In materia del senso gran cose s'hà sentìo
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo I, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 1.djvu |
| ← Fottemo pur, fottemo allegramente | Edission e fonte ▼ | Conta Petronio del gran Neron → |
In materia del senso gran cose s'hà sentìo,
Al dito de Petronio, Neron xe stà un gran fio.
Sentì, se de più grando lù mai podeva far,
Perchè la so lussuria l'avesse da sfogar.
5Sul lago delizioso d'Agrippa nominà
Sù d'un vascel d'avorio, e d'oro l'è montà.
I remiganti tutti de quella zente i giera,
Ch'in le dissolutezze portava la bandiera;
Un superbo banchetto l'hà fatto sul vascello,
10Che dar no se podeva el più superbo, e bello;
Figureve, che i cibi, e i più preziosi vini
Vegniva della terra dai ultimi confini.
L'hà fatto pò innalzar dei porteghi sontuosi,
E quanto tira el lago casini deliziosi;
15El gà volesto metter là dentro in quelle porte
Un numero infinito de Donne d'ogni sorte;
Da una banda ghe stasse le belle illustri Dame,
Che ghe cavasse ai Cazzi più nobili la fame,
Che ognuna fusse pronta, e facile, e contenta
20De tior drento quel primo, che'l Cazzo ghe presenta,
Perchè 'l so gusto giera veder ste belle Done,
Giusto per esser Dame, a far le Buzarone.
Dall'altra l'hà volesto, che in varie forme strane,
E in varj atteggiamenti, nue stasse le puttane.
25Oh quà mi me figuro cosa doveva far
Ste Donne, perchè i Omeni gavesse da sborar,
Chi colle gambe larghe puzade a una colona
Menarse le doveva in publico la Mona;
Chi co una gamba alzada, come che stà la grua,
30Aspettava, che un Cazzo ghe dasse una fotua
Chi stava là attendendo colla so Mona in mostra
Chi ghe 'l mettesse dentro, come se và alla giostra,
Chi colle man in terra, come hà pensà Aretin,
All'uso delle piegore sù lo tiolea a passin;
35I Omeni più forti se le chiappava in brazzo,
E pò i se le impirava sù, e zoso per el Cazzo,
I Vecchj da qualcuna ai piè se inzenocchiava,
E co un deo in tel Culo la Mona i ghe licava;
Altri ghe 'l dava in man con belle parolette,
40Perchè le ghe 'l menasse in mezzo delle Tette,
Altri ghe prometteva de darghe ogni diletto,
Perchè le ghe tiolesse in bocca l'Oselletto.
Gran cose se vedeva, ghe giera fin de quelli,
Che 'l so gran gusto giera sborarghe in te i cavelli.
45In mezzo a ste lascivie Neron tutto quel zorno
Con pompe, e con gran fasto quel liogho hà zirà intorno
Al comparir dell'ombre, perchè se ghe vedesse,
Illuminar l'hà fatto le Case, e le Barchesse,
L'hà volesto ghe fusse per tutto dei Strumenti,
50E delle Canzonette al foter attinenti,
Tanto, che dai vicini boschetti, e dai Palazzi,
L'Eco diseva, evviva, viva le Mone, e i Cazzi.
Per coronar Neron st'azion cussì famosa
Da femena el s'hà fatto vestir, come una Sposa;
55L'hà volesto, che i ghe metta el so gran velo in Testa,
E fin anca la Dote per far sta bella festa;
E, perchè el matrimonio usasse quel so Bulo,
In publico l'hà fatto, che 'l ghe lo metta in Culo.