Pagina:Poesie e satire di Pietro Buratti veneziano.pdf/236

Da Wikisource
Salta a ła navigasion Salta a ła riserca
Sta pagina la xe stà trascrita, ma la gà ancora da vegner rileta.

„ Son fato mo cussì, ne riflession,
     Ne riguardi me pol in fren tegnir,
     De arischiar la mia vita gò passion,
     E vedo za impossibile el guarir
     Da sta spezie de mata convulsion
     Ve dirò tuto... cosse da stupir!
     Ma senza mì lo tocarè coi dei
     No bastava al Paese el sior Tomei.
Che Tomei! lo interompe un butalà,
     La fala sior Marchese, fin adesso
     La gà fato da sbiro, e no la sà
     Che chiamarlo Tomei no xè permesso!
     Tolomei l'è sta sempre batizzà
     E no Tomei. Che Mona de riflesso!
     Replica el Marchesin, sior visdecazzo
     El mestier del nodaro mi no fazzo.
E fabricando in pressa e destirando
     Lasagne che no core in sto paese
     El miscia el vechio al novo, amalgamando
     Co le presenti le zà note imprese,
     E come per la gloria l'à dà bando
     A la prudenza propria de un Marchese
     Anca el dì che al cadavere de Prina
     L'è andà drio cominciando la matina.
E dal pien del raconto el mete in chiaro
     Che e Venezia e Milan tuto ghe deve,
     Che el so gran nome a tute dò xè caro
     Che de gloria guarir nol pol la freve,
     Che Tolomei xe un'omo svelto e raro
     Che un'altro goto d'acqua in pressa el beve
     E che dopo l'aspeta quel campion
     Per far l'ultima prova de Canon.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Pagina:Poesie_e_satire_di_Pietro_Buratti_veneziano.pdf/236&oldid=58525"