Senza starve a cantar d'arme, e d'amor
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo II, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 2.djvu |
| ← Zà, che 'l vento, e la piova me fà star | Edission e fonte ▼ | Ghe xe al Mondo certi siori → |
1Senza starve a cantar d'arme, e d'amor,
Senza dirve de guerre, e de fracassi,
Per soddisfar el genio, e un certo umor
Voggio cantarve della Mona i spassi;
No voi però, che ve mettè in rumor,
Siben, che sti me versi è troppo grassi,
Perchè ve voi provar con rason bona,
Che tutti i mali nasce dalla Mona.
2Tiolemo esempio prima in Salamon;
Che per la Mona hà dà in te le pazzìe,
E privo de giudizio, e de rason
Hà fatto tante, e tante idolatrìe;
Orlando, che coll'arme giera bon
Far tremar un Golia da capo a pìe,
Zeloso per la Mona l'è stà visto
Andar matto per strada per sto acquisto.
3Sanson per un tantin de quel servizio
A Dalida infedel si fà soggetto,
Tanto se gà oscurà tutto 'l giudizio,
Che 'l trovava in la Mona ogni diletto,
L'è andà per una Mona in precipizio,
Orbo, senza cavei, a so despetto,
L'hà copà i Filistei colla colonna
Per la Mona fatal della so Donna.
4Neron, che se puol dir Rè de tiranni,
Del popolo roman strage, e rovina,
Dopo aver fatto tanti gran malanni,
Hà fatto avrir so Mare una mattina,
Fà Seneca svenar, che per tanti anni
Xe stà 'l maestro, che gà dà dottrina,
E pò alfin el l'hà fatta alla so Dea
Per la semplice Mona de Popea.
5Per gelosia Ermolao della consorte
Brusò Troja una notte all'improviso,
Ma nel so primo amor costante, e forte
Nol podeva aver ben per quel bel viso,
Anzi l'hà stabilìo piuttosto a morte
Riddurse, che lassarla ad un Narciso,
E per quanto, che lù gabbia studià,
La sorte rìa gà tutto rovinà.
6Ruggier xe andà più volte in man d'Alcina,
Credendo, che la fusse Bradamante,
El gustava la Mona ogni mattina
Per farse publicar un vero amante.
Priamo per una Mona è andà in rovina
Dopo aver bù dolori, e pene tante,
E Giove senza onor, senza decoro
Hà lassà d'esser Dio per farse un toro.
7Paris Omo da ben per ogni conto
Per la Mona de Vienna è andà in deliri,
Alfonso per Biancafior xe stà a dir pronto,
Che 'l viveva de lagreme, e sospiri,
Marte, che al mio parlar no resta sconto,
Lù hà fatto colla lanza dei bei tiri,
Marte, ch'è stà costante a ogni cimento
Hà fatto el Dio Vulcan becco contento.
8Anca Ercole hà invidià molti bravazzi,
Che perdea per la Mona le so glorie;
Col cuor intento sempre a più solazzi
Trava là in un canton palme, e vittorie,
Scipion, Cesare, e tant'altri Omenazzi,
Ch'ai so eredi hà lassà grande memorie,
S'hà lassà dominar da più proriti,
Che fà tirar el Cazzo anca ai Romiti.
9Lassa Alcide el so sdegno, e la so ira
A debellar i mostri avezzo, ed uso,
E perchè della Mona gà la mira
Abbandona le gaerre, e tiol el fuso.
Orfeo col son della so dolce lira
Frenetico d'amor mesto, e confuso
Per placar colla Mona el duol interno
Và Euridice a cavar fuor dell'Inferno.
10Monarchi, Potentati, e Imperatori
Gà fatto de capello a sta gran Mona,
Filosofi, sapienti, e gran Dottori
L'hà fatta del so cuor sola parona,
Rè, Duchi, Gardenali, e gran Signori
S'hà cavà riverenti la corona,
E xe stà messi i regni a ferro, e fuogo
Per trovar in la Mona un pò de liogo.
11Donca bisogna dir, che sta Pottazza
Sia 'l giubilo, e 'l contento dei mortali,
Giubila tanti, e tanti se ne ammazza,
Per la Mona sbasisce i Dei immortali.
La Mona infame d'una scarabazza
Fà nascer tante risse, e tanti mali;
Donca ve provarò con bona frase,
Che la Mona è un boccon, ch'a tutti piase.
12Mona, manna del Ciel, e dolce vita,
Refrigerio dei Cazzi, ch'è languenti,
Mona, che dell'Osel xe calamita,
Mona consolatrice nei tormenti,
Mona cara, soave, e assae gradita,
Che morsega l'Osello, e no gà denti,
Mona del miel più dolce, e delicata,
O dolcissima Mona, o Mona amata.
13No se puol aver gusti, nè dileti,
Se no se gà 'na Mona al so comando,
Mona, che divertisce i Frati, e i Preti,
Boccon curà, che tutti và cercando.
Scrivè in lettere d'oro, o vù Poeti,
Che 'l gusto della Mona xe 'l più grando;
E acciò, che no credè, che ve cogiona,
Metto zoso la penna, e vago in Mona.