L'Elefante
|
Edission original: |
Pietro Buratti, Poesie e satire di Pietro Buratti veneziano, corredato di note preliminari ed annotazioni scritte dallo stesso autore, Amsterdam, J. Loocke, e figlio, 1823 |
|
Fonte: |
| ← Epistola a Piazza | Edission e fonte ▼ | Lettera a Paolo Stella → |
Finissila una volta buzzarona!
Voi la mia pase, astu capio? la vogio;
Zà pur tropo in paese se tontona
Che posso i corni urtar in qualche scogio;
Son stalon de famegia, idest mona,
Gò un per de fioli, e presto el terzo imbrogio
Minacia la mugier sgiónfa la pazza
De la poca semenza che me m'avanza.
Cussì digo a la musa, ma custia
Ridendome in tel muso da putana
La sà tanto zogar de furberia
Che perdo a so piacer la tramontana,
E come per parlar co pulizia
Co tira a l'omo in braghe la membrana
Rason nol sente, cussì el mio cervelo
Col me tira l'è pezzo de l'oselo.
E zà messo in ardenza el me domanda
La descrizion esata e veritiera
De la morte famosa e memoranda
Che à fato in sti palui cambiada in fiera
La bestia più bona e la più granda
Che sia sudita a l'omo in pase e in guera;
L'argomento xé degno de un zigante
Consacro sti mi versi a l'Elefante.
E come me propono fermamente
De no andar co la tromba a publicar
I mi sfoghi secreti a certa zente
Che no sà l'amicizia rispetar
Fra quatro muri vogio alegramente
La materia a mio modo tamisar,
Che me la godo assae co senza fren
Posso tuto molar quel che me vien.
De l'otocento mile diese e nove
Da Cristo in quà del mondo Redentor,
(Ano da no scordarse per le prove
Che à dà del so gargato la Fodor,
E per tante bestemie vecchie e nove
Che sul teatro nobile e magior
S'à dito contro i capi diretori
Che à tolto in mezzo un corpo de signori)
Co lioni, co tigri e co scimioti
Ubidiente al comando del paron
Ne l'ordinario sito dei casoti
A piantà sede un caro Elefanton
Che chiamando a vederlo aseni e doti
In logo separà, cortese e bon
D'inteligenza el dava segni tali
Da far crederi omeni anemali.
O tanto poco almanco superiori
Da no passar per bone le monae
Che in catedra ne spazza i professori
Co papagai de buzzere sunae
Da papagai so degni antecessori
I ne conta le solite vechiae
Che l'omo de natura xe el paron
Col sezendelo fiaco de rason.
Ma chi sto mio raconto ascolterà
Co pazienza arivando sin al fin
Da prove de confronto capirà
Che a l'omo se ghe stua presto el lumin,
Che la bestia rason su l'omo gà
Se tropo el vol tetarghe in tel martin,
E che sto bel sovran de la natura
Xe un composto de fiabe e de impostura.
Maledeti episodi! ma zà ò dito
Che vogio sbabazarme in sto argomento.
Solitario maestoso nel so sito
A chi co mezzo franco entrava drento
Senza sgarar d'un'ete el fiol pulito
Dava col naso gran divertimento,
E ghè sta qualche vedova vogiosa
De tocar la proposide nervosa.
Co questa una monea butada in tera
Servindoghe de man presto el chiapava,
E se un'altra e pò un'altra ghe ne giera
Ubidiente al custode el le brincava;
Da una botiglia el stropolo de cera
Senza tira bosson neto el cavava,
E pò voltando el naso per de soto
El la svodava in boca come un goto.
Una valdrapa strazza, disonor
De spale che ne l'India e ne la China
Porta in ziro l'istesso Imperator
Se mai ghe chiapa el flato la matina,
Suso più volte el se vedeva tor,
E con inteligenza Elefantina
Destirarsela quasi sora el dosso
Perchè el paron po ghe montasse adosso.
E no de bote, ma de l'ose sola
Se valeva el custode comandando,
Che sto bravo anemal co la parola
Generoso de cuor serve de bando;
E se per apendice de la scuola
Lo vedevi col naso andar scorlando
Una mosina, l'anemal capiva
Che la batua per el paron serviva.
O montagna de carne! o bestia rara
Finchè la mosca al naso no te salta!
L'antichità mai de stramboti avara
Gà ben rason se tanto la te esalta,
Se in Plinio, pien de buzzere s'impara
Che in pudicizia a un cavalier de Malta
Ti tol la man, che luna e sol ti adori,
E ti te scondi el zorno che ti sbori.
Ne torto gà quei popoli zuconi
Che tien per un articolo de fede
Che dopo morte i rè nei to cogioni
Spiritualmente i pianti la so sede,
E soto de superbi padiglioni
Dover de religion d'acordo i crede
El tratarte coi guanti, e in vasche d'oro
Darghe ai to nasi acquatico ristoro.
L'apostrofe quà tronco, e tiro dreto
Per dirve che per tuto el carneval
Più docile d'un can, de un'agneleto
L'Elefante no à fato nissun mal,
Tanto col so paron ligà d'afeto
Che de farse licar da l'anemal
No gaveva riguardo quel guardian
Che mastegava un slaparo italian.
Ma nel dì che fra i sbari e l'alegria
De suditi fedeli come nù
De la quarta mugier in compagnia
El nostro bon Francesco xè vegnù
Per dar una lumada e netar via
Tuto quel che fà torto a la virtù
(Sudito de nissun) vardè che caso!
L'Elefante in casoto à storto el naso.
E dal pien de la zente s'à credesto,
(Perchè el pien de la gente no ragiona)
Che da tanto fracasso roto el cesto
El gavesse una fufa buzzarona;
Ma da la storia in fin xe manifesto
Che fala assae chi lo supone un mona
Se gnanca mezzo morto in sepoltura
No se gà visto indizj de paura.
E calcolando sti spaurachi un rosto,
De natura co qualche osservator
Le prime lune soe credo piutosto
Catorigole sconte de l'amor
Che no podendo in vulva trovar posto
Gà messo la proposide in furor
Contro chi lo voleva condanà
Ai voti de perpetua castità.
Defati molto prima che arivasse
El nostro Imperator in ste palae
E che el comercio in fior lo festeggiasse
Contento e alegro a son de canonae
Contava da Florian certe bardasse
Che s'à visto più done spaventae
Dal casoto scampar, perchè el furbazzo
In furia gà sfodrà tanto de cazzo.
Nè contento de far mostra pomposa
(Co l'ochio rebaltà ne la so ardenza)
De quela bruta cossa scandalosa,
El gaveva costù l'impertinenza
Zogando la proposide famosa
De coronar da mato l'indecenza
Co un tiro da colegio, che slanzava
Del publico in tel muso la so bava.
E co me meto un poco nei so pani,
Concedendo che l'ato xè vilan,
No posso darghe torto, che ai so ani
Stenta anca l'omo de tegnir le man,
Ne roto el culo, da riguardi umani
Xe de le bestie l'anemal Sovran
E quel menarse el biscaro a l'averto
Xè de sovranità segno el più certo.
Ma l'inglese custode che vedeva
L'afluenza a la porta minorada
E impedir a la bestia no podeva
Co le bone parole sta porcada
L'onanista sui corni zà gaveva,
E a comincià co qualche bastonada
Sciocamente credendolo una pua
A scavezzarghe a mezzo la bevua.
E se per l'omo istesso che in confronto
De quela imensità xè un mussolin
No gh'è magior disgrazia, o pezzo afronto
Che de fermarghe i nini sul bambin
Co l'algebra del tre facendo el conto
Ve lasso calcolar se in tel martin
Dovesse neto andarghe a l'Elefante
L'indiscreto baston de quel zelante.
A segno che acostando in convulsion
La proposide un zorno al candeloto
E volendo impedirghe el so paron
De la porca manovra el dolce moto
L'Elefante (tut'altro che cogion)
Gà lassà andar col naso un scopeloto
Che gà volesto dir, razza de mulo
Col me tira no voi secae de culo.
E no volendo più da quel momento
Vederselo vicin, col naso in furia
L'à molà scopeloti per de drento
Più che de rabia fioli de lusuria,
E da quel dì el paron che per portento
A salvà no so come la so auguria
Gà cesso la custodia a un subalterno
Per andar co più comodo a l'inferno.
Subalterno più cauto, e che in distanza
Stava a goderse el quadro se da novo
Co l'oselo tirà soto la panza
De furegarse ghe nasseva el vovo:
Ma finio el carneval per vecchia usanza
Che santa e commendevole mi trovo
Le bestie forestiere và lontane
Perchè gabia più logo le nostrane.
E in cerca de cogioni, e de fortuna
Quadrupedi e volatili imbarcai
Col silenzio de note senza luna
A farse buzzerar tuti xè andai,
Ne un rugito à mandà su sta laguna
Marco lion che zà desmentegai
Xe i trionfi dei vecchi, e col suismo
I zoveni suplisse al patriotismo.
A cazzo sempre in aria, e sempre duro
Restava l'Elefante gran bestiazza
Intestà de tegnir el culo al muro
Benchè finisse la scritura in piazza:
Più volte remurchiarlo a cielo scuro
S'à tentà in una aposita barcazza,
Ma col naso in perpetua negativa
L'Elefante infuriava, e no ubidiva.
Ai sedese de marzo finalmente
S'à proposto de zorno el proprietario
De provar se l'aspeto de la zente
Lo podesse guarir dal so lunario
E dal casoto zà publicamente
Menando con gran pompa el tafanario
Venir fora el s'à visto, e co un penin
Zapar del molo l'ultimo confin.
In bateli desperso el popolazzo
Ghe zigava a le rechie, el và el và
E qualche vose interompeva un cazzo
Nol gà cuor de lassarne so Maestà.
Paneti ghe sporzeva quel regazzo
Dal paron in so logo deputà
E co sto golosezzo quasi in barca
Se calumava docile el Monarca.
Ma sentindo malfermo el pian balarse
Soto la regia zampa indispetio
Da la riva el s'à visto destacarse
E tornar in casoto a culo indrio;
E permaloso in bota vendicarse
Scavezzando col naso in pofardio
La fabrica de legno, e sui bateli
Slanzar i pali come ravaneli.
Ve podè imaginar l'urlo e i spaventi
Del terzo stato, ossia de la canagia,
Co à scomenzà a svolar sti curadenti
E a minaciar la testa a la marmagia:
Testimonio ocular de quei momenti
Mi no so stà nemigo de la fragia,
Mi sò che l'è stà un tiro da comedia
E per molti un principio de tragedia.
So che barchete, gondole, e batei
S'à tirà in largo per andar lontani
Che à zigà puti, omeni, e putei
Co un urlo tal da spiritar i cani,
Che à messo a mogie braghe e zebedei
Molti dei nostri bravi cortesani,
E che in bidè s'à visto certe done
Che ne s'aveva mai lavà le mone.
El gropo de le barche, e la gran faca
À influido a salvar de tanti i zorni,
Tuti slonga le man, tuti se taca
E slonga i Bechi a chì xè in barca i corni;
La musa mia sempre de fondo vaca
Voria farghe a sto quadro dei contorni,
Ma basta assicurarve per conforto
Che de tanti bagnai nissun xè morto.
Barafusola egual, egual cagnera
A quela che zà in acqua v'ò depento
A messo in confusion la zente in tera
Che assisteva a l'imbarco e in t'un momento
Chi quà, chi là sul dubio che la fiera
No volesse in casoto star più drento
Xè corso a gambe, e xè restai guardiani
De carabine armai pochi Patani.
Intanto el magistrato che indefesso
Vegia perchè nissun ne rompa el cesto
Al paron de la Bestia el zorno istesso
Gà fato in boni modi manifesto
Che no ghe gera oltre tre dì concesso
Restar fra nù, che lù pensasse al resto,
E che dopo i tre dì se no l'andava
Un'elefanticidio el decretava.
Misura che da più d'una spuzzeta
Che vol entrar in quel che no ghe toca
E meter no chiamà la so pezzeta
S'à avudo cuor de batizzar per scioca
Per poco prudenzial; per maledeta,
Ma in ste cosse se mai mi averso boca
Gò per massima vechia de provar
Che gnente megio se podeva far.
Cussì mo no gà parso a chi el comando
À ricevudo e la final sentenza,
E fra da lù un oreta ruminando
Come salvar de un naso l'esistenza
Che no stava in Casoto mai de bando
E cresseva ogni zorno d'insolenza,
Gh'è venudo in pensier de cambiar sito
E de condurlo in logo più romito.
E dopo mezza note in santa quiete
Col toso avanti che sporsezze el pan
Menarlo da la riva per calete
In un gran magazzen poco lontan,
Da dove po con bone parolete
Cercando ch'el butasse un fià più uman
Persuaderlo in tre dì che o morto o via
Gera el dilema d'alta Pulizia.
Tuto disposto per el bel progeto
A le dodese fora de la porta
Lusingà da la gola del paneto
Andava drio la bestia a la so scorta;
La nervosa proposide del dreto
L'avressi data quasi roba morta,
Per nasar el paneto el la slongava
E strada a poco a poco l'avanzava.
Preside a la manovra dava lode
In debita distanza el paron vero
A l'artifizio franco del custode
Che no stimava la so vita un zero,
No calcolando gnanca ne la frode
Usada verso un'anemal sincero
El dubio ch'el podesse sul più belo
Stufarse del continuo cagionelo.
I grizzoli me vien, e zà me trema
La pena in man nel dirve neto un caso
Che xè degno lù solo de poema
Da eternar nel vernacolo Parnaso;
L'Elefante secà perde la flema,
Co la mosca in cimeta el zira el naso,
Do passi indrio fà el puto, e da testicolo
El crede garantirse dal pericolo.
Ma presta l'indomabile bestiazza
Che trota inviperia quanto un cavalo
A tiro de sto aloco la se cazza
E sul gran naso la lo mete in balo;
Come el gato col sorze se sbabazza
E d'un mezzo morbin con lù fa scialo
Prima de darghe l'ultimo strapon
Che lo manda a patrasso da cogion,
Cussì el puto nei ziri ingambarà
(E pur tanta superbia ghe xè in nù)
De quel nervo proposide chiamà
S'à visto molte volte andar zo e sù
Da l'Elefante in aria sbalotà,
Che dopo averse divertio de lù
(Per sie soldi comprar se pol la stampa)
El se l'à calumà soto una zampa.
E da sto rame (che acquistar zà vogio,
Che in certe cosse mi no vardo spese,
E petarvelo in fazza de sto fogio
Come alegato publico e palese)
El puto vedarè che ne l'imbrogio
Va maledindo el so paron inglese,
E ziga ajuto, e sente zà la morte
Spalancarghe del diavolo le porte.
Ma no lo vedarè (scena funesta)
L'ultimo svolo far cascà dal cielo
E soto i ossi e sfracassà la testa
Perder buele, e tochi de cervelo,
E la bestia che nasa, e lo calpesta
(Cosse per Dio che fa drezzar el pelo)
Finchè sicuro l'è che più morbin
No ghe resta da romperghe el martin.
Ma cossa mai per una fiera tal
Xe su l'anema aver un'omicidio?
Tuti me acorderà che l'equival
Al delito per nù d'un moschicidio,
E co sto brazzoler da mal co mal
Chi pol saver se l'Elefanticidio
No sia rispeto a nù magior delito
Che per la Bestia quelo che ò descrito.
El fato xe che no trovando intopo
Più l'Elefante in aria de borezzo
L'à tolto su la riva un ben galopo
In cerca pur de qualche golosezzo,
E s'à capio pochi momenti dopo
Che del copà nol ghe ne dava un bezzo
Perché roto un casoto l'à magnà
Una cesta de pomi a sazietà.
Mosso dal senso caro a tuti quanti,
Dal trovarse voi dir libero e solo,
Coreva l'Elefante indrio e avanti
Dispotico paron de mezzo molo,
E fra i do ponti coi do nomi santi
(Per la rima ghe slongo un poco el colo)
Un Cà de Dio l'altro sepolcro dito
L'à dà fiero de naso a più d'un sito.
Sul dubio che volesse el forestier
Sbrissar in piazza, o andar verso i zardini
L'imperial comissario de sestier
A furia de promesse e de zechini
Unindo in pressa zente da mestier
Gà intimà de tegnirlo fra i confini
De quei do ponti, e de sbararghe al muso
Nel caso ch'el tentàsse de andar suso.
E come l'acidente gà del novo
E libro eterogeneo a l'istruzion
De un comissario, o per dir megio un vovo
Saria l'aver per man sempre Bufon
Da sorprenderse tanto mi no trovo
Se operando in sta parte dà cogion
Nol saveva che bale da moscheto
Per la so pele val manco d'un peto.
Da quei pometi confortà la tripa
E vogioso l'eroe de novi alori
El mena morbinoso la so pipa,
E sentindo a un cafè dei boni odori
Con una gravità da Marco Agripa
Nol dimanda se drento gh'è signorì,
Ma co do colpi che ghe rompe un fianco
L'entra in botega, e l'è col muso al banco.
Ò po savesto dopo che parona
De quel cafè xe adesso una putana
Che ghe refila a l'aventor la mona
Co do lirete al più, vera bubana,
Nè credo certo presunzion cogiona
El dir che per cavarse la pavana
E dare in coca sfogo a la lusuria
Sia l'Elefante entrà come una furia.
Ma invece la gazzeta più modesta
E la distinta relazion vendua
Tase la circostanza e zonta questa
Che mi gò per grandissima nassua,
Che i pochi buzzolai che gera in cesta
L'abia fumà col naso, e po bevua
Quanta acquavita e ruhm ghe gera drento
Imbriago el sia stà da quel momento.
Ben vero xè che dopo un gran fracasso
De chichere, de goti e de bossoni
L'è tornà fora acelerando el passo
E din don ghe faceva i so cogioni;
Un secondo casoto el buta a basso
Situà su la riva dei schiavoni,
E zà col schiopo al muso preparada
Xè a prove de valor la forza armada.
Intanto da culia che in un oreta
Da picola e menua deventa granda
Che miscia verità co la fiabeta
Che xè coverta d'ochi in ogni banda
Che.... ma chi xela mai sta maladeta?
Qualche mezza fadiga me domanda
Bue, lezzi, Maron, mio caro amigo
Lù va per viole, e mi Fama ghe digo.
Da fama donca in manco d'un sospiro
Xe difusa in paese la gran nova
Che l'Elefante libero xè in ziro,
Che rimedio a domarlo no se trova,
Che de bale i gà fato più d'un tiro
Ma che el le scorla come el can la piova,
E la squaquera tuto da Florian
Come el logo più averto, più a la man.
Florian botega nota a tuto el mondo
Dove core galanti e putanieri
E zogadori vechi che à dà fondo
A borse de famosi cavalieri,
E pederasti mati per el tondo,
E magnapote nostri e forestieri
E done che va in cerca de merloti,
E una fraca de novi zizoloti,
E politici spuri, e negozianti
Semenza de disordini, e de mali
Che a fruto lassa in man de stochizanti
Prima bari e rufiani i capitali,
E pochi onesti in mezzo a gran birbanti,
E un numero infinito de bocali,
E spioni che vive de le rechie
E conti balonieri, e done vechie,
E dopo mezza note un'impotente
Fondo de ciacoloni che in presenza
De eumenidi infernali eternamente
De teatri ve parla, e spua sentenza....
Basta cussì per Dio che in tanta zente
Gh'è dei Marchesi pò la quint'essenza
Ne posso lassar d'ochio un gran marchese
Che la vita à rischià per el paese.
Nato ai piaceri e popolar per boria
L'è tanto avezzo a disprezzar fortuna
Che chi no sà dei fasti soi la storia
Pol crederlo un strozzà da sta laguna:
Figura picoleta, e tomboloria,
Colo curto, e bovin, muso da luna,
Batolon, libertin, omo d'inzegno,
De più no digo, va zà tuti a segno.
La fama che a le chiacole va drio
Per so degno campion la lo destina
Zigando, cossa dormistu per Dio
Se l'Elefante in Piazza s'avicina?
Ti solo riparar, Marchese mio,
Ti pol, corendo a gambe, la rovina,
Urge el bisogno, e in mezo a tante mone
L'omo ti è ti de cuor, l'omo che impone.
Mostra nel gran cimento la fermezza
Degna de un militar, de un russo degna,
Mostra de un Grego oriondo la finezza,
E zà ch'el mondo te batizza tegna
Se peca i pulizioti de lentezza
Dopera el to casnà, trionfa, e regna,
Novo xe el caso, e no pol far da medico
Che un marchese signor, e enciclepedico.
Da ste parole che anca un sasso move
El marchese invasà tol sù el capelo
E pronto a dar de lu condegne prove
El core più veloce de un oselo
Co pochi eroi de la botega dove
La bestia fora afato de cervelo
Dal fogo spaventada dei soldai
Minaciava a Venezia orendi guai.
Core el marchese in pressa snanarando
Quel culo imenso da far gola a un frate
Coi so compagni d'arme chiacolando
Che nol la cede in questo a Dona Cate,
E visto Tolomei che gà el comando
El se ghe mete in bota a le culate
E a l'ombra de l'ilustre comandante
El vol tuto saver de l'Elefante.
Ne l'averto so cuori russi fumi
De nobiltà più no ghe parla un cazzo,
El marchese xè un Proteo de costumi
Che nobili e plebei tol tuti a mazzo;
El ghe averse el tesoro dei so lumi
Sempre chiapà del capo sbiri a brazzo
Verso de Tolomei cussì cortese
Che no se sà fra i dò chi sia el marchese.
Onorato segnal d'insurezion
Per la causa del giusto, e del leal
L'ordine Tolomei gà del canon
Che a l'occhio del marchese assae più val
De tute le so russe distinzion,
E come in certe cosse el gà del sal
Vedarè che vivendo fra i strozzai
Nol le porta che in casi riservai.
Superbo Tolomei che un cavalier
De nassita de ton sia da la sorte
Deventà so compagno de mestier
Alegro l'andaria contro la morte;
Se gode el mio marchese putanier
Che un sgarafon ghe fazza la so corte,
E ne la simpatia de varie creste
Podè in lori trovar Pilade, e Oreste.
Ma in mezzo al parapiglia al tibidoi
Invece de quietarse e cambiar stil
Fà colo l'Elefante a tanti eroi
Che lo insegue e lo investe col fusil
Tireghe pur, Tolomei ziga ai soi
Guai per chi scampa, o chi se mostra vil!
El marchese ripete la parola
Ma ne la fufa la ghe resta in gola.
I tiri de fusil no val un corno
E apena leziermente scortegada
Lassa la bestia el molo, e se fà zorno
De la Bragora drento la contrada.
Per rioterà la passa, e zà del forno
La minacia la cale indiavolada,
Anzi a mezzo galopo la la imbroca
E colpi de proposide la sfioca.
Zonta a la fin de sta caleta morta
Fa la bestiazza un ponto amirativo,
E po dandoghe al naso una gran storta
La ghe ne zonta un'altro imperativo;
In cento pezzi casca zò la porta,
Ma ne l'ingresso ghe xè un pozzo vivo
Col so gran buzzolà tuto de piera
La mena el terzo e el buzzolà xè in tera.
Nè contenta de questo sempre a scuro
La tira colpi a l'orba, e no la fala,
De la casa in pericolo xe el muro
Par che la vogia zà montar la scala;
Da vechio militar crede mauro
Consegio Tolomei de grossa bala
Cargar i schiopi, e a l'ordine del bulo
Prudente el Marchesin ritira el culo.
L'Elefante ingossà par che no possa
Dal logo streto za cavarse più
Che quela sia la sepolcral so fossa
Che no se deva più tremar de lù;
La Falange teribile xè in mossa
Cento colpi se sbara e forsi più,
Lù intrepido presenta el so martin
Per esser proprio buzzerà a passin.
Salta le bale sù la dura pele,
Ma forsi qualcheduna de le tante
Ghe ariva per el buso a le buele
E dal dolor za casca l'Elefante,
Un zigo del marchese va a le stele
Come quel dì che de Golia trionfante
Davide ancora imberbe e zizoloto
A chiapà co la fionda un terno al loto.
Ma più sgionfo de là co Tolomei
Pien de coragio el s'avicina al morto,
El slonga un poco, e po el ritira i dei
Zigandoghe a la plebe semo in porto!
Ma no lo vol gnancora i somi Dei
Ustinai de no darghe sto conforto;
S'alza la bestia, e de mostarda el vaso
Scampa el marchese ritirando el naso.
Corpo de Dio! cussì marchese in cima
De perder la se mete la so schizza?
(Ghe dise Tolomei) che più de prima
Bestemia rinculando pien de stizza;
Musa dame una man, supia la rima,
Cresse el bisogno adesso che s'impizza
L'Elefante de bile, e dai cogioni
Scorezzando el se cava i do campioni.
Dal suposto cubatolo indrio cesto
Fra i zighi de chi paga l'afitanza
Sbalza fora l'amabile foresto,
Ne se ghe vede un buso in te la panza,
Segno per tuti chiaro e manifesto
Che le bale con lù gà in pien creanza,
E a l'aspeto de l'arma Elefantesca
Co la plebe dà indrio la soldatesca:
E necessariamente se ritira
Co l'onda popolar che lo strassina
Anca el marchese, più nessun no tira
Ma el pericolo cresse e la rovina,
Da novo in rio terà la bestia zira,
E de Sant'Antonin zà zà vicina
Al Ponte la vedè sora un scalin
Slongar la zampa dreta a pian pianin.
La magior porta de la Chiesa in fazza
Xè proprio de sto Ponte situada,
Più volte de andar suso la bestiazza
Se propone, e più volte imbarazzada
La tira indrio la nobile zampazza,
Finalmente la dà una gran sciada,
La porta da quel cul no gà difesa
La casca abasso, e xe la fiera in Chiesa.
Ne a garantir la porta val un cazzo
L'aver de drento dopia seraura
Legname de fazion, dopio caenazzo,
Xè inutile de l'arte ogni bravura.
Co da l'Africa in quà vien el culazzo
D'un Elefante a rebaltar natura,
L'Elefante paron zè zà del Tempio
Oh novo caso! oh memorando esempio.
El Piovan sbalordio da sto fracasso
Corendo per la casa come un mato
No sà se l'Anticristo o Satanasso
Gabia roto el porton dal dito al fato,
Prudente el Sacrestan no move passo,
Trema in bareta a bigoli el Curato,
E d'una pezza assae più bianco el nonzolo
Fà senza braghe mostra del baronzolo.
Intanto con misura provisoria
Ne la qual gà el marchese la so parte
Ordina Tolomei, degno de storia
E campion rispetabile de Marte
Che per assicurarse la vitoria
Senza perder momento sia da l'arte
Pontelà quel porton in modo tal
Che sortir più no possa l'anemal.
Za suso l'è in un bater de palpiera
Del marchese agiutante a la presenza
Che doto ne l'astuzia ne la guera
Anema co l'esempio l'indolenza;
Ma nel tempio un'oribile cagnera
Fa l'Elefante reo de miscredenza
E sacrileghi colpi el mena in ziro
Su tuto quelo che ghe vien a tiro.
Col nome sù de nobili casae
Fate dal so furor barbaro segno
Rote svola per aria squinternae
Da trenta, se no più banche de legno,
Le pile d'acqua santa sconquassae
Le spande el brodo e da quel naso indegno
Sant'Antonin paron del ricetacolo
No garantisse Cristo in tabernacolo.
Sta spezie d'oragan sentio de fora
Dopo pochi momenti s'à quietà;
L'ativo Marchesin no vede l'ora
De sodisfar la so curiosità:
E cossa falo! dal Piovan l'implora
De l'organo la chiave, e drento el và
Co quel che tira i foli a l'organista
I guasti a esaminar de l'onomista.
Armà de un feraleto da scarpioni
Che fora el sporze co la man de giazzo
El lo vede zirar coi so gamboni
Su le rovine come un visdecazzo
Che zà disposto a romperse i cogioni
De la preson no ghe ne dava un cazzo
Rassegnà de subirla so condana
Con un bel me ne infoto da putana.
Impaziente el Marchese de sonar
La tromba del so zelo, e del so cuor
Co un mezzo franco, perso ne l'afar
Credendolo un Zechin paga l'onor
Che à avudo el tirafoli de scortar
Nel logo che v'ò dito un gran signor,
E po de spron batuo l'impianta in campo
El comandante, e el core come un lampo.
E bagnà de sudor nol ferma el troto
Se no l'ariva de Florian al banco,
Là se ghe mete le lasagne in moto
E pizzegando un fià del saltimbanco
„ Acqua fresca, l'esclama, presto un goto
(E sa vinti curiosi ghe xè a fianco)
„ No gh'è caso, son bestia, e lo sarò,
(Ne dei vinti nessun dise de no:)
„ Son fato mo cussì, ne riflession,
Ne riguardi me pol in fren tegnir,
De arischiar la mia vita gò passion,
E vedo za impossibile el guarir
Da sta spezie de mata convulsion
Ve dirò tuto... cosse da stupir!
Ma senza mì lo tocarè coi dei
No bastava al Paese el sior Tomei.
Che Tomei! lo interompe un butalà,
La fala sior Marchese, fin adesso
La gà fato da sbiro, e no la sà
Che chiamarlo Tomei no xè permesso!
Tolomei l'è sta sempre batizzà
E no Tomei. Che Mona de riflesso!
Replica el Marchesin, sior visdecazzo
El mestier del nodaro mi no fazzo.
E fabricando in pressa e destirando
Lasagne che no core in sto paese
El miscia el vechio al novo, amalgamando
Co le presenti le zà note imprese,
E come per la gloria l'à dà bando
A la prudenza propria de un Marchese
Anca el dì che al cadavere de Prina
L'è andà drio cominciando la matina.
E dal pien del raconto el mete in chiaro
Che e Venezia e Milan tuto ghe deve,
Che el so gran nome a tute dò xè caro
Che de gloria guarir nol pol la freve,
Che Tolomei xe un'omo svelto e raro
Che un'altro goto d'acqua in pressa el beve
E che dopo l'aspeta quel campion
Per far l'ultima prova de Canon.
E finia sta solene batolada
(Che el poeta veridico v'à esposto
Gnente da regalifi esagerada
Per non aver fra i maldicenti un posto)
El tol sù novamente una trotada
Per sigilar de le so glorie el rosto;
L'ariva sora logo, e su l'istante
El corpo se ghe mola a l'Elefante.
E come l'à cazzà fora una broda
Probabilmente fia de la paura
E no materia figurada e soda
Come el caga in pacifica natura
Sogeto più che lirico de un'oda
Saria la nova esalazion impura
Che à mandà sul marmoreo pavimento
El coroto sacrilego escremento.
Rapidissimamente da le porte
Per i busi la spuzza in campo ariva,
La sconcerta i soldai che sfida morte
E del gran Tolomei l'anima ativa,
Tuti fa un passo indrio, superbo e forte
Ghe va incontro el marchese da la riva,
El se la sorbe tuta, e quasi el cria
Che la merda simpatica no sia.
Chiamai intanto a capitolo i pensieri
Del fior de la milizia, l'Arsenal
Provedendo canoni e canonieri
Contribuiva a l'opera mortal;
E zà tuti in un bossolo i guerieri
Aveva decretà che un lateral
Buso fato del Tempio a la muragia
Dasse ingresso al Canon cargà a mitragia.
Auspice Tolomei, auspice el zelo
Del teribile nostro lasagnon
Nasse nel lateral muro el sfacelo,
E vien fora la morte dal canon.
La morte? chi lo crede xè un putelo
Se move come prima el gran bestion,
E senza indizio dar de maestà lesa
Intrepido el camina per la Chiesa.
Alora el marchesin che sà da dreto
Zogar la circostanza a favor sò
„ Qual meraviglia, el ziga, non v'ho detto
„ Che qualche scoriazione apena può
„ La mitraglia portar? letto e riletto
„ L'ò giá in Buffone, la mitraglia oibò,
„ Cannone a palla e grossa, amici miei
„ Pianta il cannone a palla o Tolomei.
Subito sior marchese, ò sempre dito
Che la xè un'omo grando — e sul momento
Nel buso istesso, e ne l'istesso sito
La boca del canon se mete drento,
Bravo el marchese! el colpo va pulito
A sventolarghe el scroto a tradimento
(Che in Venezian se chiama cogionera)
E va fora dei bazzeri la fiera;
E dal dolor convulsa par che gnente
Possa più garantir da la so furia
Adesso che la morte crudelmente
Ghe spasizza i canali de lusuria;
Ma gnancora la casca, anzi insolente
Pache ai marmi la dà co la so scuria,
E un miracolo par che a tanto caldo
E colone e pilastri tegna saldo.
Ghe cresse al marchesin la ciera zala,
Ma Tolomei no aspeta tempo, e in bota
El secondo canon cargo de bala
Vien situà ne la muragia rota;
Da una cossata a la sinistra spala
El secondo confeto in pressa trota,
Ma la bile ghe cresse più ch'esangue
Và la bestia spandendo a laghi el sangue.
E ne l'ato che verso la magior
Porta la se avicina, e la xè in cima
De rinovar su ela el so furor
E de tornar in strada come prima,
La vecchia sopoltura de un signor
(Del qual no digo el nome per la rima),
Spalanca la so boca, e bona note
Mezzo de quel corpazzo la se ingiote:
Co le gambe da drio casca el birbante
In cotego chiapà per man de Dio,
La riconosse el marchesin che ansante
Adora in Grego el logo Santo e pio.
Tuti se buta adosso a l'Elefante
Sepolto in antidata col da drio,
E flagelà de bagionete el muso
Casca l'eroe per no levar più suso.
O novo caso! o memoranda storia!
O bestia! o Chiesa! o naso! e merda! o forte
Russo marchese! o copia magna! o gloria!
O spacaura oribile de morte!
Possa sta mia poetica memoria
Ai posteri passar, e aver la sorte
De provarghe al marchese che va persi
De Grandi i fasti se li tase i versi.