Pieroto
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← L'imbrogion | Edission e fonte ▼ | L'ingenuo → |
Pieroto Pampanin,
Che a Monastier
Fava el sanser
Da vin,
5Ghe premeva mandarghene a Bastian,
Da lu poco lontan,
Do sechi ma de quelo
Che se sol dir se tagia col cortelo,
Campion d'una partia
10Che 'l voleva dar via.
El campion gera belo e preparà
In t'un picolo arnaso messo drento,
E sora de un careto caricà;
Ma sicome al mumento
15Ghe mancava a Pieroto
Un aseno o un cavalo
Da poder tacar soto,
Cossa falo?
Core da so compare Tita Pegno,
20Che un aseno gaveva,
Disendoghe — qua vegno
Perchè se no ve greva
Ve prego che me fè
Una grazia distinta, un gran favor —
25E Pegno — dove posso comandè,
Mi ve servo de cuor,
Saria ben bela
Co quela parentela
Che gavemo,
30E dopo tanto che se conoscemo —
Alora Pampanin:
— Dovendo qua vicin
Mandar un caratelo,
Che pol tegnir un terzo de mastelo,
35Vorave se podessi,
Che l'aseno compare me imprestessi;
Za più de circa un'ora
No stago via dasseno,
Anzi al conto che fasso manco ancora,
40E subito che torno ve lo meno. —
Pegno mo che per l'aseno sentiva
Un afeto deciso, una premura
Stravagante cussì che lo tegniva
Come se pol tegnir la so creatura,
45Un parente, un amigo, una morosa,
Tantochè so muger gera gelosa,
Ghe dise — me despiase in verità,
Ma l'aseno compare geri sera
A un sanser da cavai ghe l'ò imprestà,
50Che andava a far negozi su la fiera,
Nè, da quanto me par de aver sentio,
Prima de doman l'altro el torna indrio. —
No capisso dasseno come mai
De un aseno compare sia in bisogno
55Uno che marcantizza de cavai,
Questo me par decisamente un sogno,
E se no fussi vu lo credaria
Un pretesto deciso, una busia.—
No posso darve torto, si ze vero,
60La circostanza ga del singolar,
E che soto ghe fusse del mistero
Podarave qualunque sospetar,
Ma pur compare l'è cussì credeme,
Per quel san zuane ch'emo fato insieme.
65Intanto che sto dialogo nasceva,
E che senz'altre repliche a rammenti
Pampanin da bon omo riteneva
Sinceri del compare i zuramenti,
Con una potentissima ragiada
70L'aseno in stala fa la so asenada.
Alora e co rason
Pieroto dise a Pegno: — sè un bufon,
Che l'aseno ze via me protestè,
E in stala lo gavè;
75No lo podè negar,
No podè dir de no,
L'ò sentio mi a ragiar
Adesso i o —
Ma no se perde Pegno,
80E fando finta che lo mova a sdegno
L'insolente rimbroto
Del compare Pieroto
El salta su: — anca si,
Che ghe credè più a l'aseno che a mi.
85Pampanin per quel che ò inteso
Da sto lagno soprafato,
Al mumento aver ofeso
El compare crede in fato,
E confuso estremamente
90Volta via senza dir gnente.
Con una spiritosa cavatina
Spesso quel che ga torto la indovina.