Pronostico de l'ano 1840

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
[p. 201 modifica]
PRONOSTICO DE L'ANO 1840.1


Ze scrito, se lo sà per cossa certa,
     Nel misterioso libro del destin,
     Dove tuti gavemo partia averta,
     Che quel che ga principio à da aver
     E le opere tute
     De l'arte e de natura
     Dal tempo vien distrute,
     O le cambia figura,
     E co l'andar dei ani, co l'età
     La più robusta fabrica perisce,
     Se consuma qualunque quantità,
     El vulcan più tremendo s'esaurisce,
     Al piano se livela la montagna,
     El marmo da la giozza vien spacà,
     El fero da la rusene se magna,
     El rovere deventa cariolà,

[p. 202 modifica]

     Ghe capita al colosso la magagna,
     Ghe vien la prole a chi cigava oà,
     Dove coreva el mar gh'è la campagna,
     Gh'è l'aqua dove gera semenà,
     E l'omo, l'animal, l'alboro, el fior,
     El nasce, el vive un poco e dopo el mor.
In base a sto principio general
     In ogn'angolo noto,
     Qualche vero cocal,
     Qualche dindioto,
     Benissimo informà
     Che i mii stromenti
     Per el tempo passà
     Tanto i ze stai
     Tutiquanti i mumenti
     Doparai,
     No vedendo a vegnir
     Per l'ano trentanove el mio presagio,
     El ga avudo coragio
     Francamente de dir
     De qua e de là
     Che go tuto fruà,
     E che 'l mio canochial
     Ze per el tropo usarlo
     Ridoto in stato tal
     Da pensionarlo,
     Senza considerar, vero zucon,
     Che ogni regola ga la so ecezion.

[p. 203 modifica]

E sicome l'aplauso che i mii scriti
     Sora l'astronomia
     Ga trovà clamoroso in tuti i siti
     À messo in gelosia
     Vari impostori,
     E indigeni e foresti,
     Che procura spazzarse per dotori
     Nele cosse celesti
     Dando da intender co le so carote,
     A chi no la sà dreta, che la note
     In specola montai
     I contempla le stele e le comete,
     E invece i stà ficai
     Soto le piete
     Co la mente pensando a chi sà cossa,
     Co la so testa sora el cavazzal,
     Dove no sò capir come se possa
     Meter in esercizio el canochial,
     Cussì sti pantegani,
     Sti sciochi e pretendenti, sti poltroni,
     Che ghe ne ze sti ani
     In quantità
     E per tuti i cantoni
     À propagà,
     La fama no curando
     Che co la so trombeta
     La me va proclamando
     Per profeta,

[p. 204 modifica]

     Nè abadandoghe gnente
     Al titolo spezioso
     Che go meritamente
     De astronomo famoso
     E qua e in Germania e in Franza e in Inghiltera,
     Sentiva la calunia volentiera,
     Anzi i supiava soto in ogni logo
     Per impizzar el fogo,
     E quando ghe pareva
     La zonta de bon peso i ghe meteva,
     Scordandose l'elogio che imparziali
     Omeni veramente da cartelo
     I m'à fato sui libri e sui giornali,
     E spezialmente quelo
     De la nostra gazzeta, che siben
     Co la ga da dir ben
     Sia spesso avara,
     El gera do fazzae neto da tara;
     E per provarghe che no son busiaro
     Le prego de tor suso le gazzete,
     E leser quela vintitre genaro
     Ano mile otocento e trentasete.
L'invidia po che pronta
     A l'ocasion
     La buta, stando sconta,
     Su el balon,
     E con inique trame
     La lo buta sta infame

[p. 205 modifica]

     In modo tal
     Da far belo che 'l casca de presenza
     Sul perfido brazzal
     De maldicenza,
     Che co la verità mai avilia
     La se trova in partia
     Continuamente,
     Ma che la fa andar fora
     Squasi sempre dal zogo socombente
     A forza de dessora,
     L'invidia, lo ripeto,
     Maligno zefireto,
     Perverso venteselo,
     Che a bel belo a bel belo
     Co insistenza supiando
     El se va insinuando
     Co la quiete
     Per porte, veri, scuri,
     Per le sfese più strete,
     E passa i muri,
     L'efeto à generà
     Che le lengue barone
     De omeni e de done
     De le quali arivà
     Ze da sti tempi el numero infinito,
     De mi per la cità
     Plagas ga dito,
     A grado che deboto

[p. 206 modifica]

     Deventava sogeto da casoto.
Più de qualche sventà,
     Che la testa ghe serve per intrigo,
     El s'aveva sforzà
     De provar che no so quelo che digo;
     Sosteneva qualcun faglio decenza,
     Ma forsi persuaso
     D'esser a suficienza
     Provisto de bon naso,
     Che ogni opera fata
     Da mi, ga avudo aceto in ritirata,
     Dove la ga fenio...
     Sepolta nel'oblio;
     Qualche povaro gramo,
     Qualche testa de ola
     Co una dose de mamo
     Che consola,
     No fava altro che dir
     Che go l'abilita de far dormir,
     Tantochè coi mii scriti i podaria
     Far de manco de l'opio in spiziaria;
     Qualchedun che per l'abito ben fato,
     Per l'ochialeto al colo
     Se ritien leterato
     E ze pandolo,
     Che no à passà la prima elementar,
     Ossia, dita in volgar,
     Qualehe tamburò,

[p. 207 modifica]

     Voleva sostentar
     Che no me so spiegar,
     Che scrivo oscuro,
     Quando invece la cossa la dipende,
     Che molti lese poco e manco i intende,
     Anzi precisamente
     Tre terzi boni no capisce gnente;
     Diseva qualche misero cervelo,
     Che per vardar el cielo,
     Scaldà la testa co l'astronomia,
     Pregiudico el servizio,
     Perchè so assae distrato e stago via
     Le ore co le ore da l'ufizio,
     Gnancora conoscendo ste marmote
     Che porta el mio mistier
     De dover lavorar sempre de note,
     E lasso che lo diga mia muger.
     La qual spesso la trova so mario
     Fra le tenebre in specola indurio;
     E qualche can da toro,
     Qualche ladro da onor,
     Che d'ogni mio lavoro
     El conosce l'intrinseco valor,
     Coram populo à dito
     Che de quelo che ò scrito
     In tante carte
     Roba mia no la ze
     La magior parte;

[p. 208 modifica]

     Se se ne acorze subito, perchè
     Quando la giuba l'aseno se mete
     El se lassa scovrir da le chiopete.
E questi ze de quei
     Galanti cicisbei
     Che insensa la cità cui bergamoti,
     Co l'aqua de cologna,
     Per confonder el tufo da dindioti,
     La spuzza da carogna;
     Che tuto el santo zorno,
     Dapertuti i cantoni
     Se vede andar atorno,
     Incomodi mosconi,
     Ridicole figure,
     Con un certo vestiario caricato,
     Identico ritrato
     De quele cargadure
     Che ze frequentemente
     Sui ventoli depente,
     Co do dei do crovata,
     Camisa colorata,
     Braghesse co le sfese,
     Velada a la francese,
     Mescola per baston
     Per la so profession,
     Che le destira
     Del peso d'una lira,
     Coi mustachi da gati,

[p. 209 modifica]

     Co la barba da frati,
     Che disendola qua
     I me par capucini in bursoà;
     Arditi, pretendenti,
     Sfrontai, che vol entrar
     In qualunque sia sorte de argomenti,
     E che co se li sente a batolar
     Pararia che tornasse
     La bela età de l'oro,
     Nela qual se pretende che parlasse
     La piegora el molton la vaca el toro,
     E tute quele bestie che ze stae
     In te l'arca sarae.
Mi povareto che me desservelo
     Nei misteri astrusissimi del cielo,
     Mi che vegio le ore de la note
     Vestio da don Chissiote,
     E sfido le procele
     Contemplando le stele
     Una per una,
     Ch'esamino la luna,
     E per vederla piena
     So restà qualche sera senza cena;
     Mi che ò fato suar le stamparie,
     E co l'opere mie,
     Coi mii lavori,
     Go emendà tanti erori
     Go sciolto ogni problema.

[p. 210 modifica]

     Stabilindo un sistema
     Cussì vero,
     Che tuti i altri ze ridoti zero;
     Mi che m'ò sconcertà
     L'economia
     Causa l'astronomia,
     Avendo prodigà,
     Speso tesori
     Nei strumenti
     Ocorenti,
     E in t'una gran racolta de acessori;
     Mi che a tropo tirar de canochial
     M'ò consolà da festa,
     So un omo da ospeal,
     E stago ben co go dolor de testa;
     Mi che a vantagio de la società,
     Me son sacrificà,
     Me son distruto,
     Mi go da aver sta sorte de tributo?
Senza lagnarse co rassegnazion
     Se pol tor tuto quelo
     Che capita dal cielo,
     Ma a le persecuzion
     De tanti ingrati,
     Che cerca de umiliarme
     Co parole e co fati,
     No posso, no gh'è caso, rassegnarme:
     Le ze cosse che un omo come mi,

[p. 211 modifica]

     Che studia note e dì,
     Che spende e spande
     Da per tute le bande,
     E per genio e per zelo,
     Daga volta al cervelo,
     Le ze decisamente baronae
     Per le quali reclama
     L'opinion e la fama
     Maltratae:
     Son stufo, stomegà,
     Ve lo confesso
     De esser giudicà
     Con un ecesso
     De invidia e d'ignoranza
     Da tanti barbassori
     Che ga la so balanza
     Pezo, ma pezo assae, dei pescaori,
     E che con nova tatica
     Rompe el.. capime, e mi lo so per pratica.
Mi da trent'ani in qua
     La note fasso vita
     In specola sarà
     Dessù in sofita
     Per aquistarme 'l publico favor,
     Per poder farme onor,
     Per meritarme un posto nela storia
     Eternando cussì la mia memoria,
     E apagando la vogia,

[p. 212 modifica]

     Che l'alboro de casa cambia fogia;
     E go mo da trovar
     De quela zente
     Che me vol tormentar
     Continuamente;
     E ga da saltar fora
     Dei vasi
     Malegnasi
     De Pandora,
     Col disegno deciso
     De a la mia gloria spegazzarghe 'l viso;
     E s'à da combinar tanti indiscreti,
     Che co le so parole
     Fassa le gambariole
     Ai mii progeti;
     E sinamente ga da capitar
     Chi contro el mio bon nome, el mio decoro,
     S'abia da imaginar
     Calunie nove
     Per no aver visto el solito lavoro
     L'ano mile otocento e trentanove,
     Senza considerar da grossolani,
     Che in pochissimi ani
     A son de schena
     Da mia posta go dà dei risultati,
     Che podarave apena
     Dar cento leterati
     Uniti insieme,

[p. 213 modifica]

     Vivendo i zorni de Matusaleme.
Mia siora nona curta assae de vista,
     Ma che se suponeva
     Un quinto evangelista,
     La diseva,
     Basandose su cossa, Dio lo sa,
     Che so venudo al mondo fortunà;
     Mia siora mare po de quando in quando
     La me va tontonando,
     Povareta,
     Che mi so nato co la camiseta,
     Intendendo cussì sta bona dona
     De confermar el dito de la nona,
     E in barba a l'inteleto,
     Insultando el criterio
     Stabilisce l'efeto,
     El desiderio,
     Perchè che fusse nato fortunà
     Ela lo bramarà
     Sicuramente,
     Ma no ghe son, lo provo facilmente.
In quanto a possession
     So a pezo condizion
     Del bovolo che ga
     La casa almanco de so proprietà
     Senza pagar un soldo de predial,
     E che vedendo ben
     Coi so ochi bislonghi a canochial

[p. 214 modifica]

     Quanto el mondo de smafari ze pien,
     Lassando malfidente che i ghe diga,
     Dotà de precauzion,
     Trando le bave da la gran fadiga,
     In tute le stagion
     El se la porta atorno;
     Mi mo, no me vergogno,
     Mi proprio no go un corno,
     E tanti ghe n'à più del so bisogno;
     Tutiquanti i mii scudi, i mii poderi,
     I consiste in t'un pochi de piteri,
     No go un strazzo de campo, una chiesura,
     No possedo un pilastro, una tavela,
     E per quanto che fassa, e che procura,
     No capita in scarsela
     Che 'l salario,
     El qual, se un fià me slargo co le spese,
     Se no me circoscrivo al necessario,
     Finisce prima che finissa el mese.
In genere de amori
     Go scomenzà assae presto,
     E ò fato, no lo nego, i mii furori
     Insina che ò podesto;
     Go avudo per morose
     Certi tochi de tose
     Ghe dà el beco a le stele,
     Ma me so messo a rischio
     Impetolà in tel vischio

[p. 215 modifica]

     De lassarghe la pele,
     E gh'è certi mumenti,
     Magari no, che le me ze presenti.
A qualche dona ò fato el cascamorto,
     Ma per non esser stà tropo prudente
     El mario se n'à acorto,
     E quantunque co tanti indiferente,
     Mi ò prodoto l'efeto prodigioso,
     Che 'l deventa geloso
     Oltre l'ecesso,
     E dopo averghe messo,
     Per usar una frase assae modesta,
     Dei grili per la testa,
     Go avudo de ritorno el regaleto,
     Ma i talari dai fora,
     Che me comodaria,
     No so come la sia,
     Li aspeto
     Ancora.
Dopo de quarant'ani,
     Che come i pipistreli, i barbagiani,
     Mi go passà la vita
     In t'una casa incomoda e ristreta,
     Che la pareva proprio una sofita,
     Un deciso tugurio da poeta,
     De fazza, da una parte a l'ospeal,
     E da st'altra al sepolcro general;
     Dopo de tanto che so andà cercando

[p. 216 modifica]

     Via da le fondamente
     Un alogio più grando
     E più decente;
     Dopo averghene visto
     A centenera
     Me so alafin provisto
     Una cagnera
     Coi muri mezzi marzi, col sofito
     Sbusà come un crielo,
     Dal qual in ogni sito
     Penetra l'aqua che vien zo dal cielo,
     In modo tal che co ze 'l tempo roto,
     Mia mare e mia sorela,
     Che le ze sempre in moto,
     Le camina per casa co l'ombrela;
     Infati tuti i incomodi se trova,
     Che ga una casa vechia che par nova,
     E basta dir che sina la ze priva
     D'una strazza de riva,
     Motivo per el qual go el sacrifizio
     De no tegnir più barca al mio servizio.
Riguardo a sanità so da gran ani
     Atacà da una fiera malatia
     Con carateri oscuri e cussì strani,
     Che no se sa capir cossa la sia
     Perchè nissun la vede
     Avendo fato sede
     Con sensazion molesta

[p. 217 modifica]

     De drento de la panza,
     Ne adesso più me resta
     Un ragio de speranza
     De tornar
     A aquistar
     La mia salute,
     Se za l'à provae tute
     Senza efeto
     Ogni Esculapio che ze stà al mio leto.
     Mi no ve posso dir
     Per cercar de guarir
     Quelo che ò fato,
     E cossa, mi no so,
     Che no go parà zo
     Per sto gargato:
     Dei stera de boconi,
     Tinazzi de decoti,
     Lavativi a milioni,
     E manteche e saroti,
     Fumenti e vissiganti,
     E tonici e purganti,
     Sinapismi, sanguete,
     E distrazion e quiete;
     Mi ò fato fanghi e bagni,
     Abuso de veleni,
     Mi go provà sedagni,
     Le aque a sechi pieni,
     El decoto de Fior,

[p. 218 modifica]

     La camara a vapor,
     Le botiglie del Rob, el Leroà;
     Me son eletrizzà,
     E go dà sinamente
     Vacanza al canochial,
     Ma no s'à fato gnente,
     Ma me resiste el mal,
     E son a la parola
     Per certe cosse un omo pensionato,
     Un deposito vero, una cariola,
     Ogn'ano che Dio à fato
     Condanà de sofrir
     Per el manco cinquanta setimane,
     E de sentirme a dir
     Quel da le rane.
Se mai scrivo in poesia per acidente
     No rischio che de far trista figura;
     Se scaena dei arcadi el torente,
     Che i arzeri sormonta e fa paura;
     El sito che l'inonda prepotente
     Vien dal fango imbonio de la censura,
     E ze a la megio superà el flagelo
     Se devento sogeto de bordelo.
Publico ogn'ano la mia profezia,
     Ma andando de sto troto
     Resta tute le copie in stamparia,
     Perchè oramai fora de qualche doto,
     De qualche leterato,

[p. 219 modifica]

     Genere ricercato
     Ai dì presenti,
     Che conoscendo a fondo
     I mii talenti,
     La compra casca el mondo
     Costassela un milion,
     Per le so gran rason,
     Per i so fini,
     Tuti i altri va a casa macarini,
     Nè tanto me despiase che passivo
     Me sia quelo che scrivo,
     Quanto che me rincresce
     Veder che'l fritolin
     Coi libri de Nalin
     L'incarta el pesce;
     L'imaginarme quante volte e quante
     I servirà a qualch'uso più umiliante,
     E sentir tuto el dì
     Che al confronto de mi
     Tanti el schieson
     Lo crede un erudito,
     Un Ciceron,
     E quando i trova scrito
     — Ghe fa l'amor Pomponio a Polissena,
     Dunque presto predigo luna piena —
     Solecita la sposa de Petronio
     Ga anticipà la prole al matrimonio, —
     E consimili trati,

[p. 220 modifica]

     I ride come mati.
Dopo el quadro che vo fato
     Cussì ingenuo, cussì esato,
     Co licenza de mia mare
     Pararia che la comare
     Dito avesse una panchiana
     Deponendo a quel mumento
     Che sia nato ficà drento
     Quela spezie de membrana,
     Che vien dita da la zente
     Camiseta volgarmente;
     Ma se mai per caso raro
     Co sta sorte de tabaro
     Fusse al mondo capità,
     Da mi dunque ze provato,
     Che nol serve gnente afato
     A far l'omo fortunà,
     Perchè son sora la tera
     Tratà in modo, in tal maniera,
     Che se mai donà dal cielo
     No gavesse un bon fradelo,
     Muger cara, un dolce fio,
     Mia speranza, idolo mio,
     Una mare, una sorela,
     La farave veder bela:
     Nela panza d'una bote,
     Mi soleto zorno e note
     Voria viver tuto l'ano

[p. 221 modifica]

     Su l'esempio de quel strano,
     De quel gran filosofon,
     Per po farghe del cocon
     A qualunque che tentasse,
     D'ogni sfera e d'ogni classe,
     De voler vegnir là drento,
     Gratuito tratamento,
     De sto mondo tristo e scioco
     Veramente stomegà,
     Dove l'omo ghe stà poco,
     E l'è sempre tormentà.
Un certo conte Anibale Stival,
     Dotà de gran talento,
     Basta dir che d'arzento
     Gaveva sinamente l'orinal,
     Ai setanta arivà
     Pien de schinele,
     Coi ossi mal coverti da la pele,
     Un'opera à stampà
     Contro el bel sesso
     Per esser stà più volte sasonà
     Nela qual el s'à espresso
     Al terzo tomo
     Con un breve episodio sora l'omo,
     Che in sta vale tristissima de afani
     Ne mete a so capricio la natura
     per zorni o per mesi o pur per ani
     A far vilegiatura,

[p. 222 modifica]

     Acordandoghe ai miseri mortali
     El ben de vero e de diamante i mali;
     Che semo proprio oseli de passagio,
     E quel che al trenta april ga bona ciera
     Pol esser soto tera
     Al primo magio;
     Che in conseguenza ogni fedel cristian
     Sin che l'è vivo e san,
     Avanti che ghe ariva el sera-sera
     El ga matina e sera
     Da star pronto
     Se vien la schizza per saldarghe'l conto;
     E po filosofando
     L'andava dimostrando,
     Che sto mondo de vizi ze un ridoto
     Averto note e dì, senza confini,
     Un deciso casoto,
     Del qual nu semo tanti buratini,
     Un gran campo d'armada,
     Indove per podersela sticar
     Ocore de tirar
     Sempre de spada,
     E senza farghe oltragio a la moral
     El conclude col dir, l'è un ospeal,
     Dove fida compagna
     Gavemo la molestia o la magagna,
     E dove mal esperto
     S'inganarave certo

[p. 223 modifica]

     Quelo che aprofitando dei contenti
     Sperasse de blandir,
     O credesse guarir
     Dai so tormenti,
     Perchè la farmacia
     Del mondo ze la pezo che ghe sia,
     E tal la ze protesto
     Per esser l'esercente poco onesto,
     E per esserghe là
     A comun beneficio
     Averto spalancà
     El vaso abominevole del vizio,
     Quel vaso per el qual s'à chiamà gramo.
     Ma tropo tardi, Adamo,
     Che ga scaldà la zuca,
     E n'à servio de barba e de peruca.
Mi mo che no minchiono,
     Mi che ghe vedo drento,
     Che penso, che ragiono,
     Come sa ragionar chi ga talento,
     E che me piase in fato
     El parlar figurato,
     Mi con dei paragoni,
     Più evidenti,
     E in forza de argomenti
     Assae più boni,
     Trovo el mondo una torta,
     Una polenta,

[p. 224 modifica]

     De la qual vari ga piena la sporta,
     E tanti, come mi, ghe ze che stenta,
     O inutilmente aspeta
     De averghene una feta,
     Essendo scrito che magnar ghe toca
     Quel che ai altri ghe casca da la boca;
     Lo batizzo un bordelo,
     Una cloaca,
     Nela qual no se gode che'l porcelo,
     Che l'aseno, che'l beco, che la vaca,
     Che la cavra, che'l mulo, che'l molton,
     Per esser senza lume de rason;
     L'è la fiaba te digo
     Del mio cavalo antigo,
     Alzighe la so coa. . . . . . co tuto quelo,
     Che i me contava suso da putelo;
     Lo intitolo un pestrin,
     E che'l sia tal lo provo,
     Se sina da bambin,
     Anzi apena se ze fora del vovo,
     La prima che i ve peta
     Sul muso cossa zela? l'è una teta.
     Se po qualcun vorà
     Sentirlo piturà
     In t'un modo assae vario,
     Che'l ricora al mio Regno Imaginario,
     Za vint'ani al'incirca publicà,
     Dove co alcune otave me son fato

[p. 225 modifica]

     De sto mondazzo el quadro scelerato.
Ma a sta gran destirada de saroto
     Prevedo che deboto
     Me diga qualchedun poco paziente,
     Che invece de studiar l'astronomia
     Leso co del profito sorprendente
     I libri del profeta Geremia,
     E che la mia virtù
     Consiste spezialmente in tirar su:
     No ze vero, el mio lagno, el mio lamento,
     L'è un pontelo, una spezie de palada
     Per far che'l fondamento
     D'una fama aquistada
     Co stenti, co suori,
     Resista a l'urto forte
     De quei persecutori,
     Che per mia mala sorte
     Procura a la parola
     Tutequante le vie perchè la crola:
     No ze vero, lo replico; indefesso
     Me ocupo senz'altra distrazion
     Nela scienza scabrosa che professo,
     E la mia predizion
     Del trentanove
     La gera preparada,
     I manoscriti ghe ne ze le prove;
     Che se no l'ò stampada,
     Ze chiaro, ze evidente,

[p. 226 modifica]

     El tempo m'à mancà precisamente.
Per più de qualche dì
     Qua e là zirando
     Fra el giubilo anca mi
     So stà nel trentaoto contemplando
     Quel'astro che à onorà
     Per so clemenza
     Sta vechia cariolada de cità,
     E che a la so partenza
     N'à profuso le svanziche e i favori,
     Ma n'à portà via i cuori,
     Tributo volontario che ga dà,
     E da meritamente,
     Ogni classe de zente
     A so Maestà.
Tre mesi boni se poi dir deboto
     Squasi ogni zorno mi so stà distrato
     Per i foresti che ghe gera in moto,
     Perchè a qualunque pato,
     Savendo che me trovo in sto paese,
     Vinti trenta a la volta,
     Certi de no aver spese
     I à volesto osservar la mia racolta,
     E mi sempre cortese
     Per ospitalità,
     E aciò no ghe la mostra la massera,
     Me so sacrificà
     Tre ore la matina e tre la sera,

[p. 227 modifica]

     Lassando porta averta a tutiquanti,
     E ghe n'ò visto tanti
     Co tuta la so chiacola
     Sorpresi, imatonii,
     Confusi, sbalordii,
     Da quela racola,
     E diversi restar come stivai,
     Val a dir come i gera capitai.
Nel trentaoto ben incaminà
     De casa m'ò cambià,
     Cambianza che m'à fato
     Assae deventar mato
     Per trasportar senza che i vada in pezzi
     Tuti quanti i mii atrezzi,
     Che ghe n'ò un arsenal,
     Le machine, i aparati,
     L'imenso canochial,
     Che me costa un bel grumo de ducati,
     La mia gran libraria
     Sora l'astronomia,
     El mio rico museo d'antichità,
     De scienze e d'arti,
     Che oramai contarà
     Cento e più mile pezzi senza i scarti;
     Le mie carte geografiche, i modeli,
     I disegni, le stampe, le piture
     De classici peneli,
     Le mie dote scriture

[p. 228 modifica]

     E i scartafazzi,
     Dove ogn'idea sora l'astronomia
     Apena digeria
     La molo a brazzi.
Per i afari d'Ufizio
     In numero magior del consueto
     A qualche straordinario sacrifizio
     Me so trovà costreto,
     E per dirvele tute
     Nel'ano trentaoto
     Go avudo un scopeloto
     A la salute.
Ma per l'ano quaranta, che restà
     Me ze nel precedente
     Qualche ora del zorno in libertà
     Da meterme in corente
     Con coragio,
     Eco che stampo el solito presagio,
     E per poderlo dar,
     Come che ò sempre fato, positivo,
     Perchè i astronomi possa regolar
     Le so bambine idee su quel che scrivo,
     Ritratando le buzzare patenti,
     I sonori stramboti,
     Le lasagne imponenti,
     Che'l titolo de doti
     Mendicando,
     I ze andai semenando,

[p. 229 modifica]

     Go esteso ogni più ardita osservazion
     Sora le stele fisse e le vaganti,
     Sora i pianeti e le costelazion,
     E sui corpi celesti tutiquanti,
     A ognuno con un calcolo infinito,
     Col massimo rigor
     Stabilindoghe'l sito,
     El grado de calor,
     La materia, la forma, la distanza,
     La gravità real
     A peso scrupoloso de balanza,
     El splendor natural,
     Che da ogni banda
     E in ogni punto el manda,
     L'orbita che 'l percore
     Diligente,
     El tempo che ghe ocore,
     L'impulso diferente,
     La so eletricità, la so influenza,
     La so corispondenza,
     El so volume, la so direzion,
     La varia posizion
     Nela qual el se mete,
     E la so relazion
     Co le comete,
     Soportando, bisogna che lo diga,
     Co massima pazienza
     Qualunque sia fadiga

[p. 230 modifica]

     E soferenza.
Ma se ò fato una vita da mazzarme,
     Se m'ò sacrificà,
     Quelo che ò rilevà
     Pol compensarme,
     Perchè dal studio esato
     Su tuto el firmamento,
     Sora tuto el creato,
     In qualunque mumento,
     E in modo franco,
     So al caso gnente manco
     A chi mai vol
     De provarghe che 'l sol,
     Quel'astro benedeto
     E portentoso
     Sin adesso sogeto
     Clamoroso
     De bizzare induzion,
     E de tante question,
     El ze una selva ardente
     Rotonda de figura,
     De mole sorprendente,
     Che l'imaginazion no la misura,
     De quele che sa far la Providenza
     Co la so onipotenza,
     Atorno de la qual rapido el fogo
     Per opera divina
     Mile ani ardentissimo el camina

[p. 231 modifica]

     Avanti de tocar l'istesso logo,
     Tantochè col ghe torna a capitar
     El lo torna a trovar
     De albori vestio
     Come mil'ani indrio,
     E cussì se mantien perenemente
     E eterna cussì dura
     Quela massa calorica potente
     Che scalda tutaquanta la natura,
     Quel'imenso fornelo,
     Quel lampion,
     Che fa figura in cielo
     Da paron.
Rispeto po a la luna
     I nostri patentati osservatori
     No i ghe n'à dito una,
     E sempre in gran contrasto fra de lori,
     A forza de osservar,
     Dopo tanto studiar,
     Dopo tanto arguir,
     I finisce col dir:
     L'è un corpo opaco,
     Cossa che la sa anca Marco Caco:
     Mi invece che nei ani precedenti
     Go dito che la luna ga montagne,
     Ga i so mari, i so fiumi, i so torenti,
     Ga miniere, ga boschi, ga campagne,
     Che la ga zorno e sera

[p. 232 modifica]

     E che come la tera
     L'è abitada,
     Me l'ò nel trentanove avicinada
     Tanto coi telescopi e i canochiali
     Che go distinto omeni, cavali
     E manze e cavre e piegore e vedeli,
     Che ò visto coi mii ochi
     Case, boteghe, chiese e campanieli
     Co tanto de batochi,
     E in mezzo del silenzio qualche note,
     Le creda o no le creda, go sentio
     El sordo mormorio
     De le so bote.
S'anca per el passà
     Coi lavori dificili che ò fato
     Mi no gavesse dà
     Sicuro un dato
     De la bravura mia
     Sora l'astronomia,
     Per dir quelo che ò dito
     No le me pol negar
     Che bisogna studiar
     Co del profito;
     Che se deve star su le note intiere
     A contemplar le sfere;
     Che ocore aver avudo la pazienza
     Ani coi ani de tratar sta scienza;
     Che ghe vol dei talenti

[p. 233 modifica]

     Superiori ai comuni e sorprendenti,
     E che ze necessario
     Aver infuso un genio leterario.
E sicome benigna la natura
     M'à dà come ga tanti
     Do rechie de misura
     Esuberanti,
     E un per de sporteloni
     Con tuti i requisiti, con quei doni,
     Che ocorarave a vari
     Per far l'ufizio de referendari,
     Mente sempre serena e assae bon naso,
     Cussì col mio talento,
     Che ascolto, vardo, taso,
     Stago atento,
     E procuro da tuto
     Cavarghene un costruto,
     Da dei meri acidenti,
     Da cosse indiferenti
     A tutiquanti,
     Mi go fato scoperte interessanti.
Basta dirve che un dì l'ano passà
     El caso m'à portà
     De doverme trovar
     Co mia muger e co altre do signore,
     Che d'acordo s'à messo a batolar,
     E dopo, per dir poco, un per de ore,
     Che a diverse so amighe e conoscenti

[p. 234 modifica]

     Le ga fora dei denti
     Tagià zoso un tabaro
     Co le franze, coi fiochi e col colaro,
     Fruto de le lizion
     D'ogni conversazion,
     Andando come viole,
     A forza de parole
     El discorso à cambià,
     E le se n'à ocupà
     De capei, de galani, de scufiete,
     De sciarpe e manteline,
     De cinture, colari e camisete,
     Sin che le ze arivae su le bustine,
     Su la necessità,
     Che tantissime ga
     De dopararla,
     Sul modo de tagiarla,
     Su la vera maniera che i la impira,
     Aciò no la ghe tira,
     Dove casca la grespa opur la pieta,
     Dove s'à da imbotirla,
     E come per tegnirla
     O più larga o più streta,
     À dito una,
     Bisogna regalarse co la luna
     Apogiando el so assunto a la rason,
     Che quanti al mondo semo
     Secondo le stagion

[p. 235 modifica]

     In tel peso specifico variemo;
     Che alterandose 'l peso va sogeto,
     No gh'è gnente da dir,
     El volume a sentir
     L'istesso efeto;
     E che per conseguenza
     Quando una diferenza
     Se combina
     Ghe vol più o manco larga la bustina.
Sto fin ragionamento
     M'à fato star atento,
     E se da quelo che gaveva inteso
     Gera restà sorpreso,
     Go po avudo motivo de stupir
     Go ò visto a comparir
     Tirada fora,
     No so se per dessoto o per dessora
     Una steca de fero irusinia,
     Che drento la bustina custodia
     Gaveva una de ele
     Per tegnir in sequestro le buele.
     Sto arpese da panze esorbitante,
     Sta robusta armadura,
     Ghe a la dona galante
     Serve per farghe far bona figura,
     A mi invece che sempre stago a l'erta
     La m'à servio per far una scoperta.
Me ze venudo in mente

[p. 236 modifica]

     Sto tragico acidente:
     Una de quele note,
     Che'l caldo molestava,
     In situazion rimote
     Se trovava
     Senza viste barone
     Do omeni e do done,
     Quando dà su marubio in t'un mumento,
     Scravazzi che no lassa un pel de suto,
     E lampi e toni e vento,
     S'à fato el tempo bruto,
     S'à sublimà i vapori,
     L'eletrico s'à unito,
     E dove i gera lori,
     In quel'istesso sito
     Ga el fulmine sbrocà,
     E de presenza adosso el ghe ze andà;
     Le do done colpie
     Ze restae là sbasie,
     Ma i omeni no à trato
     Che un potente scorlon
     Dal strepito che à fato
     L'esplosion,
     Avendo mi presente
     Sto caso veramente
     Singolar,
     Che à dà tanto motivo de parlar;
     E st'altro ricordando,

[p. 237 modifica]

     Ingrato per Venezia e memorando
     De quele do sartore
     Povarete,
     Che poco dopo le vintiquatr'ore,
     Co la so santa quiete,
     Senz'ombra de paura
     De un fià de scontraura
     Butada su da poco
     Dal vento de siroco,
     Lassandose trovar ste disgraziae
     In cale del pandolo a san Cassan
     Co le so forfe in man
     Nome guae,
     Una saeta suta l'à incandie,
     E l'à destese in tera incenerie,
     Fandoghe solamente
     A chi ghe gera arente
     In quel istante
     Subitaneo l'efeto de un purgante;
     Mi a la steca pensando
     Co un lucido intervalo,
     Fati i considerando
     Go stabilio nel fero senza falo
     Un atraente
     Al fulmine potente,
     E go per conseguenza rilevà,
     Come diverse per parer più snele
     Ga drento la bustina sequestrà

[p. 238 modifica]

     Un nemigo imponente a la so pele,
     Come sconta le ga una calamita,
     Che le tien in pericolo de vita,
     E podarave esser la rovina
     De quei che le avicina.
Oltre po d'esplorar minutamente
     E i misteri e i prodigi de natura,
     Me so ocupà con studio diligente
     Nei retagi del tempo a la letura
     Su le scienze, su l'arti, su la storia,
     E dotà de grandissima memoria
     Me ricordo aver leto
     Un'opera in dialeto
     Venezian,
     Che certo Pantegan,
     Numismatico imenso,
     E pien d'erudizion
     Co assae bon senso,
     Co molte ilustrazion,
     Ga publicà
     Credo del mile cento e vintisete,
     Co la qual l'à provà
     Che le svanziche no, ma i disisete
     Squasi tuti col buso,
     E che i daoti
     Sin dai tempi remoti
     I gera in uso.
Go avudo per le man

[p. 239 modifica]

     Un poema toscan
     A Monaco stampà
     Tresent'ani sarà
     Dal celebre botanico Caligo,
     Che ga parlà ex professo
     Su la muger del figo,
     Pianta da tuti conossuda adesso.
Go imparà da un antico calepin
     La maniera de rider in latin,
     El modo più sicuro
     Per far el muso duro,
     E ò visto come un senator roman
     Ga provà che'l biscoto no ze pan.
Da un foglio leterario,
     Che se stampava impreteribilmente
     Soto el regno de Dario
     Giornalmente,
     Son venudo a saver
     Che ze de un ingegner
     Chiamà Variola
     El ritrovato de la cighignola,
     La qual per vari ani
     Diversi cortesani
     La doparava invece de botoni
     Per comodo magior sui pateloni.
Scartabelando l'enciclopedia,
     Tomo cento cinquanta a carte oto,
     Go trovà che in Turchia

[p. 240 modifica]

     L'uso dei lavativi è stà introdoto,
     E me par de aver leto,
     Dal medico Kulim
     Ai tempi de Maometo
     Co s'à amalà Ibraim,
     Uso che dopo vari
     Efeti salutari
     Col progresso dei ani,
     E con del fruto,
     S'à propagà fra i popoli cristiani,
     E in seguito pertuto.
E nela storia antica ò trovà scrito
     Che un corsaro da mar certo Mazepa,
     Omo robusto e ardito,
     El sia stà el primo che à inventà la slepa,
     La qual co vari esempi prova un doto,
     Che la ze diferente dal sberloto.
Dele altre scoperte interessanti
     Co le mie osservazion far go podesto,
     E per utilità de tutiquanti
     Me lusingo assae presto
     Poder esser in caso de stamparle
     Per dopo regalarle,
     Sicuro in sta maniera,
     Perchè go l'esperienza,
     D'esitarghene a miera,
     E garantirle da la maldicenza.
Co sto emporio de rare cognizion,

[p. 241 modifica]

     Co sto fagoto imenso
     D'estese erudizion,
     Co sta dose squisita de bon senso,
     Lasso che tuti canta,
     E buto zo el presagio del quaranta.
Inverno bon assae
     Pien de bele zornae,
     Perchè la bora
     Ogni secondo dì vegnara fora
     Dal cielo a cazzar via
     Qualunque porcaria,
     E supiarà indefessa
     Aciò no se impossessa
     Quei cani de sirochi
     Che ve riduse a tochi,
     Che ve mazza a dretura,
     E a tanti ghe fa far bruta figura.
     Dai calcoli prevedo
     Che gavaremo un fredo
     Pochissimo molesto,
     Ma nonostante a questo
     Numerosa che mai
     La classe dei giazzai,
     Essendoghene za
     Anca de gran istà;
     Una strage, un sproposito de zuche,
     Sia sante che baruche,
     E tempi sempre boni

[p. 242 modifica]

     Per i magnamaroni,
     Perchè se gavarà de sto bon fruto
     Abondanza grandissima pertuto.
Sarà la primavera stravagante,
     La bava da borin,
     El vento da levante,
     E i refoli frequenti de garbin
     Mantegnarà severa
     Oltre 'l mese de april l'atmosfera,
     Ma circa a mezzo magio
     Faremo un gran passagio,
     L'aria radolcirà,
     Sarà gradita,
     La natura darà
     Segni de vita,
     E quando la stagion sarà finia
     La campagna vestia
     D'erbe e de fiori
     Prometarà tesori.
In quanto sia l'istà
     Nol variarà de un ete
     Da quelo che ò stampà
     Per el mile otocento e trentasete,
     E se pur ghe sarà
     Qualche cambianza
     Questa consistarà
     Nel'abondanza
     De zizole, de gnochi, de meloni,

[p. 243 modifica]

     Ma tuti senza sugo e poco boni,
     E de bachiri veri,
     Genere de meloni forestieri.
I tre mesi de autuno tuti bei
     Assae megio de quei,
     Ve li predigo,
     Che s'à avudo nel'ano trentanove;
     Qualche dì de caligo,
     Un pochete de piove
     E po zornae beate,
     Sere da polastrelo,
     Note da passegiate,
     Limpidissimo el cielo,
     E un'aria in ogni sito
     De quele che conserva l'apetito.
     El racolto pertuto andarà ben,
     Gran caneve de vin,
     Gran montagne de fien,
     Quantità de formento e cinquantin,
     Legumi d'ogni sorte a bataglion,
     E de panochie, sive formenton,
     Ghe n'avarè, prometo,
     De più del consueto.
Sarà po l'ano, tolto in general,
     Fora de qualche fià de teramoto,
     Un fradelo carnal
     Del trentaoto,
     E tanto che con quelo

[p. 244 modifica]

     El pararà zemelo:
     Ma sicome me ze una secatura
     De tornar a dir su quelo che ò dito,
     E se lo fasse gavaria paura
     Che i podesse imputarmelo a delito,
     Opur che pronto alora
     Me capitasse fora
     L'indiscreto
     A dir che me ripeto,
     Cussì ò determinà
     A sto punto arivà
     Lassar che i canta,
     E finir el presagio del quaranta.
Chi po vora saver
     Su sto mondo galioto el mio parer;
     Chi conoscer vorà
     Come la penso sul vegnente istà;
     E chi sul ben, sul mal
     De l'ano in general
     Amasse de informarse
     Per aver un timon da regolarse
     A tute quante l'ore,
     E menarselo quando che ghe ocore,
     Che i lesa le mie opere stampae
     Dove ste cosse chiare le se vede,
     E se no i l'à comprae,
     Nè imprestar ghe le vol chi le possede,
     Mi no posso che darghe le minute,
     Ma da Chiarussi le se trova tute.



Note
  1. Per il 1839, l'autore non ha scritto il Pronostico.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pronostico_de_l%27ano_1840&oldid=57958"