Pronostico de l'ano 1834
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1833 | Edission e fonte ▼ | Pronostico de l'ano 1835 → |
L'afar dei pronostici
Ancuo da la zente
Pertuto el se reputa
Un studio da gnente,
La par cossa facile
De note ben scura
Entrar nele fufigne
De madre natura,
Studiarghe i fenomeni,
Scovrirghe i secreti,
Intender le cause,
Sorprender i efeti,
E a forza de bussola,
A furia de lenti,
Per mezzo de calcoli
Spiegar i portenti,
Per po palesargheli
A tanti zuconi,
Che ze un gran miracolo
Se i varda i cartoni;
Ma che senza scrupolo,
Censori spietati,
Assae ben tratandove
Ve trata da mati;
Se crede un zogatolo
El far da profeti
Montai su la specola
Vardando i pianeti,
E sora le machine,
E sul cavaleto,
Dormir qualche pisolo
Invece che in leto,
Ma mi lo considero
Ai zorni che semo
L'afar più dificile
De quanti tratemo,
Se fra tanti ostacoli
Che 'l studio presenta,
Che ze inumerabili,
Che proprio spaventa,
Gavemo un esercito
Molesto de enti,
Che senza saverghene
No i ze mai contenti;
Che per farse merito,
Le cosse più serie
I mete in ridicolo,
Le chiama miserie;
Se vol da sti tangari,
Sti cani da toro,
Che adesso l'astronomo
El sia un Bocadoro,
E anzi un oracolo,
Un mago, un strigon,
Che fando el presagio
De quatro stagion,
L'anunzia infalibile
E l'ora el mumento
Che piove, che nevega,
Che domina el vento,
Co l'aria ze tepida,
Co el caldo ne mazza,
Co capita el grizzolo,
Co l'aqua se giazza,
Co i zorni ze lucidi,
Co ze note quiete,
Co vien le meteore,
Co vien le comete,
Co i corpi mefitici
Esala i vapori,
Co in cielo vien l'iride
Co el mar va in furori,
Co incomoda l'umido,
Co casca la brosa,
Co sponta el garofolo,
Co sbroca la rosa,
Co fato ze'l pampano,
Co el biso scomenza,
Co a tiro ze'l spareso
E co el va in semenza;
Se vol che'l determina
Co el tempo ze in moto,
Co da suso el refolo,
Co fa el teramoto,
Co zira l'eletrico,
Co fa la borasca,
Co vien zo la grandine,
E dove la casca,
Co in mezzo le nuvole
El sol fa baosete,
Co Giove se scarica
De lampi e saete,
E tanti a l'astronomo
Ritien che ghe speta
El sito prefiger
Indove le peta;
Se vol che'l pronostico
Ghe diga a puntin
Se scarso, se fertile
Ze l'ano de vin,
De fien, de panochie,
De erbagi, de grani,
De gnochi, de zizole,
De boni cristiani,
De oche, de anare,
De dindi, de agnei,
De cavre, de piegore,
De manzi e porcei,
E tanti da stolidi
In testa i se cazza
Che fissa l'astronomo
El dì che i li mazza;
Che'l diga se prodigo
El mar ze de anguele,
De scombri, de sievoli,
De orae, de sardele,
De rombi, de astesi,
De trie, de sturion,
De sfogi, de ostreghe,
De scampi, de ton,
E gh'è sina un numero
De quei che pretende
Saver per so regola
A quanto i lo vende.
Se vol che 'l pronostico
Ogn'ano de pato,
Mediante un chiarissimo
Catalogo esato,
I mali determina
Che ga da vegnir,
E insegna el specifico
Per farli guarir;
Inquieta desidera
Saver ogni tosa
Se a caso ghe capita
Qualcun che la sposa,
E vari depositi,
Che no trova un can,
Voria che l'astronomo
Ghe fasse'l mezzan;
Pretende per metodo
De aver le signore
La lista esatissima
Dei gusti che core,
La forma dei bavari,
La mis dei cavei,
El tagio dei abiti,
El ton dei capei,
E qualche bon stomego
Voria che'l trovasse
Quel pezzo de aseno
Che ghe li pagasse;
Vorave un gran numero
De sti galantoni,
Provisti de debiti
In tuti i cantoni,
Che 'l povaro astronomo
Catasse sul fato
Un modo economico
Da aver el saldato;
Se vol povar'anima
Che'l sia un Ciceron,
Che'l trova e partecipa
La vera rason,
Percossa che antitesi
Fa belo co bruto,
Grazioso co tangaro,
Fa mogio co suto,
Fa elogio co biasimo,
Fa odio co amor,
Silenzio co strepito,
Go onesto sartor,
Fa rico co povaro,
Fa storto co dreto,
Pietoso co barbaro,
Fa cavo co meto,
Fa vechio co zovene,
Fa drento co fora,
Fa doto co stolido,
Madona co niora,
Fa pase co colera,
Fa note co dì,
Salute co medico,
Sapiente co mi,
Se vol che l'astronomo
Sia un'arca de scienza,
Che sora ogni articolo
El spua una sentenza,
Che senza dir buzzare
El fassa palese
Percossa che dodese
Ze do più de diese,
Percossa principio
Ga l'ano in genaro,
Percossa che'l fosforo
De note fa chiaro,
Percossa le ceole
Ze un mezzo sicuro
Da mover le lagreme
Al cuor el più duro,
Percossa spessissimo
Co nel matrimonio
Ze bela la femena
Ze l'omo un demonio,
Perchè in tanti secoli
No s'à visto mai
Fra miera de esseri
Che nassa castrai,
Percossa che Padoa
Vien dopo de Strà,
Percossa le simie
Ga el culo pelà,
Perchè l'oche e l'anare
De l'aqua sta a gala,
Percossa che'l bovolo
La casa ga in spala,
Percossa che'l gambaro
Camina indrio schena,
Percossa che Seneca
S'à averto la vena,
E se del sproposito
Quel... eme pentio,
L'è là che'l se brustola
Adesso el dadrio,
Percossa che l'aseno
Fra tanti animali
Pronuncia benissimo
Un per de vocali,
E se suscetibile
Saria el so inteleto
De quanto un astronomo
Dir su l'alfabeto,
Percossa incontrandose
I cani per strada
Nel sito de metodo
Se dà la nasada,
E se sta so pratica
La ze ben intesa
No avendo la scatola
Da tor una presa;
Se vol che l'astronomo
El spiega pulito
Percossa sinonimo
De logo ze sito,
De ladro ze smafaro,
De sbassa ze cala,
Un fià ze de fregola,
De piomba ze bala,
De avaro ze africa,
De orzo ze porcole,
E gambe de femena
Ze spesso de forcole,
De insulso ze pampano,
De pica ze taca,
De largo ze comodo,
De gamba ze slaca,
De stereo ze mercore,
Maroca de spia,
De slepa garofolo,
De furbo galia,
Barbuzzo de sbezzola,
De bruta saeta,
Lasagne de cabale
Spiantà de poeta,
E in casa del misero
Bombon de paneto,
Spelonca de camara,
E cuzzo de leto:
De lento ze piatola,
De magro ze steco,
Ruson ze de todaro,
Mario ze de checo,
Secada de pitima,
Regazze de tose,
De cuche ze debiti,
Muger ze de crose,
Pecente de lazzaro,
Faceto de tomo,
E spesso spessissimo
De bestia ze omo,
Austero de rigido,
Fortuna de sorte,
De sporco filosofo,
De schizza ze morte,
Biasteme de mocoli,
De stagno ze economo,
E povaro diavolo
Ze sempre de astronomo;
Nè mai rifletendoghe
Che l'e un osso duro
Col sforzo de l'otica
Scovrir el futuro,
Se vol che 'l pronostica
Se regna la fame,
Se cala le svanziche,
Se cresce'l polame,
Se monti precipita,
Se gh'è falimenti,
Se nave pericola,
Se rompe torenti,
Se crola le fabriche,
Se buta i vulcani,
Se va propagandose
Le razze de cani,
Se canta la racola,
Se salta la rana,
Se tien duro i arzeri
Co vien la brentana,
Se gh'è più del solito
Passagio de grue,
Se'l più bravo quagio
Dà sete batue,
Se l'ave prolifica,
Se fila i bigati,
Se verso la bragola
Se chiapa bisati,
Se boni peochi
Ne dà l'arsenal,
Se furia de mascare
Ghe se in carneval,
Se camare otiche
Se vede ai casoti,
Se vien la mandragola,
I automi, i simioti,
I zoghi acrobatici,
I salti mortali,
Le prove de fisica,
I alcidi, i cavali,
Se vien l'omo scheletro,
Se capita el nano,
E qualche spetacolo
Che gabia del strano;
Se fiasco fa l'opera,
Se'l balo va a tera,
Se'l mestro de musica
El fa una cagnera,
Se a mezza quaresema
I brusa la vechia,
Se quei che ga debiti
Ze duri de rechia,
Se seguita a vederse
In ora brusada
Le done cubatoli
Zirar per la strada,
Se i parti ze facili,
Se mal fa le voge,
E se cresce talari
Metendoli a moge,
Se zira sonambuli,
Se ghe'l capelon,
Se a più d'una zovene
Ghe vien le ostruzion,
Se gh'è quei che gratis
Farà la fatura,
Se gh'è benemeriti
Che dà bezzi a usura,
Se anca nei antipodi
Se zoga al pandolo,
Se ga de l'insipido
La carne de colo,
E se rischia un putrido,
Se fa el sangue guasto
Chi magna per metodo
La carne de tasto,
Se a casa del diavolo
Se stà a la refusa,
E se carbon fossile
O legne se brusa,
Se i fava le tombole
Al tempo de Adamo,
Se ze la parussola
Osel de rechiamo,
Se ancora Diogene
Ze in cerca de l'omo,
Se i pesca tartufole
Nel lago de Como,
Se pol esser lecito,
O se ze da bari,
Bastoni risponderghe
A chi vol danari,
Se chi tol su un memini
Riceve un afronto,
Se 'l brodo ze un liquido,
Se'l grasso ze un onto,
Se'l marmo ze un solido,
Se l'omo ze un bruto,
Se'l nervo ze elastico,
Se l'ogio ze un fruto,
Se l'aria ze un balsemo,
Se'l fumo ze un ente,
Se l'aqua ze un fluido,
Se l'ombra ze gnente,
Se'l vero ze un fragile,
Se'l vin ze un licor,
Se i bezzi ze un tonico,
Se'l flato ga odor;
Se 'l fio de sior Prospero
Fa bona riuscita,
Se'l sposo de Barbara
Ghe tien bona vita,
Se Piero, se Paulo,
Se Polo e Martin
Ga ancora la tatara,
Ga el vizio del vin,
Se Cate, se Menega
Conserva el secreto,
Se Nane co Bortola
Alfin tira dreto,
Se siora Filicita
La vive de intrada,
Se Beta dei talari
La ze inamorada,
E tanti tantissimi
Vorave deboto
Saver sina i numeri
Da meter al loto,
Per po inesorabili
Se a caso falè
Chiamarve più stolido
De quel che pesè,
E senza metafora,
Sia in casa che in strada,
Pusarve de l'aseno
A roda la vada.
Ogn'ano el pussibile
De far no se manca,
Se varda, se specula,
Se strussia, se ranca,
Se studia, s'esamina
Da tute le bande,
Se induse, se calcola,
Se spende, se spande,
La mente se logora,
La testa va atorno,
Ne toca spessissimo
De note far zorno,
Ma tuto ze inutile
Per quanto se fassa,
Perche'l magior numero
Adesso vol massa,
E se qualche metodo
Da novo trovemo,
Ghe ze chi prontissimo
Ne voga sul remo.
Ossia destirandola
In bon venezian
A chi per metafore
No ga certa man,
Se trova el bon stomego,
Se trova el simioto
Che aquista copiandone
La fama de doto,
No fandose scrupolo
De averla usurpada
Senz'ombra de merito
Co roba robada.
Oh! vita diabolica,
Mistier maledeto?
Che ga tanti ostacoli,
Che frua l'inteleto;
No voi più saverghene?
Voi meterme in quiete,
E go in tel preterito
E stele e comete,
Sfracasso la bussola,
Sfraselo la sfera,
Destaco el barometro,
Lo slanzo per tera,
E punfete panfete,
E dai tira para,
In ato de colera,
La cossa ze chiara,
I prismi destermino,
Frantumo le lenti,
Scavezzo i triangoli
Co tuti i strumenti,
I libri astronomici
Li fasso a boconi,
Le carte le doparo,
Ghe bruso i cartoni,
E a tanto de letere
Averto Andreola,
Che più per pronostici
No scrivo parola.