La polenta (1822)
|
Edission original: |
Lodovico Pastò, Poesie edite ed inedite de Lodovico Pastò venezian, scritte nel so natural dialetto, Venezia, Giuseppe Molinari, 1822 |
|
Fonte: |
Indice:Poesie edite ed inedite de Lodovico Pastò venezian.djvu |
| Edission e fonte ▼ |
- . . . . . . . . . . . non omnibus unus
- Gustus . . . . . . . . . . . .
- Macar. ined.
་
Ben venuti, ben venuti,
Via, da bravi, le se senta
Le se comoda qua tuti,
Che xe ora de polenta.
Disnaremo qua in cusina,
Za la vede che zogielo,
Co mi go la polentina
Questo è sempre el mio tinelo.
Ma le prego un momentin.
Oe, Tonin,
Fala in fete
Sutilete,
E impenissi la licarda...
Varda, varda
Che quei stizzo fa del fumo!
Sì, per dia, che me consumo
A insegnarghe a ste marmote!..
Quele quagie no xe cote,
Quela bampa no laora...
Via... da brava, siora Dora,
Sul fogher no vogio intrighi;
Onzè ben quei becafighi;
Tirè zo quele brisiole...
Deme in qua le cazzariole...
Mo che odori, che consola!
Portè in tola, portè in tola...
Tropa roba? cosa disele?
No le vede? semo in quindese;
E po' gnente, mi soleto,
Picoleto come son,
A contarghela da amigo,
Più d'un terzo la destrigo.
Co ghe xe sta bela zogia
Mi devento un parassito,
E po' mando el rosto, el frite,
E i piateli tuti al bogia.
La me piase dura, e tenera,
In fersora, e sulla grela,
In pastizzo, in la paela;
Co i sponzioli, coi fongheti,
Col porcelo, coi oseleti,
Cole tenche, coi bisati,
Co le anguele per i gati;
E po' insoma in tutti i modi
La polenta xe'l mio godi.
Co camino per Venezia,
E che trovo per le strade
Quei, che vende polentina
A un soldeto ala fetina;
Che i me diga pur: no cade,
Che mi spendo el mio boreto,
La gazeta, e infina el traro
E bel belo, belbeleto.
Me la vago musegando
Rosegando,
Papolando
Soto l'ala del tabaro.
Ola, digo, Comareta,
No tegnì la boca streta,
Fè i boconi un fià più grossi
Chè za qua no ghe xe ossi.
Questo è late ben colà,
Dove drento go butà
El bisogno de farina
Tamisada, fina, fina;
E po a forza de missiarla,
De menarla sora el fogo:
Come fa ogni bravo cuogo,
L'ò tirada una rosada
E a sculieri, l'ò cavada;
Go butà po' su el so zucaro
El botiro, e la canela
Comareta, via, magnèla.
Comareta, via, magnèla.
Chè voi farve tondolina,
Grassa come un becafigo;
Perdoneme, se vel digo,
Vu sè stada sempre bela,
Ma un pocheto magretina:
No vede ste furlanote,
Che papote che le ga?..
Che montagne!... che arie fine!
Quele è tute polentine,
Che al pajes le ga magna.
Sto pastizzo xe un oracolo...
Che botiro perfetissimo!
Mo che stime tartufole!
Che fongheti gentilissimi!
Che polenta ben passada!
La par proprio una sfogiada.
Vegna i cuoghi contuti i so sguateri
A imparar da sto muso de mamara
A formar el pastizzo più nobile,
Cussì raro, e gustoso, che'l simile
No i lo trova se i studia tre secoli,
Se la mente el cervelo i se stempera
No i lo trova, son certo, certissimo,
Per dio baco! bacon! baconissimo!
Ola, amigo, cossa seu?
Cossa diamberne gaveu,
Che no fè che sbadagiar?...
Povereto!.. se pol dar?
La polenta ve fa sono;
La ve fa malinconia?
Andè in leto, caro nono,
Chè la testa ve va via!
Cossa mai saria de mi,
Che la magno a tute l'ore?:
Ma lo diga ste Signore,
Se de note fazzo dì,
Se son sempre d'un umor...
Cossa disela, Bonsior?
La polenta xè ordinaria?
Oe, lighèlo, che 'l zavaria!
No la sa, che le gran Dame
Par infin morte da fame
Co le vede la polenta?
No la rida, la me senta,
Mi le vedo in palco al'opera,
E ale cene dei casini
A magnarla tanto in furia
Sia in pastizzo, o in boconcini,
Che par, e ghe lo zuro ben, persbrio!
Che no le veda mai graziadedio...
Oh, che mato che ti xe!
Si alafè che vago in colera!
La polenta inlanguidisse?
La fiachisse?
La sbasisse?
Te becasse cento bisse!
No ti sa se i Terazzeri,
I Mureri,
I Fachini,
I Tasini,
Quei, che adopera, le sieghe,
Quei, che conza le careghe,
Quei, che ciga tagialei
Co i xe vecchi, i par putei?
I xe svelti come spade,
I camina per le strade,
Che i consola chi li vede:
E sì, posso dirte in fede,
De purissima polenta
Ste creature se sostenta.
Varda roba! varda! varda!
La mostarda!
Mo che quagie! mo che tordi!
Mo che odor! lo sente i sordi,
Che polenta co ben frita!
La me da proprio la vita...
Via Comare, destrighemola,
Chè, per diana! la lo merita...
Ah! gavè dolor de denti?
Malegnazi! i xe sti venti;
Ma son qua co un gran rimedio:
Una bela feta in bota
De polenta apena cota
Aplichèla
Cussì calda ala massela,
Fè l'istesso in qualche dogia
Che ve dà un dolor da bogia
Sia pleuritica, o sciatica,
E ve parlo ben per pratica.
Se per caso studiè l'etica,
No stè a tor brodi de vipera,
De gagiandra, nè de gambaro,
Nè tanti altri diavolezzi
Che destruze vita, e bezzi,
A bon'ora ogni matina
Feve far la polentina
E magnèla a scotadeo,
Se crepè me tagio un deo.
Se gavè... ma cossa è stà?
Gran secae che i vegna qua
Oh! cospeto! benedeta!
Sì, dasseno una casseta
De farina bergamasca
Che me ariva da Somasca.
Digo ben che la go cara...
Oe, vardè che cossa rara?
Che color! che bel zalon!
Femo, femo un polenton
Tropo tardi? varda, mato!
Fazzo farlo qua in t'un trato.
Catina, via, Catina,
Tamisa in quel albuol
Sta bela zalolina;
Ma varda che 'l granziol
No resta in tela semola
Che 'l vaga tuto zo...
Puro fioreto? oibò,
La riesse tropo slimega,
E smorta de color...
Ma cossa fa quel sior
Là solo in quel canton?..
To su quel caldieron,
Tachilo ala caena...
Mo via, gran Madalena!
Me fastu dir del mal?
Parechime del sal.
Destrighite, Catina,
Vien qua cola farina...
Basta: va ben cussì....
Va ben, tel digo mi,
Co la xe tropo dura
La buta ruspia, e scura,
E piena de monari...
Alegri, fioli cari,
No stemo quà a vardarla
Xe ora de menarla.
Via, presto femene,
In qua la mescola....
Da bravo, Giacomo,
Da bravo, menila
Da bravo, daghela
Adasio, adasio.
Chè la se brustola!
Presto, destachila,
E ben unissela
Co la to spatola
Qua sula cenere...
La va benissimo
Via presto deghimo
Un fià de fogo,
E rebaltemola...
Mo bravo cuogo!
Largo, largo, deghe strada,
A sta nobile Matrona;
Che da tuti xe adorada:
A sta bela Polentona
Schietaneta, e natural,
De farina, d'acqua, e sal
Senza ontume,
Nè grassume,
Senza odor da brustolin,
Senza un fià de pignatin,
Nome fata, e rebaltada:
Largo, largo, deghe strada
Oe, Catina, sona el cimbano,
E ti, Giacomo, compagnila
Cola mescola, e la spatola,
Chè ghe femo onor al merito
Veramente imparegiabile
De sta nobile Regina
D'ogni piato de cusina
Qua del filo, Siora Bortola,
Chè voi farla tuta in fete:
Mi, per mi ghe ne voi sete,
Oto, diese, e po'.... chi sà?
Fermi, fermi, cari vu,
Chè ghe vogio pensar su.
Fermi, digo, pofarsbrio!
Lasse star de pizzegarla,
Chè ò pensà de maridarla.
Ma chi mai sarà el so sposo?
Via, regazze, indovinelo.
Nò, dasseno, el xe più belo,
Mile volte più sontuoso....
No'l trovè gnanca in cent'anni
Ma ve levo da sti afani:
„Lu xe 'l Re de tutti i vini,
„Dei liquori soprafini.
Cossa ve par? disemele,
Xelo un sposia de sesto?
Regazze, vel protesto;
De megio no se dà.
Regazze gentilissime,
Vegnime tute apresso,
Chè voi sposarli adesso,
Chè voi sposarli qua.
Bravo, Tonin,
Un gotesin
De sto bon vin
E una fetina
De Polentina,
Chè voi far una zopeta,
Che consola, che dileta,
Cospetazzo del demonio,
Che stupendo matrimonio!
Mo che zopa xe mai questa
Fata su cussì ala presta?
Catineta,
Comareta,
Riosa, Bortola, Lucieta,
Via, sorele, tute qua
A sentir sta rarità....
Cussì poca, coresin?
No lateu quel fantolin?
Impenive ben la panza;
No ghè gnente, assicurevelo,
Gnente al mondo che la supera
Per far late in abondanza.
Ola, digo, bella fia,
Ma sè molto ingritolia!
De novembre gavè fredo?..
Eh ve vedo, sì, ve vedo,
Ma no tremo minga mi
Via, careta, fè cussì...
Vegna pur tuti i aquiloni,
Le più fiere
Levantere,
Vegna el fredo dei Laponi,
Go go in panza sto bruetin
Mi devento un paladin:
Mai no tremo, supio, e suo,
Se anca fosse squasi nuo.
Se sta zopa mai va avanti,
E se meta tuti quanti
A magnarla come i risi,
Nu vedemo tuti sbrisi:
I Sartori, i Pelizzeri,
Rovinai tuti i Marzeri
No se fabrica più pani
Nè da Schio, nè padoani,
Mai più bati, nè londrine
Nè fanele, nè schiavine;
Vien i fassi vinti al traro;
No se mete zo le ventole
Granca el mese de genaro
Toni, porta del friularo
Chè la Sposa xe qua sola,
Presto, via, che la consola,
Co la xe cussi soleta
La xe morta, povereta
Pofardin de din, de dia!
La gran testa xe la mia!
Sì, per crispo, che son mato!
Cossa diamberne goi fato
A no darghe a sta Sposina
A sta bela polentina
Anca un poco de servente
Che ghe staga sempre arente.
No ghe Dama, nè Contessa
Citadina, o Marcantessa,
Benestante, e boteghiera;
In ancuo la cameriera,
La massera
La calera,
Fin la sposa del scoazzer
Ga'l so bravo cavalier:
E sta nobile Regina
D'ogni piato de cusina
Starà sola a muso suto?...
No lo tegno, no, da puto:
Sarò mi,
Sarò mi,
Ui Madam, Madam, ui
Sarò el vostro protetor,
Sarò el vostro adorator:
Cussì el mondo vederà
Che xe vero che se dà
In amor la bela fiama,
Che platonica se chiama...
Eh, caveve, malandreti!
Che bochini da zaleti!...
Gnente afato, frustè via
Che sta zogia è tuta mia
Vien qua, cara, vien qua ti,
Vien da mi,
Vien da mi.
Vienme in sen
Vienme in sen,
Che te vogio tanto ben...
Saldi, saldi che m'ingosso...
No la pò...
No la pò...
No la posso mandar xo:
Ahi Tonin!
To... Tonin,
Vin, vin, vin,
Vin, vin, vin...
Cussì poco? gran cocal
Tuto, tuto ste bocal...
Porta ancora, porta qua...
Porta qua...
Porta qua...
Via, via, via, son desgossà.
Oh, che cara Comareta!
L'à m'à fato una burleta,
Che mai più ghe la perdono.
Sì, cospeto de sior nono!
Che ò credesta de brepar
Se pol dar!
Guai, persbrio!
Se no trovo so mario...
Oe, dove xela andada?
Per dia! la xe scampada
Ma nò, che la xe qua
Sposina, per pietà...
Mo via, muso, che piase;
Vien qua chè femo pase.
Che polenta xe questa! che balsemo!
Me che vin! mo che ambrosia, che netare!
Mo che union! mo che spasi adorabili!
Mo che gusto stupendonazzissimo!
Mo che gusto xe quel, che lo supera?
Mi, per mi no lo trovo certissimo,
Mo che gusto stupendonazzissimo!
Mo perchè no songio un'aquila,
Che vorave adesso subito
Trasportarli tuti do,
Trasportarli fra i pianeti...
Ma, nò, nò,
Siori, nò,
No faria sta roba mai;
I pianeti
Povereti!
Resteria pregiudicai.
El gran fogo do custù
Parerave el sol più in su,
La belezza de custia
Luna, e stele eclisseria.
Dè qua, dè qua, dè qua‚
Dè qua, per carità!..
Oimei! respiro un poco,
Vardè, se so' un aloco
Son stà quasi un menuto
Sempre a gargato suto...
Ah! fradeli diletissimi,
Che sposini! molto fervidi!
Se sentissi in tel mio stomego
Che carezze che i se fa
Mo che salti! mo che tombole!
Che urtoncini che i me dà!
Sì, careti, sì, godevela...
El gran gusto che go mi!
Ah, magari seguitasseli
Zorno, e note a far cussì.
Vardè, vardè, vardè
Che bel color che go,
E megio lo farò,
E megio lo farò.
Me sento, sì, me sento
In fior de zoventù;
Se me volè contento
Dè qua chè buta sù...
Friulareto
Careto,
Beleto;
Polentina
Carina,
Belina,
Via, che balemo
Via, che saltemo,
Che se godemo fin domatina.
Puti, sonè,
Pute, cantè,
Sì, sì, sì, sì,
Che balo mi.
Che balo mi.
E nio, e nio, e nà...
E nanà...
E nanà
Alto, là...
Alto, là
Alto, digo, pofardia !
Che le gambe me va via
Co sti soni:
Co... cordoni...
Vardè qua,
Varde qua,
Son in tera destirà!
Deme man...toleme su...
Su, su, su,
Su, su, su,
Mo co sgionfo! mo co fiaco...
No capisso per dio baco!...
No me posso... sostentar...
To... torneme a colegar,
E andè tuti via de qua,
Che sarà...
Che sarà quel, che sarà.