Invettiva contro una vecchia (1817)

EPUB

MOBI

PDF

RTF

TXT

Qualità del testo: sto testo el xe conpleto, ma el gà ancora da vegner rileto.

Pietro Antonio Novelli

Invettiva contro una vecchia

XIX secolo

Edission original:	Collezione delle migliori opere scritte in dialetto veneziano, Volume duodecimo: Poesie di autori diversi, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817
Fonte:	Indice:Collezione delle migliori opere scritte in dialetto veneziano 12.djvu

Edission e fonte ▼

Altra edizion: Invettiva contro una vecchia (1845)

[p. 127 modifica]

INVETTIVA CONTRO UNA VECCHIA

SONETTO COLLA CODA

DI PIETRO ANTONIO NOVELLI

FAMIGERATO PITTORE VENETO

Vechia chietina, via de qua, corbame
     Scampà da sant'Arian, bruta figura,
     Mumia, diavolo, can che fa paura,
     4Spuzzolente de vermi bulegame,

Asma, lievra, catàro, peste infame,
     Bruta evacuada de Pluton pastura,
     Reo spegazzo e sberlefo de natura,
     8Parca che de la vita tagia el stame,

Carogna, striga, anema danada,
     Feral che piola, e che ga el talco sporco,
     11Otomia co la pele roversada,

Mozza in sconquasso, e un dì nena de l'orco,
     Morta vampira con un corno infiada
     14Dei spiriti foleti dal più sporco.
Le Gree fiole de Forco,
Che una co l'altra un ochio se imprestava

[p. 128 modifica]

17Gera megio de tì, che ti à la bava.
Arcibisdebisava
Ti par, co quela to ciera inumana,
20Picàda e vegnua verde in tramontana;
L' avarizia te scana,
Efige de la morte e de l'invidia,
23Che ti ga proprio el cefo de l'acidia.
No gh'è ne la Numidia
Fiera più spaventosa, e no gh'è drago,
26Basilisco, simioto, arpia nè mago,
Nè de Stige sul Lago
No ga Caronte quel color da mostro
29Tra 'l fiel e tra 'l calizene e l'ingiostro;
Va via dal confin nostro,
Va a star co' quei che tien el colo storto,
32Che a ochi bassi no i te farà torto
De vardarte quel porto
De tute le desgrazie, bruto muso,
35Despetoso, ingrugnà, scarna, otuso.
Quel to vardar astruso,
Losco, incantà, che 'l sangue fa giazzar,
38Che fa l'anema in corpo scantinar,
E quel gran scricolar
Che te fa i ossi, e quela to osazza,
41Che par el subio de una carbonazza,
Le xe cosse che cazza
Via la pazienza, e se se imbila e stufa
44Sentindo quel fetor che ti à da mufa.

[p. 129 modifica]

Coi zoveni in barufa
Grima, zotega, spia, nona del boja,
47Goba, sdentada, secagine, incroja.
Chi vedesse despoja
Sta idea de Lazareto e de Ospeal,
50Piena de fezza come un orinal,
Vederìa un infernal
Furia, el Porton de casa de colù...
53El pecà... me vien mal... no posso più.