Pagina:Poesie e satire di Pietro Buratti veneziano.pdf/63

Sta pagina la xe stà trascrita, ma la gà ancora da vegner rileta.

Che spandeva la semenza
     Un poeta criticon
     Per satirica insolenza
     Fresco zà da la preson, ¹¹
(Gran nemigo de chi lica,
     Visità da mi la sera,
     Che non tase se i lo impica, ¹²
     Che farà de mi cagnera.
La veniva mascherada
     A trovarme da Florian
     Co i morosi incantonada
     Che gaveva el culo in man.
Vestìa d'omo in badinè
     Al Teatro de scampon
     La me urtava col bombè
     Messa proprio da buson, ¹³
Al Ridoto in dominò
     La vedeva capitar
     Coi galanti in comerò
     Che palpava a tuto andar.
E mì intanto (stravaganza
     D'una zuca senza sal!)
     Stava la co la mia panza
     Trufaldin da carneval. ¹⁴
Finalmente aspeta aspeta
     El paron me chiama a bordo,
     Vol venir con mi Marieta,
     La gò in culo e fazzo el sordo.
Zà me par tuto contento
     D'aver vinto un terno al loto,
     Zà in favor me supia el vento
     Zà el mio stomego xè in moto.

11