Pronostico de l'ano 1833
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1832 | Edission e fonte ▼ | Pronostico de l'ano 1834 → |
Inoponibile
Questo qua ze
El mio pronostico
Del trentatre.
Fredi grandissimi
L'inverno intiero,
Sin gradi dodese
Soto del zero,
Sempre de nuvoie
Coverto el cielo,
Scravazzi in musica
Col ritornelo,
Neve che capita
De quando in quando,
Che i teti deboli
Va sfracassando,
Calighi massimi
Co fa la luna,
De quei da perderse
Per la laguna,
Borasche insolite,
Sirocaloni,
Bore diaboliche,
Fieri aquiloni,
Che oltragia fabriche,
E che a dretura
Despianta i roveri
D'ogni misura.
Sarà una tombola
La primavera,
E tarda a moverse
Sarà la tera,
De april tardissimo
Squasi despogia
Senza che uri alboro
Gabia la fogia,
Senza che vegeta
Pianta nè fior
Costante e incomoda
Nel so rigor;
Tantochè in magio
No sarà raro
Sentir el grizzolo
Soto el tabaro,
Dati infalibili,
Segni evidenti,
Che poverissimi
Sarà i formenti,
Che su le pergole
Scarsa la ua
Restarà picola,
Restarà crua,
Che d'ogni erbagio,
Che d'ogni fruto
Ristreto el numero
Sarà pertuto.
Secondo i calcoli
Trovo in ista
Che insoportabile
Caldo sarà,
E a la capicola,
Lasso che i canta,
Ma lo pronostico
Gradi quaranta;
Tempeste oribili
Per ogni logo,
Sionere, fulmini
Che taca fogo,
Lampi che ispirita,
Che cava i ochi,
Toni che giacomo
Farà i zenochi,
E sempre sofego,
Sempre brusera,
Continua polvere
Matina e sera.
L'autuno povero
Sarà de tuto,
E malinconico
Piovoso e bruto,
I zorni pessimi
Scuro la note,
Borin che pizzega,
Piove dirote,
Po, Brenta e Adese
Farà la rota,
Sarà da l'umido
L'aria corota,
E del barometro
L'arzentoviro
Segnarà stabile
Tempo cativo.
L'ano po in genere
Presentarà
De quei fenomeni
Che mai s'à dà;
Sarà el sol palido,
Negra la luna,
Color de l'ebano
L'aqua in laguna,
Lassarà vederse
Nel firmamento
Dei foghi fatui
Da far spavento,
Strane meteore
Comparirà,
Aurore lucide
De qua e de là,
Cascarà in numero
Per tuti i siti
Fati a triangolo
Grossi aereoliti,
Eclissi insolite,
Che durarà
Tre dì de seguito
L'oscurità,
Vegnarà prossima
Una cometa
Carga d'eletrico
Fata a trombeta
Co una probosside
Verso ponente
Longa oto perteghe
Cussì insolente,
Che 'l polo antartico
Metarà in moto
Con scosse oribili
De teramoto,
E conturbandose
L'atmosfera
Dei zorni a vesparo
Pararà sera;
Restara imobile
La calamita,
Vivarà i polipi
Nel'aquavita,
Cantarà l'anare
Come i quagioti,
In ton de alamire
Dindie e dindioti,
Zirarà notole
De chiaro dì,
Parlara l'aseno
Megio de mi,
Ghe sarà a nuvole
I calabroni,
A miera, a eserciti
Ragni e scarpioni,
Cressarà i pulesi
Quanto un oselo,
Gavarà i cimesi
Tanto de pelo,
Sarà le rusole
Come bisati,
Come corogoli
Grossi i mossati,
Schiavi, formigole
E topinere,
Sorzi che rosega
Quanto le fiere,
Vermi longhissimi
Come buele,
Tarme che in fregole
Fa le scarsele,
Conii che morsega,
Agnei che sbrana,
Bechi che incomoda
La spezie umana,
Cani che sgnaola,
Gati rabiosi,
Strage de retili
Bruti e schifosi.
Le piante e i albori
Produrà ortighe,
Incanti e fufigne
Farà le strighe,
Duri durissimi
Su le crosere
Ghe sarà i spiriti
Tute le sere,
Atorno i arzeri
Verso l'aurora
Urli che spasema
Saltarà fora,
Sora le fabriche
De note scura
Zirarà scheletri
Da far paura,
De tante zovene
Soto del leto
Insolentissimo
Sarà el foleto,
Miera de omeni
Per gelosia
Morirà martiri
Da epizoosia,
Diverse femene
Causa le voge
Restarà vitime
Soto le doge,
Sarà incurabili
Le malatie,
Movarà el gomito
Le librarie,
Nassarà i roscani
Soto la cenere,
Piovarà tossego
Squasi ogni venere,
Tremarà i cogoli
Nei cimiteri,
Ardarà i mocoli
Senza paveri,
Sarà prolifiche
L'ave de fiel,
Serpenti e vipere
Produra el miel,
In tel parsemolo
Nassarà i ossi,
Supiarà i mantesi
Senza esser mossi;
Cambia el so ordine
Tute le cose,
Se cata l'ostreghe
Drento le nose,
Se trova zizole
Drento i limoni,
Gambe de seleno
Drento i maroni,
Nasce tartufole
Sora i palazzi,
Canta le racole
Drento i pagiazzi,
Zira sonambuli
Tuta la note,
I gufi strepita
Nele so grote,
Casca volatili
Morti da fame,
Sofre i quadrupedi,
Crepa el polame,
A miera capita
In canalazzo
Volpine e sievoli
Duri dal giazzo.
Se stenta a vederghe
De mezzodì,
Se incastra l'ongie
Drento dei pi,
Vien fora zolfare
Da le cisterne,
Boge l'arsinico
Nele caverne,
Casca el calisene
Nele pignate,
Vien la marantega
Zoso in zavate,
Sparisce i talari
Da le scarsele,
Sona el so ultimo
Le campanele,
Bala le mescole
Nele cusine
Col folo in gringola
Valz e manfrine,
Va i più bei mobili
Tuti in sfacelo,
Se tarma i abiti
Come un crielo,
Schiopa magioliche,
Se rompe spechi,
Le gatorigole
Ghe vien ai vechi,
Rusa le masene,
Ciga i molini,
Se fa invisibili
Dopie e zechini,
Più assae de l'argana
Tira el saroto,
Va el marmo a fregole
Come 'l biscoto,
La forfe mastega,
Sbrega el cortelo,
L'ago no penetra,
Ponze 'l scarpelo,
Subie e verigole
Piu no trapana,
Nei campi fertili
Nasce la cana,
Tanto la pegola,
Che la tanaca,
La cola, el mastese,
Più no se taca,
Deventa rusene
L'oro e l'arzento,
Se scola i arpesi,
Se vede el vento,
No gh'è più bussola
Nè direzion,
Le barche navega
Senza timon,
L'ago magnetico
Più no laora,
Salta le menole
Cote in farsora,
Trota la piegora,
Svola el conio,
No va più i gambari
Col culo indrio,
Pianze da tortora
El martorelo,
Cede l'ancusene
Soto el martelo,
Ventoli e ventole
No fa che caldo,
Tute le rendite
Magna el gastaldo,
Se sbara mascoli
Senza sussuro,
No ghe ze gomena
Che tegna duro,
Ze dolce 'l pevare,
Ze ruspio l'ogio,
Fa vermi el zucaro
Caldi de bogio,
Fa el fogo i grizzoli,
El giazzo scota,
Piase moltissimo
La roba rota,
Core retrogradi
Fiumi e torenti,
Se incanta machine,
Se inchiava i denti,
Casca zo stabili,
Va abasso ponti,
Se spaca roveri,
Se averze monti,
Boschi se incendia,
Laghi se suga,
Trute belissime
Metendo in fuga;
El mar in colera
Su le barene
Trasporta i scheletri
De le balene,
Se intriga i omeni
Nele scarpie,
Gh'è barafusole
Per le ostarie,
I cataradeghi
Zira la note,
Perde la canola
Tute le bote,
Le statue sbotega
Sui monumenti,
Fa el vovo in caneva
Draghi e serpenti,
Verso i crepuscoli
Vestio in velada
Se vede Attila
Tirar de spada,
Se vede in cotolo
Siora Pandora,
Che co Proserpina
Zoga a la mora,
Baco fra i pampani
Che da galioto
A la dea Venere
Ghe fa sto moto,
Se sente Cerbero
Ghe ga el samoro,
Se vede Ercole
Che tira el toro,
Se vede Elena
Che fa un impalo,
Amor che a Paride
Ghe tagia un calo,
Fortuna in mascara
Che zira el molo,
E che dei omeni
Zoga al pandolo,
Didon che in estasi
Magna el sguazzeto,
Enea che in gondola
Passa tregheto,
Neuton in specola
Co Zoroastro,
Marte che intrepido
Scana un polastro,
La bela Andromeda
Che sui sabioni
Al caval Pegaso
Frega i latoni,
E Piero d'Abano
Nel so tabaro
Co cento diavoli
Che ghe fa chiaro.
Questo, infalibile,
Questo qua ze
El mio pronostico
Del trentatre,
Ma se nol comoda
A qualche mato,
Senza far chiacole
Ghe lo barato.