I do stolidi

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
I do stolidi
1857-58
←  L'abitudinario Edission e fonte ▼ La sorpresa  →


[p. 52 modifica]
I DO STOLIDI.


Momoleto Sportela e Piero Cesto,
     Do teste, ma de quele,
     Che no ga mai savesto
     Cossa che sia cervele,
     5Ossia do gran zuconi
     Co tuti i requisiti,
     I spassizzava uniti
     La riva dei schiavoni
     Da stolidi baucando
     10Precisamente quando
     El sol, che andava a monte,
     Tocava l'orizzonte,
     E coi so ragi d'oro risplendenti
     Ghe petava in tel muso a quei sapienti.
15Alora Momoleto,
     Povero d'inteleto

[p. 53 modifica]

     Ancora più de Piero,
     — Spieghime, el dise, Cesto caro ti
     Sta cossa che per mi
     20Ze un gran mistero;
     El sol che a dì fenio
     Costantemente
     Va soto da la parte de ponente,
     Percossa el zorno drio
     25Dopo l'aurora
     Da quela de levante vienlo fora? —
Piero da Ciceron
     Ghe risponde — zucon!
     No ti à capio,
     30La note el torna indrio. —
Momoleto a sto stramboto
     Trova Piero un omo doto,
     E contento contenton
     De aver tolto sta lizion
     35Spera de far la so figura
     Se ghe vien la congiuntura.


Sta storiela ze un esempio,
     Che le bestialità
     Più de le verità
     40Convince el sempio.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=I_do_stolidi&oldid=39273"