El cavalo longo
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← La longevità | Edission e fonte ▼ | La puerpera → |
Don Paulo capelan
De santa Bona,
Una degna persona,
Un prete cortesan,
5Divoto, onesto e bon
Senza esser minchion,
Bei requisiti
Che assae de raro se combina uniti,
E che a chi li possede ghe fa onor,
10Al verde la scarsela
Causa del so bon cuor,
Un cavalo da sela
El doparava
Talmente seco induto
15Che i ossi ghe spontava
Dapertuto,
Alto discretamente,
Ma longo in tal maniera
Che assae dificilmente
20Se trovaria el compagno su la tera.
Un dì dopodisnar,
Che don Paulo montà sul so ronzin
L'andava a confessar
Un zoto contadin,
25Che balando, sto toco de pandolo,
Malamente cascà,
S'aveva scavezzà
L'osso del colo,
E alora gera drio
30A dar l'anima a Dio,
Don Paulo capelan
Strada facendo
L'incontra un cortesan
Che ghe dise — de grazia reverendo,
35La prego de scusarme,
La me fassa el regalo
De informarme,
Quanto vendela al brazzo el so cavalo?—
Fissandolo in tel muso,
40E a la bestia la coa tirando suso,
El ghe risponde — lo misureremo,
L'entra in botega che se giustaremo.—
Vorave che chi el prossimo minchiona
Trovasse un capelan de santa Bona.