Le smanie de Nineta in morte de Lesbin (1822)
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
PER LA MORTE
DE LESBIN.
Lesbin, Lesbin, te, te,
Caro! vien qua da mi, vien qua, Lesbin...
Mo via, Lesbin... oimè!
Cossa che gabbia ancuo sto bestiolin?
5No l'ò visto mai più cussì svogià...
Voleu veder?... senz'altro el xe amalà.
E come, le mie vissere!
Vardè se 'l cuor ghe palpita,
Se i so lavreti tremola...
10Che ochieto turbio, e languido...
Che pelo dreto e ruvido...
Che convulsion... che spasemo!
Oe, Checo... Toni... Giacomo...
Gran servitori perfidi!
15Seu tuti a ca del diamberne...
Mo via, malegnazzissimo!
Destrighite, sassin!
Va là, cori dal Medico.
Dighe che 'l vegna subito,
20Chè xe amalà Lesbin.
In tanto ti, Catina,
Sbati quel stramazzeto
Per farghe el so cuzzeto,
E dopo va in cusina,
25E scanighe un capon;
Ma varda che 'l sia bon,
Da farghe del restoro;
Te pago un cordon d'oro,
Se 'l mio Lesbin no mor...
30— Mo bravo, ma da seno, el mio Dotor!
Dotor mio, la gran disgrazia!
S'à amalà el mio cagnoleto,
E pur tropo me l'aspeto,
Che sta volta el morirà...
35Feghe pur quel, che ve comoda,
Ordineghe a larga ciera;
Ma nol dura fin sta sera...
Nò, credèmelo, Dotor...
Mo che mana?... che riobarbaro?...
40Che gialapa, mo che sena?
Droghe tute, che velena,
Che Lesbin no le pol tor...
Cossa xe mo sto clistier?
Voleu dir un servizial?...
45Me faressi vegnir mal
Co sti termini da catedra!
Olà, Toni dal Spizier
Chè 'l te daga sto decoto...
Via, camina, xestu zoto?
50Cate, portime el schizzeto...
Gran marmota! el picoleto...
Quelo, quelo, bruto sesto!
Ma, protesto, la gran tosse!
El gran mal che 'l ga in tel peto!
55Povereto...
Povereto
Lesbineto...
Vita mia, le gran angosse!
Malegnazzo Spizier! quanto mai stalo
60A far quel pochetin de decozion?
Checo; cori, va là, movite, palo!
Dighe che 'l se destriga quel poltron.
Zito, che Toni è quà...
Presto, per carità!
65Catina, el servizial:
Dotor, no ghe fè mal,
Metèghene pocheto,
Metèghelo adasieto...
Stà quieto, vita mia,
70Che 'l mal te andarà via...
Mo bravo! me contento,
Dotor vu sè un portento!
Co presto! co pulito!
Chi l'averia mai dito?
75Oh, povera bestiola!
Senz'altro el mal ghe mola...
Nol vedo più a missiarse,
Nol sento più a lagnarse;
Voi darghe giusto un baso...
80Perdia!... ghe saria caso!
Oh, dio! che bruti sesti!
Catina, Toni, presti.
Mo via, agiutèlo, oh dio!
Dotor, per carità!
85Caro Lesbin, cuor mio,
Caro mio dolce amor...
Ah! che no ghè più tempo,
El mio Lesbin xe morto..
L'è morto... sì, l'è morto,
90L'è morto, sì, Dotor.
Ah, sorte crudelissima!
Che colpo xe mai questo!
Catina, Toni, presto,
Presto chè me vien mal...
95Cossa... cossa.... cossa feu!
Dove, dove lo porteu?
Lo voi qua,
Lo voi qua...
Olà, puti, abiè giudizio,
100Chè ancuo nasse un precipizio...
Ah! Lesbin, Lesbin, Lesbin...
Ah! Dotor, Dotor sassin!....
Che prudenza?... che rason?...
Che quietarme? come mai?
105Ah! lassè che sto balcon
Daga fin a tanti guai...
Via, molè...
Via, molè...
Via, molème... via, lassè...
110Via, molème, maledeto!
Bogiacan del mio cagneto!
Signor sì, l'ave copà...
Ah scuseme...
Perdoneme...
115Compatime, per pietà!
No son mi,
No son mi,
Stè certissimo, Dotor,
No son mi, xe 'l mio dolor,
120Che me fa parlar cussì...
Ah, sorte crudelissima!
Che colpo xe mai questo!
Catina, Toni, presto,
Presto che me vien mal...
125Tegnì, tegnime, oh dio!
Tegnì, tegnì, Dotor:
Lesbin, Lesbin, cuor mio,
Mio dol... mio dol..ce amor.