La puerpera
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El cavalo longo | Edission e fonte ▼ | El biglieto → |
Un certo sior Ilario,
Che gaveva so fia
Maridada a Pavia
Co sior Macario
5In grando negoziante
De denti d'elefante
Venudo a conoscenza,
Che so zenaro gera
Per cercar de finir certa pendenza
10Da quatordese mesi in Inghiltera,
El risolve de andarsela a trovar
Persuaso che grata
Ghe sia per risultar
L'improvisata;
15E de quei rari che dal dito al fato
No ghe lassa gran trato,
In mezz'oreta
Co un picolo equipagio
Fa su la so sacheta
20E ze za in viagio.
Dopo quarantaot'ore
Che per la posta el core,
Ecolo za a Pavia
In casa de so fia
25Cigando — Nana —
Abreviatura in uso
De Susana;
Ma apena l'è dessuso,
Ancora col tabaro e col capelo,
30Ghe va incontro a corando la massera
Disendoghe — lo prego, caro elo,
El fassa apian, perchè geri de sera
Co l'agiuto de Dio
La parona un putelo à partorio,
35So pare tal e qual, tanto de toco,
E avendoghe za un poco
Dà la teta
Adesso la ze quieta,
Nè mi, schieto ghe parlo,
40Me credo autorizzada
A darghe la secada
De anunziarlo,
Avendome preciso dà el preceto
De no lassarghe andar che sior Carleto.—
45No badando al mumento
Al gofo complimento,
Che a quela dona scioca
Vien fora da la boca,
Sior Ilario copà,
50Sorpreso, imatonio
Del parto, ga esclamà:
— Ma come? se Susana ga el mario
Da quatordese mesi in Inghiltera. —
Alora ghe risponde la massera
55Più de l'aqua inocente:
— Questo no vol dir gnente,
Perchè 'l paron Macario
Ghe scrive ogni ordinario. —
In quanto a la Susana no ghe trovo
60Gnente a fato de novo,
Ma in quanto a la massera veramente
La me par una cossa sorprendente,
Perchè la più zucona
Sa far quelo che à fato la parona.