La notte che serré la porta al dì
Vai alla navigazione
Vai alla ricerca
| ← Sonetto IX. Songio mi, Amor, quel servidor de dame? | Edission e fonte ▼ | Sonetto XI. Occhi pianzé, che ghe ne havé cason → |
La notte che serré la porta al dì,
Che successe a quell'altro, che successe
A quel che amor me fè tante promesse,
Là in l'apparir dell'alba me insonij.
E cusì in sonno vagabondo in ti,
Zonsi in sin al callar delle braghesse,
Quando el zorno e 'l sonar le prime messe
Me fa fermar, me fa tornar in mi.
O maledetti botti, o maledetti
Martelli, e pi maledette le man
Che me ha tiolto e robbà tanti deletti.
Dal monte son tornà pur in paltan,
E dal ciel in sto mar pien de deffetti.
O masìn empio, o crudel sagrestan!