Pronostico de l'ano 1835
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1834 | Edission e fonte ▼ | Pronostico de l'ano 1836 → |
Sicome, me penitet,
Ancuo so ridoto
A far le mie indagini
Co un culo de goto,
Perchè zo dei bazzari
Andà l'ano scorso,
Da vero energumeno,
Da tigre, da orso,
La sfera, la bussola,
I gran canochiai,
I prismi, i barometri
Li go frantumai,
E co un irassibile
De mi poco degno
Ridoto go a fregole
Qualunque sia ordegno,
Cussì più del solito
Insatanassà
Per far un pronostico
Che sia verità,
Mancante de svanziche
Per tor l'ocorente,
Incomodo cronico
Del tempo presente,
Al passo teribile
M'ò visto costreto
De meter al torcolo
Quel fià d'inteleto,
I efeti e le cause
Cefcando de cosse,
Che son per scometerghe
Nissuno conosse,
Ma che ze utilissime
Se ben se rifleta
Per far che l'astronomo
Sia un vero profeta.
Basa su ste massime
Che ze sacrosante
Studià go l'origine
De tute le piante,
L'influsso de l'umido
Che casca la note,
La voga grandissima
Che ga le carote,
L'odor malinconico
Che manda el castrà,
La spuzza simpatica
Che ga el bacalà,
La strage de mescole
Che ne le destira,
Che pesa le picole
Almanco una lira,
L'imensa retorica
De mezzo milion,
El scopo colpevole
Che ga el pizzegon,
El pregio dei mocoli
Co no gh'è candele,
La fame insaziabile
De tante scarsele,
El gusto grandissimo
Co l'agio vien suso,
La barbara replica
Del pugno in tel muso,
Le ochiae metafisiche
Che dà certe pute,
La mostra omogenea
Dei cambiavalute,
I eroi pusilanimi
Che porta la spada,
La stufa che genera
El pan de casada,
El slanzo poetico
Che ga le scalzae,
El gusto antipatico
Che ga le legnae,
Le strussie del trapano
Col stenta a sbusar,
El miasma epidemico
Che ga el sbadagiar,
La rabia dei aseni
Coi dì de laoro,
Le teste moltissime
Ch'esercita el foro,
L'altezza del crostolo
Che fa la panada,
Quel certo laconico
Che ga la peada,
El don che tantissimi
Possede qua in tera,
Che ze de no dirghene
Mai una de vera,
El peto de Venere
Col gera da late,
La ciera patetica
Che fa le patate,
El baso de Zefiro
Al cul de un tinazzo,
La forza che i omeni
Conserva nel brazzo,
La freve periodica
Che abate el lion,
Del Bifi le scatole,
De Anchise 'l baston,
El calo de l'ostrega
Nei mesi da l'ere,
El tufo da scovolo
Che ga le massere,
Le forfe diaboliche
Dei nostri sartori,
Le idee miserabili
De tanti signori,
I ultimi premiti
Che à avudo Tiberio,
La forza indomabile
Che ga el desiderio,
Del povaro Socrate
La trista muger,
I conti coi diesis
Che manda el spizier,
I pezzi de nombolo
Magnai da Luculo,
La sorte propizia
Che ga qualche mulo,
La piaga notissima
De Piero Pinson,
La carta che dopara
Kulì nei Giapon,
La furia dei musici
Co passa l'april,
La fuga dei gambari
Nel'aque del sil,
L'afar de Lugrezia
Co quel scelerato,
Del ruto l'idrogeno,
L'impero del flato,
La sala anatomica
Che ga el dio d'amor,
I denti acutissimi
De qualche fator,
Quel poco de glutine
Che gh'entra nel spuo,
L'impulso solecito
Che move 'l stranuo,
Le spose legitime
Del re del Mogol,
Le torte belissime
De istà cote al sol,
El peso specifico
Che ga un bon sberloto,
La parte de solido
Che gh'è nel sangioto,
L'azion de Proserpina
Chiapada a le strete,
El sangue che supega
Siemile sanguete,
Le smanie ridicole
De l'omo geloso,
Le rechie istancabili
De chi ze curioso,
I sforzi del stitico
Nel far quel servizio,
La spuzza da scheletro
Nel dì del giudizio,
La presa de Brondolo
Ai tempi de Caco,
E quela gratissima
De chi tol tabaco,
Le note de musica
Che studia i cantanti,
E quele più armoniche
Che passa do amanti,
Dei cuori platonici
La prima campagna,
El salto che ai stropoli
Fa far la sciampagna,
La resa de Tripoli
Blocada per mar,
E quela che opera
El massa magnar,
Le lanze e le sciabole
Dei Parti e dei Medi,
Le braghe de mogano
Che usava Tancredi,
De Ulisse 'l trabacolo,
De Poro el scalè,
De Diana la cogoma
Da far el cafè,
Le prime pantofole
Portae da Torquato,
La vesta da camara
De Ponzio Pilato,
Le pene de Tantalo
A tola sentà,
Le orine de Patroclo
Co el gera amalà,
La pipa de Antenore,
De Aron la bareta,
De Ariana la ventola,
D'Enea la bocheta,
De Leda le fufigne
Scaldada da Giove,
Le ombrele che circola
I zorni che piove,
El pianto de Pilade
Sul corpo d'Oreste,
El povaro Lazzaro
Consa per le feste,
D'Egeria le bucole,
De Sara el galan,
De Aininta la britola,
De Malco la man,
La bile de Andromaca,
L'amor de Cambise,
Del gran Muzio Sevola
El pontacamise,
L'estrato purissimo
Del salabacai,
De Claudio decemviro
El cavastivai,
L'astuzia de l'istrice,
L'istinto del lovo,
El canto de Pindaro
Co el gera da vovo.
La mente chiap=rissima
Che s'à imaginà
L'acento de meterghe
Per scriver figà,
Del schiafo la logica
Co l'è dà ben fisso,
El fin del peochio
Sul petene fisso,
La morte del pulese
Da l'ongia strucà,
L'essenza del cimese
Fra i dei mastruzzà,
I efeti mirabili
Del baso in scondon,
Quel'aria romantica;
Che ga el simiton,
I omeni comodi
Che vive in Turchia,
I studi su l'otica
De chi fa la spia,
L'incastro de l'ongia
Nel deo menuelo,
I rizzi salvadeghi
Che sconde 'l capelo,
La steca da letere
De Giulio assassin,
El frinchete frinchete
Che fa el mandolin,
El tichete tochete
Che spesso fa el cuor,
El punfete punfete
Che fa el bataor,
El tinfete tanfete
Che fa i marangoni,
El schichete schiochete
Che fa i postiglioni,
El plifete plafete
Che fe le zavate,
El trichete trachfete
Che fa le culate,
La chiopa da sedese
Che apena disnà
Vitelio in t'un'atimo
El s'à divorà,
I miera de paroli,
E gnente che rido,
Zogando co Venere
Che à fato Cupido,
Narciso che a vederse
Cambià ze in t'un fior,
El fuso de Ercole
Co el fava l'amor,
El terno belissimo
Che alcuni sapienti
Cavà ga dal pisolo
Dei sete dormienti,
La strage che Ipolito
De crudo genaro,
Ga fato su l'anare
Dessuso in ponaro,
La streta de spasemo
Soferta da Europa
Co Giove energumeno
Se l'à tolta in gropa,
L'incontro gratissimo
De roba salada
Che ga avudo Sofocle
Dabasso in intrada,
I do baracocoli
Da Sardanapalo
A Numa Pompilio
Mandai de regalo,
El primo gastronomo
Che à fato polpete,
L'assieme antieletrico
De tante saete,
La mossa del femore
Tirando de spada,
I gas patologici
De roba magnada,
L'imensa probosside
Del mostro turchin
Chiapà co la fossina
A Ponte Molin,
El gran sotoportego
Indove de note
Medoro co Angelica
Cantava vilote,
L'impalo col ichese
Che a son de campana
Ga fato Pitagora
In campo a la tana,
La morte stranissima
Soferta da vari
Sui monti de Ceneda
Magnai dai caviari,
El caso grandissimo
Che à fato Pompeo
Co l'à sentio el quagio
Cantarghe marmeo,
Le scene che Rodope
In ore brusae
Ga avudo col Satiro
A porte sarae,
El pianto d'Eraclito,
Tradoto dal greco,
Sentindo le piadene
Che canta da leco,
El luto stretissimo
Del povaro Elpin
Perchè drento in camara
Gh'è morto el lumin,
La sporta equilatera
Indove che Piro
Viagiando in incognito
Tegniva el botiro,
La slepa che Ipocrate
Vegnù da le Fiandre
Studiando la fisica
Ga dà a le palandre,
E quel sapon classico
Che à fato che Apele
De zorno chiarissimo
El veda le stele;
L'intagio de porfido
Che mostra Ezzelin
Giustarse la canola
Al tempo del via,
El grupo de Ortensia
Famosa matrona,
Che là coram populo
La mostra Latona,
La statua de Danae
Che'l busto se mola
Intanto che Titiro
Ghe sona la viola;
El quadro mirabile
Indove Tizian
Dipinto à benissimo
Do vovi in antian,
Medusa che Antiloco
Invida al ridoto,
E lu che ghe replica
— Mi vegno deboto —
Orlando l'intrepido
Che mete in spavento
L'aurora e i crepuscoli
Coi torzi da vento,
Esopo che medita
Per far l'ex abrupto,
Galeno ch'esamina
La lengua d'un muto,
Gofredo l'armigero
In spada e in sacheto
Nel'ato teribile
Che'l passa tregheto,
Eugenia che a Nestore
Ghe dà la panada,
E lu co la sbessola
Ghe dise secada,
I a freschi de Paolo
Che ve rapresenta
Sanson co la sessola
Che svoda la Brenta,
El diavolo in mascara
Che va a casa soa,
E cento lustrissimi
Ghe tien su la coa,
Polibio sul Tevere
Che ze imatonio
Vedendo le menole
A far un caorio.
El sposo de Tetide
Sentà in ritirata,
Ch'estende una suplica
In carta holata:
Le tele de Xeusi
Che val dei milioni,
Che mostra Copernico
Che castra i maroni,
Filipo el Macedone
De note avanzada
Che co le Termopili
El fa la trotada,
Tersicore al cembalo,
E Clio co una sbrega
Che bate la musica
Dadrio la carega,
A brazzo de Elena
El rico Epukon
Che col paragrandine
Spassizza el liston,
Enea che a le Grazie
Ghe pela le rave,
E Crispo Salustio
Che sponza la Piave,
Prometeo sul Caucaso
Che fa testamento,
E Giuda che a vederlo
Ze andà in svanimento,
Moncalvo notissimo
Che cava per gnente
I denti e le gramole
A miera de zente,
Alcide che in colera
El pesta la mazza,
E del polo antartico
El fa una fugazza,
Petrarca che a Laura
In campo a san Luca
Co do endecassilabi
Ghe scalda la zuca,
Lutero e Dionisio
Che in bona salute
I va a ca del diavolo
Col paracadute,
Giunon che de Cesare
Contempla l'armada,
E lu per compiaserla
Ghe fa la parada,
Tarquinio che in catedra
Converte Isabela,
E intanto Demostene
Ghe tien la mastela,
La casta Penelope
Confusa nel'ato
Che i so primogeniti
Presenta al senato,
Orfeo che da Cataro
Fugindo stà sconto
Tre zorni de seguito
Dadrio l'Elesponto,
El fio de Anassagora
Che se la fa adosso
Vedendo le Amazzoni
Che sfodra el palosso,
Sentà drento in sandolo
Un doto toscan,
Che pesca sinonimi
Nel fiume Giordan,
Gonipo che scriver
Dovendoghe a Sparta
El stà sfregolandose
Un sfogio de carta,
Cleopatra che in camara
Ghe dà del marzoco
A Tito Pomponio
Chiapà dal siroco,
Cornelio che abevera
Nel'ore beate
L'imensa famegia
De quel da la late,
Medea che a Esculapio
Ghe dà la triaca,
E lu co la spatola
El vaso ghe spaca,
Netuno in pantofole
Che unito ai Tritoni
Sin soto le natole
L'insegue i sturioni,
I do vechi pitime
Che tenta Susana,
E ela buriandoli
Se tira lontana,
Pluton che da Cerere
Per prova d'afeto
Un per de panochie
Riceve in secreto,
Cassandra che in estasi
Ghe scrive al Sultan,
E Cassio atentissimo
Ghe mena la man,
El bosco de carpani
Indove che'l Dante
Beatrice se cocola
A grego-levante,
La sposa de Lepido
Che incontra l'amigo,
La nena de Atila
Che fila caligo,
La mare de Seneca
Che ingropa panele,
Enea fra le tenebre
Che vende candele,
El scurzo de Ercole
Che sbrana el lion,
Anchise col medico
Che zoga al balon,
Sanson che da Dalila
El resta tradio,
Ariana che i bucoli
Ghe fa a so mario,
Giusepe castissimo
Che lassa el tabaro,
Mercurio che naufraga
In cale del caro,
El bel capo d'opera
Che ve rapresenta
Fortuna in gran auge
Che core la Brenta,
Dai poveri astronomi
Co strussia tirada
Da secoli e secoli
A marchia sforzada,
E Aldo Manuzio
Che armà de pistola
El ga per el stomego
Sior Checo Andreola,
Perchè coi so torcoli,
Da vero assassin
El stampa le buzzare
Che scrive Nalin:
E da sta faragine,
Da sto zibaldon,
Da tuta sta sgnesola
Strucà el megio e'l bon,
M'ò messo con scrupolo
Strussiando la mente
A far un'analisi
La più diligente,
Se'l marmo vien tenaro
Pestandolo assae,
Se gh'è qualche regola
Per far le sassae,
Se ze le molecule
Un piato da cogo,
Se i gusti più classici
Pecai ze da fogo,
Se un goto de malega
Ze megio del tè,
Se piase la fritola
Piu assae del bignè,
Se vien prima el spasemo
E po la paura,
Se un poco de mamara
L'è un don de natura,
Se quei che la mastega
Ze zente pulita,
Se gh'è in tanti circoli
I cani da vita,
Se chi vien per scoder
El ze una secada,
Se molti no dopara
Mai roba pagada,
Se quando che un zovene
Ga el sangue in fermento
La pol ogni femena
Tirarlo a cimento,
Se ga qualche credito
I nasi a caroba,
Se a forza de mangano
Se drezza la goba,
Se pol nascer dubio,
Opur se ze certo
Che l'u da l'origine
Ze stà sempre averto,
Se l'oro vien rusene
In man dei poeti,
Se ze megio un pisolo
De tanti soneti,
Se ai tempi de Romolo,
Se a queli de Remo,
Zirava le mescole
Che adesso gavemo,
Se a far catorigole
Se ofende l'onor,
Se e quando le porcole
Ze prova de amor,
Se ben rifletendoghe
De più se la gode
Chi paga i so debiti
O quelo che scode,
Se ze in magior numero
Le trombe o i tromboni,
Se quei dal bel manego
Ze i megio meloni,
Se al tempo dei barbari,
Che'l staga lontan,
Più Goti che Vandali
Ghe gera a Muran,
Se ocore saverghene
Per esser dotori,
Se tanti ze comodi
Senz'esser signori,
Se avanti che 'l scriver
Secasse i tondini
Se usava le virgole,
Coreva i pontini,
Se mama in vernacolo
Chiamando la mare
Se pol senza ofenderlo
Chiamar mamo el pare:
E po su sarandome
Nel mio gabineto
Un monte de classici
Atento go leto;
Go leto l'agricola
De Piero Pandolo,
El corso botanico
De l'osto del Dolo,
I studi de chimica
Per far bon el brodo,
La guida infalibile
Per far a so modo,
Le prove co l'algebra
Che l'omo ze zero,
El metodo facile
Per far el pavero,
Le opere postume
De Mario Stalfini
Su l'uso e l'origine
De tuti i bruschini,
I cento rimproveri
Che cava la pele,
I libri proibiti
Sul far pignatele,
L'esteso catalogo
Stampà in Linguadoca
Sui termini tecnici
Per far la maroca;
Le idee del filantropo
Sul dar bezzi a usura,
L'elogio dei stropoli
De ogni misura,
I dodese opuscoli
Sul strucalimoni,
El modo infalibile
Per far i caponi,
I squarzi de logica
Sul pero mauro,
Le mile e più regole
Per far muso duro,
I piani de Prospero,
Murer patentà,
Che'l logo del licite
El s'à imaginà,
La storia ch'epiloga
El viagio d'Enoc,
El libro col titolo
Berlich berloc,
I rami d'ostetrica,
La fisica pratica,
Co tuti i preteriti
Che ga la gramatica;
E dopo de un studio
Cussì complicato,
Cercando conoscer
Con calcolo esato
L'odor de le foleghe
E de le sarsegne,
El fumo che genera
Un caro de legne,
Lassando el detaglio
Che adota assae spesso
Le schiape de astronomi
Del tempo de adesso,
Che strussia da aseni,
Ma che, son sicuro,
No cava el so metodo
Un ragno dal muro,
Trovà go più utile
Per ogni riflesso
De far el pronostico
Su l'ano in complesso,
Ed eco in epilogo,
Ma chiaro e gustoso,
Che senza preamboli
Ve lo buto zoso.
Sarà el fredo massimo
A tuto febraro,
E a magio tardissimo
Diversi in tabaro;
Sarà i zorni nuvolo,
Mai bela la note,
La neve spessissima,
Le piove dirote;
Borini che pizzega,
Sirochi che mazza,
Calighi da perderse
In mezzo la piazza,
Tempesta che stermina
I più facoltosi,
Saete che ispirita
I più coragiosi,
Incomodi refoli
Continui de vento,
Racolti assae poveri
De ua, de formento,
In polvere, in cenere,
Brusae dai gran soli
La lente, la cesara,
I risi, i fasioli,
Col vermo in te l'amina
I boni cristiani,
I gnochi in gran numero,
Ma roba da cani,
I sparesi picoli
Per causa del suto,
De bisi e de fragole
Penuria pertuto,
Ma orzo che capita
Da tute le bande,
Panochie che fulmina
De piccole e grande,
Ma strage de zizole,
Emporio de zuche,
Le sante più insipide
De quele baruche,
Gran verze e cogumari,
Tanfati i meloni,
Gran gambe de seleno
Per tuti i cantoni,
Pochissimi bocoli,
Pochissime rose,
No viole e naroncoli,
No piante odorose,
Ma tanti garofoli
De quei senza odor,
Che ga cinque foge
De un solo color;
El pesce scarsissimo,
E a prezzo ecedente,
Ma sepe grandissime
Per poco per gnente,
Mancanza sensibile
De ogni carname,
Ma molto salvadego,
Ma grosso el polame,
Cucagna de dindio,
Dureto ma bon,
Porcei senza numero
In ogni stagion,
Cavali scancanici
Che stà suso apena,
Ma pezzi de aseno
Co tanto de schena;
I pulesi, i cimesi
Sarà malegnasi,
Mossati pochissimi,
Ma gran papatasi,
No tarme, no rusole,
Ma molti mosconi
Che rasa, che incomoda
Atorno i balconi;
Gran zente che specula
In tuti i raporti;
Caterve de zoveni
Che fà i cascamorti;
Figure ridicule
Che sempre va in ziro,
Che spuzza da mamara
Da tor el respiro,
Anedoti insipidi,
Bomò co la barba,
Gran sughi de pampani,
Gran goti de garba;
Abuso de fritole,
De brodi tirai,
Gran vini de scopolo
Per forza donai,
Patemi de animo,
Intachi amorosi,
Gran femene intropiche,
Gran urti nervosi,
Tripudio de tonici,
Consumo de mana,
Unzion de mercurio,
E gran cassia in cana;
Le mode dei omeni
Sarà stravaganti,
Le calze a mosaico,
De bulgaro i guanti,
Stivai co la racola,
Botoni de vero,
Barete col manego,
Mustachi a pavero,
Gabani in epilogo,
Braghesse a campana,
Coleti a probosside,
Bochete de lana,
Velae fate a ipsilon
Tagiae co sparagno,
Gilè co le virgole,
Cravate a sedagno;
Sarà de le femene
Curioso el vestiario,
Gran maneghe a brombola,
Corpeti a lunario,
Gran guanti col memini,
Scapini de intagio,
Centure co l'ichese
Bechini a sonagio,
Gran scufie a baracola
A moto farsora,
Fodrae de frescusene
De drento e de fora,
Galani a catastrofe,
Penachi a vesuvio,
E sciali col pendolo
Color del diluvio,
Capeli a trabacolo,
Colari a vapor,
Bustine longhissime
Col so bataor,
Camise a cubatolo,
De sea le madande
Col so praticabile
Da tute le bande,
Traverse a crepuscolo
Fornie de scarpia,
E veste da camara
A bagnomaria;
Gran voga de mascare,
Frequenza ai casini,
Gran ochi a telegrafo,
Gran fioi setemini;
Boteghe pienissime,
Teatri galanti,
Discreta la musica,
Basoti i cantanti;
Gran trombe, gran organi
Per ogni contrada,
Gran cori che strepita
La sera per strada,
Tamburi che incomoda,
Chitare scordae,
A soli de flauto
A gambe levae,
E gran poesie safiche
De poche parole
Sonae co la musica
De le castagnole;
Foresti che capita
Per mar e per tera,
Comercio vivissimo
In ogni maniera,
Gran zoghi de tombola
Che straca le rene,
Gran tose onestissime
Che va a far le nene,
Amor a le svanziche,
Afeto ai fiorini,
Passion per i talari,
Trasporto ai zechini;
La guera infalibile
Del Turco unio col....
Ma qua sento a meterme
Fracà el musariol.