Pronostico de l'ano 1831
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| Edission e fonte ▼ | Pronostico de l'ano 1832 → |
Da l'alto de la specola
Su l'ano in general
Secondo i fati calcoli
4Pronostico assae mal;
L'inverno severissimo,
Gran neve a la montagna,
Scaravazzi dirotissimi,
8Calighi ma che bagna;
El fredo insoportabile,
El giazzo alto sie pì,
La bora che ne sventola
12Tuta la note e 'l dì.
La primavera umida,
E rigida e incostante
Farà patir i albori,
16Farà morir le piante;
L'istà sarà assae prodigo
De pulesi e mossati,
El caldo sarà massimo,
20Da far deventar mati,
Sarà i raccolti poveri
De ua, de gran, de tuto,
No ghe sarà che polvere,
24No regnarà che 'l suto;
Toni, tempeste, fulmini,
Sioni, levantere
Da far che i muri tremola,
28Da far svolar le piere.
L'autuno malinconico
Sempre co piova e vento
Sarà per l'uman genere
32Tre mesi de tormento:
Tute alterar le regole
Se vedarà natura,
Sucedarà disordini
36Che ne farà paura;
Case che se scombussola,
Strade che se sprofonda,
Cità che se scompagina,
40Campagne che se inonda,
Boschi ridoti in cenere,
Roture de torenti,
Negozi a tuta perdita,
44E trufe e falimenti,
Nave che in mar pericola,
Monti che casca roti,
Vulcani che ve ispirita,
48Incendi e teramoti,
Veture che precipita,
Vapori che se brusa,
Antiani che va in fregole,
52Pignate che se sbusa,
Amanti che se rosega,
Carampie in sentimento,
Novizzi che se morsega,
56Neroni in svanimento,
Onesti che ve smafara,
Ladri che ve socore,
Tosi che no pol moverse,
60Decrepiti che core,
Arditi che se spasema,
Austeri che ve tenta,
Pietosi che perseguita,
64Spaurosi che cimenta,
Avari che dilapida,
Sinceri che ve ingana,
Amici che ve trucida,
68Parenti che ve scana,
Marii che ga le cotole,
Muger co le braghesse,
Massere che ga el camito,
72Parone compromesse,
Spizieri che ve tossega,
Sonambuli che zira,
Orchi, foleti, diavoli
76Coi corni che ve impira;
Oseli che se rampega,
Quadrupedi che svola,
Mureli de luganega
80Più duri de la tola;
Sorzi, scarpioni, vipere
E ragni col boton
Da generarve el tetano
84Se tolè su un becon.
Come granseole i cimesi,
Peochi tantofati,
E cavalete e rusole
88Più longhe dei bisati.
Se vedarà nel'adese
A corer le balene,
Per cause atmosferiche
92Se aumentarà le nene;
Aparirà meteore,
Comparirà comete,
Se gavarà fenomeni
96Insin soto le piete,
Ma quel che rompe l'organo
Sto ano ghe sarà
Dal so principio al termine
100Dei mali in quantità:
Ponte de peto, reumi,
Variole, indigestion,
Maligni, tifi, putridi,
104E gastrici e flussion.
Ingorghi, timpanitidi,
Riscaldi, polmonie,
Carie, postieme, esostosi,
108Artritidi, otalmie,
Freve, emicranie, coliche,
Tubercoli, dolori,
Roture, fonghi, cancari,
112Idropisie, tumori,
Urti nervosi, palpiti,
Strangurie, convulsion,
Bile, restagni, erpeti,
116Patemi, consunzion,
E parti scabrosissimi,
E ferse e scarlatine,
Asmi, catari, volvuli,
120E morti repentine,
E sincope e paralisi,
E panarizzi e gnochi,
Frescusene de Venere
124Da consolar coi fiochi,
Neorisme, colpi, fistole,
E siatiche, e renele,
E cronici inguaribili
128Per tute le scarsele.