La longevità
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La sorpresa | Edission e fonte ▼ | El cavalo longo → |
Onestissima dona,
Ma a l'ecesso zucona,
Siora Beta
Gaveva l'uso bruto
5De meter la pezzeta
Dapertuto
Sempre senza proposito,
O per dir un sproposito
Palmar
10Da doverghe cigar,
Fandoghe basa,
Per carità la tasa,
Ela la dovaria
Parlar la note de l'epifania;
15E per darve un'idea de la so testa
Credo che bastarà de dirve questa.
Dà la combinazion
Che l'altra sera
A una conversazion
20Dove la gera
El discorso i gaveva intavolà
Su la longevità,
E sentindo che Gegia so sorela
Avendo la parola
25Diseva — sinamente da putela,
Co ancora andava a scuola
Go inteso che la nona,
Un colosso de dona,
Co tuti i denti sani
30Ze morta de cent'ani —
La salta suso — Gegia
No te far maravegia,
Perchè se 'l nono fusse vivo ancora,
El conto belo e chiaro se presenta
35Ghe n'avaria a sta ora
Cento e trenta.—
Gegia a sentir sta cossa
Ze deventada rossa,
Ma i altri ga ridesto per mezz'ora,
40E quando i se la pensa i ride ancora.
Siora Beta in quela età
Gera una rarità,
Ma a l'incontrario adesso,
Che lo diga el bel sesso
45Me permete,
Abondanza ghe ze de siore Bete.