El sistema de Copernico
|
Edission original: |
Giuseppe Coletti, Poesie postume in vernacolo veneziano, Venezia, Gattinoni, 1889 |
|
Fonte: |
Indice:Coletti - Poesie postume in vernacolo veneziano, Venezia, Gattinoni, 1889.pdf |
| ← El Pesse frito | Edission e fonte ▼ | La Campanela → |
.jpg)
Un certo sior Matio da le Palae,
Che viveva nel secolo passà,
Quantunque senza quarti, e tondo assae,
El gera un omo molto cortegià;
E se el perchè no ve paresse schieto,
El gera rico: eco spiegà el secreto.
Sto signor, che gaveva mo anca el grilo
De creder tuto un pan bezi e talenti,
Un dì dopo disnar faceva el chilo
Sul sofà smozegando un curadenti
In boca, e l'ascoltava a chiacolar,
Perchè l'aveva buo zente a disnar.
Tra i altri un professor de astronomia,
Un pezzo grosso, un altro Galileo.
Qua che ve fazzo la fotografia:
Do gran relogi, roseton in deo,
Braghe curte, bocheta intabacada,
Paruca, e tagio longo de velada.
El dialogo xe sta de più colori:
I à scomenzà da la Gazeta urbana,
I xe saltai dai aseni ai dotori,
Dai matrimoni a la freve terzana;
I ga parlà de cani e de cantanti,
Ei ga missià nel mazzo i re coi fanti.
Cussì xe fata la conversazion;
El vero abito a scachi de Arlechin,
Coi recami de la mormorazion,
El professor cercava qualche ancin
Per tacar anca lu la so pezeta,
E no star sempre co la boca streta.
E ga bastà sentir a calcolar
Quanta strada ch'el sol fazza ogni dì,
Per dir: ― Signori, le pol stralassar
De far el conto, ghe lo digo mi:
Ele questiona de lana caprina
Perchè el sol veramente no camina.
Do gran sistemi ne l'astronomia
Ga fato i pugni e ga impizzà la guera!
Quelo de Tolomeo, che vol che sia
Mobile el sol, e stabile la tera;
E st'altro de Copernico, che vol
Mobile questa, e invece fermo el sol.
E tra sti do sistemi a pieni voti
Se ritien preferibile el secondo,
Essendo dimostrà che ga do moti
Sta gran burela, che se chiama mondo,
E che i calcoli va per el so verso,
Metendo contro el sol de l'universo. —
Tuti ga storto el muso a sta lizion;
Una feta de scienza a panza piena
Andava a disturbar la digestion.
Ma sior Matio, che se sentiva in vena
De disputar, co un pegio da censor
Ghe dà sta mustazada al professor:
― La tera zira?.. La xe un'eresia,
Una proposizion da vero mato.
Sto Covernico mi no so chi el sia,
Ma vago per le curte, e stago al fato.
Ò sempre visto che la tera è ferma,
E sempre ò sentio dirghe teraferma. —
— Xe vero, salta suso siora Daria
Che la tera se volta? Oh! chi disesse!
Dunque andaremo co le gambe in aria?
Massa bona che porto le braghesse;
Ma me despiaserà co vedarò
I campanili co la ponta in zò.
E sior Matio: ― La tasa, cara ela,
No la cambia e confonda le question.
Domando mi: zela una mortadela
La tera da tacarla picolon
Soto i travi? No savaria in che modo:
Ghe voria la gran gomena e 'l gran chiodo. —
— Ela scherza, sogiunge el professor:
La sa che per reciproca atrazion
(Su la qual no ghe xe gnente da opor),
Ossia per forza de gravitazion
Che tuti i corpi celesti se move,
E se la vol ghe posso dar le prove. ―
— Oh sì! Le prove le gavè in scarsela!
Ve torno a dir che la xe un'eresia:
M'aveu tolto per Marco Paparela?
Dormo, per cussì dir in libreria,
E se vendesse i mii libri a Milani 1,
Se incartaria tabaco per mil'ani.
Co questo vogio dir che go studià;
E gh'è un passo latin, se no savario,
El qual dise... spetè... me l'à spiegà
Cento volte co gera in seminario
La bon'anema de don Geremia
Che gera mestro de fisiologia. ―
― So cossa la vol dir: rispeto el testo,
Ma nol risolve la dificoltà;
L'è una cambial che xe andada in protesto,
Perchè 'l gran Galileo ga dimostrà,
E i più celebri astronomi conferma... ―
― Fiabe, fiabe: la tera la xe ferma.
Xe vero che co tresco col madera,
E se ghe missio el fumo de altri vini,
Me par che fazza biscolo la tera;
E che co vago in gondola ai Giardini,
Le case me fa spesso la burleta
De andar de longo verso la Piazzeta.
Ma queste no xe altro che ilusion.
Parleu del teremoto? L'è spiegada:
La tera gavarà le convulsion,
O la freve, e la dà qualche scorlada:
Ma fermo el sol? oh! questa no la sorbo,
Professor caro, no son minga orbo. ―
― Come! el sol fermo? salta su un poeta;
Febo che core a tiro quattro el cielo,
Fiamante infaticabile stafeta?
Le senta un mio soneto: O Dio di Delo...
― La lo sparagna pur, dixe l'udienza,
El sarà bon per qualche altra ocorenza. –
E un altro: ― Nol pol esser stazionario
El sol, perchè ogni mese el cambia forno.
Lo sa chi va per ogio; eco el lunario:
Sol in toro, in ariete, in capricorno... ―
― Notandum, ga sogiunto el più baron,
Che nol va solo in ste costelazion. ―
Tuti insoma à volesto dotorar,
Secondando el parer de sior Matio.
E infati co un signor dà da disnar,
Per un tacito pato stabilio
Da la creanza o da l'adulazion,
Quei che l'invida ga da dar razon.
El professor gavarave molà,
Ma nol voleva mo tor su sto smaco;
Ceder xe civiltà, ma xe viltà
Co la razon meter le pive in saco.
E no volendo darse per falio
L'à cercà de sorprender sior Matio.
Disendoghe cussì: ― Ela che sa,
Che xe in suma quel omo che la xe,
Sicuramente no la negarà,
E no la pol negar che Giosuè,
Quelo che à sconcertà tutti i relogi,
À fermà el sol... ― A pian; cos'è sti imbrogi? –
― Che imbrogi? cara ela, la xe storia.
― Oè, no cighè, che no son minga sordo:
La storia mi la go tuta a memoria...
Giosuè à fermà el sol; si ve l'acordo. ―
― Co l'acorda ch'el sol xe sta fermà,
El xe fermo da quela volta in qua.
A sior Matio ga imposto l'argomento,
Senza peraltro ceder l'opinion;
E sicome i signori ga el talento
Particolar de aver sempre razon,
Qualunque sia la budela, che i diga,
E de andar dreti senza falsariga,
L'à saltà su: ― Ciacole che no conta!
Vardelo el sol la sera e la matina,
Quando ch'el nasse e quando ch'el tramonta,
Per saver se 'l sta fermo o s'el camina.
La cossa xe patoca, incontrastabile:
E vu lo fè impiegato in pianta stabile! ―
― Benissimo! diseva tuti in coro,
Che spirito! che inzegno! che talento!
E sior Matio, da vero aseno d'oro,
Fava el bochin, sorbiva el complimento;
Senza nasar sto fià de adulazion,
E se credeva un altro Salomon.
El professor xe fin deventà verde;
Ma so dano! el doveva po saver,
Che a contrastar coi stolidi se perde
El fià, e se pesta l'acqua nel morter;
Che el savio no se mete a sto cimento,
E che conta più i bezzi ch'el talento.
E tuti quei che ga sbatuo le man,
E coi so elogi ga incensà el paron,
Ne l'andar via ghe dà del barbagian,
Lo trata da imbecil e da bufon;
E sior Matio xe restà solo, sgionfo
De boria a cocolar el so trionfo.
.jpg)
- Note