L'indigestion letteraria

Da Wikisource
EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.
[p. 173 modifica]
L'indigestion letteraria


     Un preteso leterato,
Pien de fumo e pien de boria,
Un de quei che a tutto cesto
Vol un posto nella storia,

     Casca un dì dal dito al fato,
In un mal piutosto fiero,
Che marciando de quel passo
Lo portava al cimitero.

     Agravà lu se sentiva
Da una forte ripienezza,
Testa storna, mal de panza,
Gran suor, gran debolezza.

     E sì lu no magna molto,
Poco el beve, el fa del moto:
Quala donca xe la causa
Che a malarse l'ha ridoto?

[p. 174 modifica]


     Per saverla de preciso
S'à do medeghi chiamai,
Che per pratica e per lumi
Xe i più dotti e i più stimai.

     Dopo averghe tocà el polso
E la lengua esaminada,
I ga franchi sul so viso
La sentenza pronunciada:

     Se capisse a prima vista
Che l'è un mal d'indigestion,
Ma la causa no xe 'l cibo,
Xe più astrusa la ragion.

     Dell'Ariosto e de Petrarca,
De Vergilio e de Nason
E de Tasto e de Catullo,
E d'Ovidio e Ciceron,

     Ella almanco da qualch'anno
Uso a far la s'à ridotto,
E per esserghe indigesti,
I ga un putrido prodotto.

     Prima dunque che se vaga,
A incalzar la malattía,
I rimedi più opportuni
Doperar bisognaría.

[p. 175 modifica]


     L'amalà da sto consulto,
Messo subito in spavento
I rimedi l'à volesto
I più forti, in quel momento.

     E cò doppi lavativi
De Sonetti e de Canzon,
Ha ottegnudo el letterato
Una presta varigion.

     Sto rimedio portentoso
Par che ancuo sia messo in uso,
Cussì i versi anca i più tristi
Tutti quanti gà el so buso.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=L%27indigestion_letteraria&oldid=57072"