Biglietto di Nico Calafato alla Perina
|
Edission original: |
Poeti antichi del dialetto veneziano, Volume I: Poesie di diversi autori antichi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| ← Lettera di Nico Calafato dalla Prigione a sua Moglie | Edission e fonte ▼ | Imprecazioni di Nico Calafato → |
Son d'una grisa vogia, son sì fiaco
Come se avesse tolto medesina.
3Da che vien, cara fia, che son sì straco?
Dìmelo, cara suor, cara Perina;
So ben mì che ti sa' la mia natura;
6Confortame, te prego, cara Nina.
Fame carezze, adora sta fegura;
Son pur colù che fa sluser la casa!
9E infin che ti me vedi, sta segura.
Zafame a brazzacolo, strenzi e basa;
Son tuto rovinà, tio' quel zibeto,
12Onzime el peto, e po le cegie e nasa.
T'ingrugni el muso? astu qualche sospeto?
Certo ti pensi che sia stà da Cate.
15No barbotar; dì via, parlame schieto.
Ti rogni sempre, ti fa' co' le gate;
Sto to' far te consuma, povereta...
18Eh tendi a viver, no far co' fa le mate.
Te vòi trovar un dì 'na massareta
Che me vegnirà drio col cesto in Piazza
21Per no lassarte star cussì soleta;
E vòi comprarte un papagà, una gazza,
Del basegò, una zelosia, un spechio;
24Alegrate mo adesso, e vien m'abrazza.
No far la schiavonessa, con dir nechio,
Che se te meto po' le man atorno
27Te pelo tuta sin al petenechio;
Ch'astu trovà, che ti crii ogni zorno,
Da un mese in qua, da matina a sera?
30Mi taso pur co' cato pan in forno.
Vegno straco da Piazza anca gersera
Con menole, con ravani e salata;
33Ti crii deboto che son stà a la guera.
O credo che con mi ti fa la gata;
Perchè ti vedi che mi fazzo el gonzo,
36O pur ti vol che te fazza una nata.
Varda che per la rogna mi te onzo,
State tranquila, e tiente in cervelo
39O no passa oto zorni che te ponzo.
Te fidistu forsi col dir che mì ò martelo?
No sastu che per poco la me monta,
42Che te farave de la panza un crielo?
El par ch'ogni mio mal vogia la zonta;
Varda chi me gradisse e chi m'ingrinta
45Che tute le rebeco per la ponta.
Quatro ti me n'à fato; orsù a la quinta;
Che te despogio a mo' un san Zuan de Zugno;
48Co' à fato Zan Fracao un dì a la Tinta.
Vardate co' ti vedi che m'ingrugno,
E tiente ben a l'erta; che co' taso
51La vol bogier, e presto scampa un pugno;
E po' mi finzerò de darte un baso,
E cussì pien de grinta, a dreto, a storto;
54Te portarò coi denti via el naso,
E co la prima Nave ch'è sul Porto
Farò po' vela, e trucherò in Levante;
57E questo è 'l mio pensier, el mio conforto;
Che ti ti perderà el naso e l'amante.