In Valdonega
|
Edission original: |
Giovanni Ceriotto, Poesie veronesi, Seconda edizione accresciuta, Verona, Remigio Cabianca editore, 1911 |
|
Fonte: |
| ← Le rime de novembre | Edission e fonte ▼ | La bionda in piassa → |
- È una piccola valle che si
apre a settentrione di Verona.
- È una piccola valle che si
- Questi sonetti furono scritti
per la Signorina Gina Veronesi
in occasione delle Sue nozze
col Signor Francesco Apollonio,
celebrate in Verona.
- Questi sonetti furono scritti
Ci l'è che porta sta canson dal monte,
sta canson che me sveia e me inamora?
L'è un coresin che passa e che se indora
al sol che bate le stradete sconte;
l'è un cor de montanina che tra fora
la so canson fra le tirele[1] pronte,
soto al sol che pitura anca le ponte
de du campanileti che laóra.
Ci l'è che me rasona drio a sto verde,
e brontolando tira drito e core
drio le rive che scapa[2] e che se perde?
L'è un vagabondo che no g'à mai casa,
l'è un fosseto[3] che passa e che discore,
tra du rosari freschi che se basa.
Così, tra la canson de montanina
e quel fosseto che se fa la strada,
passando soto a rame che se inchina,
me trovo a spasso in meso a la valada:
L'è 'na gondola; el par che la se nina
dal gusto d'essar tuta immerletada;
la se piase parchè l'è picinina
come 'na bomboniera impiturada.
Gh'è le vignete che se core a drio,[4]
co i albari che i g'à tra rame e foie
'na fameia dei osei che se fa el nio;
e tra du cai de 'na tirela rota,
gh'è su 'na corda de le pesse moie,
che le se suga[5] soto al sol che scota.[6]
Me guardo a tomo; Vedo 'na ceseta,[7]
che g'à paura de scotarse al sol;
par quasi che la g'abia 'na giacheta
imbotonada streta in fin sul col.
E più in là se fa védar 'na caseta
tuta bianca compagno de un ninsol,[8]
la vol far la smorfiosa e la siveta,
ma gh'è du pigni grandi che no i vol!
De drio a le rame de 'na pianta grossa,
fuma e scende al vento un camineto;
e 'na casa più in soto tuta rossa
da la vargogna d'èssar massa in mostra,[9]
al s'à fato un contorno de boscheto,
che ghe dà ombra e che ghe fa da giostra.
Dentro a un restel[10] gh'e un orto che se sconde,
tra 'na gran sesa[11] e tra du muri veci:
gh'è i pomidoro e gh'è do suche tonde
che se la va contando[12] co i radeci.[13]
Zo da un sentier fato de sassi e a onde,
va verso 'na fontana un par de seci,
che in meso al verde i sluse e i se confonde
ciari e lustradi ben come du speci.
El sol prensipia a bàtar de traverso,
e un s-ciapo[14] de oseleti i passa e i canta,
cascando in sima a un albareto perso.
Mi camino pensando drio a un mureto,
dove che trovo piturà 'na santa,
soto a 'na rama che ghe fa baeto.
E in fondo al monte sento che se move
qualche cosa e no so cosa la sia;
ma la me par una canson che piove,
soto a un'aria che gira e che no cria.
Altri du passi e po' me cato dove
i pensieri più storti i scapa via,
me trovo a rente[15] a de le cose nove,
torno a 'na testa che no l'è più mia.
E tra el verde che ràmpega[16] sul muro,
tra do pierete che ghe fa da rosta,
fora da un sito rovinado e scuro,
gh'è 'na fontana che ogni giorno speta
'na gran note de luna che fa sosta,
par sognar le rosarie del poeta!
Bela fontana, fontana d'argento,
che da gran ani i t'à insegna a parlar,
dime parchè me guardo intorno a stento,
dime ci vien qua in fondo a respirar!
«Quà vien 'na bionda che g'à el cor contento,
che la se cucia[17] e la me vien basar;[18]
mi ghe guardo i cavei[19] che i sgola al vento
e quei oci pescadi in fondo al mar.
Quà de matina zuga[20] le farfale,
soto a un cucio de osei che se la conta
e a mesogiorno canta le sigale;[21]
e de note, che i par tanti lumini
co 'na fiameta che vol èssar sconta,
taca zugar a bona anca i slusini.»[22]
L'è sera e 'na sbutada d'aria fina
me la pensar che semo in tramontana,
e 'na pocia vissin la fontanina
la ghe iuta a cantar a qualche rana.
Zo, a traverso la val gh'è che camina
la solita canson che se lontana,[23]
come el canto che porta 'na putina
in meso a i sogni che fa far la nana.
Ci l'è che porta sta canson sul monte,
sta canson che se sveia e se indormensa?
L'è un cor che passa da stradete sconte,
l'è un cor de montanina che inamora,
che 'l va sercando un loghetin che pensa
fra du campanileti che laóra.
- Note
- ↑ tirele: viti
- ↑ rive che scapa: rive che fuggono
- ↑ fosseto: ruscelletto
- ↑ se core a drio: si rincorrono
- ↑ suga ― asciugano
- ↑ scota: brucia
- ↑ ceseta: chiesetta
- ↑ ninsol: lenzuola
- ↑ massa in mostra: troppo in vista
- ↑ restel: cancello
- ↑ sesa: siepe
- ↑ contando: raccontando
- ↑ radeci: radicchi
- ↑ s-ciapo: stormo
- ↑ a rente: vicino
- ↑ ràmpega: arrampica
- ↑ se cucia: si abbassa, s'inchina
- ↑ basar: baciare
- ↑ cavei: capelli
- ↑ zuga: giuocano
- ↑ sigale: cicale
- ↑ slusini: lucciole
- ↑ se lontana: si allontana