La Visita
|
Edission original: |
Giuseppe Coletti, Poesie postume in vernacolo veneziano, Venezia, Gattinoni, 1889 |
|
Fonte: |
Indice:Coletti - Poesie postume in vernacolo veneziano, Venezia, Gattinoni, 1889.pdf |
| ← La Campanela | Edission e fonte ▼ | El Pastizzo → |
.jpg)
- Siora Beta Veneziana
- Siora Cate da Possagno
- Momola massera de siora Beta.
Beta. ― No sentì, ola che i sona? 1.
Digo Momola, seu morta?
Vardè chi è, verzi la porta...
Dove seu? No ve movè? —
Momola. ― Son al comodo; no posso 2. —
B. ― Lassè star, farè deboto. —
M. ― La gran vita! sempre in moto! —
B. ― Manco ciacole, corè. —
M. ― Vago, vago... 3 La indovina!
Una visita. ― B. ― A sta ora?..
B. ― Destrigheve, via, disè. –
M. ― Quela siora da campagna....
No la sa? via... quela bruta...
Siora cossa... la me agiuta... ―
B. ― La gran stolida che sé! -
― Che la fusse siora Cate
Da Possagno? ― M. ― Giusto ela.
Ma in che aria! bagatela!
La strascina in tera el sial!
B. ― Dame qua quela traversa,
Che me vesta su un pocheto...
Giustè suso un fia quel leto...
Portè via quel'orinal.
Una visita a nove ore
A l'usanza campagnola!
Che importuna! xela sola?
Zito, zito che la vien.
― Benedeta, siora Cate 4. —
Cate. ― Siora Beta, mia parona... —
B. ― La se senta... Che çierona! —
C. ― Anca ela la sta ben. —
B. ― No ghe mal, no, me la passo.
Che favor che la m'à fato! ―
C. ― Cossa disela? el xe un ato
De creanza e de dover. ―
B. ― Quando zela capitada? ―
C. ― Geri sera, zogia mia. ―
B. ― Brava! e quando vala via? ―
C. ― Al più presto. ― B. ― Che piaçer! —
― La me scusa, cara ela,
No xe leçito, nè vôi
Riçercar i fati soi soi,
Ma per spasso no la vien.
C. ― Ghe dirò: la mia putela
Se fa sposa drento el mese,
E ò da far diverse spese... —
B. ― O capio! Trovela ben? —
C. ― Eco: el fiol ga un bon negozio;
Qualche cossa la ghe porta;
No andarà la barca storta,
El xe zovene, el xe san... ―
B. ― La me diga: so mario
Xelo sempre cussì tomo? ―
C. ― El xe vechio, poveromo!
El morbin xe andà a Bassan. —
B. ― I ani passa. Go una vogia,
Ma de quele proprio grande
De vegnir da quele bande... —
C. ― Gh'è arie bone e libertà. ―
B. ― Ma el mario, la casa, i fioi,
Me tien qua come una vechia:
Ghe n'ò tre, sala, a la rechia,
E uno apena deslatà, —
C. ― Povarazza! Dove xelo
El ninin? ― B. ― Cossa? el mio toro
La vol dir;... vien qua, tesoro 5:
Che bochin! che idea çivil.
El ga apena diese mesi,
E la varda che bel toco! ―
C. ― Eh! la burla; cussì poco? ―
B. ― Diese mesi ai sie de avril.
El sta dreto come un fuso,
Xe un pezzon ch'el se tien neto,
El pronunzia tuto schieto,
E che batola ch'el ga!
El ga po un giudizio, un sesto
(No sta ben che mi lo diga),
Za co ela che xe amiga...
Zise, ps... la resterà
Chiò, ben mio,
La bona cossa... 6.
Tira in drio.
La te ingossa...
Varda el santolo,
Chiò brum 7;
El mamao,
Vita mia,
Te fa gnao?
Marchia via.
Bastoņemolo
Tum tum 8.
Dove xelo el to papà?
Suso belo....
Dame un ba...
Ti ga bua
Vissere, ah?
Mi chi sogio?...
Via la ma.. ma...
Vien qua trotolo,
E carezzilo el tetè
Din, din, din,
Chi xe che sona?
Xe la nona,
El barba Stin,
E la tata
Col bulà....
Uh! perdiana
Ch'el l'à fata
Presto in nana 9.
A dir caca
V'ò insegnȧ.
Sior pizzoto,
Sior cagon,
Co ve scampa
Dixè a a.
Xelo proprio una delizia?
La lo basa sto anzoleto... —
C. ― La lo neta, povareto,
La lo neta ch'el xe pien 10. –
B. ― El cafè come lo torla? ―
C. ― La sa ben discretamente. ―
B. ― Via siè bon Zize, el fa un dente,
El patisse assae 11. ― C. ― Va ben? ―
B. ― Come adunque ghe diseva
Son qua sempre confinada:
Ma vôi darme una sbrocada
Anca mi co vien l'istà.
Andarò da mia comare
A Vicenza senza falo:
E chi sa... quando so in balo,
Che no vada anca più in là. —
C. ― Se la va, la se diverta.
Anca mi go el mio progeto:
Bagni, acque, e po un viageto
De piaser... Che ora sarà 12?
Diese boti!.. El tempo passa
Presto in bona compagnia. —
B. ― La vol subito andar via?
Che premura che la gà! —
C. ― Restarave volentiera,
Ma no posso. ― B. ― Ben, pazienza:
So anca mi la convenienza,
No la vogio sequestrar. —
Le se alza, le se abraza,
Do gran basi le se schioca,
Le se forbe po la boca,
Co riserva de spuar.
Siora Beta (gera apena
La so amiga a meza scala)
Co la serva la se esala,
E la va zo col brenton.
B. ― La xe andada sta secada!
Che la staga pur lontana;
La xe proprio una vilana,
E la ga tanta ambizion.
E che lusso! vechia mata!
Bruta striga! So mario
Spendi spandi, ga falio,
E l'è belo e rovinà.
Al mio Zize gnanca un baso...;
Oh! carogna per el manco!
E po avanti de spuar bianco
Andar via? che inciviltà!
Mi a Possagno? Aveu sentio
Che risposta a boca streta?
No son gnoca: che l'aspeta
Che ghe vaga la go in cu...! 13.
Recordeve, un'altra volta.
Se mai 'l diavolo la porta,
No ste a verzarghe la porta,
E mandela via co lu. ―
Siora Cate va disendo
Col pensier ne l'andar fora:
― No vedeva proprio l'ora
De cavarme da sto spin.
Che petegola! che sprota!
Gala gnanca una bardela?
La vol sempre parlar ela,
Che burata, che molin!
E quel fio? che bruto stampo,
Che figura da casoto!
E a sentirla, quel simioto
L'è un amor: caro colù!
Mi basarlo? O sì dasseno,
Cossì sporco e spuzzolente;
No podeva starghe arente
Dal fetor: che peste! puh!
E no basta: la riceve
Dove? in camara da leto!
Che indecenza! e quel cuzeto!
Quei linzioi sporchi! che oror!
Cossa credela che?... Basta!
Vegnarò a Venezia ancora,
Ma no torno, se i me indora,
A trovarla, no in onor. —
La moral? La sponta fora:
Cuori averti, lingue schiete.
Cosse rare! Quante Bete,
Quante Cate in società!
Basi, abrazi, complimenti,
E parole inzucarae;
Ma da drio che stafilae!
Che tabari che se fa!
.jpg)
- Note
- ↑ Dalla camera da letto.
- ↑ Dalla cusina.
- ↑ Entrando ne la camera da la padrona.
- ↑ Andandole incontro.
- ↑ Levandolo dalla cuna e carezzandolo.
- ↑ La ghe dà un buzzolà.
- ↑ La ghe dà da bever.
- ↑ Mostra de bastonarlo.
- ↑ Lo mete in cuna.
- ↑ Vien la serva col caffè.
- ↑ Mostrandoghe el zucaro ne la cicara.
- ↑ La varda l'orologio.
- ↑ Battendose la boca.