I meriti de sior Antonio Rioba

Da Wikisource
Jump to navigation Jump to search

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
XIV. I meriti de sior Antonio Rioba
1881
←  XIII. Un dialogheto a l'inferno Edission e fonte ▼ XV. No posso servirla  →
[p. 131 modifica]
XIV.


I MERITI
DE
SIOR ANTONIO RIOBA


[p. 133 modifica]

Se mai per miracolo
     Un morto guarisse,
     Se fosse possibile
     4Che i sordi sentisse,

Mi certi politici
     Che par de cartelo,
     E invece una frégola 1
     8No i ga de cervelo,

Vorave sul serio
     (Vardè che cagnera!) 2
     Mandarli a la predica
     12Da un omo de piera:

[p. 134 modifica]

Da un vechio de merito
     A tutti palese,
     Che fin ai tipografi
     16Ga fato le spese.3

Beata l'Italia,
     Se in quanto a virtù
     Il tipo e la pratica
     20Tolesse da lu!

Vardè per esempio:
     Adesso i ministri
     Xe un'ora monarchici,
     24Un'ora sinistri;

Ancuo co Vitorio,
     Doman co Mazzini,
     E ieri borbonici,
     28O pur papalini.

Lu no: ma incrolabile
     In campo dei Mori,
     De inverno coi grizzoli,4
     32De istà coi süori,

[p. 135 modifica]

Là dreto, e a un princìpio
     Fedel a ogni costo,
     Da squasi sie secoli
     36Sta saldo al so posto.

E se qualche sbrindolo,5
     Più scuro più chiaro,
     El gà per capricio
     40Depento al tabaro;

Lu, in pien, del zogatolo
     L’è stà malcontento,
     L'istesso, istessissimo
     44Restando de drento.

Vardè; certi zoveni
     (E pochi no i xe!),
     Ga fato l’Italia
     48Fumando al cafè:

Opur col sussidio
     De qualche bulada:
     Scrivendo un articolo,
     52Cigando per strada.

[p. 136 modifica]

E pur sti bei mobili
     Ga fato cariera,
     Muchiando stipendii
     56De talari a miera.

Lu nò: ma in silenzio
     Da ani co ani
     El salva la fabrica
     60Da tanti malani;

L'è sempre in servizio,
     E mai nol se lagna,
     Se l'aria lo sventola,
     64Se l'acqua lo bagna.

El strussia, el se snombola;
     Ma gnanca per questo
     Se diselo martire
     68Sto omo modesto?

Pretendelo sbrindoli
     De crose o cordoni?
     O gnanca se degnelo
     72De un pèr de milioni?..

[p. 137 modifica]

Nei bezzi del publico
     Che xe sacrosanti,
     Adesso pol mètarghe
     76Le man tuti quanti;

E par ch'el sia metodo,
     In una parola,
     Guardiani che rosega,
     80Cassieri che svola.

Intanto un tal debito
     Adosso ne pesa,
     Che ai prò se sacrifica
     84Metà de la spesa;

Se inventa e moltiplica
     A monti le tasse;
     E pur d'ordinario
     88Xe vode le casse.

Vardè Sior Antonio
     Che sesto ch'el ga!
     Lu istesso la guardia
     92Al scrigno el ghe fa.

[p. 138 modifica]

E a farghela megio
     In spala el lo tien:
     E (tuti pol vederlo!)
     96El xe sempre pien.

Nè tasse, nè dazii,
     Cussì no ghe ocore,
     Nè banche, nè prestiti,
     100Nè altre malore.

E questo xe indizio
     Per mi molto chiaro,
     Che in fato de studii,
     104No l'è po' un somaro.

Ancuo i diplomatici
     Sia guera, sia pase,
     Cô i fa qualche fùfigna, 6
     108I schiopa 7 se i tase;

Che anzi el consegio
     I tien in locanda,
     Perchè le notizie
     112Più presto se spanda.

[p. 139 modifica]

Lu invece pacifico
     Da tute le case
     El suna 8 notizie,
     116Ma el medita, el tase;

E mai (se la storia
     No inventa anca questo)
     Cavarghe una silaba
     120Nissun ga podesto.

I nostri politici
     Se dise cristiani,
     E pur coi catolici
     124I trata da cani.

I papi no i tòlera
     Nè vivi, nè morti;
     E aver el batesimo
     128Xe el pezo dei torti.

Lu in Chiesa, che sapia,
     Nissun l'à mai visto;
     Ma pur nol bestemia
     132Nè i Santi, nè Cristo.

[p. 140 modifica]

Se ai altri ghe comoda,
     El lassa che i vada,
     E spesso al so prossimo
     136Ghe insegna la strada.

Nol cata mai rádeghi9
     Coi preti, coi frati;
     E tutti xe liberi
     140De far i so fati.

Cussì sto bon vechio
     Xe onesto, discreto,
     L'è giusto, l'è economo,
     144L'è savio e segreto:

De nostri politici
     Facendo el roverso,
     L'è insuma d'un genere
     148Che el stampo s'à perso.

Qua forse i filosofi
     «Va ben» me dirà:
     «Ma alfin Sior Antonio
     152Sta sempre inchiodà.

[p. 141 modifica]

E adesso, in sto secolo
     Se move anca el sol:
     Via dunque l'inerzia!
     156Progresso ghe vol!...»

Sì! queste xe chiacole;
     Ma mi se el progresso
     Xe quelo dei gambari;
     160Opur (che xe istesso)

Se tuti el ne tribola
     De dentro o de fora,
     El corpo co l'anema
     164Mandando in malora,

Per mi lo qualifico
     Progresso pandòlo:
     Oh! megio no mòvarse
     168Che romparse el colo!!. .




Note
  1. [p. 144]frègola — briciola.
  2. [p. 144]cagnéra — piccolezza, cosa da nulla; in qualche luogo di terraferma, significa rumore, schiamazzo di cani.
  3. [p. 144]grizzoli — brividi.
  4. [p. 144]Nel 1848 e anche nel 1867 Sior Antonio Rioba fu il titolo d'un giornale umoristico popolare.
  5. [p. 144]sbrindolo — monello, figurat. - (Vedi la nota 7 al N. I.
  6. [p. 144]fùfigna — V. al N. XII. la nota 5.
  7. [p. 144]schiopa — scoppia.
  8. [p. 144]suna — raccoglie.
  9. [p. 144]nol cata... radeghi — non trova mai questioni, non accatta liti.
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=I_meriti_de_sior_Antonio_Rioba&oldid=52380"