— Xe vero, salta suso siora Daria
Che la tera se volta? Oh! chi disesse!
Dunque andaremo co le gambe in aria?
Massa bona che porto le braghesse;
Ma me despiaserà co vedarò
I campanili co la ponta in zò.
E sior Matio: ― La tasa, cara ela,
No la cambia e confonda le question.
Domando mi: zela una mortadela
La tera da tacarla picolon
Soto i travi? No savaria in che modo:
Ghe voria la gran gomena e 'l gran chiodo. —
— Ela scherza, sogiunge el professor:
La sa che per reciproca atrazion
(Su la qual no ghe xe gnente da opor),
Ossia per forza de gravitazion
Che tuti i corpi celesti se move,
E se la vol ghe posso dar le prove. ―
— Oh sì! Le prove le gavè in scarsela!
Ve torno a dir che la xe un'eresia:
M'aveu tolto per Marco Paparela?
Dormo, per cussì dir in libreria,
E se vendesse i mii libri a Milani 1,
Se incartaria tabaco per mil'ani.
