No voi scriver più sonetti

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
[p. 3 modifica]
SCUOLA PER LI IPOCRITI.


CANZONE


No voi scriver più sonetti,
    Nè canzon, nè madrigali,
    Ma voi scriver in quartetti,
    4E trattar cose morali.

No voi più quella maniera
    De componer cussì schietto,
    Voi tior suso altra carriera,
    8Che me fazza più concetto;

Se me vien la fantasìa
    De dir su quattro strambotti,
    Sotto qualche allegorìa
    12Li voi dir per i Bigotti;

[p. 4 modifica]


Che li possa lezer tutti,
    E le Muneghe, e anca i Frati,
    Anca quei, ch'i so Istituti
    16Li fà tanto riservati;

Siben son d'un'opinion,
    Che le gran cogionarìe
    Fazza assae manco impression
    20Despoggiade, che vestìe;

Come a tanti ben vestìa
    Più la Donna ghe fà voggia:
    Se voi dir l'opinion mìa,
    24La me piase più despoggia.

La moral, che mi sostento,
    Che la credo più sicura,
    Xe de far ogni momento
    28Quel, che cerca la natura;

[p. 5 modifica]


Che, se questa un bel solazzo
    Ne prepara in la Felippa,
    Chi sarà quel visdecazzo,
    32Che no voggia andar in trippa?

Ghè chi crede, che consista
    L'onestà nel non chiavar,
    Che sìa un empio, un ateista
    36Quel, ch'i vede a no zunar.

La superbia, e l'interesse,
    E la poca carità
    In tel cuor, ch'i ghe vedesse,
    40Tutte buzare i le fà.

Strapazzar quel poverazzo,
    No commoverse ai so pianti,
    Co no tira in braghe 'l Cazzo
    44I se crede d'esser santi.

[p. 6 modifica]


Far star questo, far star quelo,
    Cogionar anca i Fradelli,
    E pò i crede andar in Cielo,
    48Co i saluda i Capitelli;

Se i tiolesse 'l mio conseggio
    Ghe dirave con pacienza,
    Ch'i farave molto meggio
    52Manco Messe, e più conscienza.

Che rosarj, che officietti,
    A che tante gran corone,
    E pò far mille dispetti,
    56E esser razze buzarone!

Ghe dirave a ste Chietine,
    Che xe bestie maledette,
    Che le crede esser divine,
    60Co le tien le gambe strette,

[p. 7 modifica]


Che valerave meggio assae
    Alle so Potte rabiose
    Farse dar quattro chiavae,
    64Ch'esser tanto fastidiose.

Ghe vuol altro, mie parone;
    Ghe dirìa con bella rasa,
    Per poder dir, che sè bone,
    68Che tegnir la Mona a Casa.

Vù gavè solo paura
    Delia bestia del Cotal;
    E credelo, ch'in natura
    72El xe questo 'l manco mal.

Se ghe xe Creature bone,
    Che se possa praticar;
    Le xe giusto quelle Done,
    76Che se lassa ben chiavar.

[p. 8 modifica]


Cosa xe sto maridarse
    Per star sempre co 'na Dona,
    Nè poder pò mai cavarse,
    80Se ghe spuzza anca la Mona?

Cussì quella a tior Marìo
    L'hà da star sempre con quello,
    S'anca 'l genio xe fenìo,
    84Nè ghe tira più l'Osello?

Quel, che no puol tior Muggier,
    Perchè troppo la ghe costa,
    De menarselo 'l mestier
    88Gnanca 'l puol far da so posta,

Se nel Mondo xe gran mali,
    Quando i gusti xe peccai,
    Come dise sti Cotali,
    92No ne resta altro, che guai.

[p. 9 modifica]


L'hà piuttosto da morir,
    Che qualcun mai ghe lo ficca;
    Nè la puole pur tegnir
    96Gnanca un Can, che ghe la licca.

Cosa fà pò quei gramazzi,
    Ch'in un Eremo i se serra
    Per aver da visdecazzi
    100Col so corpo a far la guerra?

D'ogni semplice trastulo
    De privarse elli fà patto,
    E de sbatterse sul Culo
    104Tutto quel, che Dìo gà fatto.

Siben molti Fraticelli
    Coi santini, e coi cordoni,
    In sta forma a questi, e a quelli,
    108I ghe pela anca i Cogioni.

[p. 10 modifica]


I gà un'arte cussì brava
    Colla femena devota,
    Che, per Dìo, fina i ghe cava
    112Anca i peli della Pota;

Mai de notte no i xe usi
    De star fuora de Convento,
    Ma de zorno in tutti i busi
    116I se cazza, come 'l vento.

I ne predica, che femo
    Per salvarse carità,
    Ma che a lori ghe la demo;
    120Perchè 'l merito stà quà.

L'apparenza cussì bella
    De sti Frati buzaroni
    Và sugando la scarsella
    124De sti poveri Cogioni.

[p. 11 modifica]


Cosa serve, che no i fazza
    Mai l'amor co qualche Dona,
    I gà tutti 'l so Bardazza,
    128Nè i ghe pensa della Mona.

Le gran case dei potenti
    Frequentar i hà per usanza,
    Perchè là nei testamenti
    132De bruscar i gà speranza;

I ghe dise al moribondo,
    Per el nome de Gesù,
    No badè gnente a sto mondo,
    136Ma lassè la robba a nù.

Massa ben, che mi no fazzo
    Amicizia co sta zente,
    Che no son sì visdecazzo
    140De lassarme magnar gnente.

[p. 12 modifica]


Su sto punto, che xe vasto,
    Sarìa molto da parlar;
    Toccarave un altro tasto,
    144Ma son stuffo de cantar.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=No_voi_scriver_più_sonetti&oldid=46097"