Pronostico de l'ano 1838
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1837 | Edission e fonte ▼ | Pronostico de l'ano 1840 → |
Da quando poco acorto el primo omo
Per un toco de pomo
L'è stà, Dio ghe 'l perdona,
Sedoto da la dona,
Ghe ga mostrà
Quel fruto,
Dal diavolo tentà,
Che quantunque 'l sia bruto
Ghe ze comparso belo
A la parola,
E ga tirà la gola
Da putelo,
A grado che da sempio, da cocal
L'à comesso el pecato original;
Da quela volta in qua
S'à tuti sparpagnà
Sora la tera
La caterva dei mali
Che avanti no ghe gera,
E i omeni bestiali
Da la madre natura mandai fora,
Per so fatalità
S'à sempre dedicà
Sina da alora
In tutoquanto quelo
Che no i ze stai
Dal cielo
Destinai:
El soto per esempio
Se sforza de balar;
Quel che no sa la musica
Procura de sonar;
Se vede i vechi pitime
Che tenta far l'amor;
Pronuncia sempre 'l stolido
Sentenze da dotor,
E quelo per la basta che ze nato
Vol far da leterato.
E che la sia cussì
Una prova palmar l'ò avuda mi,
Perchè ghe ze sta tanti
De quei che in vita soa no ga mai leto
Che opere galanti
Per no gravitar tropo l'inteleto,
E che dei libri boni,
Dei libri d'istruzion,
No i ga visto i cartoti
Nè sà che sia stà al mondo Ciceron,
Virgilio, Ovidio, Orazio, e tanti doti;
I quali da dindioti,
Da imprudenti,
Sora tuti i argomenti
Se mete a disputar,
E a forza de cigar,
Per no dar tempo che qualcun se opona,
I crede che se creda che i ragiona;
De ste ingrate lasagne, de sti gnochi,
De sti veri pastochi
Ghe ze stà
Che zirando qua e là
Ga abuo el coragio,
Go parole gofissime, indiscrete,
De farghe la censura al mio presagio,
Che go stampà per l'ano trentasete
Disendome marzoco, zarlatan,
Tolendome per man
Severamente
Con un certo frasario,
Se no basta insolente,
Temerario,
Avendo da storditi
La speranza
Co sti bei requisiti
D'esser tolti per zente de importanza;
Zuche baruche col cervelo sbuso,
Tosati che dà suso,
E che no ga
Per nissun carità:
Esseri inconcludenti,
Che de tuti i mumenti
A tute l'ore
A corer i se vede per la strada,
Come i trotoli core
Apena che i ga avudo la scuriada,
Vestii per parer bon
Co roba streta,
Che marchia col baston
E un certo veladon
Che par giacheta;
De quei che nu in dialeto
Zizole ghe disemo col confeto,
E che fa in bon toscan
Anagrama purissimo co man;
Bravi da cossa, mi lo savaria,
Ma tut'altro che nati
Per far i leterati,
E molto manco per l'astronomia.
Sta barbara acoglienza,
Sto ingiusto tratamento,
Sto veder che se manca de conscienza
Con chi mete a profito el so talento,
E co la so costanza,
E co la so insistenza,
Cerca de far la guera a l'ignoranza,
Teribile potenza
Che ga per tuti i siti
Eserciti infiniti;
Co un omo, sia permessa l'espression;
Che oramai ze ridoto da cartelo
In t'una profession
Dove ocore gran dose de cervelo.
Acume, testa freda, intraprendenza,
E de Giobe più granda la pazienza;
Con chi senza paura
De calighi, de venti, de procele,
Sin che 'l mondo ronchizza a note scura,
Contempla e luna e stele,
E invece de dormir
Se lambica la mente
Studiando l'avenir
Continuamente
Per po senza falar
Poder pronosticar
Cossa sucedarà sora la tera
Aciò tuti chi vol senza inganarse
Sapia matina e sera
Regolarse;
Sta cativa acoglienza, lo ripeto,
A uno che fadiga no sparagna,
Che sta dei mesi senza tocar leto,
Lassando pur che so muger se lagna,
E quei de casa che ghe diga mato,
M'aveva squasi indoto
De no dir gnente afato
Per el mile otocento e trentaoto,
E me gera deciso intieramente
Dopo de l'acidente
Assae mortificante
De vederme incartà
Un grosso de levante
Che ò comprà
L'altro dì del mio Bepi in compagnia
Da quelo dal tabaco in marzeria,
Cossa che sul mumento
M'à fato un missiamento,
Un tal travaso,
Che no ghe ze stà caso
La bile de frenar,
E ò dovudo esclamar
In modo che me senta sin i sordi
Oh che mondo ignorante! oh che batordi!
L'è proprio una passion
Co se riflete che no gh'è famegia
Nela qual el schieson
No se consegia;
L'è una cossa che urta estremamente
El veder dei simioti,
Tante gran volte senza intender gnente
Rider de quel'amasso de stramboti,
Che al secolo fa torto e disonora
Le stamperie che ne li manda fora;
Fa rabia in verità
Dover da poco in qua
Da per tuti i cantoni
Petarghe 'l muso drento
A autori de schiesoni
Senza nissun talento,
E saver che Andreola povarazzo
Bonissima creatura
Che tuto el se rancura
Quel che fazzo,
Voi dir quelo che scrivo,
Ogn'ano coi mii versi el ga un passivo,
Avendo trovà tanti
Che se nol l'à donai
I ghe l'à rifiutai
Co mezzi impianti,
Fra i quali gh'è de queli che sostien
E de stimarme e de volerme ben,
Ma che mi li batizzo co sti dati
Per busiari spacati,
E quantunque sia ofeso
Nela parte esenzial de le scarsele,
Generoso al de là no li paleso
E me limito a dirghe cavanele.
E possio, le risponda! far de manco
De avermene per mal, de lamentarme.
Mi che strussio, che ranco;
No minga per aver, per meritarme
Quela fama, quei onori
Che me acorda academie e professori;
Mi che a forza de schena e de pazienza
Co le mie planetarie osservazion
So arivà al non plus ultra de la scienza,
Son deventà in sto ramo el Ciceron,
De maniera che 'l nome de Nalin
Ze per antonomasia l'indovin;
Mi, che ghe lo confesso,
A studiar me so messo
Astronomia
Per sentimento de filantropia,
Col piano val a dir
La gran turba dei mami de erudir,
Regolando le menti
Da erori madornali mal istrute
Sui celesti portenti
Senza riguardo per la mia salute;
E pur tropo laorando da animal
Le intiere note col mio canochial
So ridoto in efeto,
No bia che me vergogna,
Una vera carogna,
Un lazzareto
Aflito tuto l'ano da dolori,
Con una infermità cussì cagnina
Che fa desservelar tanti dotori,
E ze l'obrobrio de la medicina;
Mi che convinto za
Da una longa esperienza
Che tuto ga co tuto afinità,
E che per conseguenza
Serve a l'astronomia
E la gema preziosa e la scarpia,
Co le man che go sbuse ò speso, ò spanto,
No savaria dir quanto,
A farme copiosissime racolte
Sora materie molte,
De le quali un'idea, se no me ingano,
Me par de averve dà giusto l'altr'ano;
E finalmente mi,
Che senza mai pensar
De poderme cussì
El stato in poco tempo rovinar,
E senza farme caso gnente afato
Che i me trata da mato,
Al mio assunto coerente,
No fasso che aquistar continuamente.
Difati anca da poco go comprà,
Esborsando dei miera de fiorini,
Un'opera sul sugo dei susini,
El secolo passà
Da un medico stampada
Nela China,
Che ghe l'à dedicada
A la regina,
E che ze stà per questo da la sorte
Fato de sbalzo medico de corte;
Una canzon curiosa,
Ma assae sentimental, sora i scorloni,
Che spesso a la morosa
De soto dei balconi
La note ghe cantava
Un certo Meleagro
Scrupoloso cussì che nol magnava
Gnanca i peri botiri in dì de magro;
Un quadro de valor
Che ze de incerto autor,
Ma che se crede
Lavoro de Tizian,
O d'altra brava man,
Nel qual se vede
Un bel toco de dona, una romana,
Butada sul sofà nel so tinelo
In maniera assae strana,
Che stà aspetando el console Metelo;
Un'opera famosa, gigantesca,
Sul peso del suor,
E sul picante odor
De l'aqua fresca;
Un libro d'istruzion
Che in t'un per de lizion
Co la pazienza
Insegna anca ai minchioni
Quala sia la precisa diferenza
Tra le spente e i spentoni;
L'elenco general de le sarache
In verso martelian
Del quondam sior Impolito Panache
Da Bassan,
Omo de molto inzegno,
Ma delicato a segno
Che a l'odor de la zuca, del melon,
L'andava in convulsion,
Tantochè se 'l facesse ai dì presenti
Numero fra i viventi,
Col so temperamento
El saria tuto el zorno in svanimento;
La storia d'un subioto
Scrita da certo vechio buranelo,
De soranome intitolà Dindioto,
In venezian, ma venezian de quelo
De quei tempi beati,
De quei ani
Che zirava i ducati
Come che adesso zira i carantani,
Co coreva la moda dei lustrini,
Co in teatro i magnava i brustolini,
Quando che se vedeva i cortesani
In coa zo per la schena,
E co sin per el manco quindes'ani
Se tacava la calza a la caena;
Un curioso modelo
Col qual senza che 'l stenta,
Anca un strupio, un putelo,
Se pol menar al fogo la polenta;
L'intagio del famoso Brustolon
Sora un toco de legno san bastian
Fato per comission
De un rico mussulman,
Dove se vede el prode Mandarin
Del gran Muftì
In fondo el so giardin
De mezzodì
Che a la bela giorgiana Kulmeleca
Ghe fa el salameleca;
La testa de Megera
Incisa in t'un topazzo
Perso in tempo de guera
A Cortelazzo
Dal general in capo de l'armata,
Dal nemigo copà co una pignata;
Cento otave balzane
Sora el salto mortal che fa le rane;
El calepin del cuor
Per certi sempi,
E la scuola d'amor
Con vari esempi:
E mi che finalmente
Stago adesso ultimando
Un lavoro imponente,
Un piano in grando
Che se stamparà presto
Dai tipi de Andreola
Col titolo modesto
De sta gravia parola
— Astrolunarsoliferosistema —
Lavoro el qual farà
Che se risolvarà
Quel gran problema,
La question agitada
Se dei corpi descriti nela sfera
Solamente la tera
Sia abitada;
Impresa colossal
Che me farà imortal,
Perchè a furia de squarzi d'eloquenza,
Co profusion de scienza,
Co logici tratati,
Coi calcoli più esati,
Con un milion d'esagoni,
Con diese de pentagoni,
E co imense tabele
Definirò le stele
Una per una,
I astri, el sol, la luna;
Darò l'intinerario
E del lampo e del ton,
De la saeta;
Farò una descrizion
Sul corso vario
D'ogni stela cometa;
Stabilirò le vie del teramoto,
E la causa del so moto
E de la scossa,
Dimostrarò percossa
E in che maniera
Se rivolge la tera
Sul so asse;
Rendarò la rason del corpo opaco
Come se se tratasse
De fumar una pipa de tabaco;
Spiegarò la potenza dei vapori,
L'efeto del splendor,
L'ingano dei coiori,
La parte positiva de l'odor,
Del sol la direzion
Dopo i vinti de zugno,
La proprietà del pugno
In tute le stagion,
Separarò i elementi,
E darò una teoria
Sui quatro venti
Afato nova per l'astronomia,
Da farghe perder se i ghe n'à el cervelo
A quei marzochi che contempla el cielo.
Per tute ste integrali riflession,
E la combinazion
De esserme trovà
In modo straordinario
Nel mio ufizio ocupà
A guadagnar quel strazzo de salario,
Co una salute sempre più cativa,
Co una malatia che ze un mistero,
Per la qual bia che viva
Come che se sol dir drento d'un vero,
Inutile, impotente
A qualunque esercizio,
E sinamente
Costreto al sacrifizio...
Ma no serve che qua fassa la serie
De tante mie miserie,
No volendo che chi ze de cuor bon
Se mova a compassion,
E chi lo ga più duro del biscoto
Me possa dir sul muso:
El ze qua sto pianzoto
A tirar suso;
Per tuto, lo ripeto, sto complesso
De motivi giustissimi, ve zuro,
Mi za gaveva messo
El culo al muro,
E no avaria suposto
Sul mio onor
De doverme distor
Dal mio proposto;
Ma i astronomi del secolo presente,
Avendo, no so come, penetrà
Che gaveva fissà
De no dir gnente
Per el mile otocento e trentaoto,
Da per tuti i cantoni
I s'à unito in comploto,
I à tirà caregoni,
E per indurme a no perseverar
Nel mio proponimento
I m'à scrito un dispacio da insoazar,
Facendoghe l'elogio al mio talento
Con termini, con frasi, che no posso
Per mia soma modestia replicar
Senza sentirme in viso a vegnir rosso,
E concludendo che l'astronomia,
Mancando le mie dote osservazion,
A una perdita tal sotostaria
Da no poder trovar sostituzion,
Anzi la tornarave su la tera
In tel stato de infanzia che la gera.
Comosso, sbalordio
Da sto bel trato,
Che con esuberauza m'à realdio,
Per no mostrarme ingrato,
Dopo rifleter molto
Me so alafin risolto
De butar zoso la mia profezia,
E lassar che la vaga in stamparia.
Ma sicome trovà me so a le strete
Causa el progeto che gaveva fato
De no pensar nè a stele, nè a comete
De no deventar mato
Ogni mumento
Coi telescopi e col mio canochial
A misurar l'intiero firmamento,
Cussì m'à mancà el tempo material,
Fenie le operazion,
De estender co raconti detagliati
La longa descrizion
Dei risultati,
E in camara sarà
Me son in conseguenza limità
Le cosse più importanti de predir
Con un semplice estrato,
Ma che pol ben servir
Perchè l'è esato:
Eco dunque col testo che go usà
Anca l'ano passà,
Eco che dago zoso la bacheta
Per far no da indovin, ma da profeta.
L'inverno lo prevedo
Longhissimo, severo,
E gavaremo el fredo
Sie gradi soto el zero;
Dominarà la bora,
Dominarà aquiloni,
Che mandarà in malora
I scuri dei balconi;
Continue levantere, sirocali,
Che condurà i cocali
In canalazzo;
Se corarà sul giazzo
Sie quarte e più profondo
La sera e la matina
Da qua sin a Fusina
E a san Secondo;
Neve una quantità,
E piove vegnarà
Cussì dirote
Da minaciar le rote
Che spaventa
Del Bachiglion, de l'Adese, del Brenta;
Gran distruzion de ombrele,
De scarpe, de prussiani, de stivai,
Gran uso de fanele,
Gran gabani fodrai,
Coi so colari,
Coi so colarini,
E strage de tabari,
Che adesso i se pol dir saltamartini.
Sarà bela che mai la primavera,
Fresca matina e sera;
Zirarà minaciando i nuvoloni,
Ma gavaremo in pien
E la note seren
E i zorni boni;
Ogni sorte de fiori
De diversi colori
In abondanza,
Erbe che dà fragranza,
El giacinto e la viola,
Che col so grato odor
El naso ve consola,
E ve ralegra el cuor;
Se vedarà abonora
Albori e piante
Le foge a butar fora
Tutequante,
E in moto la campagna,
A promoter cucagna,
Uno dei più bei ani
Per vin, foragi e grani.
El caldo de l'istà
Tardi scomenzarà,
Ma nonostante a questo
El ne sarà molesto,
Perchè diversi dì l'arivarà
A vintiquatro gradi, e dei mumenti
Vinticinque crescenti,
E che la staga là;
Minaciarà l'arsura,
Ma a tempo vegnarà
La piova a ristorar madre natura;
Sarà tempeste e venti
Pochissimo frequenti;
I temporali
No ne farà gran mali,
E i pulesi, i mossati,
E tanti inseti,
Che dei ani ne fa deventar mati,
Nel trentaoto sarà assae discreti.
L'autuno una delizia e cussì bon
Che deposta in casson
El metarà
Quel de l'ano passà;
El sol sempre costante
E sempre belo
El pararà un brilante
In mezzo el cielo;
Sarà chiara la luna,
Un spechio la laguna,
Vento pocheto assae,
Discrete scravazzae,
Calighi squasi gnente,
E dapertuto
Sarà costantemente
El tempo suto.
De formenti, de sorghi e cinquantini,
Richissimi racolti,
Abondanza de vini
E fruti molti:
In conclusion se gavarà un'anata,
Che per prodoti no gh'è stà l'egual,
Proprio paradisal,
Proprio beata,
De quele che per trato de clemenza
Sà mandar co la vol la Providenza.
Se trovarà contenti
Vilani e possidenti,
Nè i gavarà pensieri
Col racolto che i à fato,
Che ga impenio le caneve e i graneri,
De mantegnirse a norma del so stato,
Anzi se pol supor
Che i ghe farà el saldato
A qualche creditor,
Ghe l'aspeta impaziente
Da ani e ani senza scoder gnente.
Se vedarà bacanti
E sanseri e marcanti,
Che chiaparà tesori
In t'un mumento
Co le strade ferate e coi vapori,
Che senza dubio ghe l'impata al vento,
Perchè tanto se core, che deboto
Pol co l'ariva al Dolo alzar la man
Chi vol dar un sberloto
Al Moranzan.
Anca quel che fa stochi,
Idea del cocodrilo veramente,
Che in qualunque stagion supega i gnochi,
E co no i ga più sugo l'è dolente,
El gavarà motivo de alegria,
Perchè tra quei che compra, quei che vende,
Queli che tropo spende,
Quei che li buta via,
E po bate la luna,
Che ghe ne ze al presente
Un numero imponente,
El trovarà da far la so fortuna.
Giubilarà el falio nela disgrazia,
Rifletendo a la grazia,
Che la sorte propizia ga acordà,
De averse ritirà
Dopo tanto studiar
In bon mumento
Da poder i so debiti pagar
Con un trenta per cento
A farla granda,
E un capital da banda,
Come ze adesso in uso,
Per po co franco muso,
E co nova patente
Tornar in piazza a trapolar la zente.
Deposta come un mato
Ridarà l'avocato
Ocupà a consegiar
Tuti i mumenti,
Facendose pagar dai so clienti,
Per i quali el se presta,
Quatro parole un ochio de la testa.
Ridarà le regazze,
Che gavarà morosi a bataglion,
Amanti sviscerai per le scoazze,
A cantarghe dì e note la canzon,
Per veder se gh'è caso
De farle inamorar,
Che ga quel malegnaso
Intercalar
— Quando che te so arente
No so più bon da gnente —
Sin che le intiva in quelo,
Che fa dasseno e che ghe dà l'anelo.
Ridarà le donete
Perchè le podarà
Co gran facilità
Far da sanguete
Co tanti cicisbei che per tormento
I ga la malatia del sentimento:
Ridarà el boteghier de marzeria,
Che co false proteste a son de bezzi
Vendarà i so strighezzi,
E darà via
E la roba de moda e la caia,
Avendo a tute l'ore
La so botega piena de signore,
Che stima più una scufia col galan
De qualunque lavoro de Tizian,
Che ritien ghe sia più da savariar
A far su de bon gusto una capota
De quelo che a trovar
Un mario per la goba senza dota,
E con idee balzane veramente,
Co un pensar strambalà
Le crede fermamente,
Che a tagiar un bel stampo da capelo
Ghe sia dificoltà
Più che a far un putelo.
Le modiste, i sartori,
Giubilarà anca lori,
Perchè una varietà
De mode ghe sarà,
E tantissimi e tanti,
Che per esser nel rolo dei galanti,
Per far la so figura,
La spesa co l'intrada no i misura,
Che reputa delito
No aver el pano fin,
De no vestir pulito
Secondo el figurin,
E che po no ghe abada
Se fermi sui cantoni
A l'uso dei piantoni
Per farghe la filada
Li topa i creditori,
I spendarà tesori.
Ridarà a crepa panza
El zogador
Vivendo tuto el dì co la speranza
De deventar signor,
E a daoto a daoto
Per el zogo del loto
Se svodarà la borsa
Volentiera,
Sperando una risorsa
In sta maniera.
Mi po, che, no gh'è caso,
Co posso me compiaso
El prossimo agiutar,
Trovo de consegiar
Queli che mete
Nel'ano trentaoto a tegnir duro,
A no lassar per ochio el disisete,
Se i vol bruscar qualcossa de sicuro;
E ghe insegno cussì per esperienza,
Perchè anca mi piutosto fortunà
Più volte go chiapà
Co l'insistenza,
E de la mia vitoria
Conservo qualche picola memoria.
Ridarà i locandieri
Per i gran forestieri
Che ghe capitara continuamente
In tute le stagion,
Ma spezialmente
Durante 'l carneval per la rason
De la nova Fenice che gavemo,
E ghe ne vegnarà
Tanti che vedaremo
Co le prove de fato
Che mi no so stà mato,
Che no me so inganà,
Se co la vechia se brusava ancora
Fra el lagno general de la cità,
Che vedendo le fiame a saltar fora
Esclamava pecà;
Se fra le smanie, i pianti,
Fra el lamento
De ste nostre sensibili galanti,
Che ga avudo là drento
Tantissime ocasion
A lusor de candela
De far l'esposizion
De roba bela,
E sina che i cantanti,
I sonadori
Scodeva i batiman
Le fulminava i cuori
Spasemanti
Dal primo, dal pepian;
E se fra i crudi palpiti e 'l sangioto
De qualche zovenoto,
Che in mezzo quel recinto
Nela guera d'amor
E ze stà vincitor,
E ze stà vinto,
Mi co mente serena,
Co go pensà su apena,
Mi ò avudo la bravura
El bel coragio
De sostener che la disaventura
Doveva esser sorgente
De vantagio,
Quantunque, ze evidente,
Nel far sta profezia
No me sia valso de l'astronomia.
Ridarà el fritolin,
Che co la so farzora
Bruscarà qualche zorno el so fiorin
In manco de mezz'ora,
E a bomarcà la sera,
Facendo da polaco,
Ghe darà a la massera
El pesce straco.
La ghe butarà ben
A chi ga magazzen,
Che a torme, a bataglioni,
Ghe vegnarà chi beve da sioni,
E che sarà la note
Senza chiamar padrin
Batizzarà le bote,
E farà l'aqua convertir in vin.
Ridarà chi ga betola, ostaria,
Che 'l podarà dar via
La roba da magnar
Facendose pagar
Sora la broca;
Chi vende el dindio e l'oca,
La polentina a fete
Canochie, caraguoli, masanete,
La spienza, el bon figà,
Lengue, maneghe e tripa, ridarà;
Ridarà quel che vende campagnole,
Quelo che vende datoli e susini,
Carobe e castagnole,
Maroni e brustolini,
E roscani e salate,
E seleni e patate,
Sponzioli e pevaroni,
E naranze e limoni,
E tuta la famegia dei ambulanti,
Dei quali ghe n'è tanti
Con gargati da mussi, da staloni,
Che dal nascer del dì sina la sera
I ciga in tal maniera
Da farve trar scorloni,
E quantunque difeso dal capelo
Ve stempara el cervelo:
Indiscreta masnada
De bitri e mascalzoni,
Che se crede paroni
De la strada.
Oresi, chincaglieri,
Artisti, boteghieri,
Barcari, batelanti, pescaori,
Queli che conta storie, i saltadori,
Chi vende fulminanti per la note,
Cazze e sculieri e canole da bote,
Quei da le figurine,
Quei satrapi che vende tele fine,
Che vien diretamente
Da Ludromiria a cogionar la zente,
Chi recita orazion,
Quei che canta canzon,
Chi va co l'organeto,
Chi sona el clarineto,
Queli che vende fosfori e lumini,
Polvere da netar i candelieri,
Quei che spazza i camini,
Queli che fa braghieri,
Queli che giusta ombrele,
Quei da le bagatele,
Chi zira co la mola,
Chi mena la cariola,
Quel che conza lavesi e giusta piati,
Quelo che castra gati,
Quei che impizza i farali,
Queli che dà la patina ai stivali,
Le done da la late,
Queli che ga negozio de pignate,
Per la gran quantità
Che i ghe ne romparà,
E per finirla tuti
Omeni, done e puti,
De qualunque sia classe, de ogni età,
Nel'ano trentaoto ridarà;
E in mezzo de sto chiasso
Co tuto sto fracasso,
Co tuto sto favor,
Che se ve averze 'l cuor,
Co zorni de morbin
Che ve stuzzega l'estro,
Che sinamente 'l mestro
In scuola fa el bochin,
In tempo tanto mato,
In sto ano beato,
In sto ano bufon,
Sarà in malinconia
Solamente 'l paron
De spiziaria;
E i medici, e i chirurghi, brava zente,
Che venero e rispeto,
Ma che Dio me difenda averli arente
Quando me trovo in leto,
I so zechini storti
Guadagnai
A spale dei dolori
De tanti medicai
Ma che ze morti,
In ozio i magnarà come i signori,
Perchè fra el bon umor
Confido nel Signor
Che godarà la zente
Un stato de salute permanente.
Mi po per restar saldo al costituto,
Democrito bastardo de sti dì,
Senza scomporme ridarò de tuto,
E chi sa quanti ridarà de mi.