Lettera a Madonna (Questa è la quarta Letera che scrivo)
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
Questa è la quarta Letera che scrivo
Despuò che son sortìo da la Laguna,
Nè so se infermo o san, se morto o vivo;
E vu, freda e crudel più de la Luna,
No respendè a le mie, no tegnì conto,
Ma fe ziogo del tempo e de fortuna.
Gavè rason, me cognossè ben onto
Del vostro amor, e se' resolta forsi
De volerme sta volta far el conto.
Pazienza! la stà a vu; certo che i orsi
Averìa del mio mal misericordia,
Nè vorià morsegarme i cani Corsi.
No son, come credè, forsi a Concordia,
Ma in la bela Cità deta Vicenza
Dove no gh'è altro mal che la discordia;
Mi son senza danari e pase, e senza
Chi vogia aver pensier del mio gran mal.
Senza vin in la bote e pan in crenza.
Certo sta megio quei del'Ospeal,
Che almanco ghe va el miedego ogni zorno
A vardarghe in la sechia e l'orinal.
E mi, lontan dal vostro viso adorno;
No trovo chi remedia a tanto ardor!
Paro a ponto la cenere del forno.
El mio mal xe ficà drento del cuor,
Nè 'l poi conosser altri mai che vu,
Causa eficiente del so gran brasur!
Oh Dio, no xe, no sarà mai, no fu
Tanto mal co xe 'l mio, nè altra belezza
Che vaga co la vostra tanto in su;
Sicome no ghe xe tanta fierezsa
In quante tigre manda l'Oriente,
Nè in altro, co xe in mi, tanta fermezza.
Quando che me trovava esserve arente
Pareva pur che avessi compassion,
E che tegnissi conto de la zente;
Adesso che ve prego in zenochion
Che me mandè do righe a destuar
El fogo che me brustola el polmone
Vu fe' la gonza, e si ve fe' pregar,
Fe' vista no aver rechie e non intender
De un meschìn confinà l'alto criar!
Ma chi no à bezzi no ghe ne pol spender,
E chi no sa che cossa è cortesia:
No la sa usar e no la sa comprender.
Ghe ne xe de sta vostra fantasia
De l'altre, e se le à refudà un par mio
Par un vilan le s'à po' trato via.
Vardè, che se sol dir che no è finio
El zorno se no a sera; e i nostri fati
No se dise sul viso, ma da drio.
Vien notai da sto mondo i nostri ati,
E co pensemo d'esser Salomoni
E d'aver fato sempre dei bei trati,
Restèmo svergognai come minchioni,
Che quel che se pensava esser coverte
Lo sa po' fin i coghi e i sbrodegoni.
Ma vòi lassar da parte sto concerto,
Che no vorave che 'l me discordasse
Tolendome el seguro per l'incerto.
Me voleu a un, lidissime ganasse?
De la Dea che me priega e che me sgrafa
Chi gh'è che a quel color no s'inganasse?
Chi poderàve star in sela o in stafa,
Tegnir i pie ai colpi de quei echi?
No se resisterìa su una zirafa!
Mi casco sempre, e se ghe n'è de tochi
Dai colpi de quei ochi i è cussì ofesi
Che no i pol caminar se no in zenochi.
Ochi cari, amorosi, ò per vu spesi
Tanti passi al mio tempo e trato via,
Per contentarve, setimane e mesi!
Che se bon per disgrazia mo son, via
No doveressi tiorme a mi i favori
Donando ai altri quel ch'è parte mia;
Soporterò, lagrimeró i me' amori,
E canterò la mia disaventura
Fin che vorà che pianga i me' mazori.
Ma se sta ingrata, se sta sorte dura
Se mua mai de camisa, oh fazzo viso
Che se possa chiamar bona ventura!
Me vedarè sborìr a l'improviso
Dal liogo dove son sta bandizà
Contra giustizia, e con ben poco aviso;
E d'un Tartaro o un Turco più istizzà
Farò veder al mondo che anca mi
Ò al naso la mostarda e in panza el fià;
E a quei che adesso ride farò sì
Che 'l ghe corerà zoso per la gola,
Che 'l no ghe tornerà suso mai pì.
Ma perchè ancora me retrovo a scuola
D'Amor, no vòi bravar, ma in penitenza
Tior ogni desfavor, ogni parola,
Perchè se aquista assae co la pazienza.