Elogio di Baffo
|
Edission original: |
Pietro Buratti, Poesie e satire di Pietro Buratti veneziano, corredato di note preliminari ed annotazioni scritte dallo stesso autore, Amsterdam, J. Loocke, e figlio, 1823 |
|
Fonte: |
| ← Risposta all'Anonimo | Edission e fonte ▼ | Difesa della Marietta → |
Nemigo capital per mia natura
D'ogni union che academica se chiama
(Basada per lo più su l'impostura
Che a qualche visdecazzo ghe da fama)
Sedoto no m'avria leteratura
A secondar de sto Ateneo la brama
Se noto no me fusse che de mona
Quà se vive, se parla, e se ragiona;
Che no regna surperbia, nè eticheta,
Che se scrive per chiasso e per morbin,
Che se gà in culo onori, e cordoleta
Che al pan se dise pan, e vin al vin,
Che musi de pretesa no se aceta,
Che non gh'è gnanca un fià de calepin,
Che i libri xè bandii come el flagelo
Più grando che mandar podesse el cielo.
Pur tropo qualche volta el caso à fato
Che me toca el sorbeto in società,
De quel che se ghe dise leterato
Per boria de la scienza inamorà,
E m'à parso al confronto assae beato
Chi de sta malatia no xè infetà
Che struca struca pò no i xè che boni
De slongarneli un mio sti pedantoni.
Xè pochi i disinvolti tra costori
Che no parla per uso in silogismo,
Che no vogia parer sempre dotori,
Che no gabia de scienza l'eretismo,
E piutosto de star un dì con lori
Togo sù del Tissot l'onanismo,
O che chiavo una potana, o me lo meno
O lezzo Bertoldin e Cacaseno.
E se me stufo mai de star de bando
Fazo invece coi morti caregheta,
E secondo el capricio ghe comando
Che libero son nato, e son poeta;
Ancuo me piase le pazie d'Orlando,
Doman Dante o Petrarca me dileta,
E co i comincia a farme indigestion
El balo ghe sò dar de l'impianton.
Ne pericolo gh'è che per dispeto
I mola gnanca un corponon de baco
Se mai sora pensier me scampa un peto
Se ghe sbrodego el muso de tabaco,
Se per dormir li togo spesso in leto,
Se con lori comino e me stravaco,
Se l'aseno ghe fazzo e l'anemal,
E se i me casca fin ne l'orinal.
Proveve co sta zente da cartelo
De non star su le suste co davanti
I ga, come se i fusse un capitelo,
Un coro de divoti e de ascoltanti,
Oracoli cascai zoso dal cielo
I vol per forza esser tratai coi guanti,
E pieni de suismo e de aroganza
No i conosse riguardi, e i vol creanza.
Che i vada pur sti bravi zarlatani
A vender el so balsamo la sera
Da qualche vechia piena de malani
Bandia capitalmente da Citera,
Che civeta d'amor nel fior dei ani
Adesso ai leterati ghe fà ciera,
E a forza d'arte in mostra la ghe mete
De biaca impastrochiae le quondam tele.
A mi certo no rege la pazienza
Destarco sti omenoni in compagnia,
Che pur tropo ò capìo per esperienza
Che no regna tra lori l'alegria,
Che academia se fa d'impertinenza,
Che i manca de bon cuor, de cortesia,
E che se no i gavesse visi umani
I se morsegaria pezo dei cani.
Fra tante istituzion, filomonari,
Cossa megio de questa s'à mai dà
Che signori, e spiantai, colti, e somari
Aceta in fratelanza, in libertà?
E ve lasso pensar, amici cari,
Se m'à dolesto el cuor l'ano passà
D'esser da l'acque relegà in Bologna
Famosa per la peste e per la rogna.
Uno l'ogeto xè che quà ne move
Che ne chiama sto zorno a celebrar,
Che de dolcezza un netare ne piove
Finchè semo capaci de chiavar,
Che in gringola è fin messo el padre Giove
(Adesso bon apena da licar)
Co el vegniva a putane zò dal cielo
Vestio da manzo, o in abito da oselo.
Ogeto che xè fiol de la natura
Conforto de la vita, a tuti caro,
Dei mali che ne assedia sepoltura,
Delizia fra le bestie del somaro,
Dai preti scredità per impostura,
E scogio qualche volta de l'avaro,
Distintivo el più belo de la Dona
Senza tanti preamboli la mona.
La mona dei so peli contornada
Xè la nostra academica bandiera, 1
Sul peto ve la vedo situada,
E la lezzo a qualcheduno in ciera,
Mona che per el Baffo ti xè stada
De versi inesauribile miniera
Me cavo al to gran merito el capelo
Ma no te mostro nò per Dio l'oselo.
Che da picolo in suso sfortunà
L'à avudo, povereto, tanta boba
Che l'è ridoto un capo magagnà,
E sò che a tì te piase el fior de roba;
Campion de qualche merito l'è stà
Ma ghe pesa i quaranta su la goba
E se l'ariva a stento al primo assalto
Rimedio no gh'è più che el varda in alto.
Sia lode al to Poeta, a l'imortal
Cantor de le to gran prerogative
Pien de grazia, de spirito, de sal,
Che nato zentilomo, eterno vive;
Che in cenere ridoto ancora el val,
Per meter in ardenza tante pive
Per far che tanti cazzi colegiali
Te fota inviperii come cavali.
Puristi lo sò ben che vù altri invasi
Da le parole più che dai conceti
De Baffo al nome ranzignando i nasi
Apena ghe dè logo fra i poeti;
Ma del vostro giudizio persuasi
No xè tuti per Dio, che tra i dialeti
Ghe xè de grazie una miniera sconta
E un bel inzegno pol mostrar la ponta.
Oh se podesse libero parlar
Sul senso che me fà sti gran poetoni
Che se deve per forza rispetar,
E che de fondo i xè veri omenoni
Cosse diria da farme bastonar
Come re de le mone, e dei cogioni!
Ma co lori no parlo; e se me sfogo
Me lo permete el tempo, el zorno, el logo.
Petrarca, per esempio, de dolcezza
Capisso che l'è un netare soave,
Col depenze de Laura la belezza
Che del so cuor pianzoto gà la chiave,
Ma digo tra de mì, che bruta frezza!
Gerelo forsi un vechio co le bave
Che nol gaveva cuor sto visdecazzo
Almanco in man de consegnarghe el cazzo?
Co la so interminabile comedia
(Che da rider no à fato a nissun omo)
Quel mato d'Alighier tanto me atedia
Che sbadagiando zò me casca el tomo:
Per mì ghe daria el nome de tragedia
Se per tuto ghe vol un galantomo
Che in margine me vada per le viole
Spiegandomi i conceti e le parole.
A la longa me seca el pio Gofredo
Sul modelo formà del pio Trojan
Che prima de mazzar me dise el credo
E la crose se fà da bon cristian;
In Messer Lodovico un genio vedo,
Ma me par de sentir un zarlatan
Che in guera col bon senso là sul molo
Ghe slonga a tanti mamaluchi el colo.
Orazio fotidor e putanier
Me diverte col parla dei so amori,
Co deventà zà vechio e baloner
El nasa essenze, e tol in man dei fiori,
Ma vil me lo presenta el mio pensier
Co l'inalza a le stele i gran signori
E per scrocarghe un pranzo a Mecenate
El ghe lica da porco le culate.
Ne gnanca, se volè che sia sincero,
Sul mio bon libro trovo registrà
Quel orbo chiacolon de nome Omero 2
Da Cesaroti in zizola cambià,
L'è de natura un gran pitor, xè vero,
(Suposto che sto orbo ghe sia stà,)
Ma quei so eroi co l'anzolo custode
Secondo mi no merita gran lode.
E al confronto de adesso che Barbeta 3
No se ne intriga un cazzo, e pensa a lù,
E soto no so qual stela o cometa
Se vede el mondo andar col culo in sù
Ridicolo me par quel gran poeta
Che ghe dava ai so Dei tanta virtù,
Se in fondo chiaro xè per mile prove
Che i testicoli in ciel se grata Giove.
Insoma, francamente ve lo digo,
In tuti la magagna mi ghe trovo,
E più che lezzo el nostro caro amigo
Più me confermo che l'è un'omo novo,
De gloria lù no ghe ne dava un figo
L'à scrito proprio per cavarse el vovo
Ma la giustizia no gà fato torto
E grando in vita, l'è più grando morto.
Da tuti l'è comprà, da tuti leto
Delizia de la vaca, e de la dama,
El zovene lo vol per so dileto
El vechio per un tonico lo brama;
Ne solamente in sti palui ristreto
Come genio vernacolo el gà fama
Intopo no ghe xè ne mar, ne tera
E lo compra i milordi in Inghiltera.
Filosofo lo vedo co in esame
Tolendo el caso de Giusepe Ebreo 4
El lo batizza faglio de polame
Che tanto nol lo pol creder babeo;
Gran pensator co per frenar la fame
Ch'el cazzo gà del cul un solo deo
Tra i do busi ghe par scarsa distanza
Perchè no sbrissa in cul quel che và in panza.
Imaginoso, facile, sonoro
Col me depenze al vivo un per de tete,
Un petenichio biondo come l'oro,
Una dona che drento se lo mete,
Co morto el chiama le putane in coro 5
Che ghe fazza l'esequie benedete,
E che ghe porta el cazzo in prucission
In ato de solene adorazion.
Nol roba da nissun, no l'è scimioto;
L'è fiol de la natura, e basta questo,
L'è un cavalo che và sempre de troto,
Che gà de Pindo el gran cavalo in cesto
La mona, el cazzo, el cul lo tien in moto,
Gran purista in vernacolo e gran testo;
Moral, benchè de boca descusio
E basta insoma dir che l'è proibio.
Baffo che adesso forsi in paradiso
Dai santi, e da le sante cortegià
Ti gavarà vicin qualche bel viso,
E mona celestial ti gustarà
Un ragio almanco, un lampo del to riso
Slanza pietoso a chi te onora quà,
A chi se unisse in libera corona
Per celebrar chi à celebrà la mona.
E se vogia ne vien in sto mondazzo
De goder le delizie de quel buso
Slonghine pur alegramente el cazzo
Che zà la mona streta xè in disuso;
E gh'è de mona larga tanto sguazzo
Che un albero de nave ghe và suso,
Ne senza stà virtù preliminar
Ghe xè vera virtù filomonar.
- ↑ [p. 106]Tutti gli Accademici portavano al petto l'onorata divisa.
- ↑ [p. 106]S'allude a chi per satirizzare la troppo libera versione di Cesarotti dipinse Omero vestito alla Francese.
- ↑ [p. 106]Espressione vernacola per indicare l'Essere Supremo.
- ↑ [p. 106]S'allude a due celebri Sonetti del Baffo.
- ↑ [p. 106]Il suo famoso funerale del cazzo.