Mattinata a Cate

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
Mattinata a Cate
1573

 Edission original:   

Poeti antichi del dialetto veneziano, Volume I: Poesie di diversi autori antichi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817

 Fonte:

Indice:Poeti antichi del dialetto veneziano 1.djvu

←  A Cupido Edission e fonte ▼ Lettera di Nico Calafato dalla Prigione a sua Moglie  →
[p. 90 modifica]
MATTINATA A CATE


1Mi no vorave za se mi podesse
     Istizzarme con ti, Cate sorela,
     Perchè ti sa' ben tì, che me recresse
     Co Donete par toe zogar de mela;
     Ma daspuo che le berte xe sì spesse,
     L'è forza che mì rompa la favela,
     L'è forza, a fede, che zuoga de tonfo
     Aciò ti veda che mi no son un zonfo.

2Mi ghe n'ò soportae pì de cinquanta
     Per no vegnir a le brute del saco,
     E ò ingiotìo quela del quaranta
     Quando ti xe andà via con quel Bubaco;
     No ò dito gnente quando che con tanta
     Descortesìa ti m'à impegnà el mio zaco;
     Ò soportà quela d'esser bastonao
     Per amor too da un bulo strupiao.

[p. 91 modifica]


3Mi ò ingiotìo per ti pì strangoioni
     (Povero mi) che no ò caveli in cao;
     Perfina ti m'à dà dei mustazzoni,
     Che gnanca Orlando m'averìa tocao!
     Pota de mi! quanti buli, e dei boni,
     Quanti che fa i bravazzi infin in cao
     Me cede, e sì se tira da una banda!
     E ti, fia, ti me tonfi? ah la xe granda.

4Mo adesso me son messo in fantasia
     De no voler più esser strapazzao,
     Sia chi se vogia, al sangue de culìa,
     Che tuti se varda quando so' istizzao;
     E ti, Cate, compissi sta lissìa,
     Lassa che el mio burichio sia sugao,
     O te vegno a cazzar tal pie in la panza
     Che ghe anderà per tasta una naranza.

5Una bruta sgualdrina mal nassua,
     Una ladra da gali, una falìa,
     Che per do' scalognete e un graspo d'ua
     Agiuta le vesine a far lissìa,
     E a forza de sparagno xe cressua
     In t'un poco de grama massarìa,
     Con el so grandisar fora del caso
     Me fa bramar quatro carezze, un baso?

[p. 92 modifica]


6No star co mì su zonti e su novele,
     Che zioghi al tristo a darme a mi la bagia;
     Che te cognosso infin in le buele
     E de quel che ti xe so fin 'na pagia.
     Va, va a zogar sti ponti da cilele
     Con chi no sa che ti sia de sta tagia,
     O altrimenti i basi e le carezze
     Poderàve voltarse in gran straniezze.

7Co' la me monta son un mal bigato;
     Grami po' in quela volta chi se cata!
     Oh se sa pur quante che ghe n'ò fato!
     Però, mia Cate, no essere sì mata,
     Che a un mio par, a un omo cussì fato
     Ti vogia mostrarte de sì mala schiata;
     Falo per el to megio, e se per sorte
     Ti nol fara, ti sarà grama a morte.

8No te fondar col dir: Sia lode a Dio
     E son rica, e son bela, anema mia;
     Perchè un cervel gagiardo co' xe 'l mio
     Pol farte in oto dì grama e falìa.
     Se vorò, chi sarà che per sto rio
     Osa passar che 'l no abia una ferìa?
     Oh se me salterà la moscarola
     Te lassarò co una farseta sola.

[p. 93 modifica]


9Dì che i to' buli mo me vegna atorno
     Dì che i zitissa gnanca, o mariòla;
     Che ghe ne strupiarò do' para al zorno
     E i te vegnirà a casa su una tola.
     No ghe sarà un can in quel contorno
     Che osa gnanca dirme una parola,
     E a ti, che ti no meriti ferìe,
     Tut'el to' anderà in sbiaca e in dialtìe.

10Za tempo el fato to' gera un piaser,
     Ti gerì tuta dolce e molesina,
     Mo adesso che ti à casa in soler,
     E che ti à do' majoliche in cusina,
     E che ti fa comandar al forner,
     Te par esser deventada una rezina?
     Mo ste tante grandezze; a la fè, fìa,
     Le chiama l'Ospeal da mile mìa.

11Oh Cate, Cate, temo inanzi Avril
     (Che te la meto longa la novela)
     De vederte s'un ponte co un bacil,
     Stropà co una capa da donzela,
     Bater i denti, e filar fil sotil
     Con quatro bronze in t'una pignatela;
     E soto vose; grama e povereta,
     Dir: Signori, donème una gazeta.

[p. 94 modifica]


12O veramente cussì, co' se suol,
     Te vedarò anca ti grama, meschina;
     Ai Perdoni destesa su un storuol
     Aver per cavazzal una fassina,
     Con mile boletini onde te duol,
     E criar: Socorè sta poverina,
     Con un vechio che te racomanda
     Che dirà ai puti: Fève da una banda.

13Se san Giopo, per bona fortuna,
     No te volesse po' acetar in Scuola,
     Ne l'inverno te vederò a la bruna
     Andar a comprar ogio, o mariola;
     A trazer acqua al lume de la Luna;
     A lavar drapi per meza ceola,
     A far servizi a tuta una contrà
     Per un mezo squeloto de panà;

14Tuti i tochi, le croste e le caìe
     Ch'avanzerà in t'i armeri dei vesini
     Ti magnerà co' se i fusse trazìe.
     Questi sarà, mariola, i colombini,
     Queste, vaca, sarà le golarìe,
     Le to' confezion de moscardini;
     E i fondaghi po' dei caratei
     Te parerà perfeti moscatei.

[p. 95 modifica]


15A vederte vestìa sarà un gran spasso,
     Ti gaverà una calza, e l'altra no,
     Con do' zocoli vechi, un alto, un basso,
     E una camisa comprà da Buzò.
     Ti gaverà po' in dosso un soto-casso
     Con pì taconi che no à peli un bo,
     E in pe' de la to scufia da festa
     Una verza te covrirà la testa.

16I puti te dirà: Bruta slodrona,
     E tuto ti farà per un sesin.
     Quanti xe in la Mocina, e in la Liona,
     Tuti te spazzarà per un quatrin,
     E cussì, solenissima poltrona,
     Spero vederte a fare un malo fin
     A onor e gloria de quante p...
     Se pensa con arlassi a far sotane.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Mattinata_a_Cate&oldid=49623"