La Visione

Da Wikisource
Vai alla navigazione Vai alla ricerca
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
La Visione
XVIII secolo

 Edission original:   

Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817

 Fonte:

Indice:Collezione delle migliori opere scritte in dialetto veneziano 2.djvu

Edission e fonte ▼
Altra edizion: La vision (1845)
[p. 77 modifica]
LA VISIONE


Ne la bela stagion che 'l biondo Apolo
     Senza infuriar benefico se mostra,
     Che se rinova l'erbe, e cento verdi
     De diversi color, e mile fiori
     5Ne presenta Natura in le campagne;
     Quando Zefiro spira, e che de Giove
     La bela fia che sta nel terzo Cielo
     Nova virtù nei animali infonde,
     Virtù che insegna ai rossignoli el canto,
     10Che sui prai fa saltar le armente e i tori,
     E che conserva e fa più belo el mondo;
     L'amoroso Leandro a le coline,
     Dove el Castelo d'Asolo s'inalza,
     S'aveva retirà. Nene la bela,
     15La so tenera Nene, che rapida
     Gaveva Morte, crudelmente fissa
     Lu tegniva nel cuor: nè nove fiame,
     Nè tempo distrutor l'acerba piaga

[p. 78 modifica]

     Rimarginar podea. Se solitario,
     20Quando s'alza più el Sol col caro d'oro,
     Soto un orno sentà, se verso sera
     Seguitando d'un'acqua el dolce corso,
     Solievo el cerca al so dolor, l'imagine
     Del caro ben, l'imagine dileta
     25Ghe xe sempre presente. E un dì fra i altri
     Che da un logo eminente el contemplava
     L'imensa interminabile pianura,
     Che dai coli Asolani a le lagune
     Dolcemente inclinando se destende,
     30Del sito ameno entusiastà, comosso,
     A seconda del cuor cussì el diseva:
               Coli ridenti e fertili,
                    Come xe questi, un dì
                    Me vedeva con ti,
                    35Nene dileta;
               E de sti verdi tarpani,
                    Come che i vedo qua,
                    Godevimo l'istà
                    L'ombra secreta.
               40Oh dio! me par de vederte
                    Fiori sul pra a sunar,
                    E dopo inghirlandar
                    Quei bei cavei;
               E i furianeli e i zefiri
                    45Trarli de qua e de là,
                    E quel mal insestà

[p. 79 modifica]

                    Farli più bei!
               Proprio in t'un sito simile
                    Quel primo dì, mio ben,
                    50T'ò visto, che in sto sen
                    L'amor s'à sconto:
               Quel dì che fogie morbide,
                    Volendote sentar,
                    Te son andà a cercar,
                    55Quel zorno aponto,
               Che son cascà dal frassene
                    Col nìo che avea trovà,
                    Ma che vivi ò portà
                    Quei rossignoli;
               60E che nel mio pericolo
                    Solo fissando in ti
                    Smorti ò visto per mi
                    Quei do' bei Soli;
               E d'una tinta languida
                    65Le rose a comparir,
                    Tinta che volea dir
                    No parlo, e sento!
               Oh quanto mai dissimile
                    Che t'ò vista in amor
                    70Da tante che sto cuor
                    Xe sta in cimento!
               Come xe ancuo fra nuvole
                    El Sol mezzo imbautà,
                    Quela note d'istà

[p. 80 modifica]

                    75Gera la Luna,
               Che fisso, muto, estatico,
                    Standote a contemplar
                    S'à buo da dichiarar
                    Per mi, fortuna:
               80E che la Dea castissima
                    Spionandone dal Ciel,
                    Dei nostri amori 'l miel
                    Forse invidiando,
               Col ragio incerto e palido
                    85O 'l bel fronte seren,
                    O la neve del sen
                    Iluminando,
               Più cara, no volendolo,
                    Te fava deventar,
                    90E un belo in ti trovar
                    Che 'l cuor rapisse.
               Oh dio! tante delizie
                    Tute è sparie per mi,
                    Come fior che in t'un dì
                    95Nasse e perisse.
               La Parca inesorabile
                    I lazzi de l'amor
                    À roto, e 'l più bel fior
                    Tolto à dal mondo.
               100Perdita ireparabile!
                    Dolor che porterò
                    Fin che vita averò

[p. 81 modifica]

                    Del cuor nel fondo.
               Ma se missià a le lagreme
                    105Più lune è stà el mio pan
                    Scorendo 'l monte e 'l pian,
                    Senza conforto,
               No dubitar, che st'anima
                    Sempre te onorerà
                    110Finchè la troverà,
                    Fra l'ombre el porto.
Mesto cussì el diseva, e intanto l'ombre,
     Che cascava dai monti, a le capane
     Invidava i pastori. Una profonda
     115Malinconia dopo sto amaro sfogo
     Investiva Leandro, e su quel'erba,
     Desmentegà de lu muto el restava.
     Quando unito a la note un fiero nembo
     S'alza dal mar, e sordo el ton se ascolta
     120Da lontan mormorar; nuvoli a nuvoli
     Za se ingropa nel ciel, se vede el lampo,
     El ton più forte a strepitar se sente;
     Cambia el vento, s'incalza, e un velo orendo
     Se destende sul pian; la piova e 'l turbine
     125E la tempesta, e i replicati fulmini
     Le campagne flagela. El nostro amante,
     Scosso a la fin da oror, una capana
     Tenta trovar, ma inutilmente; e un sasso,
     Che da l'acque scavà lassava un vodo,
     130Xe l'asilo che 'l trova. Minorando

[p. 82 modifica]

     Va la tempesta, el turbine se calma,
     Cessa la piova e 'l folgorar del cielo,
     E tra un nuvolo e l'altro alfin se vede
     Le stele a comparir. Tenta Leandro
     135Reguadagnar la strada, e invece a un vasto
     Pra, che un bosco circonda a torno a torno,
     Lu trasporta i so passi. Alti cipressi,
     Proprio in mezzo del pra piantai, serava
     Un gran muchio de sassi. El ciel s'avea
     140Fato seren, e una profonda quiete
     Dominava Natura. Oh come acresse
     Sto lugubre teatro al mesto amante
     La tristezza, e l'oror! Ma quei cipressi,
     Quei bianchi sassi, i tetri soi pensieri
     145Magiormente ocupava; e fata forte
     La tristezza nel cuor, la mente e i sensi
     L'ariva a conturbar. Dona e regina
     Fantasia signoregia, e verso i sassi,
     Che un Sepolcro ghe par, cussì el prorompe:
               150Fra quele piante funebri
                    Certo un sepolcro el xe!
                    La ghe sarà le ceneri
                    D' una che più no gh'è.
               Le ceneri? le ceneri?
                    155Oribile pensier!
                    Nene una freda polvere
                    Donca... ah! nol voi saver.
               No, no podea quel'anema

[p. 83 modifica]

                    Poca tera informar;
                    160No pol, no pol un anzolo
                    Polvere deventar.
               Nene xe in Ciel belissima
                    Come la gera qua;
                    Quel tesoro invidiandome
                    165Là suso i s'à portà.
               Quando belezza e grazie,
                    Modestia, amor, virtù,
                    Unite, indissolubili,
                    S'à visto mai fra nu?
               170Chi de fortuna istabile,
                    Scogio del cuor uman,
                    Sprezzandola, avilindola,
                    À desdegnà la man?
               Chi à sparso tante lagreme
                    175De amor, de compassion,
                    O sora i miserabili,
                    O su le bele azion?
               Chi?... Ma xe mai possibile?
                    A tanto son salvà?
                    180Me insonio?... Ombra adorabile
                    Ti è ti!... Chi t'à mandà?
               No ritirarte... ascoltime...
                    No, no te toco no,
                    Rispeto la to gloria,
                    185Che ancuo ti è sacra, el so;
               Ma solo avicinandome

[p. 84 modifica]

                    Tentava de osservar
                    Se dolce l'ochio o torbido
                    Se andava in mi a fissar.
               190Che?... te son caro.... Oh giubilo!
                    Che?... ti me vol con ti?
                    Via morte, via destruzime,
                    Tioteli pur sti dì.
               Per mi xe insoportabile
                    195Quanto che gh'è de uman,
                    Ti sola... Ombra, me chiamistu?
                    Sì? vegno, eco la man.
Fusse che fantasia portasse in fola
     Tuti i spiriti al cuor, o che l'estrema
     200Dolcezza d'un amor puro e celeste
     Estasià lo gavesse; in quel momento
     Perde Leandro i sensi, e vita e moto
     Nol torna a riacquistar che quando in cielo
     Ricomparsa l'Aurora, ai freschi pascoli
     205Co cento pive dai pastori el sente
     Le so mandre a invidar. Un bel Sepolcro
     Fra quei cipressi, no è passa sie lune,
     Che in memoria de Nene alzar s'à visto.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=La_Visione&oldid=68954"