I ride come mati.
Dopo el quadro che vo fato
Cussì ingenuo, cussì esato,
Co licenza de mia mare
Pararia che la comare
Dito avesse una panchiana
Deponendo a quel mumento
Che sia nato ficà drento
Quela spezie de membrana,
Che vien dita da la zente
Camiseta volgarmente;
Ma se mai per caso raro
Co sta sorte de tabaro
Fusse al mondo capità,
Da mi dunque ze provato,
Che nol serve gnente afato
A far l'omo fortunà,
Perchè son sora la tera
Tratà in modo, in tal maniera,
Che se mai donà dal cielo
No gavesse un bon fradelo,
Muger cara, un dolce fio,
Mia speranza, idolo mio,
Una mare, una sorela,
La farave veder bela:
Nela panza d'una bote,
Mi soleto zorno e note
Voria viver tuto l'ano
