Berti, se la Natura no me ingana
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo IV, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 4.djvu |
| ← Che giova aver fortuna, aver onori | Edission e fonte ▼ | Zà, ch'ancora me trovo san de mente → |
Berti, se la Natura no me ingana,
Per ordine d'età ti gà d'andar
Dal gran Pluton a farte buzarar
4Prima de mi 'na qualche settimana.
Cento Sonetti in lengua Veneziana
Te darò a Cà del Diavol a portar,
Che, co i leze Pluton, mi voi sperar,
8In premio che 'l te trova 'na puttana
Intanto scriverò con tutto 'l cuor,
Che più, che la mia Musa sarà grassa,
11I te farà a Cà del Diavolo più onor.
Te servirò anca dopo, e a quei, che passa
Ti ghe dirà, che son to prottetor,
E s'i hà qualcosa del mio, ch'i te lo lassa.
15Co vien una bardassa
Domandeghe, se'l gà gnente de bello
In materia del Cul, e dell'Osello;
18Se 'l gà un pensier novello
Per farse ben voler dal Dìo d'Amor,
Co hò fatto mi col Bando dell'Onor.
21Co vien qualche Dottor
De quei, ch'hà buo in Padoa 'l so Patafio,
Fate dar la risposta al mio Epitafio,
24E, co un batticannafio
Ti vedi a capitar là tra' quei cani,
Domandeghe 'l Sonetto dei ruffiani;
27E quando in quei malani
Capita quelli della Capellina
Fate dar quello della Clementina;
30Co vien qualche sgualdrina;
Và subito a incontrarla sul Porton,
E varda, se la gà gnente de bon;
33E co vien un Fraton,
Domandeghe, se in mezzo al so Culazzo
El gà 'l Sonetto in lode del mio Cazzo;
36Co passa un spiritazzo
De quei, che vorrìa sempre cose niove,
Varda, se'l gà l'Intromission de Giove;
39E co vien certe love,
Ch'i Omeni reduse in sulla cenere
L'Appellazion domandeghe de Venere;
42A quelle Mone tenere,
Che se lassa per gnente tior l'onor,
Fate dar el Sonetto del Pittor;
45Co vien un bell'umor
De quelli, che stà sol poffardìo
Domandeghe, se 'l gà quello de Dìo;
48E cussì và pur drìo;
E, co un Nodaro capita là drento,
Fate dar quello del mio Testamento;
51E quando in quel tormento
T'incontri un de quei dell'arte medica,
Che 'l te daga 'l Sonetto della Dedica;
54E cussì co sta predica,
Tiolendote in sta forma del trastulo,
Ti te petterà 'l Diavolo sul Culo.