Pronostico de l'ano 1836
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1835 | Edission e fonte ▼ | Pronostico de l'ano 1837 → |
Nela specula mia dessù in sofita,
Che ze un vero tugurio, una sorzera,
Solo soleto come un eremita
Me vago a retirar squasi ogni sera,
E sina che dabasso
Mia mare, mia sorela, mia fradelo,
Che dorme più d'un tasso,
E mia muger in leto
Concerta col putelo
Un barbaro dueto
Le ore co le ore ronchizzando,
Col canochial mi vago lavorando,
E vogioso de far,
Come sempre ò mirà, bona figura
Cerco de penetrar
Nela natura
Spesso vegnindo el zorzo sul più belo,
A robarme le stele che ze in cielo.
Sta vita laboriosa, sto festin,
Che la salute m'a pregiudica,
L'ò esercitada dal principio al fin
Tuto l'ano passà
Vardando co atenzion e luna e stele
E tuti i astri,
Fra venti, fra procele
E fra disastri
Per esser ben sicuro
De poderve predir
Quelo che nel venturo
À da vegnir;
Per no perder la fama,
Che co tanti suori e co pazienza
Me so acquistà in sta scienza
E per aver el gusto che i me chiama
Co tuta la rason
No co l'insulso nome de poeta,
No col titolo basso de schieson,
Ma con quelo de astronomo e profeta.
E sicome savè che do ani fa,
Causa del mio bestial temperamento,
Ò roto, ò sfracassà
Qualunque sia strumento,
Ò fato una fugazza de la sfera,
Go da vero bastaso a son de bote
Ridoto una cagnera
El mio famoso canochial da note,
Scordandome da ingrato
Un servizio per ani tanto esato,
E da bruto deciso, da tiran
Con giudizio statario
Dei classici go fato un sancassan,
Cussì per provederme 'l necessario
Machine, boni atrezzi, scielti autori,
Go speso dei tesori;
E basta dir che un vechio brazzoler
Tuto quanto dal tempo cariolà
Che Neuton ga comprà
Per so muger,
Col qual ga dopo tolto la misura
Del spazio che presenta la natura,
Per grazia, per favor,
A conti fati
Go co tante parole al possessor
Esborsà vintiquatro colonati:
Che un picolo modelo de carton
Fato per dimostrar come a l'Aurora
Avanti dì Titon
Ghe dà la spenta aciò la vegna fora,
El m'à costà, che no le ze panchiane
Do centenera e passa de sovrane:
E per aver un certo calendario
Scrito dal padre Ilario
Fiorentin,
Che ga fato a Pechin
Da missionario
Go calumà sie mesi de salario.
Provisto in conclusion de l'ocorente
Go dedicà co impegno
Tutoquanto el mio inzegno,
E la mia mente,
Metendo a la tortura
Quel squisito inteleto
Che m'à acordà natura
Per sortir con onor dal mio progeto;
Go fato un studio atento
Su la capacita del firmamento,
Go esaminà le stele una per una,
Go contemplà la luna,
E go petà de schena
Sin che l'ò vista piena;
Co gran utilità
Me ne son ocupà
De le comete tute
E crinite e barbute;
Me son fermà sul moto dei pianeti,
Su l'orbita diverso che i percore,
Sora i magici efeti
De le aurore;
Co tuta l'atenzion
El sol so andà vardando,
E per le mie rason
Segnatamente quando
Senza dificoltà
In vergine l'è entrà,
E so stà tanto atento
A l'ato de andar drento,
Che far ve podaria la descrizion
De l'ora, del minuto,
E de la posizion,
Perchè go visto tuto;
E quela machia imensa
Su la qual sento tanti a dotorar
Disendo suso quelo che i se pensa,
L'e un erpete solar
Comparso alora
Che 'l ze venudo fora;
Go a forza de compasso
Con un calcolo esato
Tuta da l'alto al basso
Misurà l'estension che ga el creato;
Col mezzo de la bussola
Trovà go el punto centrico,
L'estremità del circolo.
La spiegazion de l'otica,
L'elastico del muscoli,
La linfa del bisbetico,
El germe che ga i polipi,
La mossa del sonambulo,
La cavità del vortice,
La procreazion dei retili,
La causa de l'eletrico,
L'influsso de le tenebre,
La massa de l'idrogeno,
El corso de le nuvole,
I strati che ga l'iride,
I gradi del calorico,
El simiton del refolo,
La proprietà de l'ossido,
De l'aria el combustibile,
De l'ombra le molecule,
El moto peristaltico,
El numero dei atomi,
L'inclinazion del tropico,
La forma dei crepuscoli,
I angoli retangoli,
Le curve i perpendicoli,
I piani d'ogni genere,
Che fa chi vol co l'algebra
Pagar tuti i so debiti,
E co infiniti computi,
Co sotre e co moltipliche,
Con studi matematici,
Con aparati e machine,
Con sforzi de mecanica,
Co esperimenti fisici,
Che megio assae d'un zovene
Go fato tuto l'ano,
Le creda se le vol, se no a so dano,
Mi go fissà i confini dei torenti,
Mi ò scoverto la base dei vulcani,
Mi go trovà l'origine dei venti,
La gravità specifica dei ani,
La forza sorprendente del pecà,
L'impulso singolar che ga le spente,
La gran facilità
Che gh'è de nascer fioi de l'acidente,
L'istituzion remota del rufian,
La rason che ghe ze
Co se scrive in toscan
De meterghe l'acento su potè,
E fra le tante cosse ò rilevà,
Facendo una fadiga da fachin,
Che quel porno che Adamo ga magnà
El gera morosin.
Dopo ste complicate osservazion
Che strussie, tempo e bezzi m'à costà,
Co tuta la più assidua aplicazion,
Senza per cussì dir tirar el fià,
Uno a la volta ò leti
I astronomi proveti,
E avendo adesso giusto a menadeo
Copernico, Cartesio, Galileo,
Persuaso me son che tuti quanti
Credendose qualcossa i gera gnente,
I ga piantà sistemi stravaganti,
1 ga inganà la zente,
E buzzare i ga dito
Che no le ghe stà drento de sto sito.
Tanti altri libri ò leto,
Che quantunque stranieri in aparenza
Al scabroso sogeto
De sta scienza,
Un omo ben fornio
De vogia e de talento,
Del calibro del mio,
Trova argomento
Qualcossa de cavar,
Nè me lo pol negar
Che qualche sempio;
Come ze per esempio
La storia dei barili,
Le regole a trionfeti per l'acuso,
La patente otomana sui sigili,
I anetodi sul fuso,
Le memorie de un gran naturalista
Sul bruco che deventa una farfala,
Sul piaserghe a le done a prima vista,
Sul modo de butar zo per la scala,
Su le parole che finisce in ona,
Su la forma omogenea de la torta,
Sul quando la morosa se bastona,
Sul come se va drento de la porta,
Su l'amor mercenario dei gentili,
Su la diversità che ga ogni muso,
E sora el privilegio che ga i grili
De star sempre sul buso;
El gran tratato in versi marteliani
De autor insigne su la sponza frita
Per far crepar i cani,
Che povareto ga costà la vita,
Perchè per imprudenza
Vitima l'è restà de un'esperienza;
Un certo manoscrito,
Che m'à parso in latin, del cinquecento,
Sora la malatia de l'apetito
Indove ghe ze drento
Un belissimo rame
Co do poeti sgangolii da fame;
L'opera in cento e trentasie volumi
Che trata sul progresso dei costumi,
Sul mal dei beni e sora el ben dei mali,
Su l'istinto del bruto,
Sui lucidi intervali,
Sora l'istituzion del ex abrupto,
Su la natura varia dei meloni,
Su l'imensa famegia de le sfese,
Su l'uso complicato dei coconi,
Sul titolo rimoto de marchese,
Su l'etimologia del Caimacan,
Sul tempo che ghe vol per far de ochio,
Sul zogo propagà del cresci in man,
Su la vera misura del batochio
De l'antica campana marangona,
E sul modo gentil che i ne la sona;
I quatro scartafazzi
Che nei casi de urgenza
Dà le avertenze per molarla a brazzi
Senza portar oltragio a la decenza,
Coredai da dusento e più figure
Benissimo miniae
In varie positure
Incantonae,
Che senza dir parola
Su la publica strada
O i l'à apena molada
O i ve la mola;
Una disertazion,
Che no sò la rason
La ze proibita,
Co del bon gusto scrita
Da un certo Menelao,
Su l'esteso comercio del cacao,
Su le braghe de pele che Marfisa
Portava sempre soto la camisa.
Sul sugo che vien fora dai susini,
Sui robi che fa antitesi coi cali,
E sule tante spezie de bruschini
Da scarpe e da stivali;
E sinamente ò avudo per le man
Un poema bernesco in venezian,
Stampà credo a Cremona,
Sora le maravegie
Che ga fato una stolida de dona
Co la s'à visto el pelo su le cege,
E sul stupor de quela tosa scioca
Co la s'à visto el buso de la boca.
Col sussidio de tante erudizion
Dai mii studi aquistae de trato in trato,
Co una strage de scielte anotazion
Che su vari argomenti me son fato,
E co la scorta posso dir completa
De ogeti che me costa una moneta,
M'ò lambicà el cervelo
A comporme un sistema planetario,
Lavoro veramente da cartelo,
Da queli che gavemo afato vario,
E che un sagio darà ve lo prometo
De cossa ze capace el mio inteleto:
Go butà zo un tratato
Indove me son fato
La descrizion esata
Del cielo, de l'epata,
De le fasi lunarL
E del flusso e riflusso che ga i mari:
Go esteso un repertorio,
Che quantunque, le sà, mi sia modesto,
Nonostante me glorio
Aver podesto
Mostrar a colpo d'ochio esatamente
D'ogni corpo celeste in esistenza
Fisso, vagante, opaco, risplendente,
El nome, el sito, el corso, e l'influenza:
Go ridoto a tabela,
Impiegando sie risme e più de carta,
La distanza che gh'è fra stela e stela
Senza falar in tute de una quarta:
E ò stabilio con calcolo profondo
Quanto che ancora à da durar el mondo,
Certo de no sentir a dirme dopo
Che la montagna partorio ga el topo.
Tuti sti gran lavori,
Ste mie opere tute,
Che m'à costà suori
E la salute,
A le stampe darò
Quando che gavarò
Scrito le anotazion
Per certa zente
Che senza la più chiara spiegazion,
Dura de modegal no intende gnente,
Perchè le saria cosse da legnae,
Senza farme la corte,
Che al publico vegnisse defraudae
Opere de sta sorte
In un tempo al de là de stravagante
Nel qual gh'è sin chi stampa
Quando el tol el purgante
E co ghe scampa.
Co sti bei materiali al mio comando
So andà fantasticando,
Me son più assae de un aseno strussià
Per far el mio presagio, ecolo qua:
Ma prima che lesè
Bisogna che sapiè,
Che sicome per mia fatalità
Nel più puro latin l'aveva scrito,
E prevedeva za
Che causa l'ignoranza,
De la qual gh'è abondanza
In ogni sito,
El numero magior no intendaria
De l'ano trentasie la profezia,
Anca per la rason
Che in latin mi go un stil decisamente
Da tuti i latinisti diferente,
Cussì ò pensà de far la traduzion
Per publicarlo in versi veneziani
Come l'ò publicà tuti sti ani:
Ma essendo per l'ufizio
Che me dà da magnar molto ocupà
La musa go pregà
De sto servizio,
E quela bruta striga,
Che no ze tropo franca nel latin,
Nè à volesto adatarse a la fadiga
De vardar qualche volta el calepin,
La me l'à no tradoto, ma tradio,
La ga fato desio,
La me l'à rovinà;
Co ò scrito chiaro la ga scrito scuro,
L'è andada avanti co go stralassà,
Co ò messo molo la m'à messo duro,
La à fato punto co go seguità,
La m'à la zuca convertio in t'un pomo,
La me ga batizzà salata el fien,
La m'à la bestia baratà co l'omo,
La à dito mal co mi go dito ben,
Cussìchè se previen
Chi lese el mio presagio de sto ano
Che l'è trato in ingano,
E che quela trombona
Quel'infame poltrona
Poco onesta
Ga ficà de so testa
Co cativa maniera
Certe bestialità, certe lasagne
Che no gh'è su la tera
Le compagne;
Dopo de sta avertenza
Che ò credesto de darve
Per scrupolo deciso de conscienza,
Perchè possiè nei conti regolarve
Con un dato sicuro,
Questo qua ze 'l presagio del venturo.
L'inverno lo prevedo
Longhissimo e assae fredo:
Da otobre sinamente
Al mese de febraro
Se vedarà la zente
A star anca per casa col tabaro;
Scomenzarà le done a san Martin
Col fogo in tel scaldin
A cossa brustolarse
Se pol imaginarse;
In magio ghe sarà
Tanti che gavarà
Le man dure inganfie,
Le buganze in tei pie,
E diversi impetrii come un sorbeto
Che ancora se farà scaldar el leto.
Col fredo a diese gradi soto el gelo
La neve zo dal cielo
A fiochi cascarà
In tanta quantità
Da sfracassar i teti,
Da ingossar i canali che ze streti,
Da blocarne la porta de la strada
In forma che per basa
El zorno dopo che la ze cascada
De andar fora de casa
Rischiar se podarà
Senza paura
I omeni che ga
Dodese bone quarte de statura,
E i picoli sarà necessitai
A star dove i se trova sequestrai.
Per setimane intiere
La bora supiarà teribilmente,
Vegnarà ogni qual trato levantere,
Che ghe farà far tombole a la zente,
E che alzarà le piere
Come che mi alzarave un curadente,
Fando desio dei scuri
Che pestarà sui muri,
E butarà in boconi
Le lastre dei balconi.
Dal principio d'inverno al terminar
No ghe sarà zornada
Che no vegna a secar
O neve o piova opur roba giazzada;
La note squasi sempre tenebrosa,
E se per caso ghe sarà le stele
Cascarà zo una brosa
Da doparar le ombrele.
La laguna dal giazzo
Sarà come un terazzo
Indove da per tuto francamente
Caminarà la zente,
E dove farà viagio
Anca quei che no ga certo coragio;
Senza boleta e senza contrabando
A l'uso de cucagna
Andarà da ogni parte capitando
La roba che se magna;
A tiro a sie cavai sul canal grando
Se gavarà la bruta compiacenza
De veder a arivar la diligenza;
Corarà suso e zo sera e matina
Da Mestre e da Fusina
Timonele, carozze, caretoni,
E smontarà in piazzeta,
O su la nostra riva dei schiaoni,
Chi col fagoto chi co la sacheta
E chi coi so forzieri
Vestii come i va in Russia i forestieri.
Quaranta zorni a da durar el giazzo
Nel nostro canalazzo,
E per l'interno
Squasi tuto l'inverno,
Grosso tre bone quarte e cussì duro
Che ghe ne indormo al muro,
E quel che mai s'à dà, cossa assae strana
Drento de qualche alogio
Co tuti i quatro lati a tramontana
Un sorbeto sarà l'aqua de bogio.
Gavaremo severa
Tuta la primavera,
E ghe sarà el festin
De un vento da borin
Che ne rinfrescarà
Sin la scarsela,
E che ne obligarà
De star co la fanela
E in codegugno
Anca el mese de zugno.
Per mancanza assoluta de calori
La tera squasi spogia
Sarà de piante e fiori,
I albori la fogia
Butarà fora a stento,
Picolo insenetio
Se mostrarà el formento,
La campagna per tuto sarà indrio,
E malapena in magio spontarà
L'erba su qualche prà.
L'istà sarà pesante,
Afanoso, insistente e stravagante;
Darà suso ogni tanto scontraura,
Ogni tanto farà la garbinada,
E no sarà sicura
La zente a caminar per la so strada
Dai refoli de vento
Che vegnarà improvisi ogni mumento
Portando da la testa via i capei
A omeni e a putei,
E alzandoghe a le done, da batochio,
Le cotole dessora del zenochio.
Tempeste a più non posso,
Che ogni gran sarà grosso
Quanto almanco ze grossa una burela,
Su l'esempio de quela
Cascada za do ani
A consolar i campi padoani.
Bissabove, sioni
Teribili e frequenti,
Che senza complimenti
Despiantarà i matoni,
E che farà svolar come un piumin
Le piere da molin.
Lampi tremendi da cavarve i ochi,
Toni da farve giacomo i zenochi,
Fulmini a prussission da spaventar,
De queli che ga in cesto i condutori,
E che andarà a petar
Dove i vol lori.
Sarà matina e sera
E sofego e brusera
E soli cussì ardenti
Che secarà i formenti,
El sorgo el cinquantin;
La ua poca e incandia
Ne predirà de vin
Gran carestia,
E da fien e d'erbagi e d'ogni fruto
Penuria de per tuto,
A grado che le zuche
Sia sante, sia baruche,
Sto ano fra i signori
Farà i so gran furori.
El caldo arivarà
A trenta gradi e che la staga là:
I omeni più forti e ben tressai
Sarà mezzi desfati e supegai:
Le done povarete snombolae
A forza de suae:
Da l'ardor afanai
Sarà tuti per tuto spalancai,
E quel che mai s'à dà
Spesso se trovarà
Su la publica strada
Con oror
De la zente negada
In tel suor.
No ghe sarà a memoria de nissuno
Piu scelerato autuno;
Dominarà sirochi
Da far le gambe a tochi
A tute le ore,
E sarà le signore
Stufe dei so galanti,
Che chiapai dal siroco i ze pesanti.
Gavaremo calighi ma de quei
Che destira i cavei
Malapena scotai,
E che co andarè fora
Ve ridurà bagnai
In manco de mezz'ora;
Le barche dei tragheti
Vogae da barcarioli i più proveti
Facendo la parada
Se perdarà per strada,
Le cigarà sia premi,
Le cigarà sia stali,
Le se urtarà coi remi,
Le petarà in tei pali,
E qualcheduna in tanto curto viagio
El rischio corarà de far naufragio.
A una maniera nova
Vegnarà zo la piova,
E tantissimi di
No bastarà nè ombrela nè stivai
Che se sarà negai
Dai cavei de la testa sina ai pì;
L'aqua penetrarà
Dai colmi ai primi piani
Portando imensi dani;
Le done intonarà
Continui piangistei,
Che là ghe vien in casa,
A sechi no, a mastei,
E i fatori e i marii perchè le tasa
Se trovarà costreti
Senza vardar a spesa
De governarghe i teti,
E stroparghe al pussibile ogni sfesa.
Da la matina a sera
Nuvolo el ciel sarà,
Nè mai se vedarà
Del sol la spiera;
Causa del tropo mogio o tropo suto
Se mancarà de tuto,
E contro la stagion
Perversa, scelerata
Se sentirà la zente co rason
A cigar de continuo la cruciata.
In general po l'ano
Sarà pien de fenomeni e assae strano:
Stando ai calcoli esati
De uno che à studià l'astronomia
In quei tempi beati
Che à fato la trotada Enoc e Elia
E che da mi ze stai
Co tuta precision retificai,
In setembre la terza o quarta note
Comparirà fra ostro e tramontana,
Dal caro de Boote
Pochissimo lontana
A banda dreta,
Una imensa cometa
Col nucleo grando come una polenta,
Co un longhissimo corno che se stenta
A vederghe la ponta
Quantunque el sia assae chiaro
Essendo afato sconta
Nel dadrio dei cavai che tira el caro,
Co una barba assae folta
Messa in sito piutosto seducente,
E co una certa coa che se ghe volta
In forma de serpente
Longa tremile cinquecento mia
A conti fati co l'astronomia.
Se vedarà a ponente
Verso le fondamente
Una stela da novo
De la forma d'un vovo
E d'un splendor
Che con somo stupor
Ne pararà
A gas l'orbe teraqueo iluminà.
E a dies'ore, tre quarti e do minuti
Ogni note de agosto,
A la vista de tuti
Aparirà discosto
Dal Can do soli dei
Fra Espero e i Zemei
Un corpo opaco assae più de la Luna
Che 'l corso alterarà de la laguna
Sti astri straordinari, piansti eti
Produrà su la tera certi efeti
Bizzari, stravaganti, prodigiosi,
Sorprendenti cussì
Che atorzio mandarà tuti i studiosi,
Per altro via de mi,
Che pien de cognizion
La mastego benon,
Nissuno ormai me par
Che me possa negar
Un squisito inteleto,
Se go da da capir quanto che peso
A chi m'à leto,
E ai pochi che m'à inteso.
Cinque eclissi solari
Se gavarà nel'ano trentasie,
Tre de le quali tanto singolari
De far omeni e done sbalordie,
Perchè le durarà
Vintitre ore e un quarto de secondo,
Nel qual tempo sarà
Scuro profondo,
E de bel zorno zirarà per strada
Col codega la zente acompagnada,
Secondo certi indizi,
Fruto de le mie atente osservazion,
Quatro sarà i solstizi
Causa la complicata rotazion,
E più de qualche dì se vedarà
Specialmente in istà
El sol da l'orizzonte a vegnir fora
Vari minuti prima de l'aurora.
Per abondanza d'eletricità
Che tuta infiamarà
L'atmosfera,
E per i gran vapori de la tera,
Ogni quarto de luna vegnarà
L'aurora boreal,
Ma de un genere tal,
De un tal splendor,
Da dover far supor
Che in qualche logo
Gabia, Dio ne difenda, chiapà fogo:
Tuti da tuti i lati,
Chi per curiosità, chi per paura,
Corarà come mati
In gran premura:
Le vechie scaturie,
Scampae fora de leto
Co le so scufie e senza gnente in pie
Dal gran spagheto,
Le vegnarà al balcon
Coi mocoli impizzai
Domandando rason
A chi passa per là del tananai:
Le done sui campieli
Co in brazzo i zo puteli,
Chi co una scarpa, chi co una zavata,
Persuase de fogo che se trata,
Ghe dirà a Caio a Tizio:
Caro elo
El ne fazza el servizio,
Indove zelo?
Ricercarà la zente
Dal strepito confusa
El sito che se brusa,
Sina che finalmente
Per tuta la cità
L'ingano singolar se scovrirà.
Per ecessiva forza de atrazion
De la cometa che comparirà,
De la qual fato go la descrizion,
Un'aqua tanto alta vegnarà
Sora comun do brazza,
Che le barche ogni strada zirarà,
E in mezzo de la piazza
Co stupor
Butarà zoso l'ancora el vapor.
Sucedarà frequenti
Le rote dei torenti
Che i campi alagarà:
Co manco se se aspeta vegnarà
Scossi de teramoto replicati,
Cussì insistenti e forti
Da far che casca zoso i fabricati,
E da lassar un numero de morti:
Gomitarà i vulcani
In modi spaventosi e repentini
Da subissar i popoli vicini,
E da portar gran dani
A quei che ze lontani:
Sucedarà naufragi, falimenti,
Incendi ogni qual trato,
Ingani, tradimenti.
E tuto quel de ingrato
Che se pol figurar le umane menti.
Scarsezza ghe sarà
De pan, de vin, polenta, de carname,
De pesce, de polame,
D'erbagi, fieni e biave,
E grandissimo pregio aquistarà
Le patate e le rave:
Tuto sarà assae caro,
Una nespola un traro,
Un figo un disisete,
Diese lire una zuca,
El late costarà più de le tete,
E più de qualche testa la peruea:
No ghe sarà in sostanza
In tuto l'ano
Che una gran abondanza
De inseti che fa dano,
De animali schifosi e ributanti
Da secarne la mare a tuti quanti.
Strage de papatasi,
Nuvole de mossati malegnasi,
Che malapena in leto
I vegnarà a la rechia
A cantarve in falseto
Quela musica vechia
Del i.... i....
Insina che fa dì,
E i ve darà beconi
Da farve i tavaroni
Sul viso, su le man, dove che i pol,
Anca in quei siti che no bate sol.
Un emporio de pulesi ziganti
Adosso gavaremo tuti quanti,
E le povare done spezialmente,
Che soto de le cotole irabiae
Se darà lanternae
Continuamente.
Cimesi grossi più de masanete
Molesti quanto mai,
Che ne starà tacai
Come sanguete,
E che se li schizzè per acidente
I esala sul mumento
Una essenza fetente
Da andar in svanimento.
Peochi tanto fati
Grassi come porcei,
Che vive i dì beati
Fra i cavei,
E che de quando in quando
A passo de poltroni
I va de contrabando
Sora de le velae, dei veladoni.
Schiavi che spuzzarà tre mia lontan,
Negri come la panza del camin,
Scomenzando dai copi al primo pian,
Che in te la scafa gavarà el casin.
Tantissimi scarpioni
Da per tuti i cantoni,
Che se per caso mai
No gavarè avertenza
Perdarè l'esistenza
Velenai.
Gran ragni col boton
Che se i ve dà un becon
Anca de chiaro dì vedè le stele;
Rusole ma de quele
Col pelo cussì duro e cussì acuto,
Che se le tocarè
In manco d'un minuto
Ve sgionfarè
Per tuto.
Pantegane da rio
Co tanto de dadrio,
E sorzi smisurati
Da baterse coi gati,
De quei che co pazienza
I ve riduse a fregole a boconi
Qualunque sia credenza
Megio assae dei più bravi marangoni,
E i fa de quel che i cata
Una netisia esata,
Lassandoghe al paron
Le prove d'una bona digestion.
Formigole a milioni,
Che se inia in ogni sito e che molesta,
Caterve de mosconi,
Che va rusando e fa tanto de testa;
Luserte, scarafagi, calabroni,
Torcoli, cavalete una tempesta,
Imense topinere
Che sbusarà le piere,
Lumaghe, rospi, rane,
E notole e pogiane,
E gufi e martoreli,
Corvi, cocai, falcheti,
Faragine de oseli
Maledeti;
E bisse e carbonazzi
Piu grossi dei mii brazzi.
E vipere e serpenti
Co baterie de denti
Acuti e velenosi,
Che se mai qualcheduno ghe va solo
El mor convulso no ghe ze saroto.
Tornarà i capeloni
A vederse impalai
De note sui cantoni
Deposta sora i ochi intabarai;
Tornarà l'orco, tornarà i foleti
A fame dei spagheti,
E a far deventar mate
Le povare inassere
Butandoghe le sere
In tochi le pignate;
Tornarà strighe, tornarà le fade
A zirar sora i copi e per le strade,
E tante note co saremo in leto
El pesariol ne vegnarà sul peto,
E come se farave dei limoni
Ne strucarà i polmoni.
Le done morirà da epizoosia,
Che ze la malatia
De la muger del toro,
E i omeni più sani
Morirà in do tre zorni dal samoro,
Mal che sinora ga soferto i cani;
Ma ogn'altra infermità
A torselo andarà
Co l'aiuto de Giove,
Ele capisce dove.
Questo del trentasie ze 'l mio presagio,
E dopo averme tanto sfadigà
Dovarò forsi soportar Foltragio
Che no se creda a le mie verità,
Perchè qualunque parto mor in cuna
Se no ghe dà le tete la fortuna.