che i li fazza via de qua
     Ma da mi no ghen sarà.
     Mi no magno altro che Osei,
     140Ma i xe quei,
     Co i ghe piase.... Cossa oi dito?
     Co i ghe piase? Che dimande!..:
Eco qua che i porta in tola;
     Le se comodi, Signori,
     Le se senta tuti quanti;
     Via, Comare, feve avanti,
     Là vicina al Sior Zaneto.
     Ela po, Siora Mariana,
     Me la vogio sempre arente....
     150Oh la toga.... gnente, gnente,
     No ghe bado, la li magna:
     La li magna che i xe boni;
     I xe quarti de Frisoni,
     Ben conzadi,
     Cusinadi
     In paela
     Co garofolo e canela,
     E co questi i ga conzà
     Un bocon de pan tagià.
160Questa xe la mia menestra:
     No gh'è risi, no gh'è bisi;
     No gh'è vena, no gh'è lente,

[p. 69 modifica]

     No gh'è sope, nè polente;
     Nè 'l panizzo, nè l'erbete,
     Nè rafioi, nè lasagnete,
     Cao-de-fiori, macaroni,
     Cussì boni.
Trarìa zo per le finestre
     Ste menestre
     170Negre, rosse, latesine,
     Zale, verdi, e che soi mi?
     Che a le tole più stimade
     Vien portade,
     Vien magnade
     Senza gnanca dimandar
     Cossa diavolo le sia;
     E chi sa, che porcaria,
     Che potachi che le xe!
Se savessi quante volte,
     180Che go visto certi cuoghi
     A burlar i so paroni
     Dei boconi che i à magnà...
     Qua da mi no l'è cussì,
     Magnè pur con libertà....
Oh i xe qua co la fritura....
     Ma le senta mo un pocheto
     Che gran testa che go mi:
     No go miga testa dura,
     Mi me piase ben magnar;
     190Za le lo crede,

[p. 70 modifica]

     E po le vede,
     Me son quasi destrigà
     Tuta quela arcimenestra
     Che qua a tola i ga portà.
     Onde tornando a bomba
     (Dirave i Fiorentini)
     Mi che voria magnar ogni momento
     Me son pensà de tior medicamento.
Ma la xe una medicina
     200Che xe mia particolar,
     Che la serve a maravegia
     Per farme vegnir vogia de magnar.
Se le andasse per Venezia
     Ne la megio Specieria
     No le trova medicina
     Più operosa de la mia....
Vedeu là quela fritura?
     Queli xe tuti Montani,
     Oseleti freschi e sani,
     210Che ga un certo saporeto
     Amareto,
     Che li fa medicinali,
     E mi i me fa guarir da tuti i mali.
Ma ghe vol po’ la so dosa,
     Convien torli in quel tal modo,
     E secondo i varj mali
     I va coti in butiro, o pur in brodo.
Per el mal d'inapetenza

[p. 71 modifica]

     I va coti in sta maniera,
     220Ma perchè po’ i fazza efeto
     No saria gnente una dozena intiera,
     Ghen vol almanco do:
     Sì; vintiquatro Osei,
     Co no i xe più che bei,
     Ogni poco de panza
     Che gabia quelo che li vol magnar
     Per medicina i stentarà a operar.
Mi lo provo
     Co me trovo
     230Co una panza cussì piena;
     Che dal peso per portarla
     La me fà doler la schena.
     La me toca za sta cossa,
     La me tocca molto spesso.
     Vardè, adesso
     Ghe saria certi minchioni
     Che ga in testa de le rane,
     Che no magnarìa gnanca do boconi:
     Ma mi gnente; è giusto alora
     240Che ghen magno assae de più,
     Perchè i fazza megio efeto.
S'à da dar mo per dispeto,
     Che a magnarghene ogni zorno
     Go el mio stomego avezzà.
     Za le sa
     Se se avezza anca al velen;

[p. 72 modifica]

     Onde, amici, capì ben;
     Che convien
     Co ste cose
     250Ogni dì cresser la dose...
Eco el lesso. Mi no uso
     De far far certi antipasti:
     Mi me basta de magnar
     Diese piati per disnar....
Comareta benedeta,
     No ve piase i Tordi lessi?
     Anca mi son come vu,
     Co ghen magno vinti, trenta,
     No ghen posso magnar più....
260Cossa gala, cossa è stà,
     Cossa è stà, Siora Mariana?..:
     Gh'è andà un osso in tela gola!
     Gnente, gnente,
     El rimedio xe qua lesto:
     Presto presto
     Sto bel Tordo in t'un bocon
     La lo ingiota tuto intiero;
     La guarisse sì da vero:
     La lo ingiota.... no la è bona?
     270Oh per Baco, se pol dar?
     L'à 'l gargato molto streto!
     Mi lo magno anca per spasso;
     No? la varda... ecolo a basso.
Ah via via,

[p. 73 modifica]

     La xe guaria.
     La se toga de le Quagie,
     Che ga i ossi
     Manco grossi....
     Cussì poche, vita mia?
     280Cossa xele vinti Quagie?
     Le xe giusto un pan da un bezzo.
     Anzi no, che un panetin,
     Benchè el sia più picinin,
     Mi el me sazia assae de più.
     E po gnente; za la vede
     Se ghen magno un boconcin,
     Che de più no magnarìa,
     El xe giusto per far forestarìa...
Vien le Lodole,
     290Vien le Lodole,
     Sì, care, sì,
     Sì qua da mi.
     Oh che bone!
     Benedete!
     Che stupende, che squisite!
     Che gustose e saporite
     Che le xe cussì caldete!
Presto, presto tiotene ti,
     Che mi resto atento per mi.
300Ah perchè no goi la boca
     Granda come una finestra?
     Che piacer che gavaria!

[p. 74 modifica]

     Da una parte meterìa
     Un gran piato de menestra,
     Da quel altra el frito, e 'l lesso;
     E 'l restante impenirìa
     De sto rosto cussì bon,
     E faria tuto un bocon.
Ma perchè mo la Natura
     310No ala visto i me bisogni?
     Che ghe fosse almanco el caso
     Per le rechie, per el naso,
     Per i ochi, e che soi mi...
     Ma cussì,
     Co na boca cussì sola,
     Co un buseto in te la gola,
     Come mai me sfogarò,
     Come mai me saziarò?
     Mi no so;
     320Co sta roba mi no posso....
Deme qua quela polenta,
     Che la prova, che la senta...
Ma, digo mi: xela po stada
     Nela licarda ben cusinada?...
     Sì? va ben: donca dè qua,
     Che ghen magna a crepapanza...
     Bona, bona, la me piase.
     Ma, perdiana, cossa feu,
     Quanta mai me ne porteu?...
     330Ah! convien che me giustifica;

[p. 75 modifica]

     Sì, Natura, femo pase,
     Xe dover che me contenta
     De sta boca che ti à fato,
     Che la è bona per polenta....
No voi altro, no voi altro;
     Portè tuto via de qua,
     Che ò magnà, che ò magnà....
Ma cossa ghe xe là?
     Oh che diavolo, Oseleti!
     340Xeli rosti? Ah benedeti!
     Voi cercar sti Petirossi;
     Ma sarave un farghe torto
     Lassar là quei Codarossi.
     Oh cospeto che Fincheto!
     Che Caonegro, che Ortolan!....
     Voi magnarme quel Montan;
     Anca st'altro... anca sti do;....
     Ah! sti quatro; e lasso là....
     Maledeli sti Montani
     350No comincieli a operar!
     Anca rosti i fa sto efeto?...
     Sì, per dia, me xe tornada
     La mia vogia de magnar.
Ah magnemoli,
     Destrighemoli!
     Qua sti Finchi, qua sti Finchi,
     Sti Frisoni,
     Qua anca st'altri, che i xe boni.

[p. 76 modifica]

     Oh che otima missianza,
     360Che i farà ne la me panza!
Ah magari ghe ne fusse
     Da poder sin che go fià,
     Sin che un angolo me avanza
     Impenirme ben la panza!
Che i sia Celeghe o Perussole,
     Che i sia pur Subioti, o Passere,
     Che i sia pur quelo che i vol:
     Mi me basta che i sia Osei...
Ma, per dia, no xe possibile:
     370No val bezzi, no val trapole
     Per averghene, per chiaparghene
     Quanti mi voria magnarghene...
     A sta ora per comprarghene
     Gavarò speso un milion;
     Gavarò impenìo de trapole
     Quasi cento Possession.
     Perchè mi go rede e trate,
     Go dei rocoli a bizefe,
     Go tordere, quagiarìe,
     380Go passade, ciese, utìe;
     Go el diluvio, go paloni,
     Gavarò mile Falconi,
     Altretanti Cazzadori
     Altretanti Oseladori;
     E po dopo ghe son mi
     Che son bravo più de lori....

[p. 77 modifica]

Sì dasseno, senza scherzi,
     Che mi passo qualche ora
     A quel rocolo là fora....
390Mi fra tante altre Oselade
     Me son scielto questa qua,
     Perchè posso star sentà,
     E ghen chiapo infinitissimi
     De sti cocoli carissimi.
     Ma no son po miga mi,
     Che ghe buto la cestela;
     El xe l'omo che sta là.
Una volta go provà,
     E me son portà benissimo,
     400Ma ò scoverto che ò un difeto.
     Quando vedo un Oseleto,
     Che xe squasi par chiaparse,
     Mi me par d'averlo in boca,
     E sentì quel che me toca:
     Son cussì fora de mi
     Che no so cossa che fazzo,
     Che no so quel che me digo,
     Onde invece del cestelo
     Trago un cigo, mandandoghe un baso,
     410L'Oseleto se la moca,
     E mi resto con tanto de naso...
Ma co ste minchionarìe
     Me scordava un bon bocon.
     Oe porteme quel fiascon

[p. 78 modifica]

     Del Friularo del Stradon
     Che qua tuti avemo in mente:
     Che quel Vin cussì ecelente
     Col so ardor arcigrandissimo
     De le Muse arciamicissimo
     420El farà che no sia priva
     Sta nostra tola del so bravo Eviva.
Oh 'l xe qua sto moroseto!
     No avè invidia, cocoleti,
     Che ghen bevo do sorseti,
     E po torno da vu altri,
     Benedeti de Oseleti.
Ma via, Friularo,
     Da bravo agiuteme
     A far sto prindese,
     430Da bravo, caro....
     No ti vol? lo farò mi.
Viva donca sta nostra compagnia,
     Ma viva anca la razza dei Oseleti;
     La sanità nostra compagna sia
     Ma che i Osei sempre sia cussì perfeti.
     Primavera per nu sempre vorìa
     Ma sempre Autuno per sti cotoleti.
     Nu, vorave che fussimo eternissimi,
     Ma che Lori po fusse infinitissimi.
440Benedeto sto bon Vin
     Che fa star zoso el magnar,
     Che fa alegro el coresin.

[p. 79 modifica]

     Mi lo voi sempre lodar
     Fin che el vien in gotesin,
     Ma co andemo sui do goti
     El scomenza andar in su,
     Nè lo posso lodar più.
     Maledeti sti imbriagoni,
     Sti porconi
     450Che ga sempre el goto in man;
     No li posso tolerar;
     No se pol gnanca parlar,
     Che no i dise altro che Vin.
     Sia pur pezo de l'Aseo,
     Che per lori tuto è bon
     Perchè i à perso la rason.
     E po dopo sti imbriagoni,
     Sti porconi,
     Sti mastei da soto-spina,
     460Ste barile che camina,
     Se ghe dassi un Oseleto,
     I ghe magna mezo el peto,
     E po i dise: oh! go magnà.
Eh che i vada.... ma no serve,
     No me vogio altro inquietar.
     Deme qua quel matrimonio...:
     Quel pastizzo:... maledeti!
     No savè che la polenta
     La xe sposa dei Oseleti?
     470Mi me par che ve l'ò dito,

[p. 80 modifica]

     Che nol xe vero disnar
     Se no gh'è la so polenta,
     Quando Osei s'à da magnar.
Ma polenta schieta.... oh giusto,
     No ghe trovo nessun gusto....
     Questa è fata col butiro,
     La ga drento mile sorte
     De Oseleti saporiti,
     Parte rosti e parte friti,
     480Che 'l me cogo a lento fogo
     Ga lassà che i se consuma
     Tra le tartufole le più pregiade,
     E tra i garofoti e le noscade.
Oh de questo mo ghen magno
     Per saziarme un pochetin;
     Anca vu, cara Comare,
     Anca ela, sior Tonin...
Mi no so po cossa dir,
     Quando che no le pol più
     490No le vogio altro sforzar.
     Mi so che ò una gran vogia de magnar...
Oh bela, si dasseno!
     Ve fe le maravegie?
     Questo vol dir, che poco
     Sui libri avè stracà le vostre cegie.
     Mi mi ve dirò, mi
     La so vera rason:
Disème, aveu mai leto el Sior Platon?

[p. 81 modifica]

     Vedeu, lu dise: che gavemo tuti
     500Al nasser nostro 'na costelazion,
     Anzi una stela, e questa fa che astuti
     Alcuni sia, che un altro sia un minchion,
     Che a chi ghe piasa i vovi, a chi i persuti,
     A chi piasa sentir criar: oa,
     A chi sentir sonar tarapatà:
Quelo vorave andar sempre a cavalo,
     Questo sempre in carozza, e st'altro a piè;
     A chi ghe piase molto el color zalo,
     A chi ghe piase el bianco, a chi el tanè;
     510Chi vol brodo de vipera, o de galo,
     Chi sorbeti, chi ponchi, e chi cafè,
     E questo per l'influsso ne sucede
     Che ga le stele che su nu presiede.
Oltre de questo el dise, che le fa
     Più stele unite insieme una figura;
     Altre d'un Can la forma le ne dà,
     Altre d'un Porco, o pur d'una Creatura,
     Altre un gran Asenon come che va,
     Altre un Beco o una Cavra le figura;
     520Altre un Cavalo, una Formiga, un'Anza;
     Altre una bela Puta, altre una Manza.
Cussì se dà che sempre nu se tremo
     Un animal, o l'altro a somegiar,
     E con quel nome spesso nu chiamemo
     Tuti quei che se vol rimproverar;
     Ma lassème che diga: no dovemo

[p. 82 modifica]

     Dir gnente nu su sto particolar;
     Perchè, cossa ghen pol Sempronio o Tizio
     Se'l porta in lu de la so bestia el vizio?
530Bisogna anca saver che tuti nu
     Soto una sola stela semo nati,
     E che za ghene vol molte de più
     Per formar sti animai come i va fati;
     Per questo molti e molti se tol su
     D'Arpie, de Porchi i titoli onorati,
     Quantunque tra le stele no ghe sia
     Altro che un solo Porco e che un'Arpia.
Ma per tornar a quel che ve diseva,
     Sapiè che in mezo a tuti sti animai
     540Ghe xe anca el Lovo; infati el ghe voleva.
     Ghe xe anca Osei; se no i ghe fusse, guai!
     E mi nato sarò co se vedeva
     I Oseleti col Lovo a star tacai,
     E la vogia che al Lovo ghe sarà
     Venudo alora el m'à comunicà..;
Ma qua cossa se fa
     Cussì senza magnar?
     Me par che gh'è de l'altro da portar.
Ah el xe qua l'intingoleto
     550Tuto quanto Becafighi:
     Ah el gran otimo Oseleto!..:
     Oh le magna po, che questo
     El xe fato qua per ele...
     No le vol? proprio mi resto

[p. 83 modifica]

     Che le gabia cussì presto
     Impenio le so buele.
     Ma pacienza.... za sta roba
     No andarà butada via,
     Che ghe xe po finalmente
     560El rimedio in boca mia.
     E vu altri, Servitori,
     Fin che magno i Becafighi
     Portè un piato anca per Lori;...
Ma vedo che nessun
     Ga vogia de magnar.
     Se i porta un altro piato
     Melo magno mi solo,
     E i altri sta a vardar;
     Onde no voi sta cossa;
     570Voi che magnemo tuti,
     Donca portème i fruti.
Ah benedeti!
     No gh'è fruti più perfeti,
     Più stupendi, più squisiti,
     Più gustosi e saporiti.
Sento a dir de l'Ananà
     Che el xe un fruto arcistupendo
     (De sto fruto no m'intendo
     Nè ghe n'ò gnanca magnà),
     580Ma, i me dise, che consiste
     Sta stupenda rarità,
     Perchè in lu sto fruto unisse

[p. 84 modifica]

     Vari gusti ch'altri ga...
     Ben... i mi no ghe n'à vari,
     Noi ga quei dei fruti soli,
     Ma quei tuti che provar
     Pol chi à vogia de magnar.
     Sì, Signori, i ghe xe tuti.
     Via, ve digo, portè i fruti....
590Oh, le diga, oi minchionà?
     Le ghen magna, che i xe tuti
     Picolini,
     Frescolini
     Tondolini
     I xe tuti Lugarini....
     Quatro soli! Oh cospeton!
     Me faressi andar in colera...
     Se sti trenta no magnè,
     Recordève, mi v'aviso,
     600No ve vardo più in tel viso....
Anca vu, via, Comareta,
     Tolè zo trenta, quaranta.
     Anca ela, Siora Aneta,
     Za per mi ghe ne xe ancora
     Qua de fora.
Questo è un piato predileto,
     Onde al cogo gh'ò ordinà,
     Ch'el ghen meta dopo questi
     Per mi solo una speada
     610Più del dopio de quei là...

[p. 85 modifica]

Ma no xelo un gran piaser
     A magnar de sti cosseti?
     Mi me par giusto d'aver
     Un scartozzo de confeti....
     Cossa è stà? chi xe venudo?...
     Una letera? dè qua...
     Oh cospeto!.... le perdona...
     A un disnar son invidà...
     Mi convien che vada subito;
     620Mi me dol lassarle qua,
     Ma le vede la ocasion
     Per ancuo porta cussì...;
     El xe pranzo che i lo fa
     Nel casin de mio Nevodo;
     El me scrive che abondanza
     De Osoleti ghe sarà....
     Ah no posso ricusarli!
     L'è un sconzuro tropo forte;
     Perchè a mi i me piase massa!
     630Le permeta che le lassa
     Perchè presto i porta in tola...
Ma no son miga un balordo,
     Me recordo, me recordo....
     Oe porteme presto, presto
     Anca el resto:
     Sì, anca st'altri Lugarini....
     No i xe coti? Oh pofardia,
     Che sfortuna xe la mia!...

[p. 86 modifica]

Ben, sentì: da qua do ore
     640Sperarìa d'aver disnà;
     Tornerò subito qua....
     Se no i trovo coti in punto,
     Se i xe fredi o brustolai
     Ve farò pagar la pena
     Ben de tuti sti pecai....
Ma mi vado, che za so
     Che sta cara compagnia
     La xe tanto e tanto bona,
     Che la perdona
     650Se la lasso cussì sola....
     Vado a tola, vado a tola.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=I_oseleti&oldid=59805"