La sorpresa
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← I do stolidi | Edission e fonte ▼ | La longevità → |
Nicoleto studente de Pavia
Ghe faceva l'amor
A Carolina, che la gera fia
De un imenso signor,
5Ma essendo viceversa Nicoleto
De mezzi assae ristreto,
Anzi spiantà,
Nè avendo in conseguenza
Dal pare de la tosa la licenza,
10El gera a la crudel necessità
De farghelo in scondon,
Lu da la strada
E ela sul balcon
A note per el solito avanzada.
15La Civica de ronda diligente,
Che andando per de là
Frequentemente
Gaveva rimarcà
Quela figura,
20La ze entrada in sospeto,
E aprofitando d'una note scura
Più assae del consueto,
Tolte le so misure a la lontana
Quei prodi lo sorprende
25A bagioneta in cana,
Lo chiapa per el stomego e pretende
Che subito el ghe diga
Cossa in quel sito el fa
Ogni sera impalà
30Si no i lo liga,
Avendo a ste parole
Uno dei più zelanti le man pronte
Sora le castagnole
Che soto del gaban tegniva sconte.
35Nel scabroso frangente
Nicoleto,
Al qual ghe interessava esenzialmente
El motivo real tegnir secreto,
Aciò su la regazza
40No facesse coment!
Le lengue maldicenti
De la piazza,
Spiritoso al de là
No se confonde,
45E apena interogà
Cussì risponde:
— Sicome sta matina
Go tolto medicina,
E sicome passando per sta strada
50El corpo a l'improviso se m'à mosso,
Per no farmela adosso
L'ò molada —
E finta el fava intanto
De imbotonarse suso le braghesse,
55Per cercar che l'impianto
I ghe credesse.
A la dichiarazion de Nicoleto,
Messo in qualche sospeto
Sogiunge el caporal
60De profession spizier:
— No la se n'abia a mal,
Mi fasso el mio dover,
In dubio mi no meto
Quel che la dise ela,
65Ma con degno rispeto
La so merda de grazia indove zela? —
El studente Nicoleto
Che co ochi da falcheto
Su la strada aveva ochià
70Da lu poco distante una boazza
El ghe risponde franco — ecola là,
No la la vede? la la ga de fazza —;
Ma el bravo caporal,
Che pronto arente
75Ghe ze andà col faral,
Dopo averla da chimico valente
Col naso e co la spada
In t'un mumento
Tanto fora che drento
80Analizzada,
Ghe dise — questa qua la me perdona,
Ze una merda de manzo bela e bona —;
E Nicoleto salta suso alora,
Tirando un corpo e fora,
85— Stago a vedèr adesso
Che co tuto el progresso
No se pol
Gnanca cagar che merda che se vol. —
La strana osservazion
90De Nicoleto
Dita co un certo ton
Ga generà l'efeto
Che tanto el caporal quanto i soldai
Confusi i ze restai,
95E senza averzer boca
El tempo ga lassà che 'l se la moca.
Una risposta pronta e spiritosa,
Che afato fora sia de l'ordinario,
La ga la proprietà miracolosa
100De inzucar sul mumento l'aversario.