Pronostico de l'ano 1832
|
Edission original: |
Camillo Nalin, Pronostici e versi di Camillo Nalin, Volume I, Venezia, Giambattista Andreola, 1857 |
|
Fonte: |
| ← Pronostico de l'ano 1831 | Edission e fonte ▼ | Pronostico de l'ano 1833 → |
Per far un pronostico
Che serva a la zente
De norma infalibile
4Nel'ano presente,
E possa dirigerla
Sul ben e sul mal,
Coi prismi neutonici,
8Col mio canochial
Vardà go atentissimo
Le machie solari
Le varie meteore
12Le fasi lunari;
L'umor de le nuvole,
I strani so efeti,
El moto periodico
16De tuti i pianeti,
L'opaco riverbero
Dei astri minori,
I estremi d'ogn'angolo,
20L'union dei colori;
Studià go co scrupolo
De drento e de fora
El circolo magico
24Che segna l'aurora,
El corso retrogrado
Che fa le comete,
I omeni pampani,
28Le done saete,
La base infalibile
Che regola i zorni,
La causa legitima
32Che 'l beco ga i corni,
El punto centripeto
De tuto el creato,
Le gambe invisibili
36Del pesce bisato,
De l'ago magnetico
L'indizio sicuro,
El metodo facile
40Per far del sussuro,
La forza cilindrica
Che regna su tuto,
El senso simpatico
44Del belo e del bruto,
Dei lampi, dei fulmini
L'origine oscura,
I tanti fenomeni
48Che ga la natura,
La lava e la cenere
De tuti i vulcani,
El longo catalogo
52Dei gusti otomani,
De l'erbe botaniche
I astrusi misteri,
La causa del fragile
56Che gh'entra nei veri,
L'ingano de l'otica,
L'influsso dei odori,
De l'aria l'idrogeno,
60El gas, i vapori,
Le cause recondite
Che suscita el vento,
El cuor de chi prodiga
64Al trenta per cento,
El fluido scorevole
Dei monti e dei piani,
La stirpe dei retili,
68L'astuzia dei cani,
I vari giudizi
Sul flusso e riflusso,
El fermo caratere
72Che mostra ogni musso,
L'azion nele gramole
Che ga el parassito
El cibo mancandoghe,
76E avendo apetito,
El senso tiranico
Che fa un grumo d'oro
Al povaro diavolo
80Che no ghe n'à un boro,
L'impulso geografico
Che ga el teramoto,
Le doge reumatiche
84Guarie col saroto,
El passo del gambaro,
Le foge che casca,
I bagni de Abano,
88El mar in borasca,
El pregio dei tonici,
El canto dei grili,
La vita girovaga
92Che à fato Mastrili,
Le ore longhissime
De chi ga la noia,
El salto de Leucade,
96L'incendio de Troia,
La parte mefitica
De ogni sostanza,
El moto de stomego,
100La falsa gravianza,
Le ale de notola,
La tela de ragno,
El naso del dindio,
104De Achile el calcagno,
I spini de l'ostrega,
I amori del galo,
El cul de la scimia
108Co tanto de calo,
La lengua de vipera,
Le onge del drago,
La barba del musico,
112La verga del mago,
De l'ave l'industria
L'inzegno dei gati,
El manzo che rumega,
116L'afar dei bigati,
Le creste dei bipedi,
La coa del paon,
El fin de l'esercito
120Del re Faraon.
La storia patetica
De Elena greca,
El primo dei omeni
124Che à usà la manteca,
I esseri miseri
Per quanto che i fassa,
El mal tanto cognito
128Del brusa e po passa,
El strepito armonico
Che fa la campana,
L'onor che sacrifica
132Lugrezia romana,
L'imprese de Ercole,
La bela Giudita,
I gradi de spirito
136Che ga l'aquavita,
El gran Piero d'Abano,
La capra amaltea,
I bruschi salvadeghi
140Soferti da Enea,
L'odor de la canfora,
El caso de Giona,
El vento che domina
144Nel porto d'Ancona.
La razza prolifica
Dei mostri marini,
L'istinto umanissimo
148Che spiega i dolfini,
La dose narcotica
Che gh'è nel tabaco,
La forza dei talari,
152Le scarpe col taco,
La tombola classica
Che à fato Fetonte,
La barca de larese
156Che voga Caronte,
Le quatro cariatidi
Che tien suso i poli,
La pasta che i dopara
160Per far i pandoli,
El moto che 'l pendolo
Ghe dà a l'orologio,
La massa calorica
164De l'aqua de bogio,
L'istinto de l'aquila
E quel de l'aloco,
La strage de omeni
168Che sa da marzoco,
El chiaro del fosforo,
La casta Susana,
I strati de l'iride,
172La sposa persiana,
Le grue che per aria
Trasporta Bertoldo,
Le smanie grandissime
176De chi no ga un soldo,
El globo areostatico
Da Esopo molà,
La morte d'Iturbido,
180La tomba d'Arquà,
I guanti de Paride,
Le scarpe de Sara,
La barba de Nestore,
184El pimpirimpara,
Le fiube d'Ipocrate,
I pani de spagna,
I siti reconditi
188Che ga la magagna,
L'ombrela de Atila,
Le braghe de Anchise,
E l'elmo a mocheghela
192Che usava Cambise,
El busto de Andromaca,
I ochiai de Rebeca,
El vero sinonimo
196Del salameleca,
El tempio de Osiride,
El nodo gordian,
El zogo de momola,
200El toco furlan,
La conca de Venere,
El brio de le muse,
La causa che circola
204Le svanziche sbuse;
Infati per meterme
Con qualche costruto
Studià go istancabile
208Un poco de tuto,
E po ritirandome
Nel mio camerin
Coi libri astronomici,
212Con quei del destin,
Con square, triangoli,
E circoli a sguazzo,
Sciolgendo co l'algebra
216I tochi de giazzo,
Cercando la regola
Del colpo de man,
Contando le fregole
220De un forno de pan,
Facendo l'analisi
D'ogni elemento,
Spiegando i miracoli
224D'un saco d'arzento,
Zirando la bussola,
Studiando la sfera,
E i spazi longhissimi
228Fra el cielo e la tera,
Vardando el barometro
Che go tacà a un chiodo,
In vesta da camara
232A stomego vodo,
A furia de calcoli
Me so assicurà
Che l'ano bonissimo
236Pertuto sarà:
L'inverno curtissimo,
El fredo discreto,
Sarà el cielo placido
240Più del consueto,
Sarà note lucide,
Sarà i zorni chiari,
Sarà squasi inutili
244Gabani e tabari;
Riposo perpetuo
A tute le ombrele,
Vacanza economica
248A mage e fanele,
Starà lontanissimi
In tanta malora
Calighi da perderse,
252La neve e la bora,
E tuti quei diamberni
Che pol su la tera
Mandar co ghe comoda
256Natura severa.
Graziosa, belissima
Sarà primavera,
El dì sempre tepida,
260Frescheta la sera,
Vestia dei so bocoli,
De gigli, de rose,
De viole e naroncoli,
264De erbete odorose,
Sui campi mostrandone
In crescer i grani,
E tuto che vegeta
268Sui coli e sui piani,
Segnando oltre 'l solito
Grossissime e bele
Le ue su le pergole
272E su le tirele,
E cargo ogni albero
De foge, de fiori
De tute le spezie,
276De tuti i colori;
Gran bisi, gran sparesi,
Salate, articiochi,
Un'aria balsamica
280E senza sirochi,
Che mete un elastico
Da far che magnè
De un gusto incredibile
284Insin che ghe n'è.
Fecondo de zefiri
Prevedo sarà,
E assae poco incomodo,
288Sto ano l'istà;
No caldi insofribili
Da far che suè
Se anca despogi
292Un pie no movè,
No venti, no turbini,
Nè un gran de tempesta
Che i campi, che i albori,
296Consola da festa,
No ghe sarà pulesi
Nè gnanca mossati,
Che 'l sangue ve supega
300Crudeli, spietati,
Che sora dei omeni
Disposti a la quiete
I cala zo a nuvole
304I gua le lanzete,
E apena fa vederse
In cielo le stele
A furia de musica
308Ve sbusa la pele,
Inseti vilissimi
Che 'l zorno stà quieti,
Ma che fra le tenebre
312I ze maledeti,
Oseli carnivori
Mandai su sta tera
Da casa del diavolo
316Per farne la guera,
E in ore più incomode
Co fiera insistenza
Sfidar istancabili
320L'umana pazienza;
No ghe sarà rusole
A far tavaroni,
No mosche, formigole,
324No ragni e scarpioni,
Ma carghi, carghissimi
Pertuto i fruteri
De fighi, de perseghi,
328De pomi, de peri,
Gran framboe, gran fragole,
Sariese a milioni,
Assae baracocoli,
332Angurie e meloni,
Suchete, nasperseghi,
Verdazzi, armelini,
Diluvio de amoli,
336A burchi i susini,
Emporio de zizole,
E a sguazzo pertuto,
Gustoso, sanissimo
340Qualunque sia fruto.
L'autuno po capita
Col viso ridente
A torne el fastidio
344D'un caldo insolente,
Vestio dei so pampani,
Alegro, bacante,
De grani richissimo
348De tuto abondante;
Ze piene le caneve
De vini i più boni,
E zoso precipita
352Castagne e maroni,
I brocoli, i caurli,
Le rave, le verze,
Le gambe de seleno
356I broli coverze;
La note chiarissima,
El zorno un zogelo,
De raro le nuvole
360Ne mascara el cielo.
E l'ano po in genere
Sarà dei più bei,
Gran pesce, salvadego,
364Gran strage de osei,
Gran oche, gran anare,
Dindioti, caponi,
Colombi un esercito,
368Polastri a milioni,
Imensa faragine
De manzi, e vedei
De porchi, de piegore,
372De bechi, de agnei,
E formarà epoca
La vera cucagna
De tuti quei generi
376Che dà la campagna.
Imprese che prospera,
Lucrosi contrati,
Aquisti de stabili
380A prezzi desfati,
Scoperte utilissime
De ogni tenor
Insina sul metodo
384Per far ben l'amor.
Comercio vivissimo,
Gran talari in moto,
Brentana de svanziche,
388Gran vincite al loto;
No ghe sarà poveri
Che viva fra i stenti,
Sarà tuti comodi
392E tuti contenti,
Sarà l'uman genere
Esente da mali,
Ozioso ogni medico
396E vodi i ospeali,
Clemente benefica
Sarà la natura,
Nè 'l colera morbus
400Farà più paura.