Invettiva contro una vecchia

by Pietro Antonio Novelli

3 Invettiva contro una vecchia
Soneto co la coa Pietro Antonio Novelli XIX Soneti Indice:Raccolta di poesie in dialetto veneziano 1845.djvu Altra edizion: Invettiva contro una vecchia (1845)

Pietro Antonio Novelli

Invettiva contro una vecchia
Soneto co la coa

XIX secolo

Edission original:	Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845
Fonte:	Indice:Raccolta di poesie in dialetto veneziano 1845.djvu

Edission e fonte ▼

Altra edizion: Invettiva contro una vecchia (1845)

INVETTIVA

CONTRO UNA VECCHIA

SONETO CO LA COA.

Vechia chietina, via de qua, corbame
     Scampà da sant'Arian, bruta figura.
     Mumia, diavolo, can che fa paura,
     4Spuzzolente de vermi bulegame,

Asma, lievra, cataro, peste infame,
     Bruta evacuada de Pluton pastura,
     Reo spegazzo e sberlefo de natura,
     8Parca che de la vita tagia el stame,

Carogna, striga, anima danada,
     Feral che piola, e che ga el talco sporco,
     11Otomia co la pele roversada,

Mozza in sconquasso, e un dì nena de l'orco,
     Morta vampira con un corno infiada
     14Dei spiriti foleti dal più sporco.
Le Gree fiole de Forco,

Che una co l'altra un ochio se imprestava,
17Gera megio de ti, che ti à la bava.
Arcibisdebisava
Ti par, co quela to ciera inumana,
20Picada e vegnua verde in tramontana;
L' avarizia te scana
Efige de la morte e de l'invidia,
23Che ti ga proprio el cefo de l'acidia
No gh'è ne la Numidia
Fiera più spaventosa, e no gh'è drago,
26Basilisco, Simioto, arpia nè mago,
Nè de Stige sul lago
No ga Caronte quel color da mostro
29Tra 'l fiel e tra 'l calizene e l'ingiostro;
Va via dal confin nostro,
Va a star co quei che tien el colo storto,
32Che a ochi bassi no i te farà torto
De vardarte quel porto
De tute le disgrazie; bruto muso,
35Dispetoso, ingrugnà, scarna, otuso,
Quel to vardar astruso,
Losco, incantà, che 'l sangue fa giazzar,
38Che fa l'anima in corpo scantinar,
E quel gran scricolar,
Che te fa i ossi? e quela to osazza,
41Che par el subio de una carbonazza,
Le xe cosse che cazza

Via la pazienza, e se se imbila e stufa
44Sentindo quel fetor che ti à da mufa.
Coi zoveni in barufa
Grima, zotega, spia, nona del bogia,
47Goba, sdentada, secagine, incrogia.
Chi vedesse despogia

Sta idea de lazareto e de ospeal,
50Piena de lezza come un orinal,
Vedaria un'infernal
Furia, el porton de casa de colù...
53El pecà... me vien mal... no posso più.