Si canto ben dolci fradei carissimi
|
1557
|
|
Edission original: |
Andrea Calmo, Le bizzarre, faconde, et ingeniose rime pescatorie, Nelle quali si contengono Sonetti, Stanze, Capitoli, Madrigali, Epitafij, Disperate, e Canzoni. Et il Commento di due Sonetti del Petrarca, in antiqua materna lingua, In Vinegia, appresso Iseppo Foresto, 1557 |
|
Fonte: |
| ← Meneghina Cinqueta furfantona | Edission e fonte ▼ | O Donzelleta che in le acque insalae → |
Si canto ben dolci fradei carissimi
No son per questo aliegro in te le viscere,
Anzi el mio cuor suspira pien de lagrime
E rasonando le parole brontola
No za ch'habbia paura, o che sia timido,
Che son pi saldo che no ne un'ancuzene,
So ben che le brigae me tien per scempio.
E mi sul viso a tutti quanti schitolo,
Oh si se messurasse un poco i spiriti,
Forse qualchun no lieverave gondola,
Mo la Fortuna che sa far sti trafeghi,
Alza i murloni, e bassa quei che merita;
Queste cosse però sempre se viscola,
Che al tandem puo se vede chi ha pantofoli
Scampa ogni cossa, e resta la memoria,
Ma di cativi presto se desmentega,
Chi vuol cercar chi fa nascer le angurie
Besogna esser nassuo de un bon theologo,
No se maravegemo puo se i aseni
Vuol portar sella credendo esser barbari,
El me duol c'ho un pensier che me desnombola,
E si no vogio consegio da miedeghi
Solo un conforto me fa viver norbio,
Chel se sta puoco a galder delle fritole,
Ni besogna pensarse a son de pifari
Daspuo morti magnar, ni far el sprocheno,
Che importa pi bernuso, cha una tonega.
O esser pi da Roma, che da Bergamo?
Che tutto quanto è mondo fina in India.
Le un dolce viver cho feva i Apostoli,
Mo chi vuol compagnarse col Diavolo,
Per qualche tempo de la roba domina,
Puo vien una tempesta, e fa so debito,
Le megio esser agnello, cha una vipera,
Si ben le un'anemal de puoco spirito,
El ciel si ama a chi no mete scandolo
Besogna haver la fede con le opere,
Si no ga recomando a Pluto l'anema
Bene vivere e letari xe un bel distico,
E chi roman da drio lica la piadena.
Chi crede piar tutto strenze un totano,
E chi si tien lion se trova un buovolo.
O grami nu, con le nostre fandonie,
E col star tesi pieni de superbia,
Che semo al fin tre onzete de polvere
Rido de i Re, di Papa, Duchi, e Principi,
Che daspuo morti si no val un trotolo,
Chi ha buona fama ghe resta memoria,
Donca fioli tutti mesuremosse,
E femo conto de esser proprio un circolo
De sta hostaria mondana, de sta machina,
Fagando manco mal, che sia possibele,
Azo che in Paradiso ogni homo tombola.