Per l'album de la contessa Aneta
de la contessa Aneta
Dialogo tra el poeta e la musa
|
1857-58
|
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← Per l'ingresso del paroco | Edission e fonte ▼ | Per el batizzo del primogenito de do sposi → |
DE LA CONTESSA ANETA . . . . . .
dialogo fra el poeta e la musa.
Che miracolo zelo, che vol dir,
Che invece de dormir
Ancuo tanto abonora
Dal leto
Predileto
Ti vien fora?
Vago e vegno in t'un supio, vago qua,
Indove i m'à chiamà,
Co ti vol veramente che confessa,
Per un afar che a tanti ghe interessa,
E indrio co tornarò
Quel che ò fato in detaglio te dirò.
E co tuta sta furia, che afar zelo?
Ghe n'hà sempre de nove
La to testa sprovista de cervelo,
Che se no ti me disi e cossa e dove
Te chiapo per el colo,
E te lasso cigar, ma no te molo.
Ancuo che ze sant'Ana,
Sant'Ana benedeta,
Da qua poco lontana
Go zente che me aspeta
Sta matina
In casa de un'Aneta
Nela qual tuti i pregi se combina,
E là da quel che sento
Dovarò farghe in versi un complimento,
Che sia corispondente
De la signora al merito eminente.
Ste imprese, sti cimenti
Co tuti quei talenti,
E co una lengua ingrata,
Che apena qualchedun pol tolerar!
Fia cara ti ze mata.
Ti è mata da ligar,
Perchè diversi è pronti
A farte scomparir;
Là ghe sarà i confronti
Co zente più de ti ben educada,
E ti andarà a finir
D'esser fischiada.
Epur per el passà
Go in ste ocasion cantà
Per più d'una signora,
E me son cussì ben portada fora,
Per apunto in dialeto venezian,
Da aver a profusion i batiman.
Altri tempi, zucona, sin a tanto
Che gh'è la zoventù
Senza certe virtù
Se porta el vanto,
E co qualche bomò,
Co franco muso,
Per prova mi lo sò
Volentiera i ve aceta in ogni buso;
Ma adesso, musa mia,
Che da l'età
Ti ga squasi fruà
La fantasia,
E tuti se pol dir quei requisiti
Che riesce graditi,
Te l'assicuro mi
Certi argomenti
No ze più pan per ti,
Te manca i denti:
Su la galanteria meterte adesse
Nel stato che ti ze
Saria l'istesso,
Che ancuo volesse mi far da lachè
Co cinquant'ani e queli de la nena,
Che go sora la schena,
Co qualche intrigo, che no vogio dir,
E co cinque sie cali,
Che me fa maledir
Scarpe e stivali.
In te le società de prima classe
Oramai no ti devi aver coragio
De comparir s'anca i te tolerasse,
Perchè pol capitar quel dal formagio,
Quelo che se'l te cata
Sogeto de censura,
No gh'è misericordia, la ze fata,
Ti pol esser sicura,
Che in manco de mezz'ora e co la zonta,
Dapertuto i to radeghi se conta.
Capisso, ma co supia la fortuna
No ghe ne va mal una,
E po per induzion
Me par se possa creder fermamente,
Che le mie produzion
Generalmente
Gabia avudo l'onor
Del publico favor,
Avendome nei fogi,
Anca lontan de qua,
Per el tempo passà
Fato dei elogi,
Che modestia no vol che li ripeta,
E la nostra gazzeta
Ga porta ai sete cieli quel presagio,
Che del genere uman
Per norma e per vantagio
Stampo ogn'ano in dialeto venezian.
Sina che de pronostici se trata,
Dove liberamente
Co la to testa alquanto strambalata
Ti pol dir quelo che te vien in mente
Su le stele, sul sol, sora la luna,
Su tuto longo e largo el firmamento,
Ti gavarà fortuna,
Perchè a scherzar no ocore aver talento,
E perchè, te lo zuro da Camilo,
Nissun ghe abada tanto per sutilo,
Anzi i ride a sentir in che maniera
Destirando ti va le to lasagne,
Che no gh'è le compagne
Su la tera;
Ma qua decisamente
Semo in un caso afato diferente;
Qua misurando sempre l'espression
Bisogna vincolar la fantasia,
E bisogna aver fato profession
De gran galanteria;
Ghe vol modi obliganti,
Maniere interessanti,
Discorso assae eloquente,
Frasario conveniente,
Brilante esposizion,
Precisa, chiara,
No ghe vol el fron fron
D'una chitara,
Vechia, bruta, scachia
Da far malinconia;
Ma pur lassando star
Tutiquanti sti obieti, che me par
(Bisogna che anca ti ti lo confessi)
No i se possa scartar,
Dime in che modo ti te cavaressi?
Eco, mi scielgeria per argomento
Le rare qualità de la signora,
Ghe diria che la ga virtù, talento,
Bontà, grazia, maniera che inamora,
E che mandada zo la ze dal Cielo
Per servir su la tera da modelo.
Perchè daga un giudizio competente
Se ai pregi de sta Aneta
Pol esser el to elogio suficiente,
Opur se l'è un ecesso da poeta,
Dime almanco chi zela?
Dimelo in t'una rechia... bagatela!
Oh! toco de petegola;
De dama de sta pegola
Ti figura barona
I meriti cantar no ti ze bona;
Acertite i ze tanti,
I ze de un tal calibro,
Che a dirli tutiquanti
Se impenirave un libro,
E ghe voria
Un talento, una tatica,
De la qual, vechia mia,
No ti ga pratica;
Ti ze per mala sorte
Priva dei più esenziali requisiti,
E drento certe porte
No i ze siti,
Che trova da far ben la to chitara,
El to insulso dialeto;
Pronostici, mia cara,
Pronostici, ripeto,
Indove per abuso de stramboti
Da una gofa importanza intabarai
Co qualche bon efeto ti simioti,
E con qualche favor, Merlin Cocai.
Dunque abandona, musa,
Te prego per piacer,
Sto to ardito pensier,
Trova una scusa,
Altrimenti te chiapo per el colo,
E te lasso cigar, ma no te molo.