Ohimè! cuor mio, me son pur partì via

by Maffio Venier

3 Ohimè! cuor mio, me son pur partì via (Sonetto XXI) Canzoni e sonetti Sonetto XX. Madonna, alla natura che vu havé Sonetto XXII. El retratto e la impresa è bona e bella Maffio Venier XVI

soneti

Maffio Venier ―  Canzoni e sonetti

Ohimè! cuor mio, me son pur partì via (Sonetto XXI)

XVI secolo

Edission original:	Maffio Venier. Canzoni e sonetti. A cura di Attilio Carminati, Manlio Cortelazzo, Tiziana Agostini Nordio Venezia, Corbo e Fiore, 1993
Fonte:	http://www.bibliotecaitaliana.it/testo/bibit001236

←  Sonetto XX. Madonna, alla natura che vu havé

Edission e fonte ▼

Sonetto XXII. El retratto e la impresa è bona e bella  →

Ohimè! cuor mio, me son pur partì via,
Anzi, son pi che mai restà con vu,
E se no me ho partìo, vu sè vegnù,
O mi son là, se no ve sè partìa.

Ho pur quel viso in te la fantasia,
Mo che in la fantasia! Ghe ho i occhi sù,
Son seguro ch'el vedo e che l'è lu,
Che adunca l'occhio me assassinerìa!

Misero, che son pur assassinà,
E l'è pur vero che me son partìo,
L'è pur pi vero che vu sè restà.

Gramo in che son vegnù del fatto mio,
Resto al fin co un senso descordà,
Co 'l cervello a strapè, co 'l cuor spartìo.
Orsù dunca, ben mio,
Za che no sè con mi, né mi con vu,
Tornerò là dove sè restà vu.