Lamento del Co. Tomboletta
|
Edission original: |
Pietro Buratti, Poesie e satire di Pietro Buratti veneziano, corredato di note preliminari ed annotazioni scritte dallo stesso autore, Amsterdam, J. Loocke, e figlio, 1823 |
|
Fonte: |
| ← Lettera alla Marietta | Edission e fonte ▼ | Sonetto per la Contessa Scotti → |
Qui il Poeta assume di trattare nel maggiore dettaglio la Storia Comica degli amori del Conte Gerardini di Lendenara con Marietta, storia che risulta già chiara abbastanza per dispensarsi dal premettere certe dilucidazioni sul proposito. Dietro la prima voce che il Conte, partito da Venezia durante l'ultimo blocco era stato preso dagli inglesi il Poeta per dar maggior risalto al quadro, finge che sia stato lasciato alla ventura sopra una spiaggia deserta, e solo in questa parte si permette di alterare la storia delle sue romanzesche disavventure. Come poi si avverrò tutto il contrario, cioè che la generosità inglese, dopo aver lasciata la Barca in libertà fornì il Padrone del Pielego di una commendatizia per il commandante ammiraglio di Trieste, e che il Conte fu scortato fino a Padova, così il Poeta per correggere l'arbitrio finge il miracolo della Balena che lo salva dalla morte come un nuovo Giona, e dopo averlo tenuto in pancia per tre giorni lo vomita in queste vicinanze.
Il Conte nel momento che si trova spogliato dagli Inglesi nel suo passaggio da Venezia a Trieste, e abbandonato sopra una spiaggia deserta, così prorompe vaneggiando con la sua Marietta, che spesso lo piantava solo in letto nel crudo inverno per dialogare furtivamente alla finestra con un certo Grazioli suo amante secreto.
Cossa rompistu i cogioni?
Vostu vederme crepà?
Sera porca quei balconi
Che son tuto indolentià.
Co sta note, co sto vento
(Xestu gnanca una Putana?)
Ti me aversi a tradimento
El balcon de tramontana.
Ti me lassi solo in leto
Per parlar col to Grazioli
Ti me esponi a un mal de peto
Per la vogia de far noli?
Dona infame senza cuor
Sto bel calcolo ti fa
Del to Conte protetor
Del so cazzo titolà?
Per la Vergine Maria
In che Mondo songio mai? 1
Songio in Africa, in Turchia
Nel Giapon nel Paraguai?
Solo quà come un cogion
In sta spiagia abandonada?
Xelo un sogno? una vision?
Xela un isola incantada?
Songio mato da ligar?
Goi la freve, o xelo vin?
In camisa? in riva al mar?
Songio el Conte o Trufaldin?
Ah pur tropo che son mi
Da quei cani sassinà...
Povereto el mio Pipì 2
Xestu gnanca imbovolà?
Cori presto, Marietina
Meti in opera, tesoro,
Quela caro to manina
Che me costa un pozzo d'oro!
Fame veder quela coca
Che stilava miel per mi
Co barbuzzo, naso e boca
Doperava note e dì.
Via de quà carogna infame! 3
Songio gnanca un visolecazzo
Mezzo morto da la fame
Sogno ancora mona e cazzo?
Sogno un'empia da cartelo
Che in compenso del mio amor
Minacciava sul più belo
De voler cavarme el cuor?
Che per far de mi ridicolo
Me chiamava Botesela
Sgionfo, Tombola, testicolo
Trufaldin, Purichinela? 4
Godi pur del to trionfo
Daghe ai cani la to mona,
Su sta spiagia el Conte sgionfo
Mor da fredo e te abandona.
A scontar i so pecai
L'anderà forsi a l'inferno,
Ma in confronto dei so guai
Cà del Diavolo xè un terno.
Pezo furia de culia
Belzebù certo no gà,
Dal gran mal de gelosia
Sarò almanco liberà.
Carlo mio no far el porco
Degna sia de ti la morte,
Una favola xè l'orco
Crepa Carlo ma da forte!
La contea xè andada in cenere
La xè tuta ipotecada,
Senza bezzi e senza Venere
Xè sta vita una monada.
Ma crepar per una vaca
Che gà intanto el so sicuro 5
Che pol dar la mona a maca
Viva Dio l'è un osso duro!
Cossa gerele po infondo
Le atrative del quel Tomo?
Xè ben vero che a sto mondo
Sempre al pezo tende l'omo.
Bruto muso, tete fiape 6
Dal bordelo rovinae
Negra, scarma, bone chiape
Basse tropo e mal piantae;
Corpo snelo, modi scaltri
Zuca voda, mentidora,
Per mi freda e per i altri
Calda sempre e sboradora.
Ma per altro Dona tal
Che nel posto ne la tatica
No se pol trovar l'egual
No ghe xè più brava pratica. 7
Oh memorie benedete
Co scaldà d'amor per ela
Me godeva un per de orete
Co do taleri in scarsela!
Per dar vita al mio Quajoto
Baloner sessuagenario
Stravaganze! un scopeloto
Gera prima necessario.
Del so posto da le scale
Come un fulmine calando
La doveva in qualche cale
Aspetarme caminando:
E co gera el bel momento
Su sto muso da polpeta
Consegnarme a tradimento
Una schiafa maledeta. 8
Pò scampar per frezeria
Menar ben le so culate,
Che mi intanto da drio via
Quachio quachio, come un frate,
Contemplando l'eloquenza
Del quel caro ondulamento
La mia poca de semenza
Me sentiva in movimento,
E l'oselo ingritolio
Da le ingiurie de l'età
(Gran fenomeni per Dio!)
Gera in bota ravivà.
De quei taciti misteri
Sò che noto xè el secreto
Che veniva i putanieri
A spiarme dal buseto.
Che i m'à visto abandonarme
Ai trasporti del mio cuor,
Co la boca sbabazzarme
Su la porta de l'amor.
Zupegar fora de mi
I cavieli de Marieta,
Furegar el mio pipì
Su la cara so sfeseta.
Per el leto come un mato
Menar culo, menar zuca
In quel estasi beato
Perder spesso la peruca.
E passando più d'un'ora
In ste varie operazion
Mezzo morto mandar fora
Qualche bava sul balon
Ma sior sì: per far el mona
Me venudo el bel pensier
De levar sta buzzerona
Da l'infamia del mestier.
La m'à parso un anzoleto
Una dona de bon fondo
Deventava a so dispeto
Mercanzia de tuto el mondo.
La m'à pianto, la m'à dito
El mio cuor no xè da scroa,
Tolta fora de sto sito
Sarò bona, sarò toa.
M'ò comosso, gò credesto,
(L'ogio gnanca fata bela?)
I riguardi ò avudo in cesto,
O fifà d'amor per ela.
Senza bezzi in mezzo al bloco
Per condurla a casa mia
O dovesto con un stoco
Garantir la Pulizia.
Varie bozze de Cologna
Ò comprà co le mie man
Per netarla sta carogna
Da la rafa, dal pantan.
Gò dà un fisso, l'ò cambiada
Per tre volte de casin
Bona tavola, e in stagnada
O polastra, o colombin,
Che mi stesso nato conte
(Stravaganze!) contratava
E a bon ora per le sconte
Soto el brazzo ghe portava.
Ma zà vaca de abitudine
E più vaca assae de cuor
La più negra ingratitudine
Gera premio a tanto amor.
Da quel dì che mia l'ò fata
Consumando e tempo e bezzi
Oh che refoli da mata!
Che dispeti! che strambezzi!
Sempre in giro per el cazzo,
Sempre falsa e brontolona,
Sempre in boca el visdecazzo
O l'antifona del mona.
De sti amori da postribolo
Gera intanto secretario
Quel ministro del patibolo
Chiamà in corte gran sicario. 9
Che sorbiva con pazienza
Sta secada de cogioni
Benchè un posto de clemenza
Lù no gabia trà i busoni,
Che garante e soventor
Solo in mezzo a tanta zente
M'à capio per un signor
Per un bodolo solvente.
Dei carnefici nei fasti
No gh'è certo un caso egual
Semio gnanca in tempi guasti?
Un carnefice moral?
Un carnefice rufian
Per impulso de bon cuor?
Che dà bezzi e che tien man
A le smanie de l'amor?
Con trasporto vicendevole
Ela e mì da là corevimo,
L'omo probo e ragionevole
Nel carnefice trovevimo.
Lù saveva a tempo e logo
Dirme, Conte la ghe mola,
Conte caro tropo fogo,
Vaca sì, ma bona fiola.
Dona avezza a torlo drento
Xè un sempiezzo imaginar
Che la possa in un momento
El negozio dissecar.
Xè la lengua bela e bona
Caro conte ma no basta;
Ghe vol cazzo per la mona,
Cazzo duro e no de pasta.
Per dirito de chi spende
La pol ben voler creanza
Ma in scondon... zà la me intende
El ghe sbrissa sempre in panza.
Sta eloquenza me incantava,
E per opera del boja
Novi pati combinava
Per far pase co la troja.
Superior al pregiudizio
Gera tanto deventà
Che per far la corte al vizio
Lo voleva rispetà.
Pretendeva a forza d'oro
Dal so fango sublimarlo,
E col rosto del decoro
A la megio pontelarlo.
Co sto calcolo, prodoto
De la mia testa de cazzo
La putana m'ò condoto
Francamente soto el brazzo.
Prima sconto nel palcheto,
Pò davanti i m'à zà visto
Ostentar a san Beneto
De sta vergine l'acquisto.
I m'à visto in certi casi
Far dei tiri da putelo
Co custia butava basi
Per de soto del capelo.
Co in inquietà del so contegno
Ghe diseva, via in malora!
Songio un'omo, o songio un legno?
Cossa varidistu de sora?
Disonor de la contea!
Ti gà el conte, e ti distrata
Co le zizole in platea
Ti gà cuor de far la mata?
Ma no basta; per sigilo
De l'epiteto merloto
L'ò condota messa in filo
Fin nel publico ridoto.
Oh che susio! oh che cagnera!
Oh che cresema de mona!
De galanti una spaliera
M'è venuda a far corona.
Chi da drio la pizzegava
Vechio amigo del so buso,
Chi davanti se fermava
Per vardarne ben in muso.
Chi tastandola sul fianco
Ghe diseva, adio Marieta!
Chi rideva, e chi più franco
Me chiamava Tomboleta.
Ma per forza de sistema
Deventà saco da bote
Ogni sera pien de flema
Compariva a mezza note.
Fermamente persuaso
De poder co sta insistenza
Darghe credito a quel vaso
De la publica semenza.
E pò in fondo zureria
Che in tre mesi un solo zorno
No à lassà passar custia
Senza farme un qualche corno.
Corni intanto che disnava,
Corni intanto che dormiva,
Corni intanto che zirava
Per la piazza o su la riva.
Corni bassi, corni fioli
D'una testa da strambezzi,
Corni fissi co grazioli
Corni mobili per bezzi.
Corni suso, corni in leto
Da capricio, e da mestier
Corni fin co Barbareto
Stomegoso putanier.
Corni in casa, corni in strada,
Corni in maschera la sera
Co da tuti palpagnada
La pareva una massera,
Corni tali che ò dovesto
Far un ato riflessivo
Dai gran corni roto el cesto
E ridoto un corno vivo.
Ò finio de far l'aloco
Anderò (gò dito un dì)
A dispeto de sto bloco
Anderò lontan da tì. 10
Fermo son nel mio progeto,
Non gh'è logo a pentimento,
Dal paron l'aviso aspeto.
Cò in favor se cambia el vento,
Per no veder la mia peste
Coragioso vado in mar
(Eco el nolo per Trieste!) 11
Le buele a gomitar.
» Bravo el conte, bravo el coca
» Và pur là che mi te mando
E col cuor e co la boca
(La m'à dito de rimando)
» Crederessistu cogion
» Che me vogia desperar
» Per un vechio polpeton
» Che và a farse buzerar?
» Schiavitù no vol Marieta,
„ La xè nata buzzerona,
„ Se no lica Tomboleta
Gh'è chi fote la so mona.
Co sto tiro, su le spale
La s'à messo el scial da festa
Ripetendo su le scale
„ Và pur là coi corni in testa!„
Da sto fulmine colpìo
Me venudo un gropo in gola,
Le mie buzare ò capio,
Son restà senza parola.
Agità da mile afeti
No l'ò vista per dei zorni,
Ma ò savesto i so dispeti
Le sò fufigne, i so corni.
Ò savesto che Vergada 12
Mio secondo secretario
S'à pagà co una chiavada
In mancanza de salario.
Che a la publica lusuria
Gera esposta la mia bela
Che la zente andava in furia
Al casin de Botesela.
Che xè andada col so muso
De Grazioli la mugier
A toparlo sora el buso
De sta vaca da mestier, 13
Che spandeva la semenza
Un poeta criticon
Per satirica insolenza
Fresco zà da la preson, 14
(Gran nemigo de chi lica,
Visità da mi la sera,
Che non tase se i lo impica, 15
Che farà de mi cagnera.
La veniva mascherada
A trovarme da Florian
Co i morosi incantonada
Che gaveva el culo in man.
Vestìa d'omo in badinè
Al Teatro de scampon
La me urtava col bombè
Messa proprio da buson, 16
Al Ridoto in dominò
La vedeva capitar
Coi galanti in comerò
Che palpava a tuto andar.
E mì intanto (stravaganza
D'una zuca senza sal!)
Stava la co la mia panza
Trufaldin da carneval. 17
Finalmente aspeta aspeta
El paron me chiama a bordo,
Vol venir con mi Marieta,
La gò in culo e fazzo el sordo.
Zà me par tuto contento
D'aver vinto un terno al loto,
Zà in favor me supia el vento
Zà el mio stomego xè in moto.
Destirà sora una stiora
Che ghe gera al lai de pope
Per de soto e per de sora
Se me mola zà le stope.
Sbrodegà come un pulelo
Tiro i ochi, perdo el fià,
Dai gran sforzi sul più belo
Se me rompe el papagà,
Vogio dir quela bozzeta
Che me tegno sul bimbin
Co me sbrissa la giozzeta
Anca senza far pissin. 18
Ma felice in mezzo al mal
De scampar da la putana
Vedo zà col canochial
Che Venezia xe lontana.
Che son fora de pericolo
De cascar in quele man,
De sentirme a dir testicolo
Vechio porco, vechio can. 19
Maladeta la mia sorte!
Giusto alora in quel momento
El paron ne ziga a forte
„ Semo friti, cambia el vento!
Vento infame, vento mulo!
De bestemmie vechie e nove
Tuti in coro roti el culo
Regalemo el padre Giove.
Tuti pianze la disgrazia
De dover tornar da novo
A serarse dove in grazia
Per sie soldi se gà un vovo.
Dove a chiapi xè i pitochi,
Dove manca el pan el vin,
Dove i nobili xè in tochi
Livelai col cercantin.
Dove un'ochio de la testa
Costa un fià de carne straca,
Dove apena qualche festa
Ghe xè carne ma de vaca.
Masenando sti pensieri
Zà la barca torna indrio,
Per dar gusto ai putanieri
Zà da novo son a Lio.
Meto in gondola el fagoto
Soto el felze me destiro,
Per culia gò el sangue in moto
Pianzo, palpito, sospiro.
Smonto a casa, vado a spasso
E chi trovio da Florian?
Quela porca che fà chiasso
Che me burla da lontan.
Chi me dise, ben tornato,
Sala conte divertìo?
Chi tontona, xè qua el mato
Xè quà Tombola per Dio.
In quel circolo insolente
Che dà suso a mezza note
Lavezzari presidente
Me tol via co le so bote. 20
Fato zà comun spetacolo
Son de tuti in cameron:
Fin de mi se burla Bacolo 21
Con quel muso de cogion.
Tegno duro ma per poco:
Orbo sempre amor xè stà,
Casco in trapola e da gnoco
Torno a far l'inamorà.
A licar torno in secreto
Soto l'ombra del mistero
De sta vergine el tempieto
Con un stomego de fero.
Torno a far de note zorno
Pago spie, la spia ghe fazzo,
Al casin ghe ziro intorno
No ghe abado al fredo, al giazzo.
Perdo un dì la tramontana
Ghe consegno un per de schiafi
Se rebeca la putana
La se mete suso i bafi,
Voria pur scampar in cale,
Ma un gran pugno me desnombola
Casco in tera, e da le scale
Vado zò con una tombola.
Sta lezion me mete in quiete
E da novo sento a dir
Dopo el zorno disisete
Che xè tempo de partir.
Stufo assae de far el coca
De andar via più no me lagno
Torno in barca, e chi me toca
Te sorbirme de compagno?
Caso novo ne la storia! 22
Quel bel capo de Grazioli,
Pien de fumo ― pien de boria
Rè de tuti i canapioli,
Che foteva a crepa panza
La mia bela e zorno e note,
Che no gà certa creanza
(Qualità de chi ben fote)
Ch'el discorso de Marieta
Ogni tanto stuzzegava,
Che del conte Tomboleta
Ogni tanto domandava.
Al mio titolo insensibile
El paron che gera on tomo
Per urtarme l'irascibile
Me chiamava galantomo. 23
Espression de confidenza
Che mal liga co l'idea
De la nobile ecelenza
Che gà el sangue de contea.
Fin per darme la boldona
Una serva, una donazza 24
Con un far da buzzarona
Me diseva, adio smegiaza,
Co ste pilole ai cogioni
Oh che viazo! oh che lunario!
E mì là tra quei birboni
Come Cristo sul calvario.
Mal coverto la mia pele
Da una strazza de schiavina,
Gomitando le buele
Imbilà da sta berlina.
Supia el vento, e zà a le preste
Naveghemo in mezzo al mar
Zà vedemo de Trieste
Case, e cupole spontar.
Zà ghe semo, zà smontemo
Zà sentimo a dir pur tropo
Che a un gran fiasco s'esponeno
Perchè el numero xè tropo,
Che le Pin de fondo amabile
No lo xè coi forestieri
Che per farlo inesorabile 25
Gh'è dei ordini severi.
Chi sta là come bocali
Passegiando la Peata
Chi presenta momoriali
Chi bestemia chi se grata.
E mi franco col mio muso
A le Pin dimando udienza
Trovo grazia, vado suso
Son davanti a so zelenza,
„ Co le lagrime sui ochi
(Digo a lu tuto tremante 26
Abrazandoghe i zenochi)
„ Se presenta comandante,
„ Un che nato a Lendenara
„ Con famegia e con contea
„ Prova in lù la sorte amara
„ De l'eroe de l'Odissea;
„ Un che vitima e zogatolo
„ De una porca buzzerona
„ Come el sorze nel cubatolo
„ Xè cascà ne la so mona.
„ L'è signor ma in sta penuria
„ Tuti à fato qualche stoco
„ Co sta strazza de lusuria
„ Quai se torno a Malamoco.
„ Che mi sia de sangue nobile
„ Tuti zà lo vede a muso
„ Coi compagni, fezza ignobile,
„ Mi no devo andar confuso.
„ Ne la mia parzial disgrazia
„ Comandante, vù zà entrè,
„ Da vù solo aspeto grazia,
„ E vù farmela podè.
Solevandome da tera,
(Ingropà da sta eloquenza)
Un bel nò pien de maniera
M'à risposto so Zelenza.
Co la zonta in bon francese,
Sul momento de dar logo
Per no urtarse co l'inglese
A miragio pien de fogo.
Ubidisso, lo sà Dio
Con che muso, con che luna
E me imbarco el zorno drio
Per la Veneta laguna.
Son da novo a Malamoco,
Ma sta volta fazzo el mulo
No voi più serarme in bloco,
Vogio aver Marieta in culo.
Tuti smonta, e restà solo
Dal paron me fazzo dar
Destirà sora de un colo
Pena, carta, e calamar.
„ Dai gran gomiti ridoto 27
„ La metà de quel che gera
„ Me contento de sto loto
„ Ma no vogio più cagnera.
„ Sia la sorte trista o bona
„ Che a sto Pielego ghe toca
„ Gò el coragio, Buzzerona,
„ De scordarme la to coca.
„ Ma chi nobile xè nato
„ No pol mai smentir el cuor,
„ Riconossi da sto trato
„ El caratere el Signor.
„ Stà cambial che mi te mando
„ Sul Portier Marco Picini
„ La xè tal che ti de bando
„ Ti pol dar tre mesi i nini. 28
„ Vado via col cuor in pezzi
„ Ne te posso ancora odiar
„ Vado via curà de bezzi
„ Vado a farme buzzerar.
Cussì ò scrito e da cogion
D'una calda lagremeta
Ò bagnà su la mansion
El bel nome de Mariela.
Per sigilo a sta Comedia
Ghe voleva un ato forte,
Un bel pezzo de Tragedia
Che me dasse in brazzo a morte.
La se varda dai corsari
Conte mio per carità!
Tante volte Lavezzari
Da Florian m'à replicà.
Pochi mia fora del porto
I me chiapa sti ladroni,
I me sbrega el passaporto,
E spogià fin dei bragoni
I me lassa a culo nuo
Co una fufa buzzerona
De sta spiagia sul paluo
A finirla come un mona.
Preda zà de Belzebù
Cussi à dito sto gran mato,
Ma pietoso amor de lù
Un miracolo l'à fato.
Bogie el mar, e una balena
Salta fora sul momento
Che misciando và la schena
Larga più d'un bastimento.
Su la spiagia capitada
Con bon garbo, con creanza
La ghe dà una boconada
La lo ingiote neto in panza.
Vivo el Conte per tre zorni
L'è portà de quà de là
E po salvo in sti contorni
Come Giona gomità.
- ↑ Il Conte ritorna in sè.
- ↑ Il Conte dà un'occhiata al suo membro irrigidito dal freddo.
- ↑ Il Conte ricade nelle furie di prima
- ↑ [p. 71]Sinonimi tutti dei quali regalava Marietta il protettore.
- ↑ [p. 71]Prima di partire per Trieste il Conte le aveva assegnato un sicuro per tre mesi.
- ↑ [p. 71]Ritratto vero della Marietta.
- ↑ [p. 71]Egli s'era innamorato di questa donna protestando che non aveva ritrovato la più valente nell'arte meretricia.
- ↑ [p. 71]Non è questa esagerazione fantastica, ma confidenza fatta dalla stessa Marietta al Poeta. Le stravaganze dell'umana fantasia in questo proposito sono tali da non sorprendersi di nulla.
- ↑ [p. 71]Una delle prime cariche della Corte Busonica e in allora mirabilmente coperta dal povero Polo [p. 72]Foscarini. Il medesimo in quella circostanza ha somministrato danari al Conte, e s'è più volte interposto nei disgusti amorosi con la Marietta.
- ↑ [p. 72]Dopo tante prove di fedeltà il Conte si decide di lasciarla e si procura un nolo per Trieste.
- ↑ [p. 72]Il Conte credeva con tanta fermezza di ridur Marietta alla disperazione.
- ↑ [p. 72]Il Conte Vergada di Zara che gli faceva l'amico, e se la divertiva in secreto.
- ↑ [p. 72]Scena notoria per cui la moglie di Grazioli fece un ricorso alla Polizia.
- ↑ [p. 72]Il Poeta parla di se stesso.
- ↑ [p. 72]Il Conte lo visitava di frequente durante il suo arresto in casa, e mettendolo alle maggiori confidenze ne suoi deliri con la bella, gli somministrava senza avvedersene i materiali per la satira.
- ↑ [p. 72]Scherzetto della Marietta, onde rimuovere il Conte dalla sua fermezza.
- ↑ [p. 72]Il Conte aveva la pazienza di seguirla tutta la sera al ridotto, e di sedere in mezzo per meglio esporsi al ridicolo.
- ↑ [p. 72]Disgrazie de l'età.
- ↑ [p. 72]Altre parole vezzegiative in bocca sempre della Marietta.
- ↑ [p. 72]Nel Camerone interno di Florian si raccoglie un certo numero di persone assennate, ma di qualche spirito, che se la divertivano assai col Tomboletta, e fra gli altri il faceto Lavezzari.
- ↑ [p. 72]Nome di uno dei serventi di bottega.
- ↑ [p. 72]Amante secreto della Marietta.
- ↑ [p. 72]Tomboletta fiero del suo titolo sbuffava di rabbia col Paron di barca che sostituiva il galantomo al Conte.
- ↑ [p. 72]Queste relazioni di viaggio sono genuine perchè avute poi dal Conte Vergada e registrate dal Poeta.
- ↑ [p. 72]Ammiraglio a Trieste.
- ↑ [p. 72]Parlata eloquentissima del Conte.
- ↑ [p. 72]Viglietto a Marietta.
- ↑ [p. 72]Marco Picini portiere della Municipalità fu incaricato dal Conte di pagare alla Marietta per tre mesi la somma di 400 lire Venete.