Pronostico de l'ano 1841

Da Wikisource
Va a: navigasion, serca

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
Pronostico de l'ano 1841
1841
←  Pronostico de l'ano 1840 Edission e fonte ▼ Pronostico de l'ano 1842  →
[p. 245 modifica]
PRONOSTICO DE L'ANO 1841.


Quantunque per meriti
     Me sia za convinto
     De aver fra i più celebri
     Un posto distinto;
D'entrar nel catalogo
     Indove a gran stenti
     Non entra che omeni
     De somi talenti,
E d'esser no dubiti
     De quei che la storia
     Tramanda coi seeoli
     Gloriosa memoria,
Se ormai da academie
     Se ormai da atenei
     Patenti me capita,
     Diplomi a cavei,

[p. 246 modifica]

Se adesso un gran numero
     De doti imparziali,
     Se opere classiche,
     Se fogi e giornali,
Scordando i preteriti
     Che ga studià el cielo,
     De elogi me fulmina,
     Me fa de capelo,
Nè tema el pericolo
     Che qualche nemigo
     Azarda de oponerse
     A quelo che digo,
Perchè i mii pronostici
     De cossa so bon
     Ga dà a vari stolidi
     Piu d'una lizion;
Quantunque, lo replico,
     Quantunque la fama
     Col nome de astronomo
     Pertuto me chiama,
Quantunque in ogn'angolo
     Mi ancuo fassa testo,
     Dotà de caratere
     Alquanto modesto,
Per far el pronostico
     De l'ano presente,
     E nel mio proposito
     Per esser coerente,

[p. 247 modifica]

Cioè col principio
     Che quanto gh'è in tera
     De fluido, de solido,
     De legno, de piera,
De grando, de picolo,
     De longo, de streto,
     De duro, de tenaro,
     De storto, de dreto,
Le femene, i omeni,
     Le piante, i metali,
     I bechi, le piegore,
     I mussi, i cavali,
Mossati, formigole,
     Le tarme, i mosconi,
     I vermi, le rusole,
     I ragni, i scarpioni,
E pesci e volatili,
     E mari e montagne,
     E nave e trabacoli,
     E boschi e campagne,
E mobili e stabili,
     Ordegni e stromenti,
     I atrezzi, le machine,
     I beni, i tormenti,
El cibo, le bibite,
     E sin le scarsele
     Influsso grandissimo
     I ga su le stele;

[p. 248 modifica]

Che seme e garatoli,
     E tochi e boconi,
     La sabia, la polvere,
     I magnamaroni,
La zuca, el cogumaro,
     I fruti da l'osso,
     La lista dei debiti,
     La dona da grosso,
La pase, la colera,
     La vita, la morte,
     El salto, la tombola,
     I cesti, le sporte,
El balsemo, el tosego,
     La dopia, el daoto,
     La gema purissima,
     El culo de goto,
Bocai de magiolica,
     Antiani e pignate
     De ogni calibro
     Sia rote che intate,
Le sponze, le mescole,
     El fuso, la roca,
     I fruli, le cogome,
     El zogo de l'oca,
I fati, le ipotesi,
     E sin l'intenzion
     Coi astri stretissima
     I ga relazion,

[p. 249 modifica]

Mi vero filantropo,
     Che pien de talento,
     Assiduo, istancabile
     No perdo mumento
Per esserghe utile
     Al genere umano,
     Da bestia strussiandome
     Studià go sto ano
Percossa la lagrema
     Ghe vien a le vide,
     Percossa Democrito
     De tuto se ride,
Percossa che i vechi
     No magna biscoto,
     La causa legitima
     Che tira el saroto,
Percossa spessissimo
     Un toco de legno,
     Usà a tempo debito,
     Ne svegia l'inzegno,
Percossa che 'l gambaro
     Apena l'è coto
     El veste la porpora
     De sora e dessoto,
Percossa che Leucade
     Scaldà s'à la zuca,
     Percossa Demostene
     L'andava in peruca,

[p. 250 modifica]

Percossa la fregola,
     Lo sa ogni marzoco,
     Ze sempre più picola
     Ma molto del toco,
Perchè à tolto Socrate
     La grega più bruta,
     E ga po da stolido
     Bevuo la cicuta,
Percossa, credeghela,
     Quel prode roman
     Zurando sul tripode
     Se brusa la man,
Perchè andava Romolo
     In spada e sacheto,
     Percossa che i musici
     I parla in falseto,
Percossa se dopara
     Pertuto i bruschini,
     Da cossa ga origjne
     I fioi setemini,
Percossa che 'l publico,
     E mi l'ò provada,
     Se volta co un aseno
     El dà la ragiada,
Perchè la luganega
     Ze fata a murei,
     Se ai mondo i bo picoli
     Ze i soli vedei,

[p. 251 modifica]

Perchè a l'emicranie
     Sogeti che mai
     Se trova da secoli
     Chi ze maridai,
Perchè del preterito,
     E mi son sicuro,
     Diversi se ocupa
     Più che del futuro,
Perchè tanti miseri
     In mezzo dei stenti
     Licando la mescola
     I vive contenti,
E invece chi spapola
     I megio boconi
     Ze sempre co l'anima
     Nel strucalimoni,
Percossa Lugrezia
     Da vera stordita
     Ga fato el sproposito
     De torse la vita,
Se za co giustissimo
     La fava el so conto
     Sfidar quel pericolo
     El gera un pan onto.
E po co la regola
     Dei quatro cantoni,
     Con sforzi de logica
     Che suga i polmoni,

[p. 252 modifica]

Coi feri acutissimi
     De la diligenza,
     A furia del trapano
     Che ga la pazienza,
Col mezzo mecanico
     Del tirabosson
     Cavae da le tenebre
     Le vere rason,
In un gran catalogo
     Ligà a lustro fln
     L'ò messe col titolo:
     Tesoro Nalin.
Co tanti miracoli
     De raro talento,
     Co tuta sta sgnesola
     Gnancora contento,
De opere classiche
     Su ogni sogeto
     E edite e inedite
     Fornio a marteleto,
Seguindo el mio metodo,
     Che ben ponderando
     El ga del magnifico,
     So andà via studiando
El son de le svanziche
     Pestae sui daoto,
     El canto dei talari
     Per chi ze candioto,

[p. 253 modifica]

L'impulso del mascolo,
     El pum dei canoni,
     Le facili scariche
     De tanti tromboni,
La strage de agricoli
     Che impianta carote,
     L'imensa foragine
     Dei secabalote,
La morte del stupido,
     El cuor de l'avaro,
     La ciera de Lazzaro
     Co el fava tabaro,
La torta de bigoli,
     La pasta sfogiada,
     Le machine eletriche
     Che zira per strada,
I coli de Ceneda,
     El monte Elicona,
     L'emporio de omeni
     Col muso da dona,
Le strussie diaboliche
     Che fa el manganelo,
     I casi che merita
     Campanamartelo,
Le ingiurie dei secoli,
     Le legi del fato,
     Le scarpe col scricolo
     Che usava Pilato

[p. 254 modifica]

Le rechie de Cerbero
     Col sente el paron,
     De Giuda bonanima
     La corda e 'l saon.
La forma del ichese,
     L'ochieto de l'e,
     La testa assae picola
     De quanti che sè,
Le bote del timpano,
     Dei corni el sussuro,
     El strepito incomodo
     De qualche tamburo,
Le zizole ezotiche
     Che zira el paese,
     Le molte gramatiche
     Che insinua el francese,
L'odor de la fritola,
     La carne de tasto,
     La roba sul stomego
     De chi vive casto,
El senso stranissimo
     Che fa la sorpresa,
     I efeti de l'aria
     Che vien da la sfesa,
La tomba de Etore,
     La tore de Pisa,
     La slepa che capita
     A brusacamisa,

[p. 255 modifica]

El pugno retangolo
     Che fra capo e colo
     A l'ombra de Nestore
     Ga dà Marco Polo,
La nota baritona,
     La chiave de basso.
     El viagio ingratissimo
     De andar a Patrasso,
El sugo del pampano,
     La meola del zoco,
     L'estrato de mamara,
     El gusto del gnoco,
El grasso del pevare,
     El fior de farina,
     I ossi invisibili
     Che ga la puina,
L'odor dei crepuscoli,
     Dei poli la base,
     La spuzza del tropico
     Che imorba le case,
Del cuor de le femene
     La falsa aparenza,
     La prova infalibile
     De amar per urgenza,
El stilo a tre angoli
     Col qual Baiasete
     Co el va zo dei bazzari
     I pomi fa a fete,

[p. 256 modifica]

La siega che Ercole
     Sui coli asolani
     Tagiava via el manego
     Ai bonicristiani,
La tragica britola
     Che a Lio sui sabioni
     L'ardito Temistocle
     Castrava i maroni,
La lama finissima
     Del prode cortelo
     Col qual Eliogabalo
     Trinzava el vedelo,
Del fiero Caligola
     La spada impontia,
     Che mazza le rusole
     Per tuta Turchia,
La forfe de Bortola,
     Muger de Lutero,
     Che a gratis benissimo
     Mocava el pavero,
La morte teribile
     Che à fato Pipin
     Sbranà dai corogoli
     In piazza a Turin,
El strazzo de abito
     Che ga la virtù,
     La forza simpatica
     Del caro culù,

[p. 257 modifica]

Le spezie tantissime
     Dei cani da toro,
     De Pilade i talari,
     De Creso el tesoro,
Le dopie spendibili
     Che ga Messalina,
     De Ortensia belissima
     L'imensa musina,
La sorte dei omeni
     Che ga i denti chiari,
     I incerti legitimi
     De tanti compari,
L'umor de la pegola,
     I spini del struto,
     L'amor a varigola
     Che sbusa pertuto,
El nostro me magnela,
     La chiapa, la toga,
     El gran me ricevela
     Che adesso ze in voga,
El zogo de tombola
     Zogà a modo mio,
     L'efeto che 'l genera
     Apena fenio,
I pomi da Modena
     Racolti a la Mota
     Del mile e quatordese
     Un soldo a la bota,

[p. 258 modifica]

El pie nel preterito,
     Che verso Noventa
     Bertoldo al so aseno
     Ga dà l'ano trenta,
El baso simbolico
     Che nel disisete
     Amor a Tersicore
     Ga dà su le sete,
La piomba de Atico,
     Che co la so cana
     Bastona le notole
     Dessuso in altana,
La testa mecanica
     Che inventa la carta,
     La man espertissima
     Che trova la quarta,
El tagio romantico
     De varie sartore,
     L'amor mimismatico
     De tante signore.
El fià de la vipera,
     L'odor del vedelo,
     El gusto de Titiro
     Co el gera putelo,
El bon che la specula
     Cigando sia premi,
     El tristo che prodiga
     In barca a do remi,

[p. 259 modifica]

L'ilustre sarcofago,
     Che i ga a Malamoco,
     Co drento la cenere
     Racolta da un zoco,
Le cene economiche
     De carne de colo,
     Che ò fato da zovene
     In campo a san Polo,
Le brute maranteghe
     Che dise magari,
     La sposa de Tantalo
     Che sfida danari,
El crudo Anassagora
     Che co la so spada
     El tagia finissima
     La robasalada,
Didon che trovandose
     Con Poro de sera
     Per no comprometerse
     La volta bandiera,
El tristo Cartesio
     Che su una fugassa
     In zorno de tempori
     Ga fato man bassa,
Chiapà da un'artritide
     Scipion african,
     Che arente de Tetide
     Se cava el pastran,

[p. 260 modifica]

Boote che fandoghe
     Da orso a Megera
     El mola le redene,
     El va de cariera,
Mnemosine in cotolo
     Che tuta una note
     Comenta co Lepido
     Cornelio Nipote,
Vicin Forapopuli
     Dionisio el tiran,
     Che visto el carnefice
     Ghe struca la man,
Netuno che in gondola
     Sentà co Susana
     Sorpreso dal refolo
     Se cazza in cavana,
El mostro che Andromaca
     S'à messo a magnar
     Sui scogi de Cataro
     De dopo disnar,
Aspasia che a Procolo
     De sera in laguna
     Facendo un apostrofe
     Ghe mostra la lima,
Goldoni drio un alboro
     Atento che varda
     Le ninfe a far licite
     Sul lago de Garda,

[p. 261 modifica]

Tancredi ch'Erminia
     Sorprende in mumento
     Che alzà ga le cotole
     Un colpo de vento,
Russò che se morsega
     I dei da melon,
     Volter che decrepito
     El zoga al balon,
El nono de Pindaro
     Che tira sarache
     Perchè nol ga elastico
     In te le tirache,
Neron col so seguito,
     Che tardi pentio
     El va a ca del diavolo
     Che 'l par un conio,
Orfeo sentà al cembalo
     Che solo soleto
     In chiave de alamire
     El canta un dueto,
Cartesio da picolo
     Che vede le stele
     Co el mestro, quel burbaro,
     Ghe dà le sardele,
Michiel Paleologo,
     Mercante da ochiali,
     Che mostra a Desdemona
     I so capitali,

[p. 262 modifica]

Bufon che se ocupa
     De una sansuga,
     El primo botanico
     Che pela latuga,
El celebre Ipocrate
     Che sora un capon
     Coi denti anotomici
     El fa la sezion,
Sul mar adriatico
     Galeno insolente
     Corsaro da svanziche
     Go sporca patente,
El barba de Antenore
     Che basa sior'amia
     Nel'ato de andarsene
     In Mesopotamia,
L'infame Epimenide
     Che sul bacalà
     Dà bote teribili
     A caso pensà,
Tremante Proserpina
     In sponda a la Piave,
     Che in brazzo del satiro
     La buta le bave,
A Chiozza sul pergolo
     Sentà Epaminonda,
     Che arente de Momola
     Ghe giusta la tonda,

[p. 263 modifica]

Pluton e i so satrapi
     Che ze in gran facende
     Co l'orzo de rovere
     Per dar le marende,
Virtù malinconica
     Che crepa da fame,
     El Vizio che giubila
     Magnando polame,
L'Onor in incognito,
     Che stenta a trovar
     Secondo i so meriti
     Un sito da star,
Giustizia dai omeni
     Tenuda in caena,
     Che de poder moverse
     In caso ze apena,
L'Ingano che medita
     Co tanto de muso,
     Amor che ficandose
     El va in ogni buso;
E dopo al mio tavolo
     Sentà in dirindela
     Co un strazzo de mocolo,
     Che gera candela,
Insin che le notole
     Su e zoso le zira,
     Co grandi, co picoli
     Le slache destira,

[p. 264 modifica]

No essendo pussibile
     Che in altri mumenti
     Mi possa con comodo
     Tratar sti argomenti,
Go fato l'analisi
     De tute ste cosse
     Co un metodo chimico
     Che pochi conosse,
Nè'l genio mancandome,
     Nè quela energia
     Che ze indispensabili
     Per l'astronomia,
De note tardissima
     Col mio canochial
     Che ga qualche radego;
     Ma senza l'egual,
Perchè l'è ben debole
     Un poco de susta,
     Nè in tera un artefice
     Ghe ze che lo giusta,
Ma a far esatissime
     Le mie osservazion
     Eh eh ghe ne fussela!
     Ancora l'è bon,
So andà dessù in specola
     Col globo e la sfera.
     Con carte geografiche,
     Balanza e staliera,

[p. 265 modifica]

Con stanghe e con perteghe
     Per far la salita,
     Co prismi e barometri,
     Co la calamita,
Con camare otiche,
     Col sbusamontagne,
     Co machine eletriche,
     Col spazzacampagne,
Coi tubi idrostatici,
     Compasso a la grega,
     La sponza, la sessola,
     La piana, la siega,
La scala portatile,
     La corda e 'l saon
     Se mai de valermene
     Gavesse ocasion,
Le lenti diuretiche,
     La piera del toco,
     L'automa spasmodico
     Che segna el siroco,
El spechio a riverbero
     Che vede pertuto,
     L'imenso pantografo
     Che regola el suto,
El tachigonimetro
     Che pesa l'odor,
     La pila vulcanica
     Col so bataor,

[p. 266 modifica]

I libri sonambuli,
     La nosa a tre coste,
     L'estrato de fulmine
     Co el va per le paste,
El timpano idraulico,
     Le so brave mazze,
     La canola isterica,
     El mio cavastrazze,
El milimilimetro
     Che calcola el fià,
     Le trombe sordometre
     Per star desmissià,
El pelo de l'istrice,
     La mumia, l'aborto,
     Cavei de mandragola,
     El cragno da morto,
La squara, la bussola,
     La scuria, i speroni,
     El noto notissimo
     Crivel da meloni,
La vesta da camara,
     Un per de braghesse
     Per tuto quel diamberne
     Che nascer podesse,
Relogio col pendolo
     Ombrela e gaban,
     De l'aqua potabile,
     Un toco de pan,

[p. 267 modifica]

El mio barilometro
     Co un sechio de vin,
     Baston fato a crozzola,
     El saltamartin,
Un per de pantofole,
     Un fià de faral,
     La bozza de spirito
     Se mai me vien mal,
I fosfori, el cotego
     Col lardo tacà,
     El vaso cacometro,
     El mio papagà
E là, logo magico,
     Dal qual vegno fora
     Co nasce i crepuscoli,
     Co sponta l'aurora,
Ze dove che intrepido
     Cimento l'onor,
     Corendo sui secoli
     In barca a vapor,
Ze dove che in estasi
     Movendome apena
     Sin che done e omeni
     Se slapa la cena,
E sin che scordandose
     Disgrazie e malani,
     Che dà à l'uman genere
     Sta vale de afani,

[p. 268 modifica]

Sul leto pacifico
     De morte aparente
     I aspeta che capita
     El zorno vegnente,
Supiando da mantesi
     Coi ochi sarai,
     O fando le tombole
     Se i ze desmissiai,
Mi povaro diavolo
     Atorno del cielo
     La mente me logoro,
     Me limo el cervelo,
Misuro ogni spazio,
     Percoro ogni sito,
     Su tuto me ocupo,
     De tuto aprofito,
Distrugo l'idrogeno,
     Disperdo i vapori,
     Anichilo i atomi,
     Divido i colori,
Sospendo l'eletrico,
     Perseguito i venti,
     Dispono l'amalgama
     Dei quatro dementi,
Dilato le nuvole,
     Sparpagno el baligo,
     E osservo le Pleiadi
     Che gode l'amigo,

[p. 269 modifica]

E Orion e Mercurio,
     E Giove e Saturno
     Atorno de Venere
     Secondo el so turno,
E Pegaso e Andromeda
     E Ocipite e Marte,
     Che investe la Vergine
     Da tute le parte,
I Pesci, l'Aquario,
     El Can, el Serpente,
     La Sirio o Canicola,
     El Caro lusente,
La Copa, el Triangolo,
     L'Ariete, el Scarpion,
     El Toro ardentissimo
     Dadrio del Lion,
E Castore e Espero
     Arente la zona,
     La Spiga, la Lucida,
     E l'Orsa e Corona,
E tuti tutissimi
     I astri del cielo,
     Dei quali ze inutile
     Che fassa l'apelo,
Se za al magior numero,
     De assae curta vista,
     I ze nomi arabi,
     Sa apena che i esista,

[p. 270 modifica]

E co arivo al termine
     De le osservazion
     La pena me temparo,
     Me cazzo in canton,
L'idee racapitolo
     Sentà a tavolin,
     La testa me strucolo
     Per far l'indovin.
Torturo la logica,
     Estenuo el bon senso,
     Lambico la fisica,
     Ghe studio, ghe penso,
Me strussio, me snombolo,
     Me slongo, me scurto,
     Me ponzo, me pizzego,
     Me fraco, me urto,
Me pugno, me morsego,
     Me slargo, me strenzo,
     Me sgrafo, me supego,
     Me tiro, me spenzo,
Me puzo, me colego,
     Me levo, me sento,
     Me calmo, me concito,
     Risolvo, me pento,
Averzo parentesi,
     Consumo tratati,
     Estendo i mii calcoli
     De mile segnati,

[p. 271 modifica]

Divido, moltiplico,
     Ghe cavo, ghe meto,
     I dati retifico,
     Barato el progeto,
E liquidi e solidi
     Mi meto a contato,
     E numero i atomi
     De tuto el creato,
Me pianto le ipotesi,
     Me creo dei sistemi,
     Me fisso le regole
     Me sciolgo i problemi,
Compono la cabala
     Sul libro del fato,
     De l'orbe teraqueo
     Contemplo el spacato,
E co semicircoli,
     Con curve, con rete,
     Con angoli elitici
     Da l'un sin al sete,
Su l'ago magnetico
     Tegnindo la man,
     Inoltro le indagini
     Nel tardo lontan;
Sorprendo i fenomeni,
     Esploro i destini,
     Rimonto a l'origine,
     Determino i fini,

[p. 272 modifica]

Rilevo le cause,
     Colpisso l'efeto,
     E a far el pronostico
     Alora me meto.
Sta vita diabolica,
     Ste strussie da can,
     Che torna a vantagio
     Del genere uman,
Sta vita fra l'improbe
     La pezo de tute,
     Che va consumandome
     E bezzi e salute,
Da quando so astronomo
     No go esercità
     Più atenta, più assidua
     De l'ano passà,
Ma ò scrito un pronostico
     Che ze cussì esato,
     Che ze su ogni articolo
     Cussì detagliato,
Che un quadro da Xeusi
     Ve fa del futuro,
     Che spiega chiarissimo
     E in modo sicuro,
Non solo i fenomeni
     De l'atmosfera,
     Ma anca el gran numero
     Che gh'è su la tera,

[p. 273 modifica]

E a quei che de lezerlo
     Ghe tira la gola
     Ze pronto de darghelo
     Sior Checo Andreola.