Saverè, che m'è stà scritto

by Giorgio Baffo

3 Saverè, che m'è stà scritto Raccolta universale delle opere di Giorgio Baffo Tomo III Oh! Estu ti quel bravo visdecazzo Zorno, e notte la testa me zavaria Giorgio Baffo 1789 XVIII Poesie

Indice:Raccolta universale delle opere di Giorgio Baffo 3.djvu

Giorgio Baffo ―  Raccolta universale delle opere di Giorgio Baffo  ―  Tomo III

Saverè, che m'è stà scritto

1789

Edission original:	Giorgio Baffo, Raccolta universale delle opere di Giorgio Baffo veneto, Tomo III, Cosmopoli, 1789
Fonte:	Indice:Raccolta universale delle opere di Giorgio Baffo 3.djvu

←  Oh! Estu ti quel bravo visdecazzo

Edission e fonte ▼

Zorno, e notte la testa me zavaria  →

AD UN AMIGO SULLO STESSO ARGOMENTO.

CANZONE

Saverè, che m'è stà scritto
    Da un poeta un'insolenza,
    Senza che mi gabbia ditto
    4Mai a lù un'impertinenza.

Quel, che stimo, che lù giera
    In tel rolo dei me amici,
    E de quei, che volontiera
    8Ascoltava i me caprici.

Vedo adesso, e me despiase,
    Ch'in quel tempo, che lù fava
    Tanti elogi alla mia frase,
    12Giusto allora el cogionava.

Tanto che no sò più gnente,
    Co me loda una persona,
    Se 'l me loda veramente,
    16O se pur el me cogiona.

Mì per altro me compiaso
    Del mio dir, e me trastulo,
    E me daga pur de naso
    20Quei, che vuol, tutti in tel Culo.

Fazza pur chi vuol fracasso,
    Ch'i me versi xe cogioni,
    A mi basta, ch'i abbia piaso
    24Al Vicini¹, ed al Frugoni;

E tanti altri gran poeti
    Letterati i più famosi
    Per aver i me soneti
    28Tutti quanti xe voggiosi.

Par, che tutti gabbia fame
    De sentir la robba mia,
    Cavalieri, Savj, e Dame
    32Per averli i se trà via.

Ma, che tutti me cogiona,
    Questo mai no se puol dar;
    La xe donca robba bona,
    36Quando ognun la vuol cercar.

Non occorre quà mentir,
    L'estro mio xe assae giocondo,
    E i me versi, basta dir,
    40I xe andai per tutto 'l Mondo.

Del mio Critico no vedo,
    Che gnessun gabbia un Sonetto,
    E s'alcun l'hà bù, mi credo,
    44S'abbia fatto un fazzoletto.

Ghe voleva gran virtù,
    E dei doni rari, e tanti,
    Per trattar da turlulù
    48Un, ch'hà piasso a tutti quanti.

S'anca un Omo el sà, che son,
    Che no gà scienza gnessuna,
    El doveva sto cogion
    52Respettar la mia fortuna;

Ch'anca questa xe 'na Dea,
    E chi in so favor la gà,
    A sto Mondo se recrea,
    56E da tutti xe adorà.

El mestier far dei poeti
    No conseggierave mai,
    Se xe sempre povereti,
    60E pò ancora cogionai.

Ma stà in petto d'ogni matto
    Criticar una persona,
    Ma è da veder, se de fatto
    64Quella critica xe bona;

Perchè quando no l'è giusta,
    E da Musa, che sia grata,
    Tutta quanta quella frusta
    68Casca addosso a chi l'hà fata.

Vù dirè, ne son seguro,
    Che mi troppo la pretendo,
    Ma a quel brutto muso duro
    72Cussì parlo, e me defendo.

---

Note a cura de Wikisource

1. Giovanni Battista Vicini, abate e poeta (1709 - 1782)