Imprecazioni di Nico Calafato
|
Edission original: |
Poeti antichi del dialetto veneziano, Volume I: Poesie di diversi autori antichi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| ← Biglietto di Nico Calafato alla Perina | Edission e fonte ▼ |
Daspuo che al mio dolor no gh'è ceroto
Bramo veder in tera ogni rovina,
3Fogo, fame, giandusse e teremoto;
E in pe' de pan, de carne e de farina
Che se beva velen, se magna sassi,
6E se dorma su pagia segalina;
E quei ch'è più mecanichi e più bassi
Signoriza i più richi e più potenti,
9E tuta la roba vaga a scazzafassi.
Vorìa solo sentir pianti e lamenti,
Sospiri, zighi e tribulazion,
12Ingani, ladronezzi e tradimenti;
E che per ogni buso, ogni canton,
No ghe fusse che sbrichi, che sassini
15Che a bel dileto facesse custion;
Vorìa che tuti i Frati scapucini
Fesse l'amor, e che i inamorai
18Deventasse in so' pe', tuti chietini;
Vorave che per tuti sti canai,
Per la Brenta, per l'Adese e per Sil
21Nuasse lovi e dragoni afamai;
Vorìa che la zonchià, l'onto sotil,
La puina, el formagio e le casuole;
24(Che xe pur un magnar cussì zentil!)
Deventasse più dure che le tole,
E quando po le fusse cussì dure
27Te ne vegnisse vogia d'esse sole;
Vorìa veder cosse anca più scure;
Che le mugier comportasse ai marii
30Ch'i se n'andasse da altre creature;
E aciò che tuti po' fusse avalii
Vorìa che le mugier fusse quintane
33De' furfanti, de ladri e de falii;
Vorìa veder regine le p...
E che quanta onestà ga le donzele
36Fusse tuta al bordelo in Carampane;
Vorìa veder tute le done bele
Arse e destrute, e per farla compìa
39Che le brute crepasse po anca ele;
Vorìa che 'l brogio fusse malatìa,
E in pe' de le carezze e bone ciere
42La zente se disesse vilanìa;
Vorìa che i serpenti e che le fiere
Lassasse i boschi, vegnisse in sta tera;
45E fesse nìo per le nostre litiere;
Vorìa veder madona ogni massera;
Le madone sguatare in cusina;
48Po, tute descopae co una manera;
Vorìa che ogni ladro de Mocina
Fusse el Camerlengo del Comun,
51Perchè le cosse andasse più in rovina;
Vorìa che no ghe fusse l'un fia un
Aciò no se podesse tegnir conti,
54E no ghe fusse credito in nissun;
Vorìa che no ghe fusse se no afronti,
Magnarìe, trufe, intachi, garbinele,
57Sogie e presonzion, arlassi e zonti;
Vorìa che quel che va per le buele,
E se purga da basso in cagaor,
60Se voltasse a la via de le massele;
Vorìa che sta frascheta de sto Amor
Tresse da seno frezze e veretoni
63Che ne passasse a tuti quanti el cuor;
Vorìa che i pie in tel cul e i mustazzoni
Fusse in masor domanda e in masor stima
66Che no xe le pernise e i pipioni;
Vorìa che la zonchià no avesse cima,
E chi tagia le carte a la Basseta
69Sempre vedesse la chiamata prima;
Voràve ch'ogni scrigno e casseleta
S'avrisse senza chiave con un deo
72Perchè i miseri avesse pi la streta;
Voràve che chi pesca desse in spreo,
E che i campi prativi e le coline
75Deventasse in so' pe' giara e caneo;
Vorìa che i puti, e che le fantoline
Fesse caca per cà, pissasse in leto
78Tute le sere e tute le matine.
Voràve che i pissoti de careto
Tegnisse scuola e desse lezion
81Ai omeni più bravi d'inteleto;
Vorìa che al Magazen e al Bastion
Se redusesse la civilità,
84Co' fa prè Bocaleto imbriagon;
E voràve che ogn'omo imbertonà
Quando ch'el scontra la so' inamorata
87El ghe fesse una ciera scorozà;
E po' per penitenza che ogni ingrata,
Da afano e da dolor dei so' pecai,
90La se pelasse e deventasse mata;
Vorìa che i vechi no gavesse ochiai,
E quei che no ga denti no catasse
93Dal pistor se no pani biscotai;
Vorìa a chi à drapi che i se ghe tarmasse;
E per chi è nui che sempre fusse inverno,
96Perchè i batesse i denti e che i crepasse;
Voràve che 'l dormire fusse eterno,
E che nessun no coversisse i ochi
99Nome che co le pene de l'inferno;
Vorìa che in pe' de carete e de cochi
Se strassinasse a coa de cavalo
102Ligai co la so' corda in tei zenochi;
Vorìa che su ogni deo nassesse un calo,
E per pì pena con scarpe impontìe
105Che convegnisse sempre star in balo.
Che tante baje? Che tante pazzìe?
Voràve per un'ora comandar
108E se in quest'ora no fesse le mie
Torìa po' ben de pato, de crepar.