Conta Sant'Agostin quel Dottoron
|
1789
|
|
Edission original: |
Giorgio Baffo, Raccolta universale delle opere di Giorgio Baffo veneto, Tomo IV, Cosmopoli, 1789 |
|
Fonte: |
Indice:Raccolta universale delle opere di Giorgio Baffo 4.djvu |
| ← Se credesse, Signor, che ghe pensessi | Edission e fonte ▼ | Col destin me lagno spesso → |
Conta Sant'Agostin quel Dottoron,
Che l'anema de chi ragiona, e vive,
Xe quel, che'l corpo fodra, e in lu s'iscrive,
E con lù agisce a far la so fonzion;
Ma, che 'l me scusa, el pensa da cogion,
E i Dottori, per Dìo, cussì no scrive,
Che cosa, che materia circoscrive,
De materia hà d'aver la dimension.
Terzetti variati in quattro modi.
1. Altri dise: la è un modo; altri: armonìa,
Altri, numero; in somma trovarè
Tante opinion, quanti l'hà definìa.
Ma sentìme anca mi, e pò giudichè:
Mi digo, no sò cosa, che la sìa,
O al più me par saver quel, che no l'è.
2. Me piase più Aristotile, che hà scrito,
L'anema umana xe una Entelechìa,
Parola, che gnessun più aveva dito.
Gnanca'l Diavol l'hà intesa, onde dirìa,
Che sto nome'l gà dà per dir pulito,
Che nol sà cosa Diavol, che la sìa.
3. E po' de' nomi, e cose i m'hà insegnà,
Che xe definizion; esaminela,
Che'l nome solo xe definìo quà.
Onde, co'l dise: l'anema xe quela,
Colla quale 'l mio corpo xe fodrà;
Mi domando, sta fodra ela sea, o tela?
4. E pò, se v'hò da dir l'opinion mìa,
Quella definizion no me par bona,
Che con descrizioncele vegna vìa.
Per definire el Cazzo a 'na persona
Della Luna anca mi dir poderìa:
L'è un cosso, col qual pisso, e vago in Mona.