Lettera a Madonna (Amor sia ringrazià)
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
Amor sia ringrazià! Magno i me' pasti,
Dormo dies'ore avanti che me volta,
Nè teme i me' riposi altri contrasti.
Credo, Signora, che caghè talvolta,
Che inanzi nol podea darmel da intender,
Aldo chi parla, e parlo a chi me ascolta,
Se ò da far qualche ben ghe posso atender,
Le gambe no me porta ove xe l'uso,
Nè go più da istizzarme o da contender,
Nè credo a mile ingani, a mile scuse;
Co se diè rider no me vien l'umor,
No xe messe a coroto le mie Muse.
Posso far a mio modo del mio cuor,
Nè cerco tossegar più i me' rivali,
E a mala pena ve son servidor.
No fazzo più discorsi su i segnali,
Ne fazzo più comenti sora i sguardi,
Nè noto le mie pene e i vostri fali.
No me despero se ve vedo tardi,
E se no ve vedesse nè anca mai
No vorìa insanguinar saete e dardi.
No vago solo in lioghi retirai,
No son soto la mistra che me daga
O qualche sparaman o dei cavai.
Qualch'altra Dona adesso me par vaga,
Che inanzi ognuna me parea una piaola;
Ò averti i ochi e ò sera la piaga;
E no me levo, co' fava, da taola
Per trar un piato a un gramo cagnoleto,
Nè coro drio a la gata co la sgnaola.
I vostri cefi no me fa despeto,
No me invaghisso a celebrarve più,
No me sento a morir col star secreto.
Do bone zanze no me tira su,
Un bruto viso no me fa meschin,
Stago col mio cervelo e no con vu.
Co bevo no sospiro po' in tel vin,
Co parlo vardo in viso i Cristiani,
Nè tremo tuto co' ve son vicin.
No tegno più botoni d'ambracani,
No cerco più d'aver vostri colori,
No porto insegne più de pensier vani;
Ne son più fra speranze e fra timori,
Ne gò fede de azzal, sdegni de vero,
Nè son rabioso in Cà coi servidori.
Ò adesso, quel che bramo e quel che spero,
Ne me va el desiderio in infinito,
Nè me dà pì martel Polo che Piero.
Me cavo adesso mi qualche apetito,
Fazzo sì che sto corpo à el so' dover,
Nè lezo mile volte un vostro Scrito.
In soma mi no provo un dispiacer,
E dei solazzi me ne dago tanti
Che m'avanza la carne sul tagier.
Musa sorela, ò dito tropo inanti,
Dio vogia che no menta per la gola,
Che sto bravar no se resolva in pianti,
E che me sia un pugnal ogni parola!