Pronostico de l'ano 1843
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1842 | Edission e fonte ▼ |
Se in qualche profezia, che go stampà
Per el tempo passà,
Go dito che la tera
Da per tuti i cantoni
La ga miera coi miera
De meloni,
Anzi che a conto fato
Con un calcolo esato
Un dodese per cento ze le zuche
Fra sante, e fra baruche,
Un sedese i tamburi, un diese i alochi,
Un do i bonicristiani, un vinti i gnochi,
Un quaranta i dindioti,
E el resto doti,
Che no me so inganà,
Che no m'ò iluso,
Che quel che ò dito suso
Ze pura verità,
L'è una sentenza,
Sto ano l'ò prova
Co l'esperienza.
Difati nissun credo
Ghe ze al mondo,
Per quanto che 'l sia tondo,
Che a sta ora no sapia che possedo
Quela lanterna magica curiosa
Al somo prodigiosa,
Che a ogni classe de zente
La ghe svegia la mente,
E co le so vedute,
Sia omeni, sia femene, sia pute
Otien pronto l'efeto
De slargarghe le vie de l'inteleto;
El scioco se fa acorto
In qualunque raporto:
L'ignorante deventa sul mumento
Un omo de talento:
L'aseno tantofato
Se cambia in leterato:
El gran secreto aquista
De far colpo sicuro a prima vista
Le done de ogni sfera:
E le tose che se vol maridar
Impara la maniera
De farse ben amar
Da questo e quelo,
Investindoghe i nervi del cervelo:
E sicome da mi
Tuto l'ano passà la note e 'l dì
Ze stà un porto de mar precisamente
Dal concorso de zente,
Per bisogno de esser lanternada
Aposta capitada
Da paesi vicini,
Da paesi lontani,
Da siti oltramarini,
Da loghi oltramontani,
Cussì so stà a portata,
Tegnindo nota esata
De tuti i presentai
Per esser lanternai,
E a ognuno atribuindoghe a l'aspeto
El grado d'inteleto,
De tor la proporzion
Co la popolazion,
E aver sicuro el dato
Per poder far quel calcolo che ò fato.
Prescindendo dal vero mio stupor
Per vederme davanti a capitar
Certuni che in onor
No m'avaria podesto imaginar,
Ch'essendo nel catalogo dei doti
Ghe restasse un fondachio de dindioti;
Prescindendo, ripeto,
Dal disgustoso efeto,
Che ga su mi prodoto
Saver in sta maniera
Che no gh'è un vero doto
Su la tera,
M'à proprio stomegà
L'esser certo cussì,
Che per esuberanza
De la crassa ignoranza
De sti dì
Nissun ghe sarà stà
Che gabia aprofità
De le opere mie,
Le quali d'ano in ano
Dai torchi de Andreola ze sortie,
Col plausibile fin de trar d'ingano
Queli che ga la paca,
La mania,
Senza saver un aca,
De far da mestri su l'astronomia,
E a furia de spropositi, d'impianti,
Dal numero dei veri scimuniti,
Dai sciochi, dai ignoranti,
Che semo in tuti i siti
Ben provisti,
Vien calcolai per novi evangelisti:
M'à urtà teribilmente
De veder palmarmente,
Che no ghe ze compenso
A bater sta cariera
Co la continua guera
Che se ghe fa al bon senso,
E le sconfite
Che in sti tempi baroni
El riceve infinite
Da la funesta armata dei zuconi,
Demodochè go fato sul mumento
Solene zuramento
De lassar in casson l'astronomia,
Stabilindolo tempo butà via,
E secondando el medico a la cura
Trascurar ogni studio de natura.
Co sto proponimento invelenà
Coro nela mia specola in sofita,
Dove le intiere note ò consumà
Quarant'ani continui de la vita
In mezzo a soferenze e patimenti,
Misantropo ridoto,
E là strenzendo i denti,
Col sangue messo in moto,
Trasportà da la bile, risoluto,
Fra pugni e fra scalzae colpisso tuto,
Ridugo in mile pezzi,
In fregole, in sfrasele,
E machine e strumenti e ordegni e atrezzi,
Che m'à servio per contemplare le stele,
Senza riguardo a quela bagatela
De ruspi e de dobloni,
Che ò dovudo dar fora de scarsela
Per aquistarli e per averli boni,
E po co un corpo e fora,
Fasso vegnir dessora
La massera,
Che m'à credesto mato
Co go ordinà ipso facto,
Che la sera
Col solito lucheto
Quel logo, che go dito, maledeto,
Quel logo che sin là,
No serve che lo zura,
Me gera sempre stà
Dileta cura,
Delizioso pensier,
Quantunque mia muger
Son certo che l'odiava
A la parola,
Parte per la rason che ghe tocava
Squasi tute le note a dormir sola,
E parte per paura povareta
Che me facesse mal
A tirar de continuo la careta
Co quel mio portentoso canochial.
Ma usà come che gera
In divisa de astronomo ogni sera
De andar a ritirarme
In gabineto,
E drento de sararme
Per star tranquilo e quieto
A far l'ufizio mio
Sin la matina drio,
Me so alora trovà
Un omo imbarazzà,
E per quanto che gabia pensà sora
No go mai catà fora
A st'indole de vita,
A sta mia ocupazion
Una sostituzion
Per mi gradita,
Tanto perchè dal fato,
Nissun lo negarà,
Ze belo e comprovato
Che in t'una certa età
Semo, fando astrazion da casi rari,
Tuti abitudinari,
E po per la rason
Che senza adulazion
Dir se me podaria
Un omo nato per l'astronomia,
Avendo prodigà su mi natura
Qualunque requisito
Del grado più squisito,
Come saria bravura,
Imensa atività,
E slanzo, e intraprendenza,
Memoria, volontà,
L'inzegno, la pazienza,
E la dose abondante de criterio,
Ch'esige un argomento cussì serio.
Titubante, perplesso,
Incerto de mi stesso,
E stufo e mal contento
Per no poder trovar
Modo da utilizzar
Del mio talento,
Sicome ogn'ano impreteribilmente
Mando a star in campagna,
Qua darente
La mia fida compagna
Che mia morosa stabile ze stada
Dal dì che l'ò sposada,
Avendo tuto quel che ga da aver
Una bona muger,
E va con ela el mori,
Voi dir el mio putelo,
Fruto dei mii sudori,
Che ze graziando el cielo
Bravo abastanza e bon,
Un anzolo, un paston,
Tanto che in tuto el mondo
No gh'è, le me permeta,
El so secondo
Se se lo cerca co la candeleta;
Sicome co la vita scelerata,
Per un corso de ani
Da mi fata,
M'ò procurà una strage de malani,
Son deposta ridoto
Svodà come un subioto
Da per tuto,
Nè bia che me vergogna,
Un omo de rifiuto,
Una carogna,
Aflito ogni qual trato da dolori,
E inutilmente predico e tambasco
Coi dotori,
I quali à fato fiasco,
Voi dir che i ga tentà
Co la so abilità
De medicarme,
Ma no i ghe ze riuscii che a tormentarme
Co impiastri e bevaroni,
Co stera de boconi,
Co bagni e sofumigi,
Co l'uso dei prestigi,
Che ga la medicina,
E co tanti sempiezzi
Per farme spender bezzi,
Procurando ai spizieri una intradela
Col sagrifizio de la mia scarsela;
Sicome vari amici e mii parenti,
Che ghe n'ò una caterva, un regimento,
Vedendo malcontenti
Che gera trati al vento
Tuti i medicamenti,
No i faceva altro fin che predicarme,
Che se voi liberarme,
Senz'altre porcarie da la magagna,
Nela bona stagion vaga in campagna;
Sicome tuti i medici anca lori,
E insigni professori,
I quali prevedeva,
Che se mai de quel troto seguitava
El mal tanto cresceva
Che presto terminava
Certamente,
Perchè i capiva de no capir gnente,
Me andava a la lontana
Sonando la campana,
Che l'aria de campagna me saria
Un refrigerio per la malatia,
E sin qualche comare patentada,
Che tien barca a do remi,
Da mi nei casi estremi
Consultada
Per cercar de guarir
Dal mal che me adolora,
No me fava che dir
Che andasse fora;
E sicome anca mi
Per verità
Gera un poco alarmà,
Capindo de dì in dì
Che 'l fisico e 'l moral
Per la vita bestial
Che aveva fato,
O gera per andar,
O gera andato,
Metendome a pensar
Sora el mio bruto caso
Seriamente,
E da tante proteste persuaso,
Che un metodo de vita diferente
Da quel che gera solito de far
Me podesse giovar
O poco o molto,
Me so alafin risolto
De domandar per qualche setimana
Un permesso de assenza da l'ufizio,
Cossa che a tuti quanti à parso strana
Dopo trentacinqu'ani de servizio,
Nei quali tropo onesto
Più de tre quatro dì no ò mai volesto.
Presento la mia istanza regolar
Co la fede del medico a l'apogio,
E fra zorni me vedo a capitar
La licenza de far
Quelo che vogio,
Ossia me vien concesso
Sie setimane intiere de permesso,
Aciochè possa dedicarle tute
A tentar de rimeterme in salute.
Contenta mia muger, bona creatura,
Per aver el ristoro
De far vilegiatura
Col so moro,
Oltrechè co so fio,
La ga ringrazià Idio,
E scomenzà ga alora
A butar soto e sora
El guardaroba;
La strussia, la se sgoba
Come un can,
E in manco de mezz'ora
Facendose dar man
La tira fora
Abiti e sopraveste
A bataglion,
Per i dì de laoro e per le feste,
Da tute le stagion,
E schieti e de color,
E de lana e de seda e de vapor,
Cotoli, sotocotoli, bustine,
Camisete, capoti, manteline,
Bavarim colarini,
Sortimento de sciali,
Borse, borsete, ventole, ombrelini,
Gran scarpe, gran stivali,
E manizzete e guanti,
Capei mi no so quanti,
Scufie, piume, galani,
E merli e strafanici,
E cento mile impici,
Che ghe ze da sti ani
Per le done,
Cossa, che zuro, impone.
Fora fora camise,
E nove e vechie e sbrise,
De tela e de coton,
Calze d'ogni rason
Picole e grande,
Stomeghini, mudande,
Quantità de coleti e de sciarpete,
Le so mate bochete,
Fazzoleti, gilè,
Mage, fanele,
E tuto quel che gh'è
Nele cassele:
Fora dai armaroni
Braghesse, veladoni,
E paletò e giachete,
Le veste, le barete,
Ligambi a centenera,
Tirache d'ogni sfera,
Un gran saco de scarpe e de prussiani
Che no se frua in dies'ani,
Un fasso de bastoni,
Dopia porzion de ombrele,
Colari e colaroni
Co la pele,
Gaban, tabaro, greca,
Infati un equipagio,
Come se fusse 'l viagio
De la Meca,
Quando, che nissun senta,
Se trata de la Brenta
Per fermarse a la Mira
Sin che 'l permesso spira,
Dove, l'ò provà mi,
Per el tempo cativo qualche dì,
E me vien dito qualche setimana,
No se va gnanca su la maresana.
Per po condizionar
Tuto pulito
In modo che l'atrito
No possa rovinar,
Oto zorni filati
Semo deventai mati,
Laorando da fachini
Se pol dir dai matini
Sin a sera
Co l' assistenza de la camariera,
E de altre do done che ò volesto
Stipendiar a zornada
Aciò se fassa presto,
E sia tuta la roba ben nichiada,
No abadandoghe gnente
A mia muger,
Che de l'ordine amante estremamente,
Voleva che chiamasse un ingegner
Per far che l'equipagio el meta via
Coi preceti che dà la geometria.
Dopo tanti fastidi e tante cure,
Dopo tante premure,
Dopo de averse tanto sfadigà,
Perchè tuto proceda esatamente,
Mi, la Giulia, el mio Bepi e mio cugnà
El mese de setembre finalmente,
E no me ingano, el zorno disisete,
Fra bauli, valise, fra sachete,
Fra i bastoni, i gabani, fra le ombrele,
Strucai come sardele,
Sepolti nei fagoti,
Se imbarchemo a le nove de matina,
E ai diese boti
Se ze za a Fusina.
Col sussidio de zente
Ben pagada
Ze in t'un ora crescente
La roba scaricada
Sul pontil,
E el ricetor gentil,
Co l'à sentio che mi son sior Nalin,
Ga dito a piena boca
A la guardia zelante de confin,
Là no se toca
Perchè a chi ga la so camisa neta
No s'à da domandarghe la boleta.
Gera za preparai
El legno e do cavai,
Che Checo, altro cugnà,
El n'aveva mandà,
E co s'à fato tuto
Quel che gera da far,
In manco d'un minuto
El cochio va a tacar;
In legno su montemo,
E favorii da tempi benedeti
In viagio se metemo
Insieme a tre careti,
Che aveva requisio
Perchè i ne vegna drio,
Sui quali gera stai
Con sicura maniera
Bagagi e camariera
Caricai,
E co quel treno tanti.
Che gavemo incontrà,
N'aveva batizzà
Per comedianti.
Andando de bon troto,
In punto a mezzo boto,
Coi musi spolvarai
Semo a la Mira Vechia desmontai.
Apena s'entra in casa
Se se strucola e basa
Fra i parenti,
E se fa i complimenti
Che se usa;
lntanto a la refusa
In t'un mumento
La roba i porta drento,
Che messa tuta in tera,
Co precauzion perchè no la se bagna,
Da tanta che la gera
Pareva una montagna
De presenza,
E malgrado l'usada diligenza
Per far che no suceda confusion
Nela distribuzion,
De la qual mia muger
S'à dà tuto el pensier,
Mi el zorno drio
M'ò messo le braghesse de mio fio,
Che me fava sacheto,
E m'ò la prima sera trova in leto
Dopo de aver stuada la candela
Per camisa da note una intimela.
Chi va dessuso in camara a lavarse,
Chi se averze 'l baul, chi la sacheta,
Chi se mete da fisso a petenarse,
Chi el fango, chi le sacole se neta,
Chi sporco come un porco va a cambiarse,
Chi se ritira a far qualche cosseta
De quele che le pol imaginarse,
Quando se sente Anzolo, el gastaldo,
Co la bela parola
Chi vol magnar de caldo
Vegna a tola.
Mi alora, mia muger, el mio putelo
E do dei mii cugnai,
Do babi da afamai,
Se va in tinelo,
E là col muso in piato tuti ziti,
Come fussimo frati certosini,
Se magna da decisi parassiti,
Se para tuto zo, che no gh'è spini:
Una bona manestra de lasagne
De prima qualità,
Che forsi no se trova le compagne
Nele fabriche estese de cità;
Un lesso de polame
A l'uso de campagna,
De quelo che se magna
Senza fame;
Pastizzo de patate
A maravegia fate,
Essendo i macaroni
Che se trova a la Mira
Dei nostri manco boni
Per quanto i se imbotira;
Un toco de stufà
Che stuzzega el palà,
Piato che fa furori
In tola dei signori;
Un frito de carote prelibate,
Che là le ze tanfate,
E se ga a basa,
Perchè da tanti le ghe nasce in casa,
Un rosto de dindioti
Arlevai a polenta
Per ecelenza coti,
Dei quali su la Brenta,
E mi lo so per prova
Sempre se ghe ne trova;
El so bodin de late a crepapanza,
Che là nol costa gnente
Per la gran abondanza
De le armente;
La salata montada,
De la roba salada,
Formagio piasentin
Che ga la giozza,
Un bon goto de vin
Co la simozza;
Pan fresco de farina
De la più molesina
Ben coto e ben levà
Che 'l par un buzzolà,
E per fruti dei gnochi saporiti,
Perchè queli ze i siti
Che per l'aria beata
In qualunque stagion se ghe ne cata.
Tuto insuma ben fato,
Tuta roba ecelente,
Abondante ogni piato
Da poder replicar comodamente
Tanto che per un'ora
Là no se magna minga, se divora;
E per render completo
El tratamento
Teraglia fina, tovagiolo neto,
E sin possae d'arzento.
Per po facilitar la digestion
Se beve el so rosolio maraschin,
El so cafè col zucaro panon,
E se se mete in gringola, in morbin;
Sucede fra de nu la confusion
Prodota dai vapori che ga el vin,
Se argomenta, se ciga, se questiona;
Ma no go cuor de dir che se ragiona.
Alafin se levemo sasonai
Dopo squasi tre ore de sentada;
I calzoni ze streti deventai,
E se ghe dà una gran desbotonada;
Chi lagnandose d'esser agravai
In piena libertà trà la rutada;
E chi va a far el chilo sul sofà
Come un vero porcelo stravacà;
Chi supia de presenza più d'un folo,
Chi stenta la parola a articolar,
Chi stà duro impalà tanquam pandolo,
Chi el stomego se sente a rebaltar,
Chi un passo no se fida de far solo,
Chi se mete tranquilo a rumegar,
Chi de la digestion dà el primo indizio,
E chi cerca de far qualch'altro ufizio.
Mi che gera ridoto
Una baga decisa, un bariloto,
Che me sentiva un rantego, un cataro,
Per el massa magnar,
Impizzo el mio zigaro,
E a la romana senza saludar
Togo suso el capelo,
El mio baston,
E a passo de poltron
Lasso el tinelo:
Go tuta la mia quiete vago solo
Prima a darghe un'ochiada
A l'orto, al brolo,
E po finisso ia strada,
Indove sul mumento
Ghe peto el muso drento
A amici e conoscenti,
Che andava via baucando,
E su vari argomenti
Disputando.
Apeaa che i me vede
Co una cordialità
Che nissun crede
Tuti m'à saludà
Fandome in conclusion
Le nenie, le domande
Che se fa de ordinario in ste ocasion;
Da quando da ste bande?
Da dove capità?
Astu fato bon viagio?
Bravo, cussì, coragio,
Bia moverse, straviarse,
Nè per far l'indovin
S'à da mazzarse
In specola o a taolin;
Sentistu che siroco?
Che polvere insolente!
Te fermistu qua un toco?
Te fa bisogno gnente?
Gavemio novità?
Tizio coss'alo dito?
Caio s'alo spiegà?
Sempronio galo scrito?
S'à Piero maridà?
Ze Polo tornà indrio?
Martin zelo guario?
In piazza ghe ze moto?
La diga come vala?
E toca de sto troto,
E via co sta cavala.
Rispondo a tuto e dopo ringraziando
La compagnia de tanta so premura,
Me informo, ghe domando
Chi sto ano ghe ze in vilegiatura,
E cossa che se fa su sta riviera
Da la matina sinamente a sera.
Alora con un ton de compiacenza
Ingiotindo dal gusto la saliva,
A dir cussì scomenza
Un de la comitiva:
Parlandote, Camilo,
Su quel che più interessa, de signore,
Gavemo de sutilo,
Sto ano qua ghe ze quanto che ocore,
Gh'è vechie de bon sesto
Fornie de qualità,
Done, che te protesto
Sa star in società,
E un numero de tose
Più fresche de le rose,
Care, graziose e bele,
Musoti che ve tenta,
Che se pol dirghe stele
De la Brenta,
E gavemo el vantagio
Segnalato,
Che dal Dolo, dal Tagio
Vien qua de trato in trato
Co manco se se aspeta
Qualche bela doneta:
In conclusion
Senza esagerazion
Bia confessar,
Che rispeto a bel sesso
Se stenta de trovar
Megio complesso;
Oltre la quantità,
Squasi ecedente,
Se ga la qualità
Bona, ecelente,
Che cerca tuto el zorno,
Co bravura
De render più gradito sto sogiorno,
E che la ne procura,
Ognitanto sogeto
De qualche bel caseto
Per far in modo onesto,
Del chiasso e del bordelo
A spale ora de questo
Ora de quelo.
Del sesso mascolin mi no te parlo,
Ti podarà sociando giudicarlo,
Ma se pol dir in pien
Anca su sto raporto de star ben,
Perchè se ve trovè
Co qualcun se capisce che no i ze
Pico, Rutilio, o el capucin da Cento,
Ma onesti, boni, e pieni de talento.
Ariva po qua spesso
Atirai dal bel sesso
Tanti e tanti,
E da tuti i cantoni,
De sti nostri galanti,
Ossia rondoni,
O col caval che monta i capucini,
Che vol dir a penini,
O co la so vetura,
Opur, caso assae raro, per le poste
A magnarghe le coste
A la zente che fa vilegiatura,
La qual sempre cortese,
Senza abadar a spese
Coltiva fra i piaceri
Quelo de aver in casa forestieri,
Un numero dei quali, la ze chiara,
Per darghe una capara
A chi li favorisce de agradir
La so ospitalità,
Se vede a comparir
Co gran facilità
Combinando la basa
De star a loco e foco in qualche casa.
Rispeto po a la vita che se fa,
Mi te dirò che qua
In mezzo del bagordo e del solazzo
Se fa precisamente
La vita che faceva Michielazzo,
Sive gnente;
Apena averti i ochi la matina
Se tol per colazion
O cafè e late quanto una puina,
O un quarto de capon,
El zorno avanti vegnù zo de tola,
O un scapin de formagio, ma de quelo,
O una bona brisiola
De vedelo,
E chi ga l'apetito che lo agiuta,
Come apunto go mi, polenta suta.
Sina po che vien l'ora del disnar
Tuti qualcossa se se mete a far;
Chi va co la so fiaca
A le Porte, a la Mira, al Tagio, al Dolo,
Chi fuma, chi tabaca,
Chi cerca de star solo,
Chi drio de le signore
Impiega le so ore,
Facendoghe 'l galante,
E chi, squasi scordandose le bele,
O che zoga al volante,
O a le burele;
Tuti fa quel che i crede,
Ma in tanti no se vede
Nissun che se procura
L'insulsa compagnia de la letura,
E questa ze la prova
Quanto ben qua a la Mira se se trova.
A le do, le do e mezza, e ghe ne ze
Sinamente a le tre,
Se va a sentarse a tola parechiada,
E se dà una magnada,
Che par dal canto mio
No s'abia visto mai grazia de Dio;
Quando s'à ben disnà,
Destesi sul sofà,
Opur butai sul leto,
Se fa el so pisoleto,
E dopo se se leva paladini;
Se va per sti casini
A trovar le signore,
Se ride, se tambasca, se discore,
Se dise suso anedoti
De quei che ga la barba,
Se cerca a qualche pampano
Farghe ingiotir la garba;
Gh'è forfe inesorabili,
Che tagia zo tabari
Co un estro inarivabile,
Co franze e con colari;
Ghe ze trati de spirito,
Gh'è sesti, ghe ze moti,
Se conta su le fufigne
De queli che ze coti;
Se gode chi ze zovene
A passegiar in strada,
I vechi che ghe incomoda
Fa invece la trotada;
Carozze de ogni genere
Se incontra co frequenza,
Se vede impreteribile
Passar la diligenza;
Se va su e zo, se tatara,
Fra el Tagio e fra la Mira,
Finchè 'l mumento capita
Che tuti se ritira.
Alora infacendae,
Sempre a porte sarae,
Va le signore
A far la so taoleta,
E quelo che ghe ocore
Fin l'ora consueta
De la conversazion,
Col progeto se sa de parer bon.
Ancuo qua, doman là, ghe ze ogni sera
Numerosa e brilante compagnia;
Done care, graziose, e de maniera,
Che dispone al dileto, a l'alegria,
Tose, musi da basi, con dei ochi
Insolenti, batochi,
E per spiegarme in termini che usa
El linguagio de moda,
De queli che ve brusa,
Che ve inchioda.
Omeni disinvolti e cortesani,
De spirito provisti e de idee chiare,
Qualità da sti ani
Che ze rare,
E là senza eticheta,
Senza formalità,
Se chiacola, se ride mezz'oreta,
Se se conta a vicenda novità,
Ga logo i so bomò, la barzeleta,
Che piase in società,
Scampa de quando in quando
La lasagna,
Che no ze contrabando,
Non essendo de quele che se magna,
E dopo se se mete
Chi a zogar a tressete,
Chi a qualch'altra partia,
E chi a zoghi de quei de compagnia,
Ma la più parte a tombola, che qua
St'ano s'à combinà
La chiapa voga,
Avendose trovà fra sti signori
Diversi che la zoga
In modo da chiamarli professori.
Verso la mezza note ze fenio,
Se tol suso i capeli, i so bastoni,
Se rancura el done, e co un adio,
Che se ghe dà ai paroni,
Per esser in sto sito
Bandii, come t'ò dito,
I complimenti,
Tuti quanti contenti
Se va a cena,
E questa ze la vita
Veramente gradita,
Che se mena
Dal far del zorno sinamente a sera
L'ano quarantadòo su sta riviera,
Vita che se capisce
A qualunque carogna conferisce,
Perchè la mediciaa
Del dolce no far gnente
Ne sera ne matina,
El star alegramente,
Scordar tuti i pensieri,
Tonfarse de piaceri,
Magnar a crepapanza,
Dormir soni beati,
Ze in sostanza
La unica maniera
Per vegnir tanfofati
Su la tera.
Dopo sta destirada de saroto,
Dopo una conclusion cussì eloquente,
Convinto se pol dir, sta vita adoto,
Sta vita fra le vite divertente,
E in pratica capisso da là poco,
Che a no farla sin qua so stà un aloco.
In quarantadò dì che ò passà fora,
Lo devo confessar,
No ò avudo un quarto d'ora
Da poder dir mi no so cossa far,
Ma anzi a l'incontrario
Stentava sina de trovar mumento
Per qualche mio afareto necessario,
E no gh'è stà che 'l vento
Che m'abia molestà,
Avendome obligà
De star do zorni intieri a casa mia
Per la paura d'esser portà via;
E qua quelo che ò scrito,
Quelo che ancora ò dito
Torno a dir,
Bisogna convenir
Che la natura,
Se spesso ne procura
Dei dileti,
La ze per altro piena de difeti.
Fando astrazion dal numero dei mali,
Se pol dir infinito,
Che sora dei mortali
La spande in ogni sito,
E fa cussì che poveri e signori
Viva tanti mumenti
In mezzo dei dolori
Per esser presto o tardi socombenti:
Fando astrazion dai miera
E de inseti e de bestie,
Che no dà su la tera
Che molestie,
Gh'è 'l caldo che ne mazza,
Gh'è 'l fredo che ne giazza,
Ghe ze brose la note,
Ghe ze piove dirote,
Ghe ze neve, tempeste maledete,
Gh'è lampi, ghe ze toni, gh'è saete,
Gh'è caligo a fagoti,
Vulcani, teramoti,
E a tutequante l'ore,
Se campessi mil'ani,
Una strage de afani
E de malore,
Fra le quali l'amor,
Che ghe riduse 'l cuor
Sin ai Neroni
A fregole, a boconi,
E che del mio,
No me vergogno a dirlo,
El ga fato desio
Senza lassar speranza de guarirlo;
Ma no gh'è secatura,
Anzi no gh'è tormento
Che daga la natura
Pezo, secondo mi, pezo del vento;
Lu spianta albori,
Lu atera fabriche,
Facendo vitime
Senza pietà;
Lu coi so refoli
I mari agita,
Dove pericola
L'umanità;
La piova cossa zela?
L'è aqua che no bagna
Quando se ga l'ombrela;
La tempesta fa oltragio a la campagna,
Ma la dura minuti
E no la toca a tuti;
La neve povareta
Vien zo tranquila e quieta,
E cussì biancolina
La par giusto puina;
Ze 'l caligo neutral,
Nol fa nè ben nè mal;
El fogo dei vulcani
No scota mai co se ghe stà lontani;
Per lo più el teramoto cossa falo
Co i so do tre scorloni?
Una festa da balo
Senza soni;
Ma el vento ze molesto,
El vento ze funesto,
El vento no se vede e se lo sente,
L'è, se pol dir un gnente,
Che per altro ve investe, ve maltrata
Co una forza che ze de nova data;
Lu in qualunque sia buso.
Per quanto ben stropà
Co gran facilità
Se cazza suso;
Lu entra in ogni sfesa
Per quanto la sia streta e sia difesa,
E mi un dopodisnar
Impazientà
Dal so tropo supiar,
Mi go esclamà:
Mo finissila spietato,
Bruto mostro, can da toro,
Vento infame, scelerato,
Mi te abomino, te aboro;
Va a ficarte nel'inferno,
Va per sempre a la malora,
Va a supiar nel fogo eterno,
Nè da là vegnir più fora,
Va nel baratro più basso,
Nel profondo del'abisso,
Va compagno a satanasso,
Che de cuor te maledisso,
Va fra mezzo tuti i diavoli,
Coi so corni che t'impira,
Nè vegnirghe a secar l'anima
Ai viventi de la Mira:
Dei tormenti d'ogni genere,
D'ogni mal, d'ogni dolor,
Che natura daga ai omeni,
Ti è l'estremo, ti è l'oror,
Ti ti ze la pena massima,
Ti ze 'l crucio, ti è 'l flagelo
Più tremendo, più teribile
Che provar ne fassa el cielo,
Ti è 'l castigo più funesto
Che mandar possa el Signor,
Ti ze sina, lo protesto,
Ti ze pezo de l'amor:
E amor, tuti lo sa, che l'è un bricon,
L'è astuto, l'è busiaro e zarlatan,
L'è un delirio, un tormento, una ilusion,
L'è ladro, stochizzante, l'è rufian,
L'è un Atila, un Dionisio, l'è un Neron,
El ze un bogia, un sicario, l'è un tiran,
L'è un traditor, l'è un empio, el ze spietato,
El ze fio del demonio, un scelerato;
L'è un mostro da l'inferno vegnù fora,
L'è un drago che se fica in mezzo el sen,
L'è più infame del vaso de Pandora.
L'è un orso, l'è una tigre senza fren,
Che 'l cuor barbaramente ne divora,
L'è una spada, l'è un stilo, l'è un velen,
Che agisce lentamente e i nervi irita,
Che ne tormenta e spesso tol la vita.
Si, l'è un velen in forma de piatanza,
Che ne seduse e stuzzega el palà,
E mi che assae me brontola la panza,
Causa qualche bocon che go magnà,
Vogio sti quatro zorni che me avanza
Viver megio che posso, e lusingà
D'esser presto guario perfetamente,
Amor detesto e stago alegramente.
Ma tornando a sto passo in argomento,
Prescindendo dal vento,
Che per do dì filai
L'à in modo imperversà
Da tegnir tuti in casa sequestrai,
Tanto ben m'ò trovà,
Che, lo confesso,
Scadendo el mio permesso
Gera squasi tentà,
Fingendome gnancora ben guario,
De cercar che 'l me fusse prorogà
Per megio esercitar l'ufizio mio,
Come go visto a far
Chi no ga vocazion per lavorar,
Ma pensandoghe su
E caspita vedendo che in virtù
De la vita beata e benedeta,
Che per sie setimane aveva fato,
Me gera spario el muso da poeta,
Pareva se pol dir squasi rinato,
Forte, robusto, in ton, de bona ciera,
Un becafigo, un tordo de risera,
E in conseguenza che no saria creto,
Senza esitar go abandonà el progeto.
Dunque ai trenta de otobre verso un boto,
Dopo una generosa colazion,
Go tolto su el fagoto,
El capelo, l'ombrela, el mio baston,
E, rassegnà, comosso al magior segno
Col fazzoleto in man so montà in legno
Dando a tuti un adio,
Che ga da aver i sassi intenerio.
Lasso là, ma basai col cuor in boca,
Lasso là la muger, là lasso el fio,
Anzolo cortesan la scuria schioca,
Andemo che nissun pol starne drio,
E intanto che i cavai pesta la zampa
Case, casini e la campagna scampa;
Qualche minuto dopo i quatro boti
Arivo a casa e trovo che in tinelo
Ghe gera i risi in tola apena coti;
Me sento co mia mare e mio fradelo
Ma la manestra, el lesso, el rosto, el frito
No magno più del solito apetito.
Passa un, passa do, passa tre dì,
Va de qua, va de là, pur per distrarme
No saveva più cossa far de mi,
No trovava argomento da ocuparme
Tutaquanta la sera,
E spezialmante in leto,
Senza muger e usà come che gera
De star sin squasi a zorno in gabineto
Per la mia profession
Fata da ani
Col canochial in man sempre al balcon,
Tirando i ochi come i barbagiani
Per scovrir co un esempio de bravura
I reconditi arcani,
De natura,
E tuti cosultar col mio talento
I corpi che ghe ze nel firmamento.
Quando una certa note,
Che no ghe gera caso de dormir,
M'à parso de sentir
In sofita dei colpi, dele bote:
Co le rechie a penelo stago atento,
Per esser ben sicuro,
E, no gh'è dubio, sento
Del sussuro;
Sbalzo fora de leto
Risoluto,
Le zavate me meto,
Me impiro el soratuto,
Me togo su un bon legno,
El mio lumin che tegno
In camara de pato,
E asvelto come un gato.
In sta figura,
Vago dessù a bel belo
Per no farghe paura
O a la dona, o a mia mare, o a mio fradelo,
Che i ga cuor quando i ariva a indormensarse
Dormir dies'ore senza mai voltarse.
Varda, ascolta, procura,
E studia la maniera
Più sicura
De arivar a saver cossa che gera
El strepito, el fracasso,
Che gaveva sentio stando dabasso;
No vedo anima nata,
No so bon
De capir la rason
De quela malegnasa serenata.
Sorpreso, incerto, inquieto,
Sospeso, duro e dreto,
Resto come un stival,
Quando che finalmente
Me par de sentir zente,
Opur qualche animal
Che rosega, che becola,
Indove, indovinè?.... nela mia specola.
Come za quarant'ani avaria fato,
Se s'avesse tratà
De la morosa,
Con un colpo spietato,
La porta ò sfracassà
Come una nosa,
E tuto in t'un mumento,
Rabioso, inviperio,
Co la bile sui lavri coro drento,
Disposto a far desio,
Senza pietà,
De l'empio, de l'ardito,
Che gavesse trovà
Sconto in quel sito:
Ma! no ghe ze nissun, no gh'è vivente,
E no se move gnente;
Vedo per altro in mezzo quei frantumi,
Opera de ste man do mesi fa,
I mii imensi volumi,
Che gaveva butà
In tanta so malora,
Dai sorzi rosegai
Drento e de fora,
E convinto che gera el tananai
Da ste bestie prodoto,
Che ghe trovava gusto a rosegar
Le mie fadighe megio del biscoto,
Me so messo a esclamar:
Oh! sorzi scelerati,
Brutissimi animali,
Che sè dei leterati
Nemici capitali,
Desidero che a un trato
Finì barbari mostri in boca al gato,
E che la providenza
Estirpa de vualtri la semenza.
Passà po el simiton me so sentio,
Per quel logo svegiarse 'l sentimento,
Che tegniva con forza sepelio;
Del guasto che ò comesso mal contento,
Magno a quatro ganasse 'l pan pentio,
E son là per andar in svanimento,
Ma pur tropo da quando che so nato
Go inteso a dir che quel ch'è fato è fato.
Dopo de sto acidente,
Resto de mal umor, col muso duro,
So de andar in sofita renitente,
Ma no passa oto dì che co fa scuro,
Me calumo dessuso co la quiete,
E me trovo za belo e capità,
Dove go contemplà
Stele e comete,
Provando un senso ingrato
De la strage crudel che aveva fato.
Alora co pazienza e con impegno,
Sospirando, le crepe me rancuro,
De unirle tute e de meterle a segno
Per quanto ze pussibile procuro;
Spendo un mondo de bezzi per comprar
Quelo che no se pol più governar;
Con tuta l'atenzion
Frego, pulisso, neto,
E drento de novembre in conclusion
El canochial ze za sul cavaleto.
Intanto che faceva sto festin,
A casa note e zorno capitava
Al chiarissimo astronomo Nalin
Letere condanae che me mandava
Da per tute le bande,
In modo urgente,
Con supliche e domande
I astronomi del secolo presente,
I quali al mio confronto,
Senza farghe un afronto,
Se pol dirghe ignoranti, pantaloni,
O tuto al più schiesoni,
Pregandome con termini purgati,
Con proteste de stima e de rispeto,
E coi distinti elogi meritati,
Che ghe spedissa come 'l consueto
El presagio sicuro
Anca per l'ano prossimo futuro,
Per poder regolarse a spale mie
Nele so profezie,
E con linguagio franco
Dir dei miera de buzzare de manco.
Alora, lo protesto ingenuamente,
Me ze venudo el scrupolo, el rimorso
De veder su la tera tanta zente,
Che senza el mio socorso
Tuto el tempo de l'ano
I gavarave 'l dano
De no saver co el fredo ne molesta,
Co el caldo ne descola,
Co nevega, co piove, co tempesta,
Co el vento tira o mola,
Co vien el teramoto,
Co supia la bufera,
Nè deboto deboto
Co fa sera.
Per sto principio de filantropia,
Che in mi ze inato,
Torno da capo co l'astronomia,
Torno a deventar mato
Per el ben dei mortali
Con bussole, con prismi e canochiali,
Con barometri e lenti,
E co la gran caterva dei strumenti,
Che come a mi, sarave necessari
A tanti disparai che fa lunari,
E ai trenta de decembre in punto e in broca,
Co la spiuma a la boca
Dal strussiar,
Arivo a completar
La predizion,
Per l'ano che ze prossimo a vegnir,
Co una tal precision
Da far stupir.
Go subito disposto de stamparla,
Ma sicome qualunque vede chiaro
Che 'l tempo m'à mancà de publicarla
Per el primo del mese de genaro,
Cussì per riparar a l'emergente,
Go adotà l'espediente
De ordinarghe a Andreola,
Che senza far parola,
Senza far ecezion,
A chi co sto mio libro vegnarà
Da lu co ze stampà
La predizion,
El ghe n'abia da dar
Gratis, vol dir per gnente, un esemplar.
Perchè po no se creda che mi dorma
Su sto serio argomento,
E tuti gabia norma
De regolarse sina quel mumento,
Intanto ghe dirò, che in general
Co l'agiuto special
De Quel Dessora,
Nu gavaremo un ano che inamora,
Un ano che darà
Abondanza de tuto e sanità,
Salve, cussì fissà ze da le stele,
Le ingrate malatie de le scarsele.