La festa veneziana dei pugni/Canto I

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
[p. 259 modifica]
CANTO I.


De Paride el giudizio
Senza apelo,
Che ga roto per sempre l'armistizio
Fra le done del cielo,
5E che a Giunon,
Al noto pomo in capite aspirante,
El ga fato vegnir le convulsion
Da no quietarla un sechio de calmante,
Mi no me meto in publico a cantar;
10No vago a scrutinar
Nei gran secreti
De l'imensa bustina,
Che a Venere la dea tien suso i peti
Senza bisogno de la petorina;
15Mi qua no vegno fora
Col vaso

[p. 260 modifica]

Malegnaso
De Pandora,
Per far da Geremia
20Su la strage dei mali
In tuto l'universo partoria
A dano dei mortali
Espressamente
Da quel bruto e nefando recipiente.

25La deduzion no fazzo
Percossa spesso in camara se vede
Co tanto de caenazzo
Sarà drento co Giove Ganimede;
No me ne importa un aca de saver
30Se per farghe una burla, o per sospeto,
Vulcano à cucà in rede so muger,
Quando che a cufolon drento un boscheto
De Marte in compagnia
La fava la partia,
35E per no tegnir conti
Quel dio co quela dea
I se pagava a pronti,
No sò po in che monea;
No me propono el tema
40De la rason che 'l diavolo ga i corni,
Se par sciolto el problema
Ai nostri zorni,
Nei quali tra el progresso,
E la pratica assidua de la scienza,

[p. 261 modifica]

45No sempre, ma assae spesso,
Certi afari i se sà per esperienza.
No celebro la roca
Su la qual per amor de la so bela
Ercole, come un coca,
50Filava note e zorno canevela,
Trovando veramente
Che nissuno sta cossa
Qualificar la possa
Sorprendente,
55Perchè, chi no à provà,
O almanco chi no sà
Quando el rifleta,
Che possede per l'omo la morosa
Una susta secreta
60E prodigiosa,
Una specie diria de trabocheto
Da sconcertarghe i nervi del cervelo?

No canto el piangisteo de quel tamburo,
Che co' l'è stà sicuro
65De aver da so muger soferto un torto,
Dei costumi ignorante,
Da la passion l'è morto
Su l'istante,
Se za al zorno de ancuo sarave molti
70Apena maridai beli e sepolti,
Anzi ghe saria tanti,
Che morirave avanti.

[p. 262 modifica]


Che isporca pur la carta
Chi cerca ai altri procurar la noja
75E per Tebe e per Sparta
E per el fogo che à distruto Troja;
Che i schinca pur le pene
Per la so antica Atene,
Per Roma, per Corinto,
80Per Gaeta,
E per el laberinto
Tanto famoso ch'esisteva in Creta,
Nel qual, per quanto scrive un certo Ilario,
Persona molto colta,
85S'à sin perso una volta
Belisario.

Descriva chi vol dar lizion morali
I spasemi mortali,
l palpiti del cuor
90Generai dal pudor
De Lugrezia romana
Nei tropo fieri istanti
Che quela bona lana,
Quel baron,
95Armà el bisogno, ghe ze andà davanti,
Chi sà con che intenzion;
Che ghe fassa la zente de conscienza
L'elogio a la pazienza
Singolar,
100Che la casta Susana, povareta,

[p. 263 modifica]

La ga dovesto usar
Co' l'è stada costreta
Far fronte ai desideri
De quei do bruti vechi baloneri;
105A la virtù esemplar
De l'omo raro,
Che a la bela muger de Putifar
De crudo inverno ga molà el tabaro,
Lassandose da l'empio
110Dessoravia dir sempio;
E ai sforzi mal premiai,
Che in mezzo un gran pipio
Ga fato Europa,
Co' Giove imbestialio
115Ghe ze andà a lai,
E se l'à tolta in gropa.

Che i nostri poco acorti leterati.
Dei quali ghe n'è adesso una brentana,
Vaga a deventar mati
120Co la fada morgana.
Col pesariol, co l'orco, col foleto,
Che tantissime sere
Se sconde soto el leto
A le massere,
125E co' le resta a scuro,
Senza nè far sussuro,
Nè avrir boca,
Le magnetizza, e dopo se la moca:

[p. 264 modifica]

 
Che i ne conta pur su ste fanfaluche,
130Ma adesso grazie a Dio
El tempo de le zuche
Ze fenio,
E tuti sà i secreti
Dei orchi e dei foleti.

135Che le teste scaldae de sti sapienti
Se lima pur quel strazzo de cervelo
A iluminar le menti
Sui confini astronomici del cielo,
Sul mormorio del vento,
140Su la rotondita del firmamento,
Sul strepito dei toni,
Sul corso dei sioni,
Sul centro dei vulcani,
Sui monti diluviani,
145Sui lampi e le saete,
Su le stele comete,
Su le machie solari,
Su l'estension dei mari,
Sul caro de Boote,
150Su la Capra Amaltea,
Su le scarpe de felpa de la Note,
Sul canochial d'Enea,
Sul papagà de Anchise,
Sul tabaro de Remo,
155E sul pontacamise,
Che portava la festa Polifemo,

[p. 265 modifica]

Del qual certo Androgeo
Quondam Batista
Co una memoria leta a l'Ateneo,
160Ghe ga fato furori, e mi l'ò vista,
L'à persuaso che la sola piera
Pesava quatro miera.

Decanta, chi no sà
Tratar come che va
165Megio argomenti,
De Tantalo i tormenti
De Andromaca i dolori,
I gusti ricercati de Licori,
La forza de Sanson,
170La morte de Didon,
El pianto de Medusa,
La fuga de Creusa,
L'impalo de Tigrane,
Le simpatie otomane,
175E l'istruzion
Su la so aplicazion;
De l'oro la potenza,
La gran benemerenza
Dei cesti e de le sporte,
180El lustro de la corte
De Fabio e de Pompeo,
Del mago Alfesibeo
La verga bruna,
La roda iregolar

[p. 266 modifica]

185De la Fortuna.
El scopo de l'amar
Co ghe ze urgenza,
El don de la prudenza,
I benefizi veri del cauterio,
190I sforzi de Tiberio,
La coa de Berenice,
I bucoli de Nice,
Dove Amor ai galanti fa de ochio
Soto le bele forme del peochio.

195Ch'esalta pur i doti
L'istinto dei simioti,
Le forfe de la Parca,
La gata del Petrarca,
La cassa de Maometo,
200El mocolo curioso d'Epiteto,
La caneva de Piro,
L'impulso del sospiro,
El sono de le piante,
El naso da invidiar de l'elefante,
205La musica de Orfeo,
I ochiai de Galileo,
De Curzio el passo ardito,
La clemenza de Tito,
L'onor de Messalina,
210De Creso la musina,
De Tamerlan secondo la bareta,
De Ovidio la carega,

[p. 267 modifica]


E l'imensa seleta
Su la qual fava caca Micromega,
215Zigante smisurato ch'esisteva,
Cussì go trovà scrito,
Prima de Adamo e d'Eva,
Dotà de un apetito,
Che, Dio difenda ogni fedel cristian,
220Se spapolava a cena,
Senza contar el pan,
Quatro quarti de manzo e una balena.

Ste classiche lasagne,
Che a ben esaminar
225Se stenta de trovar
Le so compagne,
Sta sorte de storiele,
Ste fiabe bone e bele,
St'insipidi argomenti,
230Sti fati inconcludenti
Dal tempo sfigurai,
Che ve indormenza apena desmissiai,
Mi come mi li go
Indove le galine fa el cocò;
235E postochè natura,
Che sempre s'à mostrà
Larga co mi al de la d'ogni misura,
(Sta cossa dir la posso
Senza da la modestia vegnir rosso)

[p. 268 modifica]

240Bon naso la m'à dà,
Costanza, volontà
Gran dose de bardela,
E testa quadra quanto una burela,
Invece de ocuparme da dindioto
245In sti veri sempiezzi, in ste fredure,
Che no le cava el goto,
E ghe scalda la zuca a le creature,
Mi co più assae compenso
M'esercito el bon senso,
250lmpiego el mio inteleto,
Coltivo el mio talento
Nel nobile sogeto,
Nel'eroico argomento
De le russae de pugni, ma de quele,
255Ve l'assicuro mi,
Da far de chiaro dì
Vedèr le stele;
Pugni senza ecezion
Contro l'indigestion,
260Che da tempi remoti,
Per un gran corso d'ani
S'à dà fra Nicoloti
E Castelani,
Lassando nei volumi de la storia
265Pagine brilantissime de gloria.

Apolo mio, carissima persona,
Del bel monte Parnaso feudatario,

[p. 269 modifica]

Baron de Pindo, conte d'Elicona,
De le Muse esclusivo proprietario,
270Dei teatri d'Olimpo gran cantante,
E mestro de capela del Tonante,
Te suplico, te prego, te sconzuro,
No aver co mi el cuor duro,
E no me far le rechie da mercante,
275Ma invece esuberante
Concedime el favor
De un estro onipotente,
Col qual meritamente
Me possa far onor,
280E possa anca sta volta,
Metendome a ragiar,
El genio sodisfar
De chi me ascolta.

Amanti entusiastai del vero belo,
285Zente de bon umor,
Che dovè aver sul cuor
Tanto de pelo,
Se invece de sentir
Un senso ingrato
290Da farve inoridir,
Indiferenti afato
Comparì
Al spetacolo strano,
Che qua ga logo ogn'ano
295De sto dì,

[p. 270 modifica]

Per esser spetatori,
De zente che va in cerca de dolori;
Da bravi via ocupè
Dei posti che sia boni,
300Fè presto, incaparè
E pergoli e balconi,
Copi, terazze, altane,
El campaniel dove stà le campane,
Basta che gabiè ochio
305De no urtar nel batochio,
Podendo un'imprudenza
Generar qualche seria conseguenza;
A tempo conveniente
Ficheve in t'un bon sito
310Sora le fondamente
Per goder el spetacolo pulito,
E podèr a le spente
De la fola insolente
Tegnir duro
315Pusando el culo al muro;
Insuma procurè
De colocarve megio che podè.

Pitochi, benestanti,
Artisti, boteghieri,
320Impiegati, mercanti,
E dame e cavalieri,
Infati tutiquanti
Del logo e forestieri,

[p. 271 modifica]

De qualunque sia classe, d'ogni età,
325Omeni, done, puti,
El gobo, l'orbo, el zoto, el snombolà,
Corè a gambe levae, vegnì qua tuti,
Ma che staga lontane quele siore
De la categoria,
330Che va per do tre ore
La sera in Frezzeria
Zirando atorno,
No essendoghe in sto zorno
Per sta sorte de zente
335Posto a le viste soe corispondente,
E po perchè in sostanza
Dove gh'è de salute esuberanza,
A segno se pol dir de trarla via,
No gh'è dubio, saria
340De mal augurio
La sola idea che circola Mercurio.

A sto passo arivà, cara Belona,
Te prego quanto posso
A butar bona,
345A meter drento in semola el palosso,
A frenar un mumento
El to temperamento,
Che se ti me permeti
De poder parlar schieto,
350Ze fra i più maledeti
Maledeto;

[p. 272 modifica]

Frenilo sì un pocheto
Sina che in maii me togo
La carta topografica, e che fazzo
355La descrizion del logo,
Dove l'orzo de bosco se dà a sguazzo,
Aciò qualunque idiota,
Qualunque scimunito,
Che ghe ne ze a bizefe, su sta lota
360Gabia una giusta idea del vero sito,
Nel qual esercitada
Per un corso de secoli l'è stada,
E acio qualche foresto imbratacarte,
Che va de quando in quando
365Le nostre cosse patrie publicando,
No possa anca in sta parte
Per decisa ignoranza, o per progeto,
Stampar de quele buzzare patenti,
Che con vero dispeto
370Sora d'altri argomenti
Avemo leto.

A Venezia se trova una contrada
Con palazzi, con case, con casini,
A furia de zechini
375In epoca lontana fabricada
Da periti de l'arte,
E divisa in do parte
Da un canal,
Sui margini del qual

[p. 273 modifica]

380Regolarmente,
Comode a suficienza,
Score do fondamente
Messe in corispondenza
Fra ele co un bel ponte
385Da dodese scalini,
Dove ghe ze le impronte
Dei pi, vulgo stalfini,
Privo de bande aciò
Possa ognun l'aversario butar zo,
390Opur smacarse in rio,
Se al caso el se trovasse a mal partio.

Ze sta antica contrada
San Bernaba chiamada,
E là le do fazion,
395Toca a chi toca,
Senza gnanca saver per che rason,
Pugni da confession
Se dà che sfioca,
Un dei quali a qualunque galantomo
400Prova la verità del mement'omo.

Che Roma fassa chiasso,
Perchè nei tempi andai
Qualche so bulo, qualche so gradasso,
Ghe n'à dei centenera destrigai;
405Che la vaga pomposa
D'esser stada famosa,
Perchè i so nerboruti gladiatori

[p. 274 modifica]

In mezzo dei tornei
Copava co do dei
410Le vache e i tori;
Che la vaga superba quela striga,
Parlo, s'intende za,
Come tanti à parlà
De Roma antiga,
415E parlo de quei tempi
Dai presenti lontani,
Che prosperava i empi,
Che regnava i tirani,
I Caracala i Atila i Neroni,
420La spiuma dei briconi,
I quali al so cospeto,
Per semplice dileto,
Co ghe vegniva in testa,
Quando i gera de vogia
425Ghe fava far la festa,
Ghe fava far la fogia
A quelo e a questo,
No usando tra l'onesto
E tra el baron
430Nissuna distinzion,
Quando de fresca età
Se trovasse dotà
De bel aspeto,
De forme erculee e fisico perfeto,
435Tantochè spesse volte in t'un stecato

[p. 275 modifica]

L'omo robusto e forte
Senz'esser scelerato
I condanava a morte,
Godendose sta razza buzzarona,
440(L'espression popolar se me perdona,)
De vederlo a lotar,
Senza poder sperar
Nissun socorso,
Co la tigre, co l'orso,
445Col lion,
La pantera, la jena,
Che al dito de Bufon
Naturalista
Ga fame dopo cena,
450E a prima vista
La ve lo magna un omo
Come mi magno un pomo,
Sinchè sbusà la pele,
Spandendo a sechi el sangue,
455Perdendo le buele,
Sbregà la carne el langue
Longo desteso in tera
Vitima de la fiera,
Che coi so denti acuti,
460Dio ne difenda tuti,
A son de morsegoni
In manco de mezz'ora
Lo riduse a boconi,

[p. 276 modifica]

E lo divora.

465Sti mostri, sti sicari,
St'infami sanguinari,
Sti semi scelerati
In odio al cielo,
Per umano flagelo
470Al mondo nati,
Sti teatri d'oror,
Ste becarie,
Che adesso co l'agiuto del Signor
Pertuto ze bandie,
475Da nualtri no gera tolerae
Gnanca l'età passae,
Nè ai secoli più barbari e rimoti
Qua ga esistio sta sorte de galioti;
Nela famosa lota singolar,
480Che m'ò messo a cantar,
E che per ani
Ga fato i Nicoloti e i Castelani,
Vitime no ghe ze de sta natura,
Nissuno va a incontrar
485Morte sicura,
No gh'è da cimentar
Bestie spietate,
Che vaga in quatro zate,
Ma gh'è precisamente
490Una classe de zente,
Che senz'arme da fogo, nè da tagio,

[p. 277 modifica]

Col so solo coragio,
E co la so bravura,
A pugni testa a testa se misura,
495Rischiando tardi o presto
Da quelo opur da questo
De torghene un brueto
De quei come che va
Da confinarse in leto,
500E che la staga là,
Pur per aver la gloria,
Decisamente eroi,
De far che i nomi soi
Passi a la storia.

505Ma eco la zornada
Alafin capitaria,
E san Bernaba che
Tuto el tempo de l'ano ze assae sbriso,
Ancuo vu lo trovè
510Un Parigi deciso,
Una contrada
Tutaquanta morbin, messa in parada:
Se scomenza abonora
Da pergoli e balconi a meter fora,
515Dove che stà i signori,
Tapei, damaschi, strati
E rossi e verdi e a fiori
De mile e più segnati,
E indove che ghe stà la zente varia,

[p. 278 modifica]

520De classe secondaria,
Coverte, covertori
De cinquanta colori,
Tovage, tovagioi,
Sugamani, nizioi,
525Alcuni poco neti,
Traverse, palagremi, fazzoleti,
E bonigoli e fasce e panesei
De queli, za s'intende, da putei,
Diversi mal lavai co ancora suso
530Qualche segno infalibile de l'uso.

Le strade manifesta
Un dì de vera festa,
Le boteghe sarae
Ga porte e balconae;
535Da per tuti i cantoni
Gh'è archi a lustro fin,
Belissimi festoni
Co l'oro cantarin,
Quantunque alora
540In ste nostre contrae
L'oro bon a boae,
Che adesso ze spario, ghe fusse ancora.

Tacai qua e là sui pali
Gh'è emblemi, gh'è segnali,
545Gh'è bandiere
Disposte in più maniere
Con figure alusive

[p. 279 modifica]

Dipinte o ricamae,
Che da l'aria agitae
550Squasi par vive;
Gh'è padiglioni e tende,
Barache de bon sesto
Per tuti quei che spende,
E aver no ga podesto
555A so disposizion
Un pergolo o un balcon;
E per la moltitudine ghe ze,
Previo esborso de picole monete,
Careghe, canapè,
560Scagni, banchete,
E poltrone e sofà,
Dove con liberta
Quei che se straca
Se senta, se destira, se stravaca.

565Va in ziro cabarè,
Che sà da ogio,
Co fritole e bignè
Caldi de bogio,
Gran piati de galani,
570Bagigi americani,
Naranze, caramel, stracaganasse,
Storti e forti, fugasse,
Zaletini,
Carobe, brustolini.
575E a preferenza

[p. 280 modifica]

Bocai pieni de vin,
Che crescer fa el morbin
De quela udienza.

Se vede le rochete
580Andar alte che mai,
Se sente i scarcavai
Che par saete:
Gh'è bali, ghe ze canti
In più de qualche corte,
585E nei siti importanti
Orchestre d'ogni sorte
De strumenti,
Sonai dai più valenti Professori;
Tamburi in quantità,
590Perchè i fava furori
Anca per el passà,
Trombete a bataglion,
Che sempre in ste ocasion
Vien impiegae,
595Violini, viole e corni,
Che i gera in uso assae
Sin da quei zorni,
Ma che in ancuo ze a basa,
Precisamente come ze 'l subioto,
600Che se sona deboto
In ogni casa.

Sora le fondamente

[p. 281 modifica]

No gh'è caso de trar un gran de megio
Da la strage de zente
605Venuda da Castelo e Canaregio,
Da san Marco, san Polo, da ogni sito
E poveri e signori,
Per esser del conflito
Spetatori:
610Gh'è femene, gh'è omeni,
De qualunque sia classe e eondizion,
Pocheti galantomeni,
Per quela gran rason,
Che in sta categoria
615Da Adamo sina qua
S'à sempre combinà
Gran carestia,
Siben per quel che sò
Magior de adesso no;
620Gh'è i buli, i cortesani
In scarpe coi galani,
La turba dei giazzai,
Che no finisce mai,
La spiuma dei galioti,
625I scavezzoni, i roti,
I dreti, i borsarioli,
Le mamare, i pandoli,
Che senza gustar gnente
Seguita la corente,
630I quali a conti fati

[p. 282 modifica]

Da statistici esati
Ze risultai adesso
Sora tuto el complesso
Dei viventi
635In numero de molto prevalenti;
Gh'è tosi, ghe ze tose, gh'è putei,
Sinamente de quei
Che ancora lata,
Da qualche dona mata
640La condoti
Per solo fin de ben,
Ma che l'inizia in pien
Nela trista cariera dei galioti;
E a sta giostra concore
645Tantissime signore,
Che fervide de mente,
Drio de quei pugni fissi e quele spente,
Sa far ogni qual trato
Per el so gran perchè
650La regola del tre
Da ragionato;
In conclusion fra indigene e foreste
No se vede che teste;
Ze pieni a marteleto
655In ogni casa pergoli, balconi,
Tarazza, altana, luminal e teto;
Sui archi dei portoni,
Sui capitei, su l'erte,

[p. 283 modifica]

Tacai come luserte
660Ze i baroni;
Là tose da campielo
Amanti del bordelo
In abito da festa,
E petenae
665Col so fioreto in testa,
Se vede rampegae
Su per le balconae,
Avendo, messi in gala,
I so morosi a lai
670Co la giacheta in spala,
Coi cigari impizzai;
E sina sora i muri
Se rege mal sicuri
I lazzaroni
675Co l'abito a taconi,
Per imparar el modo da quei mati
De far i pugni come che i va fati,
E meter, la ze chiara,
A partio la lizion
680Co nasce l'ocasion,
Che no ze rara.

Se vede el rio ocupà
Da una gran quantità
De sandoli e barchete,
685De passere, caichi, de peote,
De topi, de batei, de gondolete,

[p. 284 modifica]

 
Bissone e malgarote
Con lusso preparae,
Cariche de persone a esuberanza,
690E tute in bela mostra colocae
A debita distanza
Dal ponte per lassar
Che senza impedimento
I eroi possa cascar
695Ben sasonai nel liquido elemento,
E i possa, co' el pericolo ze serio,
Co' ze nel so furor la baraonda,
Trovar in mezzo a l'onda
Un refrigerio.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_festa_veneziana_dei_pugni/Canto_I&oldid=54279"